 |
ພາບປະກອບ
ເສດຖະກິດຫວຽດນາມ ໄດ້ຮັບການເຕີບໂຕຢ່າງໜ້າປະທັບໃຈໃນປີ 2019, ລື່ນກາຍຄາດໝາຍເຊິ່ງລັດຖະບານໄດ້ວາງອອກ. ຕາມຕົວເລກສະຖິຕິທີ່ໄດ້ປະກາດໃນວັນທີ 27 ທັນວາ ຢ່າງເປັນທາງການວ່າ, ລະດັບເຕີບໂຕຜະລິດຕະພັນພາຍໃນປະເທດ (GDP) ຂອງຫວຽດນາມໃນປີ 2019 ບັນລຸລະດັບ 7,02%; ລະດັບເຕີບໂຕຂອງວົງເງິນການຄ້ານຳເຂົ້າແມ່ນ 8,1%, ວົງເງິນສົ່ງອອກ - ນຳເຂົ້າບັນລຸເກືອບ 571 ຕື້ USD. ການເຕີບໂຕ GDP ຂອງເສດຖະກິດຫວຽດນາມ ຕົ້ນຕໍແມ່ນຍ້ອນການສົ່ງອອກເຄື່ອງຕ່ຳແຜ່ນຕັດຫຍິບ, ເກີບໜັງ ກໍ່ຄືບັນດາຜະລິດຕະພັນເຕັກໂນໂລຊີສູງ.
ປີ 2019 ນີ້, ຍອດການລົງທຶນ ຫວຽດນາມ ຢູ່ຕ່າງປະເທດ ດ້ວຍການຈົດລົງທະບຽນໃໝ່ ແລະ ເພີ່ມຂື້ນ 508,14 ລ້ານໂດລາ ສະຫະລັດ. ໃນນັ້ນ ມີ164 ໂຄງການໄດ້ຮັບໃບຢັ້ງຢືນ ການຈົດລົງທະບຽນ ໃໝ່, ດ້ວຍຍອດມູນຄ່າ ການລົງທຶນ ຈາກຫວຽດນາມ 403,15 ລ້ານໂດລາ ສະຫະລັດ. ຄຽງຄູ່ກັນນັ້ນ ມີ 29 ຄັ້ງ ໄດ້ປັບດັດແກ້ ແຫລ່ງການລົງທືນ ຈາກ ຫວຽດນາມ ເພີ່ມຂື້ນເກືອບ 105 ລ້ານໂດລາ ສະຫະລັດ. ໂດຍສະເພາະ ຂົງເຂດການຂາຍຍ່ອຍຫວຽດນາມ ໄດ້ນຳໜ້າໃນການລົງທຶນ ຢູ່ຕ່າງປະເທດ ດ້ວຍຍອດການລົງທະບຽນໃໝ່ ແລະ ເພີ່ມຂື້ນ 121,6 ລ້ານໂດລາ ສະຫະລັດ, ກວມເອົາ 23,9% ຂອງຍອດການລົງທຶນ, ກະສິກຳ-ປ່າໄມ້ ແລະ ສິນໃນນ້ຳ ຈັດເປັນອັນດັບ 2 ດ້ວຍມູນຄ່າ 86,1 ລ້ານໂດລາ ສະຫະລັດ ແລະ ກວມເອົາ 16,9% ຂອງຍອດການລົງທຶນ... ເມື່ອຕົ້ນປີ 2019, ຫວຽດນາມ ໄດ້ລົງນາມໃນຂໍ້ຕົກລົງການຄ້າກັບສະຫະພາບເອີລົບ (ອີຢູ) ໝັ້ນໝາຍວ່າຈະລົບລ້າງຮົ້ວກີດຂວາງດ້ານພາສີຫຼາຍຢ່າງ ແລະ ສ້າງເງື່ອນໄຂເພື່ອເປີດປະຕູຕະຫຼາດຢ່າງສຸດຂີດໃຫ້ແກ່ກັນ.
（ໄຊພອນ）
