ສືບຕໍ່ເສີມສ້າງນໍ້າໃຈມິດຕະພາບແບບພິເສດລະຫວ່າງເຊີນລາກັບບັນດາແຂວງປະເທດເພື່ອນລາວ

	ສືບຕໍ່ຊຸກຍູ້ການພົວພັນປະຊາຊົນ ຫວຽດນາມ - UAE
	ເຊື່ອໝັ້ນວ່າ ສະຫາຍເລຂາທິການໃຫຍ່ ໂຕເລີມ ຈະສືບຕໍ່ນຳພາການພັດທະນາຂອງປະເທດຊາດ ແລະເສີມຂະຫຍາຍຈິດໃຈສາມັກຄີສາກົນ

ວັນທີ 2 ທັນວາ 1975, ເຫດການຖະແຫຼງປະກາດສະຖາປະນາປະເທດ ສປປ ລາວ ກາຍເປັນຂີດໝາຍປະຫວັດສາດປະຕິວັດຂອງຊາດລາວ, ຂີດໝາຍໄຊຊະນະສະຫງ່າລາສີທີ່ຍາດມາໄດ້ດ້ວຍເລືອດເນື້ອ, ສະຕິປັນຍາ, ເຫື່ອແຮງຂອງພະນັກງານ, ນັກຮົບ ແລະປະຊາຊົນຮຸ່ນຕ່າງໆ ໃນການຕໍ່ສູ້ຢ່າງພິລະອາດຫານ ຕ້ານພວກຈັກກະພັດຜູ້ຮຸກຮານພາຍໃຕ້ການນຳພາຂອງພັກປະຊາຊົນລາວ (ຕໍ່ມາໄດ້ປ່ຽນຊື່ວ່າພັກປະຊາຊົນປະຕິວັດ ລາວ).

ພາຍຫຼັງຍາດເອກະລາດມາໄດ້, ຮອດເດືອນກັນຍາ 1945, ພວກລ່າເມືອງຂຶ້ນຝລັ່ງ ໄດ້ກັບຕ່າວຄືນມາຮຸກຮານອິນດູຈີນ ຄັ້ງທີ 2. ພາຍໃຕ້ການນຳພາຂອງພັກກອມມູນິດອິນດູຈີນ, ປະຊາຊົນສອງປະເທດຫວຽດນາມ ແລະລາວ ສືບຕໍ່ປະຕິບັດໜ້າທີ່ປະຕິວັດປົດປ່ອຍຊາດ. ປະຊາຊົນບັນດາເຜົ່າແຂວງເຊີນລາ ພາຍໃຕ້ການຊີ້ນຳຂອງສູນກາງພັກກອມມູນິດຫວຽດນາມ, ເປັນກຽດທີ່ໄດ້ຕ້ອນຮັບ, ລ້ຽງ ແລະປົກປ້ອງສະຫາຍ ໄກສອນ ພົມວິຫານ ແລະຄະນະຕະລຸມບອນພາກເໜືອລາວ ໃນໄລຍະຕັ້ງທັບຢູ່ບໍລິເວນບ້ານລາວໂຄ, ຕາແສງພຽງຄວ່າຍ, ເມືອງອຽນເຈົາ. ຈາກນີ້, ຄະນະຕະລຸມບອນພາກເໜືອລາວ ດຳເນີນການເຄື່ອນໄຫວກໍ່ສ້າງ ຮາກຖານປະຕິວັດ, ສ້າງກຳລັງ, ຖານທີ່ໝັ້ນຢູ່ບໍລິເວນບັນດາແຂວງຫົວພັນ ແລະບັນດາແຂວງພາກເໜືອລາວ, ສ້າງຂີດໝາຍໄລຍະພັດທະນາໃໝ່, ປະກອບສ່ວນສຳຄັນເພື່ອໃຫ້ການປະຕິວັດລາວ ໄດ້ຮັບໄຊຊະນະ.

