ທ່ານ ນາຍົກລັດຖະມົນຕີ ຫງວຽນ ຊວນ ຟູກ ກວດກາວຽກງານການກຽມພ້ອມຈັດກອງປະຊຸມສຸດຍອດຄັ້ງທີ 2 ລະຫວ່າງສະຫະລັດອາເມລິກາ - ສປປ ເກົາຫລີ.
ປະກອບສ່ວນຢ່າງຕັ້ງໜ້າ, ມີຄວາມຮັບຜິດຊອບຕໍ່ບັນດາບັນຫາສາກົນ
ຫວຽດນາມມີປະສົບການຫຼາຍຢ່າງໃນການຈັດຕັ້ງກິດຈະກໍາກ່ຽວກັບການຕ່າງປະເທດທີ່ສໍາຄັນຈໍານວນຫຼາຍ, ຫວຽດນາມໄດ້ປະສົບຄວາມສໍາເລັດໃນການທີ່ເປັນເຈົ້າພາບຂອງບັນດາກອງປະຊຸມສໍາຄັນໃນພາກພື້ນ ແລະ ສາກົນເຊັ່ນ: ເວທີການຮ່ວມມືເສດຖະກິດອາຊີປາຊີຟິກ (APEC) ປີ 2017 ທີ່ດ່າໜັງ; ເວທີເສດຖະກິດໂລກກ່ຽວກັບອາຊຽນ (WEF ASEAN 2018) ທີ່ຮ່າໂນ້ຍ, ທີ່ໄດ້ສັງເກດແມ່ນເຫດການລະດັບພາກພື້ນທີ່ປະສົບຄວາມສໍາເລັດທີ່ສຸດຂອງເວທີປຶກສາຫາລືຕະຫຼອດໃນ 27 ປີ ຜ່ານມາ ກ່ຽວກັບເນື້ອໃນ, ຂະຫນາດ ແລະ ວຽກງານການຈັດຕັ້ງ. ການເລືອກປະເທດຫວຽດນາມເພື່ອເປັນເຈົ້າພາບຈັດກອງປະຊຸມສຸດຍອດຄັ້ງທີ 2 ລະຫວ່າງ ສະຫະລັດອາເມລິກາ - ສປປ ເກົາຫລີ ຈະສືບຕໍ່ຢືນຢັນຕໍາແຫນ່ງຂອງຫວຽດນາມນັບມື້ນັບສູງຂຶ້ນ, ພ້ອມກັນນັ້ນກໍ່ສະແດງໃຫ້ເຫັນເຖິງບົດບາດ ແລະ ຄວາມຮັບຜິດຊອບຂອງຫວຽດນາມສໍາລັບບັນດາບັນຫາສາກົນ.
ອາດຈະເວົ້າໄດ້ວ່າກອງປະຊຸມສຸດຍອດຄັ້ງທີ 2 ລະຫວ່າງສະຫະລັດອາເມລິກາ - ສປປ ເກົາຫລີທີ່ໄດ້ຈັດຂຶ້ນຢູ່ຫວຽດນາມແມ່ນເຫດການທາງດ້ານການເມືອງ, ການຕ່າງປະເທດທີ່ມີຄວາມໝາຍສໍາຄັນຂອງຫວຽດນາມໃນປີ 2019, ເຊິ່ງສະແດງເຖິງຄວາມມີຊີວິດຊີວາດ້ານໂຍບາຍທີ່ວ່າຫວຽດນາມເປັນເພື່ອນ, ເປັນຄູ່ຮ່ວມງານທີ່ເຊື່ອຖືໄດ້ຂອງວົງຄະນະຍາດສາກົນ...ຜ່ານເຫດການນີ້ກໍ່ໄດ້ປະກອບສ່ວນໃນການໂຄສະນາເຜີຍແຜ່ຮູບພາບປະເທດຊາດ, ຄົນຫວຽດນາມ. ຮ່າໂນ້ຍ - ນະຄອນເພື່ອສັນຕິພາບ, ເປັນສະຖານທີ່ມີຄວາມສະດວກໃນການດຶງດູດການລົງທຶນ, ການຄ້າ, ການທ່ອງທ່ຽວ ແລະ ການແລກປ່ຽນດ້ານວັດທະນະທໍາທີ່ມີຄວາມຫຼາກຫຼາຍ, ມີຄວາມເອກະລັກສະເພາະຂອງຫວຽດນາມ.
