ເຊື້ອຍາວ ສ້າງສະຖິຕິຄົນຫວຽດນາມທົ່ວໂລກ: ຢືນຢັນບົດບາດ ແລະ ພະລັງຊີວິດຂອງເຊື້ອຍາວ ຫວຽດນາມ

	ຮັດແໜ້ນຄວາມຜູກພັນທາງດ້ານວັດທະນະທຳ ຫວຽດນາມ – ສ.ເກົາຫຼີ ຈາກງານບຸນ "ພວກເຮົາແມ່ນນຳກັນ"
	ເພີ່ມທະວີການພົວພັນແລກປ່ຽນມິດພາບ ຫວຽດນາມ - ອົດສະຕຣີ ຜ່ານການລົງນາມບົດບັນທຶກຄວາມເຂົ້າໃຈຮ່ວມມື

ເມື່ອບໍ່ດົນມານີ້, ນັກອອກແບບ ໂດ໋ຈິ່ງຮວ່າຍນາມ (Đỗ Trịnh Hoài Nam) ໄດ້ເປັນກຽດຮັບສະຖິຕິຄົນຫວຽດນາມທົ່ວໂລກ ໃນຖານະເປັນຜູ້ທຳອິດທີ່ຂຽນ ແລະ ຈັດພິມປຶ້ມກ່ຽວກັບສູດ "ເຊື້ອຍາວແບບຫຼ່ຽມ (ly vuông)".

ໃນຂະນະທີ່ຖືໃບຢັ້ງຢືນສະຖິຕິໂລກດ້ວຍຄວາມດີອົກດີໃຈ ແລະ ຄວາມພາກພູມໃຈ, ນັກອອກແບບ ໂດ໋ຈິ່ງຮວ່າຍນາມ ໄດ້ແບ່ງປັນວ່າ: "ເກືອບ 40 ປີ ທີ່ຂ້ອຍຕັ້ງໃຈຢູ່ກັບໂຕະຕັດຫຍິບ, ຫຼາຍຄືນທີ່ອົດຫຼັບອົດນອນເພື່ອວັດແທກ ແລະ ອອກແບບແຕ່ລະລາຍລະອຽດຢ່າງພິຖີພິຖັນ... ທັງໝົດນັ້ນກໍເພື່ອແລກກັບຄວາມເພິ່ງພໍໃຈ ແລະ ຮອຍຍິ້ມທີ່ສົດໃສຂອງຜູ້ສວມໃສ່. ການສ້າງເຕັກນິກນີ້ໃຫ້ເປັນລະບົບໃນປຶ້ມ ແມ່ນຄວາມປາຖະໜາທີ່ຍິ່ງໃຫຍ່ທີ່ສຸດໃນຊີວິດຂອງຂ້ອຍ, ເພື່ອບໍ່ໃຫ້ເນື້ອແທ້ຂອງອາຊີບນີ້ສູນຫາຍໄປ, ແລະ ເພື່ອໃຫ້ຄົນລຸ້ນຫຼັງມີພື້ນຖານທີ່ໝັ້ນຄົງໃນການກ້າວອອກສູ່ໂລກ."

ຈາກປະສົບການທີ່ບອກເລົ່າຕໍ່ກັນມາຫຼາຍເຊັ່ນຄົນ, ມາຮອດປັດຈຸບັນ ເຕັກນິກການແທກຕັດເຊື້ອຍາວໄດ້ຖືກສະຫຼຸບໃຫ້ກາຍເປັນວິຊາພາກປະຕິບັດຕົວຈິງ ດ້ວຍ 3 ມາດຕະຖານຄຳຄື: ຂີ້ແຮ້ຮາບພຽງ, ຄໍລຽບນຽນ ແລະ ແອວບາງ.

ປຶ້ມ ສູດການຕັດຫຍິບເຊື້ອຍາວແບບຫຼ່ຽມ (ເຊິ່ງໄດ້ຮັບສະຖິຕິໂລກ ແລະ ໃບຢັ້ງຢືນລິຂະສິດຜູ້ສ້າງຜົນງານ) ບໍ່ພຽງແຕ່ແມ່ນປຶ້ມແບບຮຽນມາດຕະຖານ ທີ່ຊ່ວຍໃຫ້ຜູ້ເຮັດອາຊີບນີ້ "ເຮັດໃຫ້ຖືກ, ເຮັດໃຫ້ໄດ້ມາດຕະຖານ" ເພື່ອສ້າງອາຊີບທີ່ຍືນຍົງເທົ່ານັ້ນ, ແຕ່ຍັງແມ່ນຜົນງານການສະສົມທີ່ມີຄຸນຄ່າ, ເປັນຂອງຂວັນທາງວັດທະນະທຳລະດັບສູງ ໃຫ້ແກ່ເພື່ອນມິດສາກົນ ແລະ ຜູ້ທີ່ຮັກຫອມມໍລະດົກຫວຽດນາມ.