ເປີດນຳໃຊ້ຄູ່ດ່ານຊາຍແດນສາກົນ ລ໊ອງເຊີບ-ປ່າຮ່າງ. ພາບ: ແທັງຮວ່ຽນ

ຊາວໜຸ່ມແຂວງເຊີນລາ ຫຼາຍພັນຄົນສະໝັກໃຈເຂົ້າເປັນທະຫານ, ປະຈັນບານຄຽງບ່າຄຽງໄຫຼ່ພ້ອມກັບນັກຮົບກອງທັບປະເທດລາວ ແລະປະຊາຊົນລາວບັນດາເຜົ່າສູ້ຮົບຢູ່ສະໜາມຮົບທັງໝົດໃນບັນດາແຂວງພາກເໜືອລາວ ຈົນຮອດວັນໄດ້ຮັບໄຊຊະນະສົມບູນ ໃນປີ 1975.

ວັນທີ 5 ກັນຍາ 1962, ຫວຽດນາມ-ລາວ ສ້າງຕັ້ງການພົວພັນທາງການທູດ; ວັນທີ 18 ກໍລະກົດ 1977, ລັດຖະບານຫວຽດນາມ ແລະລາວ ໄດ້ລົງນາມໃນສົນທິສັນຍາມິດຕະພາບ ແລະການຮ່ວມມື. ພ້ອມກັບບັນດາແຂວງຕິດຈອດກັບປະເທດເພື່ອນລາວ, ແຂວງ ເຊີນລາ ໄດ້ມີການພົວພັນມິດຕະພາບ ແລະເຊັນສັນຍາຮ່ວມມືຮອບດ້ານກັບ 9 ແຂວງປະເທດລາວ, ລວມມີ: ຫົວພັນ, ຫຼວງພະບາງ, ອຸດົມໄຊ, ບໍ່ແກ້ວ, ຫຼວງນ້ຳທາ, ຜົ້ງສາລີ, ຊຽງຂວາງ, ໄຊຍະບູລີ, ໄຊສົມບູນ.

ສະຫາຍ ຫງວຽນວັນຈ໊ຽນ, ຫົວໜ້າພະແນກພົວພັນຕ່າງປະເທດ ໃຫ້ຮູ້ວ່າ ມີເສັ້ນຊາຍແດນຕິດຈອດກັບປະເທດ ສປປ ລາວ, ບໍ່ພຽງແຕ່ໃກ້ຊິດດ້ານພູມສາດ, ແຂວງເຊີນລາ ຍັງມີຫຼາຍຈຸດທີ່ຄ້າຍຄືກັນກັບບັນດາແຂວງຂອງລາວ, ຄື: ເງື່ອນໄຂທຳມະຊາດ, ສັງຄົມ, ນີ້ແມ່ນເງື່ອນໄຂສະດວກເພື່ອໃຫ້ສອງຝ່າຍເພີ່ມທະວີການພົວພັນມິດຕະພາບ, ການຮ່ວມມືຮອບດ້ານ. ໃນຊຸມປີຜ່ານມາ, ແຂວງເຊີນລາ ໄດ້ປະສານສົມທົບກັບບັນດາແຂວງຂອງປະເທດເພື່ອນລາວ ດຳເນີນການໂຄສະນາເຜີຍແຜ່, ສຶກສາໃຫ້ພະນັກງານ, ສະມາຊິກພັກ, ກຳລັງປະກອບອາວຸດ ແລະປະຊາຊົນກ່ຽວກັບມູນເຊື້ອສາມັກຄີມິດຕະພາບພິເສດ, ການຮ່ວມມືຮອບດ້ານຫວຽດນາມ-ລາວ; ເປັນເຈົ້າການຊ່ວຍກັນພັດທະນາເສດຖະກິດ-ສັງຄົມ, ປົກປັກຮັກສາ ແລະສ້າງເສັ້ນຊາຍແດນແຫ່ງສັນຕິພາບ, ມິດຕະພາບ. ທຸກປີ, ແຂວງຈັດຕັ້ງບັນດາຄະນະຜູ້ແທນຂັ້ນສູງໄປຢ້ຽມຢາມ, ເຮັດວຽກກັບບັນດາແຂວງຂອງປະເທດ ເພື່ອນລາວ; ຕ້ອນຮັບບັນດາຄະນະພະນັກງານ, ປະຊາຊົນທີ່ມາຈາກບັນດາແຂວງຂອງປະເທດລາວ ມາຢ້ຽມຢາມ, ເຮັດວຽກ, ແລກປ່ຽນບົດຮຽນໃນບັນດາຂົງເຂດ; ຈັດຕັ້ງພິທີເຊັນຂໍ້ຕົກລົງກັບບັນດາຂະແໜງ, ທ້ອງຖິ່ນ; ຝາກຈົດໝາຍອວຍພອນມາຍັງສະຖານທູດ ແລະ 9 ແຂວງຂອງປະເທດລາວ ເນື່ອງໃນໂອກາດບຸນປີໃໝ່ ແລະວັນຊາດ ສປປ ລາວ.

