 |
ທ່ານນາງ ຈິ້ງທິຖຸຍ ຮອງລັດຖະມົນຕີກະຊວງວັດທະນະທໍາ, ກິລາ ແລະທ່ອງທ່ຽວຫວຽດນາມ ຕ້ອນຮັບທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວລາວ. (ພາບ: baovanhoa.vn)
ທີ່ການຕ້ອນຮັບ, ທ່ານ ບົວເງິນ ຊາພູວົງ ສະແດງຄວາມປິຕິຊົມຊື່ນເມື່ອໄດ້ມາຢ້ຽມຢາມຫວຽດນາມ ແລະເຂົ້າຮ່ວມລາຍການສັບປະດາວັດທະນະທໍາລາວຢູ່ຫວຽດນາມ ປີ 2018. ຕາມທ່ານ ບົວເງິນ ຊາພູວົງ ແລ້ວ, ແຕ່ດົນນານມາແລ້ວ, ລາວ ແລະຫວຽດນາມ ມີຄວາມສາມັກຄີ, ການຮ່ວມມື, ນ້ຳໃຈມິດຕະພາບອັນດີງາມນຳກັນ. ຍ້ອນເຫດນັ້ນ, ສອງຝ່າຍຄວນເພີ່ມທະວີປັບປຸງ ແລະເຮັດໃຫ້ຄົນຮຸ່ນຫຼັງເຂົ້າອົກເຂົ້າໃຈ ແລະພັດທະນາສາຍພົວພັນມິດຕະພາບ, ຄວາມສາມັກຄີ, ຄວາມສະໜິດຕິດພັນລະຫວ່າງລາວ ແລະຫວຽດນາມ ຂຶ້ນສູ່ລະດັບສູງໃໝ່.
ທ່ານນາງ ຈິ້ງທິຖຸຍ ໃຫ້ຮູ້ວ່າ, ໃນຊຸມປີຜ່ານມາ, ສອງກະຊວງຂອງສອງປະເທດໄດ້ມີການເຄື່ອນໄຫວຮ່ວມມື, ໜູນຊ່ວຍຫຼາຍຢ່າງ ເພື່ອຊຸກຍູ້ຂະແໜງວັດທະນະທໍາ, ກິລາ ແລະການທ່ອງທ່ຽວສອງປະເທດໄດ້ຮັບການພັດທະນາ. ບັນດາຫົວໜ່ວຍສັງກັດຢູ່ສອງກະຊວງໄດ້ມີການເຄື່ອນໄຫວພົບປະແລກປ່ຽນ, ຮໍ່າຮຽນວິຊາສະເພາະ, ວິຊາການຂອງກັນ ແລະກັນ. ທ່ານນາງ ຈິ້ງທິຖຸຍ ປາດຖະໜາວ່າໃນໄລຍະຈະມາເຖິງ, ບັນດາການເຄື່ອນໄຫວສົມທົບກັນ, ແລກປ່ຽນ, ຮ່ວມມືມິດຕະພາບລະຫວ່າງສອງຝ່າຍຈະສືບຕໍ່ໄດ້ຮັບການປັບປຸງ ແລະຍົກສູງ. ພ້ອມກັນນັ້ນ, ສອງກະຊວງກໍ່ພິຈາລະນາ, ສ້າງເງື່ອນໄຂເພື່ອເພີ່ມທະວີການເຄື່ອນໄຫວພົບປະແລກປ່ຽນວັດທະນະທໍາ, ກິລາ ແລະການທ່ອງທ່ຽວຂອງປະຊາຊົນບັນດາແຂວງທີ່ມີເສັ້ນຊາຍແດນຮ່ວມ.
（ແຫຼ່ງຂໍ້ມູນ： ບົວພອນ/ກປ.ອອນໄລ）
