ຊ່ວຍໃຫ້ປະຊາຊົນ ຮຶງອຽນ ຍິ່ງເຂົ້າໃຈຍິ່ງຮັກວັດທະທະທຳ ໄທ ຫຼາຍຂຶ້ນ
	VUFO ພ້ອມແລ້ວທີ່ຈະເປັນຂົວຕໍ່ ໃຫ້ແກ່ການພົວພັນມິດຕະພາບ ແລະ ການຮ່ວມມືລະຫວ່າງ ຫວຽດນາມ ແລະ ອາຟຼິກາໃຕ້

ໃນຂອບເຂດການຢ້ຽມຢາມທາງລັດຖະກິດຢູ່ໄອແລນ, ຕອນເຊົ້າວັນທີ 3 ຕຸລາ (ຕາມເວລາທ້ອງຖິ່ນ), ຢູ່ນະຄອນຫຼວງ Dublin, ທ່ານ ໂຕເລິມ ເລຂາທິການໃຫຍ່, ປະທານປະເທດ ໄດ້ພົບປະກັບທ່ານ Simon Harris ນາຍົກລັດຖະມົນຕີໄອແລນ.

ຫວຽດນາມ ແລະໄອແລນ ຕັ້ງໜ້າຜັນຂະຫຍາຍກົນໄກຮ່ວມມື

ໃນບັນຍາກາດແຫ່ງຄວາມຈິງໃຈ, ມິດຕະພາບ ແລະເປີດອົກເປີດໃຈ, ການນຳສອງປະເທດໄດ້ແຈ້ງໃຫ້ກັນຊາບກ່ຽວກັບສະພາບການຢູ່ແຕ່ລະປະເທດ, ປຶກສາຫາລືທິດທາງການຮ່ວມມື ແລະມາດຕະການ ເພື່ອແນໃສ່ເຮັດໃຫ້ການພົວພັນມິດຕະພາບທີ່ເປັນມູນເຊື້ອ ແລະການຮ່ວມມືຫຼາຍດ້ານລະຫວ່າງຫວຽດນາມ ແລະໄອແລນ ເລິກເຊິ່ງກວ່າອີກ.

ທ່ານ ໂຕເລິມ ເລຂາທິການໃຫຍ່, ປະທານປະເທດ ໃນການພົບປະກັບທ່ານ Simon Harris ນາຍົກລັດຖະມົນຕີໄອແລນ ຢູ່ນະຄອນຫຼວງ Dublin, ວັນທີ 3 ຕຸລາ 2024. ພາບ: ສໍານັກຂ່າວສານຫວຽດນາມ.

ທ່ານ ໂຕເລິມ ເລຂາທິການໃຫຍ່, ປະທານປະເທດ ແລະທ່ານນາຍົກລັດຖະມົນຕີ Simon Harris ໄດ້ສະແດງຄວາມເພິ່ງພໍໃຈຕໍ່ການພັດທະນາຢ່າງແທດຈິງ ແລະມີປະສິດທິຜົນພາຍຫຼັງເກືອບ 3 ທົດສະວັດແຫ່ງການພົວພັນມິດຕະພາບ ແລະການຮ່ວມມືລະຫວ່າງສອງປະເທດໃນຫຼາຍຂົງເຂດ. ເພື່ອແນໃສ່ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ຂຸດຄົ້ນຄວາມສາມາດບົ່ມຊ້ອນດ້ານການຮ່ວມມືຂອງສອງປະເທດ, ການນຳສອງປະເທດໄດ້ເຫັນດີເປັນເອກະພາບເພີ່ມທະວີການແລກປ່ຽນຄະນະຜູ້ແທນ, ການພົບປະຂັ້ນສູງ ແລະທຸກຂັ້ນລະຫວ່າງກະຊວງ, ຂະແໜງການສອງຝ່ານ; ຜັນຂະຫຍາຍບັນດາກົນໄກຮ່ວມມືທີ່ມີຢູ່ແລ້ວຢ່າງມີປະສິດທິຜົນ, ພ້ອມທັງຄົ້ນຄວ້າ ແລະສ້າງຂອບເຂດການຮ່ວມມືໃໝ່ໃຫ້ເໝາະສົມກັບສະພາບການໃໝ່.

