ກອງທັບປະຊາຊົນຫວຽດນາມ ເຂົ້າຮ່ວມບັນດາກົນໄກ, ເວທີປາໄສຫຼາຍຝ່າຍຢ່າງຕັ້ງໜ້າ

ເພີ່ມທະວີການເຈລະຈາຜ່ານກອງປະຊຸມ, ເວທີປາໄສຕ່າງໆ

ໃນກວ່າ 30 ປີແຫ່ງການປ່ຽນແປງໃໝ່ຂອງປະເທດ, ພ້ອມກັບບັນດາການເຄື່ອນໄຫວພົວພັນຕ່າງປະເທດຂອງພັກ, ການທູດຂອງລັດ, ການທູດປະຊາຊົນ, ການເຄື່ອນໄຫວພົວພັນຕ່າງປະເທດດ້ານປ້ອງກັນຊາດນັບມື້ນັບໄດ້ຮັບການຍູ້ແຮງຕາມທິດພັດທະນາຢ່າງເລິກເຊິ່ງກວ້າງຂວາງທັງຂອບເຂດ ແລະລະດັບການຮ່ວມມືກັບບັນດາປະເທດ, ອົງການຈັດຕັ້ງຕ່າງໆປະກອບສ່ວນນຳການປ້ອງກັນຊາດຫວຽດນາມ ເຊື່ອມໂຍງກັບໂລກ.

ກຳລັງຮັກສາສັນຕິພາບກອງທັບປະຊາຊົນຫວຽດນາມ ຢູ່ ຊູດັງໃຕ້. (ພາບ: ສຳນັກຂ່າວສານຫວຽດນາມ)

ຄຽງຂ້າງການຊຸກຍູ້ການພົວພັນດ້ານປ້ອງກັນຊາດສອງຝ່າຍກັບບັນດາປະເທດບ້ານໃກ້ເຮືອນຄຽງ, ເພື່ອນມິດທີ່ເປັນມູນເຊື້ອ, ບັນດາປະເທດຄູ່ຮ່ວມມື, ຫວຽດນາມ ຍັງຄົງເຂົ້າຮ່ວມບັນດາເວທີປາໄສຫຼາຍຝ່າຍຢ່າງຕັ້ງໜ້າ, ປະກອບສ່ວນສ້າງຖານະທີ່ຕັ້ງ, ບົດບາດສູງກວ່າໃຫ້ປະເທດຊາດ, ສະແດງຄວາມຮັບຜິດຊອບຕໍ່ກັບຄວາມໝັ້ນຄົງ, ສັນຕິພາບ, ສະຖຽນລະພາບຂອງໂລກ. ໃນຊຸມປີຜ່ານມາ, ຫວຽດນາມ ໄດ້ຜັນຂະຫຍາຍວຽກງານການທູດ, ການຮ່ວມມືດ້ານປ້ອງກັນຊາດຫຼາຍຝ່າຍຢ່າງຮອບດ້ານ, ມີຈຸດສຸມ, ບັນລຸໄດ້ບັນດາຜົນງານສຳຄັນ, ມີເນື້ອໃນມີລັກສະນະບຸກທະລຸ. ໃນນັ້ນໝາກຜົນພົ້ນເດັ່ນແມ່ນຫວຽດນາມ ໄດ້ເປັນເຈົ້າການໃນການປະກອບສ່ວນ ແລະເຂົ້າຮ່ວມບັນດາກົນໄກພາກພື້ນ, ພົ້ນເດັ່ນ, ຄື: ກອງປະຊຸມລັດຖະມົນຕີປ້ອງກັນປະເທດບັນດາປະເທດອາຊຽນ (ADMM), ກອງປະຊຸມລັດຖະມົນຕີປ້ອງກັນປະເທດບັນດາປະເທດອາຊຽນ ເປີດກວ້າງ (ADMM+); ເຂົ້າຮ່ວມເວທີປາໄສຄວາມໝ້ັນຄົງພາກພື້ນອາຊຽນ (ARF), ການເຈລະຈາ Shangri-La... ຢ່າງຕັ້ງໜ້າ.

