 |
ທ່ານນາງປະທານສະພາແຫ່ງຊາດ ຫວຽດນາມ ຫງວຽນທິກິມເງິນ. (ພາບ: daibieunhandan.vn)
ໂດຍອວຍພອນ ແລະ ຍ້ອງຍໍຊົມເຊີຍບັນດາຜົນງານເຊິ່ງອາຈານ, ນັກສຶກສາ, ສຳມະນາກອນຂອງ ໂຮງຮຽນຫຼາຍລຸ້ນຄົນບັນລຸໄດ້ໃນຊຸມປີທີ່ຜ່ານມາ, ທ່ານນາງປະທານສະພາແຫ່ງຊາດ ຢັ້ງຢືນວ່າ: ໃນສະພາບການກໍ່ສ້າງພື້ນຖານເສດຖະກິດພູມປັນຍາ ແລະ ການປະຕິວັດອຸດສາຫະກຳຄັ້ງທີ 4 ໃນປັດຈຸບັນ, ບັນດາ ມະຫາວິທະຍາໄລຢູ່ ຫວຽດນາມໃນນັ້ນມີ ມະຫາວິທະຍາໄລ ເສດຖະກິດ ແຫ່ງຊາດ ມີບົດບາດສຳຄັນທີ່ສຸດໃນການບຳລຸງສ້າງແຫຼ່ງຊັບພະຍາກອນມະນຸດທີ່ມີຄຸນນະພາບສູງ. ເນື່ອງໃນໂອກາດນີ້ິ້, ໂດຍໄດ້ຮັບການມອບສິດຈາກທ່ານປະທານປະເທດ, ທ່ານ ຟຸ່ງຊວັນຍະ ລັດຖະມົນຕີກະຊວງສຶກສາ ແລະ ບຳລຸງສ້າງ ຫວຽດນາມ ໄດ້ມອບຫຼຽນໄຊແຮງງານຊັ້ນ 3 ໃຫ້ແກ່ກຳມະບານມະຫາວິທະຍາໄລເສດຖະກິດແຫ່ງຊາດ.
ຕອນຄ່ຳວັນທີ 17 ພະຈິກ, ຢູ່ຮ່າໂນ້ຍ, ກຳມະບານຂະແໜງສຶກສາຫວຽດນາມ ໄດ້ສົມທົບກັບກະຊວງສຶກສາ ແລະ ບຳລຸງສ້າງຫວຽດນາມ, ໂທລະພາບຫວຽດນາມ ຈັດລາຍການ “ສະແດງຄວາມຮູ້ບຸນຄຸນ” ປີ 2019 ດ້ວຍຫົວຂ້ໍວ່າ “ຄວາມມິດງຽບ” ເພື່ອແນໃສ່ເຊີດຊູ, ສະແດງຄວາມຮູ້ບຸນຄຸນບັນດາຄູອາຈານທີ່ໄດ້ ແລະ ພວມຜ່ານຜ່າຄວາມຫຍຸ້ງຍາກ, ອຸທິດສ່ວນໃຫ້ພາລະກິດສິດສອນ “ສ້າງຄົນ”.
 |
ທ່ານຮອງນາຍົກລັດຖະມົນຕີ ຫວູດຶກດາມ.(ພາບ: giaoduc.net.vn)
ທ່ານຮອງນາຍົກລັດຖະມົນຕີ ຫວູດຶກດາມ ໄດ້ແບ່ງປັນວ່າ: ໃນຊຸມປີຜ່ານມາ, ຂະແໜງສຶກສາ ແລະ ບຳລຸງສ້າງຫວຽດນາມ ບັນລຸໄດ້ຜົນງານທີ່ເປັນໜ້າປະທັບໃຈຫຼາຍຢ່າງ ແລະ ໄດ້ຮັບການຕີລາຄາສູງຈາກປະຊາຄົມສາກົນ. ຄູອາຈານທຸກຄົນລ້ວນແຕ່ມານະພະຍາຍາມເພື່ອເອົາຊະນະຕົນເອງ, ສືບຕໍ່ເສີມຂະຫຍາຍຜົນງານດີເດັ່ນ, ແກ້ໄຂບັນດາສິ່ງຫຍໍ້ທໍ້, ຂໍ້ຈຳກັດທີ່ຍັງຄົງຕົວແມ່ນແນ່ນອນວ່າພາລະກິດແຫ່ງການປ່ຽນແປງໃໝ່ການສຶກສາຈະປະສົບຜົນສຳເລັດ, ຄຸນນະພາບແຫຼ່ງຊັບພະຍາກອນມະນຸດຂອງປະເທດຊາດຈະນັບມື້ນັບໄດ້ຮັບການຍົກສູງຂຶ້ນ.