ທ່ານ ໂຕເລິມ ເລຂາທິການໃຫຍ່, ປະທານປະເທດ ພາກພູມໃຈ ແລະແຈ້ງໃຫ້ທ່ານ Simon Harris ນາຍົກລັດຖະມົນຕີ ຮັບຊາບກ່ຽວກັບເລື່ອງ, ລັດຖະບານຫວຽດນາມ ໄດ້ຕົກລົງ ແລະພວມດໍາເນີນການເປີດສະຖານທູດຫວຽດນາມ ປະຈຳ ໄອແລນ ເພື່ອແນໃສ່ປະກອບສ່ວນຕັ້ງໜ້າເຂົ້າໃນການພັດທະນາການພົວພັນລະຫວ່າງສອງປະເທດ.

ກ່ຽວກັບການຮ່ວມມືດ້ານເສດຖະກິດ, ທ່ານ ໂຕເລິມ ເລຂາທິການໃຫຍ່, ປະທານປະເທດ ສະເໜີໃຫ້ສອງຝ່າຍສືບຕໍ່ສົມທົບກັນຢ່າງແໜ້ນແຟ້ນ ແລະໝູນໃຊ້ສັນຍາການຄ້າເສລີ ຫວຽດນາມ-ອີຢູ (EVFTA) ຢ່າງມີປະສິດທິຜົນ, ໃນນັ້ນມີການພິຈາລະນາສ້າງຄວາມສະດວກໃຫ້ຜະລິດຕະພັນສົ່ງອອກທີ່ເປັນທ່າແຮງຂອງແຕ່ລະປະເທດເຂົ້າເຖິງແຕ່ລະປະເທດເຂົ້າເຖິງຕະຫຼາດຂອງກັນ; ຊົມເຊີຍໄອແລນ ມີນະໂຍບາຍສົ່ງເສີມ, ສ້າງຄວາມສະດວກໃຫ້ບັນດາວິສາຫະກິດໄອແລນ ເພີ່ມທະວີການລົງທຶນເຂົ້າຫວຽດນາມ ໃນບັນດາຂົງເຂດທີ່ມີທ່າແຮງ, ຄື: ການຫັນເປັນດີຈີຕອນ, ພະລັງງານທົດແທນ, ກະສິກຳເຕັກໂນໂລຢີສູງ... ທ່ານ ໂຕເລິມ ເລຂາທິການໃຫຍ່, ປະທານປະເທດ ກໍ່ສະເໜີໃຫ້ ໄອແລນ ສຳເລັດບັນດາລະບຽບການໃຫ້ສັດຕະຍາບັນສັນຍາປົກປ້ອງການລົງທຶນ ຫວຽດນາມ-ອີຢູ່ (EVIPA) ໂດຍໄວເພື່ອແນໃສ່ສ້າງຄວາມສະດວກໃຫ້ແກ່ການພົວພັນລົງທຶນທີ່ສະເໝີພາບ, ພ້ອມກັນມີຜົນປະໂຫຍດລະຫວ່າງສອງຝ່າຍ.

ເພື່ອເພີ່ມທະວີຄວາມເຂົ້າອົກເຂົ້າໃຈເຊິ່ງກັນແລະກັນ ແລະຮັດແໜ້ນສາຍພົວພັນມິດຕະພາບລະຫວ່າງປະຊາຊົນສອງປະເທດ, ການນຳສອງປະເທດເນັ້ນໜັກເຖິງຄວາມຈຳເປັນຕ້ອງຊຸກຍູ້ບັນດາການເຄື່ອນໄຫວແລກປ່ຽນວັດທະນະທຳສິລະປະ, ກິລາ ແລະການທ່ອງທ່ຽວຢູ່ສອງປະເທດ.

