 |
ພາບປະກອບ
ກອງປະຊຸມສະໄໝສາມັນເທື່ອທີ 8,ສະພາແຫ່ງຊາດ ສສ ຫວຽດນາມ ໄດ້ພິຈາລະນາ, ປຶກສາຫາລື ແລະ ຮັບຮອງເອົາບັນດາບົດລາຍງານກ່ຽວກັບໝາກຜົນແຫ່ງການປະຕິບັດ ແລະ ແຜນການພັດທະນາເສດຖະກິດ - ສັງຄົມປີ 2019 ແລະ 2020. ໃນມະຕິກ່ຽວກັບແຜນການພັດທະນາເສດຖະກິດສັງຄົມປີ 2020, ສະພາແຫ່ງຊາດໄດ້ເຫັນດີເປັນເອກະພາບວາງເປົ້າໝາຍບັນລຸຍອດຜະລິດຕະພັນພາຍໃນປະເທດ (GDP) ປະມານ 6,8%. ບັນດາສະມາຊິກສະພາແຫ່ງຊາດໄດ້ໄຈ້ແຍກ, ປຶກສາຫາລືຢ່າງລະອຽດ ແນໃສ່ຍົກອອກບັນດາເປົ້າໝາຍ, ໜ້າທີ່ ແລະ ບັນດາມາດຕະການ ເພື່ອຊຸກຍູ້ການພັດທະນາເສດຖະກິດ - ສັງຄົມຢ່າງວ່ອງໄວ ແລະ ຍືນຍົງ, ສືບຕໍ່ເບິ່ງແຍງຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນ.
ສະພາແຫ່ງຊາດຮັບຮອງເອົາມະຕິໃຫ້ສັດຕະຍາບັນແຜນຮ່າງສັງລວມການພັດທະນາເສດຖະກິດ - ສັງຄົມເຂດປະຊາຊົນບັນດາເຜົ່າສ່ວນໜ້ອຍ ແລະ ເຂດພູດອຍໄລຍະປີ 2021 – 2030. ມະຕິໄດ້ລະບຸນະໂຍບາຍຄົບຊຸດ, ເປັນເອກະພາບ, ແນໃສ່ຊຸກຍູ້ການພັດທະນາຮອບດ້ານ, ຮັດແຄບໄລຍະຫ່າງຄວາມຜິດໂຕ່ນກ່ຽວກັບລະດັບການພັດທະນາ ແລະ ລາຍຮັບ, ປະກອບສ່ວນປະຕິບັດແຜນນະໂຍບາຍ, ແນວທາງຂອງພັກ, ນະໂຍບາຍກົດໝາຍຂອງລັດກ່ຽວກັບວຽກງານຊົນເຜົ່າຢ່າງມີໄຊ. ຈຸດພົ້ນເດັ່ນໃນກອງປະຊຸມສະໄໝສາມັນຂອງສະພາແຫ່ງຊາດຄັ້ງນີ້ ແມ່ນວຽກງານສ້າງກົດໝາຍ ດ້ວຍເລື່ອງສະພາແຫ່ງຊາດໄດ້ຮັບຮອງເອົາຮ່າງກົດໝາຍ, ປະມວນກົດໝາຍ 11 ສະບັບ ເພື່ອເປັນພື້ນຖານໃຫ້ແກ່ວຽກງານຄຸ້ມຄອງ, ບໍລິຫານ, ສ້າງລະບອບລະບຽບການພັດທະນາແບບຍືນຍົງໃຫ້ແກ່ປະເທດຊາດ.
ຫວຽດນາມ ຍາມໃດກໍ່ມານະພະຍາຍາມປະຕິບັດຢ່າງມີຄວາມຮັບຜິດຊອບຕໍ່ການລົງທຶນພັດທະນາແບບຍືນຍົງຢູ່ທັງ 3 ເສົາຄ້ຳຄື: ການພັດທະນາເສດຖະກິດ - ສັງຄົມສະເໝີພາບ, ຄວາມຍຸຕິທຳ ແລະ ການຮັບປະກັນສະພາບແວດລ້ອມ. ໃນນັ້ນຖືເປັນສຳຄັນບົດບາດຕັດສິນ, ການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນທຸກຂັ້ນ, ຮ່ວມເດີນທາງພ້ອມກັບລັດຖະບານ ປະຕິບັດບັນດາເປົ້າໝາຍພັດທະນາແບບຍືນຍົງ, ຮັບປະກັນຫຼັກການມີຄວາມຍຸຕິທຳ - ສາມັກຄີ - ການໜູນຊ່ວຍເຊິ່ງກັນແລະກັນ ພ້ອມກັນພັດທະນາໃນປະຊາຄົມບັນດາເຜົ່າສ່ວນໜ້ອຍ.
ປີ 2020 ແມ່ນປີສຸດທ້າຍໃນການປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກ. ຍຸດທະສາດ ພັດທະນາເສດຖະກິດສັງຄົມໄລຍະ 2011-2020 ແລະ ແຜນພັດທະນາເສດຖະກິດສັງຄົມ 5 ປີ 2016-2020, ພ້ອມທັງຈະກໍ່ສ້າງ ແຜນພັດທະນາເສດຖະກິດສັງຄົມໄລຍະ 5 ປີຕໍ່ໄປ. ນີ້ກໍແມ່ນປີທີ່ມີຫຼາຍເຫດການການເມືອງ, ການທູດທີ່ສຳຄັນ ແລະ ກໍແມ່ນປີທີ່ຫວຽດນາມແບກຫາບພາລະບົດບາດເປັນປະທານອາຊຽນ ແລະ ເປັນກຳມະການບໍ່ປະຈຳການສະພາຄວາມໝັ້ນຄົງ ສ.ປ.ຊ, ປະທານ ໄອປາ ຄັ້ງທີ 41… ເພາະສະນັ້ນ, ຕ້ອງມີການເຂົ້າຮ່ວມຂອງທັງລະບົບການເມືອງ ແລະ ການຮ່ວມແຮງຮ່ວມໃຈຂອງທົ່ວພັກ, ທົ່ວປວງຊົນ, ທົ່ວກອງທັບ ຈຶ່ງສາມາດຮັບປະກັນຄວາມສຳເລັດບັນດາໜ້າທີ່ວຽກງານ ແລະ ຄວາມຮຽກຮ້ອງຕ້ອງການໃນປີ 2020.
（ໄຊພອນ）
