ຄວາມໂປ່ງໃສກ່ຽວກັບນະໂຍບາຍ ແລະຄວາມສາມາດດ້ານປ້ອງກັນຊາດຂອງຫວຽດນາມ

ທ່ານພົນໂທ ຫງວຽນຈີ໊ວິ້ງ

ທ່ານພົນໂທ ຫງວຽນຈີ໊ວິ້ງ ໃຫ້ຮູ້ວ່າ, ໃນໄລຍະ 10 ປີຜ່ານມາ, ສະພາບການຍຸດທະສາດໄດ້ມີການປ່ຽນແປງ, ພິເສດແມ່ນບັນດາສິ່ງທ້າທາຍກ່ຽວກັບການປ້ອງກັນຊາດຕໍ່ກັບຫວຽດນາມ. ພ້ອມກັນນັ້ນແມ່ນບັນດາບາດກ້າວພັດທະນາກ່ຽວກັບສິລະປະຍຸດທະວິທີ, ແນວທາງໃນການສ້າງສາ ແລະປົກປັກຮັກສາປະເທດຊາດ, ກໍ່ສ້າງກອງທັບໃຫ້ສອດຄ່ອງກັບຄວາມຮຽກຮ້ອງຕ້ອງການໃໝ່ ແລະລະດັບຫັນເປັນທັນສະໄໝຂອງໂລກ, ພາກພ້ືນກໍ່ຄືຂອງຫວຽດນາມ. ນີ້ແມ່ນສອງຈຸດໃໝ່ຂອງປຶ້ມປົກຂາວການປ້ອງກັນຊາດຫວຽດນາມ 2019 ເມື່ອທຽບໃສ່ກັບປຶ້ມປົກຂາວການປ້ອງກັນຊາດຫວຽດນາມ 2009. ການປະກາດປຶ້ມປົກຂາວການປ້ອງກັນຊາດຫວຽດນາມ 2019 ເພື່ອແນໃສ່ສອງເປົ້າໝາຍຫຼັກ. ທີໜຶ່ງແມ່ນສ້າງຄວາມໂປ່ງໃສກ່ຽວກັບນະໂຍບາຍກໍ່ຄືຄວາມສາມາດການປ້ອງກັນຊາດຂອງຫວຽດນາມ ເພື່ອເພີ່ມທະວີຄວາມເຂົ້າໃຈ, ສ້າງຄວາມໄວ້ເນື້ອເຊື່ອໃຈລະຫວ່າງກອງທັບ ແລະປະຊາຊົນຫວຽດນາມ ຕໍ່ກັບກອງທັບ ແລະປະຊາຊົນບັນດາປະເທດໃນໂລກ, ສ້າງເງື່ອນໄຂຍົກສູງປະສິດທິຜົນການຮ່ວມມື, ການເຊື່ອມໂຍງເຂົ້າກັບສາກົນດ້ານປ້ອງກັນຊາດລະຫວ່າງຫວຽດນາມ ກັບບັນດາປະເທດ, ບັນດາອົງການຈັດຕັ້ງພາກພື້ນ ແລະສາກົນ, ແກ້ໄຂບັນດາບັນຫາຄວາມໝັ້ນຄົງພວມປະກົດຂຶ້ນ, ເພື່ອສັນຕິພາບ, ສະຖຽນລະພາບ ແລະການຮ່ວມມືພັດທະນາ. ປຶ້ມປົກຂາວການປ້ອງກັນຊາດຫວຽດນາມ 2019 ສືບຕໍ່ສະແດງໃຫ້ເຫັນທັດສະນະ, ການຕີລາຄາ ແລະຄາດຄະເນກ່ຽວກັບສະພາບການໃນໂລກ, ພາກພື້ນ ແລະພາຍໃນປະເທດກ່ຽວຂ້ອງເຖິງບັນດາສິ່ງທ້າທາຍການປ້ອງກັນຊາດຂອງຫວຽດນາມ; ເປັນການຢັ້ງຢືນເປົ້າໝາຍຍຸດທະສາດຂອງການປົກປັກຮັກສາປະເທດຊາດແມ່ນປົກປັກຮັກສາເອກະລາດ, ອະທິປະໄຕ, ເອກະພາບ, ຜືນແຜ່ນດິນອັນຄົບຖ້ວນຂອງປະເທດຊາດໄວ້ໃຫ້ໝັ້ນຄົງເຂັ້ມແຂງ; ປົກປ້ອງພັກ, ລັດ ແລະປະຊາຊົນ; ປົກປັກຮັກສາກິດຈະການປ່ຽນແປງໃໝ່, ຫັນປະເທດຊາດເປັນປະເທດອຸດສາຫະກຳ ແລະທັນສະໄໝ; ປົກປ້ອງຜົນປະໂຫຍດແຫ່ງຊາດ-ຊົນຊາດ, ປົກປັກຮັກສາຄວາມໝັ້ນຄົງດ້ານການເມືອງ ແລະສະພາບແວດລ້ອມສັນຕິພາບເພື່ອສ້າງສາ ແລະພັດທະນາປະເທດຕາມທິດສັງຄົມນິຍົມ; ສືບຕໍ່ຢັ້ງຢືນບົດບາດການນຳພາຂອງພັກກອມມູນິດຫວຽດນາມ ຕໍ່ກັບພາລະກິດການປ້ອງກັນຊາດ ແລະກອງທັບປະຊາຊົນຫວຽດນາມ.ນະໂຍບາຍການປ້ອງກັນຊາດຫວຽດນາມ ມີສອງດ້ານແມ່ນການຮ່ວມມືດ້ານປ້ອງກັນຊາດ ແລະຕໍ່ສູ້ດ້ານປ້ອງກັນຊາດ. ປັດໄຈຮ່ວມມືໄດ້ຖືເປັນສຳຄັນ. ເມື່ອການຮ່ວມມືດ້ານປ້ອງກັນຊາດກັບບັນດາປະເທດ ແລະບັນດາອົງການຈັດຕັ້ງ, ຫວຽດນາມ ທັງປົກປັກຮັກສາປະເທດຊາດທັງເປັນເຈົ້າການ, ຕັ້ງໜ້າເຂົ້າຮ່ວມປົກປ້ອງສັນຕິພາບ, ສະຖຽນລະພາບ ແລະຄວາມໝັ້ນຄົງຂອງພາກພື້ນ ແລະໂລກ.

（ໄຊພອນ）