ພ້ອມຈະເປັນບ່ອນທີ່ສ້າງສັນຕິພາບ
ກອງປະຊຸມສຸດຍອດຄັ້ງທີ 2 ລະຫວ່າງສະຫະລັດອາເມລິກາ - ສປປ ເກົາຫລີທີ່ຈະໄດ້ຈັດຂຶ້ນຢູ່ຫວຽດນາມໃນເທື່ອນີ້ມີຄວາມໝາຍຫຼາຍຢ່າງ, ໃນສະໄໝສົງຄາມ, ຫວຽດນາມໄດ້ຮັບການສະຫນັບສະຫນູນຈາກຝ່າຍທີສາມໃນການຈັດຕັ້ງການເຈລະຈາສັນຕິພາບຢູ່ Geneva (ສະຫວິດເຊີແລນ), ປາລີ (ຝະລັ່ງ). ໃນປະຈຸບັນ, ຫວຽດນາມກຽມພ້ອມທີ່ຈະເປັນເຈົ້າພາບໃນການຈັດຕັ້ງການເຈລະຈາເພື່ອສ້າງສັນຕິພາບສໍາລັບ ສປປ ເກົາຫຼີ ແລະ ສະຫະລັດອາເມລິກາ, ສໍາລັບພາກພື້ນ ແລະ ໂລກ.
ອັນພິເສດສໍາລັບຮ່າໂນ້ຍ, ກອງປະຊຸມສຸດຍອດຄັ້ງທີສອງ ລະຫວ່າງ ສະຫະລັດອາເມລິກາ - ສປປ ເກົາຫຼີ ໄດ້ຈັດຂຶ້ນໃນໂອກາດຄົບຮອບ 20 ປີຂອງຮ່າໂນ້ຍທີ່ໄດ້ຮັບລາງວັນນາມມະຍົດນະຄອນເພື່ອສັນຕິພາບໂດຍອົງການສຶກສາ, ວິທະຍາສາດແລະ ວັດທະນະທໍາ ສະຫະປະຊາຊາດ ມອບໃຫ້, ຮ່າໂນ້ຍຈະຖືໂອກາດນີ້ເພື່ອໂຄສະນາຮູບພາບຂອງນະຄອນທີ່ຮັກສັນຕິພາບ, ເປັນມິດ, ມີທ່າແຮງບົ່ມຊ້ອນຫຼາຍຢ່າງເພື່ອການຮ່ວມມືການພັດທະນາ.
ນີ້ແມ່ນເຫດການທີ່ສໍາຄັນສໍາລັບພາກພື້ນ ແລະ ໃນໂລກ, ໂດຍບໍ່ເຄີຍໄດ້ຈັດຕັ້ງຢູ່ປະເທດຫວຽດນາມເທື່ອ, ສະແດງໃຫ້ເຫັນວ່າຫວຽດນາມສະຫນັບສະຫນູນຢ່າງແຂງແຮງ, ພ້ອມໃນປະກອບສ່ວນຢ່າງຕັ້ງຫນ້າຕໍ່ຂະບວນການປຶກສາຫາລືເພື່ອຮັກສາສັນຕິພາບ. , ຄວາມສະຫງົບ ແລະ ສະຖຽນລະພາບຢູ່ເຂດແຫຼມເກົາຫຼີ, ກໍ່ຄືໃນພາກພື້ນ ແລະ ໃນໂລກ.
（ໄຊພອນ）