ນັບແຕ່ມື້ສ້າງຕັ້ງເວທີປາໄສຮ່ວມມືດ້ານປ້ອງກັນຊາດຫຼາຍຝ່າຍ, ສ້າງຕັ້ງກອງປະຊຸມ ADMM ຄັ້ງທໍາອິດ (ປີ 2006) ຢູ່ ມາເລເຊຍ, ຫວຽດນາມ ໄດ້ເຂົ້າຮ່ວມກອງປະຊຸມນີ້ຢ່າງຕັ້ງໜ້າ ແລະເປັນເຈົ້າການ. ຕໍ່ຈາກນັ້ນ, ດ້ວຍບົດບາດແມ່ນປະທານອາຊຽນ 2010, ຫວຽດນາມ ໄດ້ເປັນເຈົ້າພາບຈັດຕັ້ງກອງປະຊຸມການທະຫານ, ການປ້ອງກັນຊາດທີ່ມີຄວາມສຳຄັນຂອງພາກພື້ນຈໍານວນ 17 ຄັ້ງສຳເລັດຜົນ; ເປັນເຈົ້າການປຶກສາຫາລື, ສະເໜີຂໍ້ລິເລີ່ມຫຼາຍຢ່າງເໝາະສົມກັບກຳນົດທິດບຸລິມະສິດແກ່ການສ້າງຕັ້ງປະຊາຄົມການເມືອງ-ຄວາມໝັ້ນຄົງອາຊຽນ. ພິເສດ, ດ້ວຍເລື່ອງຍົກອອກແນວຄວາມຄິດ ແລະຈັດຕັ້ງກອງປະຊຸມ ADMM+ ຄັ້ງທີ 1 ຢູ່ ຫວຽດນາມ ສໍາເລັດຜົນໄດ້ສ້າງການບຸກທະລຸ ແລະກາຍເປັນປະຖົມປັດໄຈສຳຄັນໃຫ້ກົນໄກຮ່ວມມືດ້ານປ້ອງກັນຊາດລະຫວ່າງອາຊຽນ ກັບບັນດາປະເທດຄູ່ຮ່ວມມື.

ໃນຂອບເຂດກົນໄກຮ່ວມມື ADMM+, ຫວຽດນາມ ເປັນເຈົ້າການເຂົ້າຮ່ວມການປຶກສາຫາລື, ທາບທາມຄວາມເຫັນ ແລະມີບັນດາການປະກອບສ່ວນຢ່າງຕັ້ງໜ້າເຂົ້າໃນການແກ້ໄຂບັນດາບັນຫາຮ້ອນເຮ່ັງຢູ່ພາກພື້ນ, ເພື່ອແນໃສ່ຊຸກຍູ້ວິວັດການຮ່ວມມືດ້ານປ້ອງກັນຊາດຫຼາຍຝ່າຍ, ຄື: ກອງປະຊຸມເຈົ້າໜ້າທີ່ອາວຸໂສປ້ອງກັນຊາດຂັ້ນສູງອາຊຽນເປີດກວ້າງ (ADSOM), ກອງປະຊຸມກຸ່ມເຮັດວຽກ ADSOM+ (ADSOM+WG), ກອງປະຊຸມກຸ່ມບັນດານັກຊ່ຽວຊານ (EWG)…