ປຶກສາຫາລືບັນດາບັນຫາພາກພື້ນ ແລະສາກົນທີ່ຕ່າງຝ່າຍຕ່າງມີຄວາມສົນໃຈ, ທ່ານ ໂຕເລິມ ເລຂາທິການໃຫຍ່, ປະທານປະເທດ ຕີລາຄາສູງ ໄອແລນ ທີ່ໄດ້ເອົາໃຈໃນການຊຸກຍູ້ການພົວພັນກັບອາຊີຕາເວັນອອກສ່ຽງໃຕ້; ຢືນຢັນວ່າ ຫວຽດນາມ ພ້ອມແລ້ວທີ່ຈະເປັນຂົວຕໍ່ຊ່ວຍເຫຼືອໄອແລນ ເພີ່ມທະວີການພົວພັນກັບອາຊຽນ; ສະເໜີ ໄອແລນ ເປັນຂົວຕໍ່ຊ່ວຍຫວຽດນາມ ເພີ່ມທະວີການພົວພັນກັບອີຢູ. ການນຳສອງທ່ານໄດ້ເຫັນດີເປັນເອກະພາບສືບຕໍ່ສົມທົບກັນຢ່າງແໜ້ນແຟ້ນຢູ່ບັນດາເວທີປາໄສພາກພື້ນ ແລະສາກົນ, ພິເສດແມ່ນສະຫະປະຊາຊາດ, ອາຊຽນ-ອີຢູ...; ເພີ່ມທະວີການຮ່ວມມືໃນຂົງເຂດຮັກສາສັນຕິພາບສະຫະປະຊາຊາດ.

ບັນຍາກາດທີ່ການພົບປະ. ພາບ: VGP

ເນື່ອງໃນໂອກາດນີ້, ສອງຝ່າຍໄດ້ອອກຖະແຫຼງການຮ່ວມກ່ຽວກັບການເພີ່ມທະວີການພົວພັນຄູ່ຮ່ວມມືລະຫວ່າງ ຫວຽດນາມ-ໄອແລນ.

ທ່ານ ໂຕເລິມ ເລຂາທິການໃຫຍ່, ປະທານປະເທດ ແລະທ່ານນາຍົກລັດຖະມົນຕີໄອແລນ ກໍ່ໄດ້ເປັນສັກຂີພິຍານພິທີລົງນາມໃນຂໍ້ຕົກລົງສ້າງຕັ້ງຄູ່ຮ່ວມມືຍຸດທະສາດກ່ຽວກັບການສຶກສາປະລິຍາຕີລະຫວ່າງກະຊວງສຶກສາ ແລະກໍ່ສ້າງຫວຽດນາມ ແລະກະຊວງສຶກສາມະຫາວິທະຍາໄລ, ຄົ້ນຄວ້າ, ປ່ຽນແປງໃໝ່ ແລະວິທະຍາສາດໄອແລນ.

ຊຸກຍູ້ການຮ່ວມມືລະຫວ່າງລັດຖະສະພາສອງຝ່າຍ

ຕອນເຊົ້າວັນທີ 3 ຕຸລາ, ຢູ່ນະຄອນຫຼວງ Dublin, ທ່ານ ໂຕເລິມ ເລຂາທິການໃຫຍ່, ປະທານປະເທດ ໄດ້ມີການພົບປະກັບທ່ານ Jerry Buttimer ປະທານສະພາສູງໄອແລນ ແລະທ່ານ Catherine Connolly ຮອງປະທານສະພາຕໍ່າ.

ທ່ານປະທານສະພາສູງ Jerry Buttimer ຊົມເຊີຍທ່ານ ໂຕເລິມ ເລຂາທິການໃຫຍ່, ປະທານປະເທດ ແລະຄະນະຜູ້ແທນຂັ້ນສູງຫວຽດນາມ ໄດ້ມາຢ້ຽມຢາມທາງລັດຖະກິດໄອແລນ, ຢືນຢັນວ່າ ການຢ້ຽມຢາມແມ່ນເຫດການສຳຄັນໃນການພົວພັນ ຫວຽດນາມ-ໄອແລນ, ປະກອບສ່ວນເພີ່ມທະວີການພົວພັນສອງຝ່າຍ; ສະແດງຄວາມປະທັບໃຈຕໍ່ບັນດາຜົນງານພັດທະນາເສດຖະກິດ-ສັງຄົມຂອງຫວຽດນາມ.

