ສ້າງເງື່ອນໄຂໃຫ້ບັນດາອົງການຜູ້ຕາງໜ້າ ຫວຽດນາມ ຢູ່ຕ່າງປະເທດເຄື່ອນໄຫວຢ່າງມີປະສິດທິຜົນ

ຍສໝ - ຕອນບ່າຍວັນທີ 4 ທັນວາ, ໃນຂອບເຂດການຢ້ຽມຢາມ ຍີ່ປຸ່ນ ຢ່າງເປັນທາງການ, ທ່ານ ເຈີ່ນແທັງເມິ້ນ ປະທານສະພາແຫ່ງຊາດ ຫວຽດນາມ ໄດ້ມີການພົບປະກັບພະນັກງານ, ລັດຖະກອນສະຖານທູດ ຫວຽດນາມ ປະຈຳ ໂຕກຽວ. ທີ່ການພົບປະ, ທ່ານໃຫ້ຮູ້ວ່າ ພັກ, ລັດ ແລະ ສະພາແຫ່ງຊາດ ຍາມໃດກໍ່ເອົາໃຈໃສ່, ສະໜັບສະໜູນ ແລະ ສ້າງເງື່ອນໄຂສະດວກທີ່ສຸດເພື່ອໃຫ້ບັນດາອົງການຜູ້ຕາງໜ້າຂອງ ຫວຽດນາມ ຢູ່ຕ່າງປະເທດ ເຄື່ອນໄຫວຢ່າງມີປະສິດທິຜົນ.

	ເພີ່ມທະວີການສົມທົບກັນລະຫວ່າງ VUFO ແລະ ບັນດາອົງການຜູ້ຕາງໜ້າ ຫວຽດນາມ ປະຈຳຕ່າງປະເທດ
	ບັນດາອົງການຜູ້ຕາງໜ້າ ຫວຽດນາມ ຢູ່ຕ່າງປະເທດເຊື່ອມຕໍ່ແຫຼ່ງຊັບພະຍາກອນໜູນຊ່ວຍການພັດທະນານະຄອນ ໂຮ່ຈິມິນ

ຕາມທ່ານ ເຈີ່ນແທັງເມິ້ນ ປະທານສະພາແຫ່ງຊາດ ແລ້ວ, ໃນເດືອນເມສາ 2024, ຄະນະປະຈຳສະພາແຫ່ງຊາດໄດ້ມີຄຳເຫັນເປັນເອກະພາບກ່ຽວກັບແຜນນະໂຍບາຍ ແລະ ເນື້ອໃນປັບປຸງ ແລະ ເພີ່ມເຕີມມະຕິ ສະບັບເລກທີ 08/2019/ND-CP ລົງວັນທີ 23 ມັງກອນ 2019 ວ່າດ້ວຍການກຳນົດລະບອບຈຳນວນໜຶ່ງສຳລັບສະມາຊິກອົງການຫວຽດນາມ ຢູ່ຕ່າງປະເທດ ເພື່ອຮັບປະກັນລະບອບເກື້ອກູນທີ່ດີກວ່າ ໃຫ້ບັນດາສະມາຊິກອົງການຫວຽດນາມ ຢູ່ຕ່າງປະເທດ.

ສ້າງເງື່ອນໄຂໃຫ້ບັນດາອົງການຜູ້ຕາງໜ້າ ຫວຽດນາມ ຢູ່ຕ່າງປະເທດເຄື່ອນໄຫວຢ່າງມີປະສິດທິຜົນ

ທ່ານ ເຈີ່ນແທັງເມິ້ນ ປະທານສະພາແຫ່ງຊາດ ຫວຽດນາມ ກ່າວຄຳປາໄສທີ່ການພົບປະ. (ພາບ: TTXVN)