ຕົວຕາງໜ້າອົງການສະຖິຕິຄົນຫວຽດນາມທົ່ວໂລກ ພ້ອມດ້ວຍທ່ານ Saadi Salama ມອບໃບຢັ້ງຢືນສະຖິຕິ ແລະ ມອບດອກໄມ້ໃຫ້ແກ່ນັກອອກແບບ ໂດ໋ຈິ່ງຮວ່າຍນາມ (Đỗ Trịnh Hoài Nam).

"ໃບຜ່ານແດນທາງວັດທະນະທຳ" ໃນຍຸກສະໄໝແຫ່ງການເຊື່ອມໂຍງ

ອາດກ່າວໄດ້ວ່າ, ໃນຍຸດທະສາດການທູດວັດທະນະທຳ, ເຊື້ອຍາວ ໄດ້ແບກຫາບພາລະກຳເປັນທູດທີ່ງຽບສະຫງົບ ແຕ່ມີພະລັງແຜ່ກະຈາຍຢ່າງກວ້າງຂວາງມາແຕ່ດົນນານ. ໃນງານສະເຫວີຍເວທີສົນທະນາ "ເຊື້ອຍາວແບບຫຼ່ຽມ - ເອກະລັກຫວຽດນາມ, ຮູບຊົງຮ່ວມສະໄໝ" ທີ່ຫາກໍ່ຈັດຂຶ້ນເມື່ອບໍ່ດົນມານີ້, ທ່ານ Saadi Salama - ເອກອັກຄະລັດຖະທູດ ຜູ້ມີອຳນາດເຕັມ ແຫ່ງລັດ ປາແລັດສະຕິນ, ຫົວໜ້າຄະນະທູຕານຸທູດ ປະຈຳ ຫວຽດນາມ ໄດ້ມີການແບ່ງປັນທີ່ໜ້າປະທັບໃຈຫຼາຍ.

ທ່ານໃຫ້ຮູ້ວ່າ, ບັນດາເອກອັກຄະລັດຖະທູດສາກົນ ລ້ວນແຕ່ຕີລາຄາສູງຕໍ່ບັນດາການອອກແບບເຊື້ອຍາວແບບຫຼ່ຽມ ຍ້ອນການປະສົມປະສານທີ່ສົມບູນແບບລະຫວ່າງລັກສະນະການເຊື່ອມໂຍງ ແລະ ເອກະລັກຂອງຊາດ: "ເຊື້ອຍາວ ຫວຽດນາມ ເປຽບເໝືອນ 'ໃບຜ່ານແດນທາງວັດທະນະທຳ' ຢ່າງແທ້ຈິງ, ທີ່ເດີນທາງໄປທົ່ວໂລກເພື່ອແນະນຳກ່ຽວກັບວັດທະນະທຳ ແລະ ຄົນຫວຽດນາມ ໃຫ້ແກ່ຊາວໂລກໄດ້ຮູ້ຈັກ. ເຊື້ອຍາວໄດ້ນຳເອົາສານແຫ່ງປະຊາຊາດທີ່ພວມຢືນຢັນບົດບາດຂອງຕົນໃນເວທີສາກົນ, ປະກອບສ່ວນເຂົ້າໃນພື້ນຖານວັດທະນະທຳທີ່ຫຼາກຫຼາຍ, ຮຸ່ງເຮືອງສີວິໄລ ແລະ ສັນຕິພາບ."

ເຫັນດີກັບທັດສະນະດັ່ງກ່າວ, ທ່ານນາງ ດັ້ງທິບິກລຽນ (Đặng Thị Bích Liên) - ອະດີດລັດຖະມົນຕີຊ່ວຍວ່າການກະຊວງວັດທະນະທຳ, ກິລາ ແລະ ທ່ອງທ່ຽວ ໄດ້ຢືນຢັນວ່າ: "ເຊື້ອຍາວແບບຫຼ່ຽມ ແມ່ນວິທີໜຶ່ງທີ່ເຮັດໃຫ້ເຊື້ອຍາວສືບຕໍ່ປະກົດຕົວໃນຊີວິດປັດຈຸບັນ ຄືກັບມໍລະດົກທີ່ມີຊີວິດ – ມີຄຸນນະພາບ, ມີຄວາມເລິກເຊິ່ງ ແລະ ໄດ້ຮັບການລ້ຽງດູດ້ວຍຄວາມຮູ້."