 |
ທ່ານນາງ ເຈືອງທິມາຍ ຫົວໜ້າຄະນະຂົວຂວາຍປະຊາຊົນສູນກາງ ແລະ ທ່ານ ເລກວກຟອງ ເລຂານຸການເອກສູນກາງຊາວໜຸ່ມມອບໃບຍ້ອງຍໍຂອງສູນກາງຊາວໜຸ່ມກອມມູນິດ ຫວຽດນາມ ໃຫ້ແກ່ບັນດານາຍຄູໜຸ່ມດີເດັ່ນ. (ພາບ: TTXVN)
ຕອນຄ່ຳວັນທີ 18 ພະຈິກ, ຢູ່ຮ່າໂນ້ຍ, ສູນກາງຊາວໜຸ່ມກອມມູນິດໂຮ່ຈີມິນໄດ້ຈັດຕັ້ງພິທີ ຍ້ອງຍໍຊົມເຊີຍ “ນາຍຄູດີເດັ່ນ” ຂັ້ນສູນກາງຄັ້ງທີ I, ປີ 2019. ປີ 2019 ເປັນປີທຳອິດທີ່ສູນກາງຊາວໜຸ່ມຈັດຕັ້ງການຄັດເລືອກ ແລະ ຍ້ອງຍໍຊົມເຊີຍ ບັນດານາຍຄູໜຸ່ມທີ່ດີເດັ່ນ ຂັ້ນສູນກາງ. ໃນຈຳນວນ ນາຍຄູໜຸ່ມທີ່ດີເດັ່ນ 75 ຄົນມີ 9 ຄົນເປັນນາຍຄູໜຸ່ມຊາວຊົນເຜົ່າສ່ວນໜ້ອຍ. ຄຽງຄູ່ກັບບັນດາຜົນງານທີ່ດີເດັ່ນດ້ານວິຊາການ , ນາຍຄູໜຸ່ມແຕ່ລະຄົນກໍ່ລ້ວນແຕ່ມີຄຸນສົມບັດທີ່ດີ ແລະ ອຸທິດສ່ວນໃຫ້ແກ່ພາລະກິດການສຶກສາ, ມີບັນດາຂໍ້ລິເລີ່ມທີ່ພົ້ນເດັ່ນໃນວິວັດການສິດສອນ, ຄົ້ນຄ້ວາວິທະຍາສາດ.
 |
ທ່ານນາຍົກລັດຖະມົນຕີ ຫວຽດນາມ ແລະ ທ່ານນາງປະທານສະພາແຫ່ງຊາດ ມອບຊໍ່ດອກໄມ້ອວຍພອນວັນຄູຫວຽດນາມ.(ພາບ: vovworld.vn)
ວັນທີ 19 ພະຈິກ, ຢູ່ຫໍສະພາແຫ່ງຊາດ, ກຳມາທິການວັດທະນະທຳ, ການສຶກສາ, ຊາວໜຸ່ມ, ເຍົາວະຊົນ ແລະ ອະນຸຊົນ ຂອງ ສະພາແຫ່ງຊາດ ໄດ້ຈັດຕັ້ງການພົບປະລະຫວ່າງ ສະມາຊິກສະພາແຫ່ງຊາດທີ່ເປັນ ນາຍຄູ, ອະດີດຄູ, ພະນັກງານຄຸ້ມຄອງ ການສຶກສາ ໂດຍມີການເຂົ້າຮ່ວມຂອງທ່ານນາຍົກລັດຖະມົນຕີ ຫງວຽນຊວັນຟຸກ ແລະ ທ່ານນາງປະທານສະພາແຫ່ງຊາດ ຫງວຽນທິກິມເງິນ. ກ່າວຄຳເຫັນທີ່ການພົບປະ, ທ່ານນາງປະທານສະພາແຫ່ງຊາດ ຫງວຽນທິກິມເງິນ ໄດ້ສະແດງຄວາມຮູ້ບຸນຄຸນອັນເລິກເຊິ່ງສຳລັບຄູ່, ອາຈານ, ພະນັກງານຄຸ້ມຄອງ, ຜູ້ອອກແຮງງານໃນຂົງເຂດການສຶກສາ - ບຳລຸງສ້າງຫຼາຍລຸ້ນຄົນ, ອວຍພອນບັນດານາຍຄູຈົ່ງມີສຸຂະພາບທີ່ເຂັ້ມແຂງ, ມີຄວາມຜາສຸກ ແລະ ບັນລຸໄດ້ຜົນງານຫຼາຍຢ່າງໃນພາລະກິດສິດສອນນັກຮຽນຂອງຕົນ.
（ໄຊພອນ）