ທ່ານ ໂຕເລິມ ເລຂາທິການໃຫຍ່, ປະທານປະເທດ ແລະທ່ານ Jerry Buttimer ປະທານສະພາສູງໄອແລນ ຖ່າຍຮູບກັບສະມາຊິກລັດຖະສະພາ. ພາບ: ສໍານັກຂ່າວສານຫວຽດນາມ.

ທ່ານປະທານສະພາສູງ Jerry Buttimer ຊົມເຊີຍຫວຽດນາມ ທີ່ໄດ້ຕົກລົງເປີດສະຖານທູດ ປະຈຳ ໄອແລນ, ພ້ອມທັງ ຖືວ່າ ຫວຽດນາມ ແລະໄອແລນ ລ້ວນແຕ່ແມ່ນປະເທດທີ່ເຄີຍຜ່ານຜ່າສິ່ງທ້າທາຍຫຼາຍຢ່າງໃນອະດີດຕະການ ແລະປະຈຸບັນພວມມີຜົນສະທ້ອນໃນເວທີສາກົນ.

ທ່ານເລຂາທິການໃຫຍ່, ປະທານປະເທດ ໄດ້ຊົມເຊີຍ ແລະຕີລາຄາສູງເລື່ອງສະພາແຫ່ງຊາດຫວຽດນາມ ສ້າງຕັ້ງກຸ່ມສະມາຊິກລັດຖະສະພາມິດຕະພາບ ຫວຽດນາມ-ໄອແລນ ແລະສະພາແຫ່ງຊາດໄອແລນ ສ້າງຕັ້ງກຸ່ມສະມາຊິກລັດຖະສະພາ ໄອແລນ-ຫວຽດນາມ; ເນັ້ນໜັກວ່າ ບັນດາກຸ່ມສະມາຊິກລັດຖະສະພາມິດຕະພາບຈະເປັນຂົວຕໍ່ທີ່ສຳຄັນປະກອບສ່ວນເພີ່ມທະວີການພົວພັນລະຫວ່າງສອງສະພາແຫ່ງຊາດເວົ້າສະເພາະ ແລະສອງປະເທດເວົ້າລວມ.

ສອງຝ່າຍເຫັນດີເປັນເອກະພາບສືບຕໍ່ເຮັດໃຫ້ການພົວພັນລະຫວ່າງສອງຝ່າຍເລິກເຊິ່ງກວ່າອີກ ຜ່ານການເພີ່ມທະວີການແລກປ່ຽນຄະນະຜູ້ແທນທຸກຂັ້ນ, ໃນນັ້ນມີບັນດາຄະນະກຳມາທິການ/ກຸ່ມສະມາຊິກລັດຖະສະພາສອງປະເທດ; ຈັດຕັ້ງການເຄື່ອນໄຫວແລກປ່ຽນ ແລະແບ່ງປັນບົດຮຽນດ້ານນິຕິກຳ, ການເຈລະຈານະໂຍບາຍ ແລະກອງປະຊຸມສຳມະນາທິດສະດີ. ສອງຝ່າຍເຫັນດີເປັນເອກະພາບສົມທົບກັນຢ່າງແໜ້ນແຟ້ນ ແລະສະໜັບສະໜູນເຊິ່ງກັນ ແລະກັນຢູ່ເວທີປາໄສລັດຖະສະພາລະຫວ່າງຊາດຢູ່ພາກພື້ນ ແລະໃນໂລກ, ຊຸກຍູ້ການປະຕິບັດເປົ້າໝາຍພັດທະນາແບບຍືນຍົງ (SDGs), ຄວາມສະເໝີພາບລະຫວ່າງຍິງຊາຍ, ຮັບມືກັບການປ່ຽນແປງຂອງດິນຟ້າອາກາດ ແລະສິ່ງທ້າທາຍທົ່ວໂລກ; ເປີດກວ້າງການພົບປະແລກປ່ຽນປະຊາຊົນ, ການຮ່ວມມືດ້ານການສຶກສາ ແລະກໍ່ສ້າງ, ກະສິກຳ, ການທ່ອງທ່ຽວ ແລະການພັດທະນາແບບຍືນຍົງ.