ໃນມຸມມອງຂອງການຊ່ວຍເຫຼືອແມ່ຍິງໃນການເລີ່ມຕົ້ນທຸລະກິດ, ທ່ານນາງ ຫງວຽນເຮືອງຢາງ (Nguyễn Hương Giang) – ກຳມະການຄະນະປະທານສູນກາງສະຫະພັນແມ່ຍິງ ຫວຽດນາມ ໄດ້ແບ່ງປັນດ້ວຍຄວາມພາກພູມໃຈວ່າ: "ຈາກບັນດາຄຸນຄ່າທາງວັດທະນະທຳ, ນັກອອກແບບ ໂດ໋ຈິ່ງຮວ່າຍນາມ ໄດ້ປ່ຽນມັນໃຫ້ກາຍເປັນທັກສະອາຊີບ. ມາຮອດປັດຈຸບັນ, ມີແມ່ຍິງກວ່າ 20,000 ຄົນ ໄດ້ຮັບການຝຶກອົບຮົມ, ໃນນັ້ນມີເອື້ອຍນ້ອງກວ່າ 10,000 ຄົນ ທີ່ມີຄວາມໝັ້ນໃຈໃນການເລີ່ມຕົ້ນທຸລະກິດ, ເປີດຮ້ານຕັດຫຍິບ ແລະ ມີລາຍໄດ້ເພີ່ມຂຶ້ນ."

ທ່ານຄູ ຫວູຈີກົງ (Vũ Chí Công) (ອະດີດຮັກສາການອະທິການບໍດີ ມະຫາວິທະຍາໄລວິຈິດສິນອຸດສາຫະກຳ) ໄດ້ຕີລາຄາວ່າ, ປຶ້ມເຫຼັ້ມນີ້ແມ່ນເອກະສານທີ່ລ້ຳຄ່າ: "ນີ້ບໍ່ແມ່ນພຽງແຕ່ປຶ້ມແນະນຳເຕັກນິກທຳມະດາ, ແຕ່ແມ່ນພື້ນຖານເພື່ອໃຫ້ນັກສຶກສາໃນບັນດາມະຫາວິທະຍາໄລ ໄດ້ສ້າງສັນກ່ຽວກັບວິຈິດສິນປະຍຸກ ແລະ ການອອກແບບແຟຊັນ ເພື່ອນຳໄປອ້າງອີງ ແລະ ພັດທະນາ."

ຄະນະຜູ້ແທນທີ່ເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດ ແນວໂຮມປະເທດຊາດ ຫວຽດນາມ ເຂົ້າຮ່ວມວາງພວງມາລາຢ້ຽມຢາມສຸສານປະທານ ໂຮ່ຈີມິນ ຍສໝ - ກ່ອນທີ່ຈະເລີ່ມວາລະກຽມຂອງກອງປະຊຸມໃຫຍ່ຜູ້ແທນທົ່ວປະເທດ ແນວໂຮມປະເທດຊາດ ຫວຽດນາມ ຄັ້ງທີ XI, ອາຍຸການ 2026-2031, ໃນຕອນເຊົ້າວັນທີ 11 ພຶດສະພາ, ຄະນະຜູ້ແທນທີ່ເຂົ້າຮ່ວມກອງປະຊຸມໃຫຍ່ ໂດຍແມ່ນທ່ານນາງ ບຸຍທິມິງຮວ່າຍ (Bùi Thị Minh Hoài) - ກຳມະການກົມການເມືອງ, ເລຂາທິການສູນກາງພັກ, ເລຂາຄະນະພັກແນວໂຮມປະເທດຊາດ, ບັນດາອົງການຈັດຕັ້ງມະຫາຊົນສູນກາງ, ປະທານຄະນະກຳມະການສູນກາງແນວໂຮມປະເທດຊາດ ...

ກຽມ​ພ້ອມ​ໃຫ້​ແກ່ກອງ​ປະ​ຊຸມ​ໃຫຍ່​ແນວ​ໂຮມ​ປະ​ເທດ​ຊາດ ຫວຽດ​ນາມ ຄັ້ງ​ທີ XI ກອງ​ປະ​ຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ແນວ​ໂຮມ​ປະ​ເທດ​ຊາດ ຫວຽດ​ນາມ ຄັ້ງ​ທີ XI, ໄລ​ຍະ 2026 – 2031 ຈະ​ດຳ​ເນີນ​ແຕ່​ວັນ​ທີ 11 – 13 ພຶດ​ສະ​ພາ ຢູ່​ຮ່າ​ໂນ້ຍ.