ທ່ານປະທານສະພາແຫ່ງຊາດ ກໍ່ຍັງໄດ້ແຈ້ງໃຫ້ຊາບກ່ຽວກັບສະພາບການພາຍໃນປະເທດ, ເນັ້ນໜັກເຖິງສາຍພົວພັນມິດຕະພາບທີ່ເປັນມູນເຊື້ອລະຫວ່າງ ຫວຽດນາມ ແລະ ຍີ່ປຸ່ນ, ໄດ້ຮັບການຍົກລະດັບຂຶ້ນເປັນຄູ່ຮ່ວມມືຍຸດທະສາດຮອບດ້ານເພື່ອສັນຕິພາບ ແລະ ວັດທະນາຖາວອນຢູ່ ອາຊີ ແລະ ໃນໂລກໃນປີ 2023 ເນື່ອງໃນໂອກາດຄົບຮອບ 50 ປີ ແຫ່ງວັນສ້າງຕັ້ງການພົວພັນທາງການທູດ. ການຢ້ຽມຢາມ ຍີ່ປຸ່ນ ຢ່າງເປັນທາງການແມ່ນເພື່ອແນໃສ່ເຮັດໃຫ້ການພົວພັນລະຫວ່າງ 2 ປະເທດຢ່າງເລິກເຊິ່ງກວ່າ, ນຳການພົວພັນ ຫວຽດນາມ - ຍີ່ປຸ່ນ ກ້າວເຂົ້າສູ່ໄລຍະພັດທະນາໃໝ່ທີ່ມີປະສິດທິຜົນ ແລະ ແທດຈິງກວ່າໃນທຸກຂົງເຂດ.

ໂດຍໄດ້ຮອງຮູ້, ຍ້ອງຍໍຄວາມມານະພະຍາຍາມຂອງທ່ານເອກອັກຄະລັດຖະທູດ ແລະ ພະນັກງານ, ລັດຖະກອນຂອງສະຖານທູດໃນໄລຍະຜ່ານມາ, ປະກອບສ່ວນເຂົ້າໃນການພົວພັນຫວຽດນາມ - ຍີ່ປຸ່ນ ຢ່າງຕັ້ງໜ້າ, ທ່ານປະທານສະພາແຫ່ງຊາດ ກໍ່ສະເໜີວ່າ ໃນໄລຍະຈະມາເຖິງ, ທ່ານເອກອັກຄະລັດຖະທູດ ແລະ ຄະນະພະນັກງານ, ລັດຖະກອນສະຖານທູດ ຫວຽດນາມ ປະຈຳ ຍີ່ປຸ່ນ ຕ້ອງເພີ່ມທະວີຄວາມສາມັກຄີ, ຄວາມຮັບຜິດຊອບ, ຍົກສູງລະດັບວິຊາສະເພາະ ແລະ ທັກສະວິຊາການຕອບສະໜອງຄວາມຕ້ອງການທີ່ນັບມື້ນັບສູງໃນໄລຍະເຊື່ອມໂຍງເຂົ້າກັບສາກົນຢ່າງເລິກເຊິ່ງກວ້າງຂວາງ; ຍຶດໝັ້ນແນວທາງການຕ່າງປະເທດຂອງພັກ ແລະ ລັດ, ປະຕິບັດວຽກງານທີ່ຂະແໜງການຕ່າງປະເທດໄດ້ວາງອອກເປັນຢ່າງດີ; ປະກອບສ່ວນເຂົ້າໃນການຮັດແໜ້ນ ແລະ ເພີ່ມທະວີການພົວພັນມິດຕະພາບຫວຽດນາມ - ຍີ່ປຸ່ນ ກວ່າອີກ.