ການພົວພັນແບບພິເສດລະຫວ່າງເຊີນລາ ແລະບັນດາແຂວງພາກເໜືອລາວ ສ້າງຂີດໝາຍດ້ວຍຫຼາຍລາຍການຮ່ວມມືສຳຄັນ, ຮອບດ້ານໃນທຸກຂົງເຂດ. ພົ້ນເດັ່ນ, ແຂວງເຊີນລາ ໄດ້ຫັກເງິນຈາກງົບປະມານຂອງແຂວງນັບຮ້ອຍຕື້ດົ່ງ ເພື່ອຊ່ວຍບັນດາແຂວງພາກເໜືອລາວ ສ້າງພື້ນຖານໂຄງລ່າງ, ຄື: ສຳນັກງານເຮັດວຽກ; ຫໍວັດທະນະທຳ; ສະຖານີຮັບ-ສົ່ງສັນຍານໂທລະພາບ; ໂຮງຮຽນ, ຫ້ອງຮຽນ, ຮາກຖານສອນວິຊາຊີບ, ຫໍພັກນັກສຶກສາ; ໂຮງໝໍ, ສຸກສາລາ... ບາງໂຄງການຊ່ວຍເຫຼືອລ້າພົ້ນເດັ່ນ, ຄື: ໂຮງຮຽນການເມືອງ - ການບໍລິຫານແຂວງຫຼວງພະບາງ; ສະຖານີຮັບ-ສົ່ງສັນຍານໂທລະພາບແຂວງຫົວພັນ; ໂຮງຮຽນເຄິ່ງກິນນອນຊົນເຜົ່າແຂວງຜົ້ງສາລີ; ໂຮງຮຽນການເມືອງ-ການບໍລິຫານແຂວງອຸດົມໄຊ; ສຳນັກງານເຮັດວຽກຂອງກອງບັນຊາການການທະຫານເມືອງວຽງຄຳ, ແຂວງຫຼວງພະບາງ; ໂຮງຮຽນສອນວິຊາຊີບແຂວງຜົ້ງສາລີ; ຫໍວັດທະນະທຳແຂວງ ໄຊຍະບູລີ...

ໃນຂົງເຂດເສດຖະກິດ, ວຽກງານຄຸ້ມຄອງການເຄື່ອນໄຫວການຄ້າຊາຍແດນລະຫວ່າງແຂວງເຊີນລາ ແລະບັນດາແຂວງຂອງປະເທດລາວ ຍາມໃດກໍ່ປະຕິບັດຖືກຕາມຂໍ້ກຳນົດ. ບັນດານະໂຍບາຍບຸລິມະສິດຕາມສັນຍາການຄ້າຊາຍແດນທີ່ໄດ້ຜັນຂະຫຍາຍຢ່າງກວ້າງຂວາງເຖິງບັນດາວິສາຫະກິດ, ປະຊາຊົນຢູ່ເຂດຊາຍແດນໃນບໍລິເວນ. ແຂວງເຊີນລາ ແລະບັນດາແຂວງພາກເໜືອລາວ ຕິດຕໍ່ພົວພັນ, ກຳແໜ້ນຂໍ້ມູນ, ປະສານສົມທົບກັນຈັດຕັ້ງບັນດາລາຍການຮ່ວມມືພັດທະນາກະສິກຳ, ຊົນນະບົດເປັນປະຈຳ. ພ້ອມນັ້ນ, ແຂວງເຊີນລາ ຍັງສ້າງເງື່ອນໄຂໃຫ້ວິສາຫະກິດກຳແໜ້ນຂໍ້ມູນ, ຜະລິດ ແລະສະໜອງເບ້ຍໄມ້, ສັດລ້ຽງ, ຮ່ວມມືໃນການຜະລິດ ແລະດຳເນີນທຸລະກິດກັບວິສາຫະກິດຂອງບັນດາແຂວງຂອງປະເທດເພື່ອນລາວ.