ບໍ່ພຽງແຕ່ຢູ່ພາກພື້ນອາຊຽນ ເທົ່ານັ້ນ, ຫວຽດນາມ ຍັງເປັນເຈົ້າການເຂົ້າຮ່ວມກອງປະຊຸມປ້ອງກັນຄວາມສະຫງົບ, ປ້ອງກັນຊາດຕ່າງໆຢູ່ບັນດາປະເທດໃນໂລກອີກດ້ວຍ, ຄື: ເວທີປາໄສແຊງຊາງ ໂດຍ ຈີນ ຈັດຕັ້ງຢູູ່ນະຄອນຫຼວງປັກກິ່ງ, ກອງປະຊຸມຄວາມໝັ້ນຄົງສາກົນມົດສະກູ ໂດຍສະຫະພັນລັດເຊຍ ຈັດຕັ້ງ, ກອງປະຊຸມຜູ້ບັນຊາການທະຫານສະຫະພາບເອີລົບ (ອີຢູ) ໄດ້ດຳເນີນຢູ່ Brussels, ປະເທດແບນຊິກ... ທີ່ກອງປະຊຸມຕ່າງໆ, ຫວຽດນາມ ໄດ້ເຂົ້າຮ່ວມ ແລະເປັນເຈົ້າການປະກອບຫຼາຍເນື້ອໃນ, ຂໍ້ລິເລີ່ມສຳຄັນເຂົ້າໃນການສ້າງຕັ້ງ, ຮັກສາ ແລະຍົກສູງປະສິດທິຜົນການເຄື່ອນໄຫວຮ່ວມມືດ້ານປ້ອງກັນຊາດຫຼາຍຝ່າຍຢູ່ພາກພື້ນ ແລະໃນໂລກ. ຫວຽດນາມ ໄດ້ຮັບການຮັບຮູ້ຈາກປະເທດຕ່າງໆວ່າແມ່ນປະເທດທີ່ມີບັນດາຄຳໝັ້ນສັນຍາດ້ານການເມືອງຢ່າງຈະແຈ້ງ ແລະມີບາດກ້າວເດີນລະອຽດໃນການເຂົ້າຮ່ວມການເຄື່ອນໄຫວຮັກສາສັນຕິພາບ, ກໍຄືມີການປະກອບສ່ວນເຂົ້າໃນການຮັກສາຄວາມໝັ້ນຄົງ, ຊຸກຍູ້ສັນຕິພາບ, ຄວາມໝັ້ນຄົງໃນທົ່ວໂລກ.

ສະແດງໃຫ້ເຫັນຈິດໃຈພ້ອມແລ້ວທີ່ຈະຮ່ວມມືດ້ວຍການກະທຳຕົວຈິງ

ບໍ່ພຽງແຕ່ເພີ່ມທະວີການເຈລະຈາເທົ່ານັ້ນ, ຫວຽດນາມ ຍັງເປັນເຈົ້າການເຂົ້າຮ່ວມບັນດາຂົງເຂດທີ່ມີທ່າແຮງດ້ານກຳລັງ ແລະພາຫະນະ, ແກ້ໄຂຄວາມຫຍຸ້ງຍາກ, ສິ່ງທ້າທາຍຕ່່າງໆທີ່ກ່ຽວຂ້ອງໂດຍກົງເຖິງການປ້ອງກັນຊາດ, ປ້ອງກັນຄວາມສະຫງົບຂອງປະເທດຊາດ, ພາກພື້ນອີກດ້ວຍ. ພົ້ນເດັ່ນແມ່ນສະເໜີຂໍ້ລິເລີ່ມສ້າງຕັ້ງກຸ່ມນັກຊ່ຽວຊານທີ 6 ກ່ຽວກັບ “ການເກັບກູ້ ແລະທຳລາຍລະເບີດບໍ່ທັນແຕກເພື່ອມະນຸດສະທຳ” ແລະພ້ອມກັບ ອິນເດຍ ເປັນປະທານຮ່ວມໃນຂົງເຂດນີ້; ພ້ອມກັບ ຈີນ ເປັນປະທານຮ່ວມກຸ່ມນັກຊ່ຽວຊານ “ຊ່ວຍເຫຼືອມະນຸດສະທຳ ແລະກູ້ຊ່ວຍໄພພິບັດ (HADR)”….