ທ່ານ ເຈີ່ນແທັງເມິ້ນ ປະທານສະພາແຫ່ງຊາດ ຫວຽດນາມ ພ້ອມກັບພະນັກງານ, ລັດຖະກອນສະຖານທູດ ຫວຽດນາມ ປະຈຳ ຍີ່ປຸ່ນ. (ພາບ: TTXVN)

ໂດຍລາຍງານຕໍ່ທ່ານປະທານສະພາແຫ່ງຊາດ ແລະ ຄະນະປະຕິບັດງານ, ທ່ານເອກອັກຄະລັດຖະທູດ ຫວຽດນາມ ປະຈຳ ຍີ່ປຸ່ນ ຟ້າມກວາງຫຽວ ໃຫ້ຮູ້ວ່າ ໃນສະພາບການພົວພັນຮ່ວມມື ແລະ ການແລກປ່ຽນມິດຕະພາບລະຫວ່າງ 2 ປະເທດນັບມື້ນັບພັດທະນາ. ສະຖານທູດໄດ້ສຸມໃສ່ທຸກຂົງເຂດວຽກງານ ບໍ່ພຽງແຕ່ດ້ານການເມືອງ ແລະ ການທູດ ເທົ່ານັ້ນ, ຫາກຍັງແມ່ນເສດຖະກິດ, ການອອກແຮງງານ, ວິທະຍາສາດເຕັກໂນໂລຢີ, ການພົບປະແລກປ່ຽນວັດທະນະທຳ - ປະຊາຊົນ.

ໃນນັ້ນ, ການທູດເສດຖະກິດແມ່ນຈຸດສຸມໃນວຽກງານຂອງສະຖານທູດ, ບັນລຸໄດ້ບັນດາໝາກຜົນຢ່າງຕັ້ງໜ້າ, ໜູນຊ່ວຍບັນດາຄະນະ ຫວຽດນາມ ໄປຍັງ ຍີ່ປຸ່ນ ແລະ ຄະນະ ຍີ່ປຸ່ນ ມາຢ້ຽມຢາມ ຫວຽດນາມ; ຈັດຕັ້ງບັນດາການສຳມະນາ, ງານວາງສະແດງສິນຄ້າ ຫວຽດນາມ. ສະຖານທູດກໍ່ສຸມໃສ່ຊຸກຍູ້ການທູດວັດທະນະທຳດ້ວຍຄຳຂວັນ “ຢູ່ບ່ອນໃດມີຊາວ ຫວຽດນາມ, ຢູ່ບ່ອນນັ້ນມີງານບຸນ ຫວຽດນາມ”, ຈັດຕັ້ງງານບຸນໃຫຍ່ຢູ່ຫຼາຍທ້ອງຖິ່ນ. ພິເສດ, ສະຖານທູດໄດ້ມານະພະຍາຍາມຜັນຂະຫຍາຍວຽກງານໜູນຊ່ວຍ ແລະ ປົກປ້ອງພົນລະເມືອງ, ສ້າງເງື່ອນໄຂສະດວກໃຫ້ແກ່ການປະຕິບັດບັນດາລະບຽບການບໍລິຫານຂອງພົນລະເມືອງ.

ຫວຽດນາມ - ລາວ: ຮ່ວມແຮງຮ່ວມໃຈປົກປັກຮັກສາປ່າໄມ້, ອະນຸລັກຮັກສາຊັບພະຍາກອນທຳມະຊາດຢູ່ເຂດຊາຍແດນ

ຍສໝ - ປ້ອງກັນ, ຕ້ານໄຟໄໝ້ປ່າ, ໜູນຊ່ວຍ, ຊ່ວຍເຫຼືອເຊິ່ງກັນ ແລະ ກັນ ພັດທະນາເສດຖະກິດ, ວັດທະນະທຳ, ສັງຄົມ; ເຂົ້າຮ່ວມການປົກປັກຮັກສາຄວາມເປັນລະບຽບຮຽບຮ້ອຍຄວາມປອດໄພ, ອະທິປະໄຕຄວາມໝັ້ນຄົງເຂດຊາຍແດນ, ຫຼັກໝາຍຂອງແຕ່ລະປະເທດ... ນີ້ແມ່ນບັນດາການເຄື່ອນໄຫວຮ່ວມແຮງຮ່ວມໃຈປົກປັກຮັກສາປ່າໄມ້, ອະນຸລັກຮັກສາຊັບພະຍາກອນທຳມະຊາດຢູ່ເຂດຊາຍແດນ ຫວຽດນາມ - ລາວ.