ທ່ານ ຮ່າຍືເຫວ້, ຫົວໜ້າພະແນກກະສິກຳ ແລະພັດທະນາຊົນນະບົດແບ່ງປັນວ່າ ພະແນກໄດ້ຈັດຕັ້ງບັນດາຄະນະປະຕິບັດງານໄປຢ້ຽມຢາມບັນດາແຂວງຂອງປະເທດເພື່ອນລາວ ເພື່ອແບ່ງປັນບົດຮຽນ, ເຕັກນິກການຜະລິດ; ປະສານສົມທົບກັບພະແນກກະສິກຳ ແລະປ່າໄມ້ບັນດາແຂວງຂອງປະເທດເພື່ອນລາວ ດຳເນີນການສຳຫຼວດດິນຟ້າອາກາດ, ຄຸນນະພາບທີ່ດິນ, ໜູນຊ່ວຍປະຕິບັດຮູບແບບພັດທະນາການປູກຕົ້ນໄມ້ໃຫ້ໝາກ, ລ້ຽງສັດຢ່າງເໝາະສົມ. ແຕ່ປີ 2020 ຈົນຮອດປະຈຸບັນ, ພະແນກກະສິກຳ ແລະພັດທະນາຊົນນະບົດແຂວງເຊີນລາ ໜູນຊ່ວຍເບ້ຍໄມ້ກິນໝາກຈຳນວນ 17.900 ຕົ້ນ ໃຫ້ແກ່ຊາວນາບັນດາແຂວງຫົວພັນ, ຫຼວງພະບາງ, ຫຼວງນ້ຳທາ. ພ້ອມທັງ, ຈັດຕັ້ງກອງປະຊຸມຕີລາຄາວຽກງານສົມທົບກັນປົກປັກຮັກສາ, ພັດທະນາປ່າໄມ້ ແລະສະກັດກັ້ນ, ຕ້ານໄພໄໝ້ປ່າຢູ່ເຂດຊາຍແດນ; ເຊັນບົດບັນທຶກຂໍ້ຕົກລົງຮ່ວມມື.

ໂຮງຮຽນວິທະຍາໄລ ເຊີນລາ ຈັດຕັ້ງບຸນປີໃໝ່ໃຫ້ແກ່ນັກສຶກສາລາວ. ພາບ: ແທັງຮວ່ຽນ

ກ່ຽວກັບຂົງເຂດວັດທະນະທຳ, ການສຶກສາ, ການແພດ, ແຂວງເຊີນລາ ເພີ່ມທະວີການຮັບ, ບຳລຸງສ້າງຊັບພະຍາກອນມະນຸດໃຫ້ແກ່ບັນດາແຂວງຂອງປະເທດລາວ. ແຕ່ປີ 2015 ຈົນຮອດປະຈຸບັນ, ຕ້ອນຮັບນັກສຶກສາລາວ ມາຮໍ່າຮຽນຈໍານວນ 3.000 ຄົນ. ໃນນັ້ນ, ມີນັກສຶກສາຮຽນຈົບ ແລະກັບຄືນປະເທດເຮັດວຽກແລ້ວ ຈຳນວນ 2.000 ຄົນ. ປະຈຸບັນມີນັກສຶກສາລາວ ຈຳນວນ 1.000 ຄົນ ກຳລັງຮ່ຳຮຽນຢູ່ບັນດາໂຮງຮຽນມະຫາວິທະຍາໄລ ໄຕບັ໊ກ, ວິທະຍາໄລເຊີນລາ, ວິທະຍາໄລການແພດເຊີນລາ. ຜ່ານການຕີລາຄາໝາກຜົນການຮ່ວມມືບຳລຸງສ້າງຊັບພະຍາກອນມະນຸດ, ບັນດາແຂວງພາກເໜືອລາວ ໃຫ້ເຫັນວ່າ ນັກສຶກສາລາວຫຼາຍຄົນພາຍຫຼັງຮຽນຈົບກັບຄືນປະເທດ ໄດ້ດຳລົງຕຳແໜ່ງສຳຄັນ, ຮັບໃຊ້ພາລະກິດສ້າງສາ ແລະພັດທະນາປະເທດລາວ.