ພິເສດ, ກອງທັບຫວຽດນາມ ໄດ້ເຂົ້າຮ່ວມບັນດາການຝຶກຊ້ອມທະຫານເຮືອຫຼາຍຝ່າຍ KOMODO ໂດຍທະຫານເຮືອ ອິນໂດເນເຊຍ ຈັດຕັ້ງສອງປີເທື່ອໜຶ່ງ, ເລີ່ມແຕ່ປີ 2014 ຢ່າງຄົບຖ້ວນ. ການຝຶກຊ້ອມນີ້ໄດ້ຈັດຕັ້ງຕາມຂໍ້ລິເລີ່ມທີ່ໄດ້ຮັບຄວາມເຫັນດີເປັນເອກະພາບລະຫວ່າງອາຊຽນ ແລະບັນດາປະເທດຄູ່ຮ່ວມມືໃນຂອບເຂດກົນໄກຮ່ວມມືກອງປະຊຸມ ADMM+, ກອງປະຊຸມຜູ້ບັນຊາການທະຫານເຮືອອາຊຽນ (ACNM) ແລະ ARF ດ້ວຍຈຸດປະສົງແມ່ນເພີ່ມທະວີນ້ຳໃຈມິດຕະພາບ, ສ້າງຄວາມໄວ້ເນື້ອເຊື່ອໃຈ ແລະຍົກສູງຄວາມສາມາດປະສານສົມທົບລະຫວ່າງທະຫານເຮືອບັນດາປະເທດເຂົ້າຮ່ວມໃນວຽກງານໜູນຊ່ວຍມະນຸດສະທຳ ແລະແກ້ໄຂບັນດາບັນຫາຄວາມໝັ້ນຄົງໃນການເດີນທະເລ. ຜ່ານການຝຶກຊ້ອມຕ່າງໆ, ຫວຽດນາມ ໄດ້ຢັ້ງຢືນບົດບາດ, ຖານະທີ່ຕັ້ງ ແລະມີການປະກອບສ່ວນນັບມື້ຫຼາຍເຂົ້າໃນກົນໄກຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບອາຊຽນ ແລະພາກພື້ນອາຊີ-ປາຊີຟິກ.

ຄຽງຂ້າງນັ້ນ, ຫວຽດນາມ ຍາມໃດກໍ່ສະແດງຈິດໃຈພ້ອມແລ້ວທີ່ຈະຮ່ວມມືດ້ວຍການກະທຳຕົວຈິງ, ຄື: ຈັດສົ່ງບັນດານາຍທະຫານໄປປະຕິບັດໜ້າທີ່ຢູ່ ຊູດັງໃຕ້ ແລະ ສ. ອາຟະລິກາກາງ, ຜັນຂະຫຍາຍໂຮງໝໍກາງສະໜາມຂັ້ນ 2 ເລກ 1, ຂັ້ນ 2 ເລກ 2 ໄປປະຕິບັດໜ້າທີ່ຢູ່ຄະນະປະຕິບັດງານຮັກສາສັນຕິພາບສະຫະປະຊາຊາດຢູ່ ຊູດັງໃຕ້.

ທ່ານ Giorgio Aliberti ເອກອັກຄະລັດຖະທູດ, ຫົວໜ້າຄະນະຜູ້ຕາງໜ້າອີຢູ ປະຈຳຫວຽດນາມ ເນັ້ນໜັກວ່າ ເລື່ອງຫວຽດນາມ ແລະອີຢູ ເຊັນສັນຍາວ່າດ້ວຍການສ້າງຕັ້ງຂອບເຂດການເຂົ້າຮ່ວມຂອງຫວຽດນາມ ໃນບັນດາການເຄື່ອນໄຫວຄວບຄຸມວິກິດການຂອງອີຢູ (ເອີ້ນໂດຍຫຍໍ້ວ່າ ສັນຍາ FPA) ໃນເດືອນ ຕຸລາ ຜ່ານມາ ກໍ່ສ້າງເງື່ອນໄຂເພື່ອໃຫ້ຫວຽດນາມ ຈັດສົ່ງນາຍທະຫານ, ພະນັກງານສັງກັດກຳລັງພົນລະເຮືອນເຂົ້າຮ່ວມບັນດາຄະນະປະຕິບັດງານຂອງອີຢູ. “ການຮ່ວມມືນີ້ຈະຊ່ວຍຫວຽດນາມ ຍົກສູງກຳລັງຄວາມສາມາດ, ກຽມພ້ອມກວ່າອີກໃຫ້ບັນດາການເຄື່ອນໄຫວຄ້າຍຄືກັນຂອງຕົນ, ໂດຍສະເພາະແມ່ນເມື່ອເຂົ້າຮ່ວມກຳລັງຮັກສາສັນຕິພາບສະຫະປະຊາຊາດ”.

（ແຫຼ່ງ​ຂໍ້​ມູນ​： la.qdnd.vn）