ບັນດາກຳລັງປະກອບອາວຸດແຂວງເຊີນລາ ຕັ້ງໜ້າສົມທົບກັບກຳລັງປະກອບອາວຸດບັນດາແຂວງຂອງປະເທດລາວ ດຳເນີນການລາດຕະເວນ, ແລກປ່ຽນຂໍ້ມູນຂ່າວສານກ່ຽວກັບສະພາບການກ່ຽວຂ້ອງເຖິງການປ້ອງກັນຊາດ, ປ້ອງກັນຄວາມສະຫງົບ, ຕໍ່ສູ້ຕ້ານອາດຊະຍາກຳ, ການອົບພະຍົບແບບເສລີ, ການເຂົ້າ-ອອກເມືອງ, ປົກປັກຮັກສາອະທິປະໄຕ, ຄວາມໝັ້ນຄົງຢູ່ເຂດຊາຍແດນລະຫວ່າງສອງປະເທດ; ການພົບປະແລກປ່ຽນວັດທະນະທຳ, ສິລະປະໄດ້ຮັບການຈັດຕັ້ງເປັນປະຈຳ, ອັນໄດ້ປະກອບສ່ວນຮັດແໜ້ນນ້ຳໃຈສາມັກຄີສະໜິດຕິດພັນລະຫວ່າງກອງທັບ ແລະປະຊາຊົນຢູ່ສອງຟາກຊາຍແດນ...

ໃນບັນຍາກາດເຕັມໄປດ້ວຍຄວາມສາມັກຄີ, ເນື່ອງໃນໂອກາດສະເຫຼີມສະຫຼອງ 49 ປີແຫ່ງວັນຊາດ ສປປ ລາວ, ພວກເຮົາຍິ່ງເອກອ້າງທະນົງໃຈຕໍ່ໄລຍະທາງພັດທະນາການພົວພັນແບບພິເສດຄວາມສາມັກຄີມິດຕະພາບໝັ້ນແກ່ນລະຫວ່າງເຊີນລາ ກັບບັນດາແຂວງຂອງປະເທດເພື່ອນລາວ ເວົ້າສະເພາະ ແລະຫວຽດນາມ-ລາວ, ລາວ-ຫວຽດນາມ ເວົ້າລວມ, ຍືນຍົງຂະໜົງແກ່ນໄປຊົ່ວກາລະນານ.

ຫວຽດນາມ ສືບຕໍ່ຊຸກຍູ້ການຮ່ວມມືດ້ານການຄ້າ-ການລົງທຶນກັບ ລາວ ແລະກຳປູເຈຍ ຍສໝ - ນັບແຕ່ວັນທີ 11-13 ກໍລະກົດ 2024, ທ່ານນາງ ຟານທິຖັ໊ງ ຮອງລັດຖະມົນຕີກະຊວງອຸດສາຫະກຳ ແລະການຄ້າ ແລະຄະນະຜູ້ແທນຂັ້ນສູງຫວຽດນາມ, ໄດ້ຮ່ວມເດີນທາງພ້ອມກັບທ່ານປະທານປະເທດ ໂຕເລິມ ໄປຢ້ຽມຢາມທາງລັດຖະກິດ ສປປ ລາວ ແລະ ລາຊະອານາຈັກ ກຳປູເຈຍ.

ສະພາກາແດງສອງປະເທດ ຫວຽດນາມ - ລາວ ສືບຕໍ່ການຮ່ວມມື ແລະໜູນຊ່ວຍ ຍສໝ - ວັນທີ 3 ກໍລະກົດ, ຢູ່ນະຄອນ ດານັງ, ສູນກາງສະພາກາແດງ ຫວຽດນາມ ໂດຍໄດ້ຮັບການໜູນຊ່ວຍຈາກບໍລິສັດຫຸ້ນສ່ວນສົ່ງເສີມການລົງທຶນ ແລະ ການພັດທະນາແບບຍືນຍົງ (SIPCO) ຈັດຕັ້ງກອງປະຊຸມຝຶກອົບຮົມ ແລະ ເຮັດວຽກກັບຄະນະປະຕິບັດງານຂອງອົງການກາແດງແຫ່ງຊາດ ລາວ.