ທ່ານ ໂຕເລິມ ເລຂາທິການໃຫຍ່, ປະທານປະເທດ ສະເໜີໃຫ້ລັດຖະສະພາໄອແລນ ຮັບຮອງເອົາ EVIPA ໂດຍໄວເພື່ອສ້າງຄວາມສະດວກກວ່າໃຫ້ແກ່ການລົງທຶນສອງຝ່າຍ ແລະຊຸກຍູ້ຄະນະກຳມະການເອີລົບ (EC) ຍົກເລີກ “ບັດເຫຼືອງ” ຕ້ານການຂຸດຄົ້ນສິນທະເລຢ່າງຜິດກົດໝາຍ, ບໍ່ລາຍງານ, ບໍ່ຕາມຂໍ້ກຳນົດ (IUU) ສຳລັບສິນໃນນໍ້າຂອງຫວຽດນາມ.

ການນຳສະພາແຫ່ງຊາດໄອແລນ ຕີລາຄາສູງການປະກອບສ່ວນຂອງປະຊາຄົມຊາວຫວຽດນາມ ເຂົ້າໃນການພັດທະນາເສດຖະກິດ-ສັງຄົມ ຂອງໄອແລນ ແລະຢືນຢັນຈະໜູນຊ່ວຍປະຊາຄົມຊາວຫວຽດນາມ ສືບຕໍ່ເຊື່ອມໂຍງປະສົບຜົນສໍາເລັດ, ປະກອບສ່ວນເພີ່ມທະວີຄວາມເຂົ້າໃຈລະຫວ່າງປະຊາຊົນສອງປະເທດ.

ສົ່ງເສີມບັນດາວິສາຫະກິດໄອແລນ ລົງທຶນຢູ່ຫວຽດນາມ

ຕອນເຊົ້າວັນທີ 3 ຕຸລາ, ຢູ່ນະຄອນຫຼວງ Dublin, ທ່ານ ໂຕເລິມ ເລຂາທິການໃຫຍ່, ປະທານປະເທດ ແລະຄະນະຜູ້ແທນຂັ້ນສູງຫວຽດນາມ ໄດ້ມີການພົບປະກັບບັນດາວິສາຫະກິດໄອແລນ.

ທ່ານ ໂຕເລິມ ເລຂາທິການໃຫຍ່, ປະທານປະເທດ ເຂົ້າຮ່ວມການພົບປະກັບວິສາຫະກິດໄອແລນ. ພາບ: ສໍານັກຂ່າວສານຫວຽດນາມ.

ກ່າວຄຳເຫັນທີ່ການພົບປະ, ທ່ານ ໂຕເລິມ ເລຂາທິການໃຫຍ່, ປະທານປະເທດ ສະແດງຄວາມປິຕິຊົມຊື່ນເມື່ອເຫັນວ່າຫຼາຍວິສາຫະກິດໄອແລນ ໄດ້ມີບັນດາໂຄງການລົງທຶນຢ່າງມີປະສິດທິຜົນ ແລະບັນລຸໄດ້ຜົນສຳເລັດຢ່າງແນ່ນອນໃນຫຼາຍຂົງເຂດ, ຢູ່ບາງທ້ອງຖິ່ນຂອງຫວຽດນາມ; ຖືວ່າຄວາມສາມາດບົ່ມຊ້ອນການຮ່ວມມືຂອງສອງປະເທດຍັງອຸດົມສົມບູນ, ຕ້ອງສືບຕໍ່ຍູ້ແຮງກວ່າອີກ, ເພາະແຫຼ່ງກຳລັງພາຍໃນທີ່ອຸດົມສົມບູນຂອງແຕ່ລະຝ່າຍ, ກໍ່ຄືພະລັງຊີວິດຂອງສະໄໝໃໝ່, ສະໄໝຂງການປະຕິວັດວິທະຍາສາດ-ເຕັກໂນໂລຢີ, ການເຊື່ອມຕໍ່, ການເຊື່ອມໂຍງທີ່ເລິກເຊິ່ງກວ້າງຂວາງໃນທົ່ວໂລກ.

ສະເໜີບາງທິດທາງການຮ່ວມມືໃນໄລຍະຈະມາເຖິງ, ທ່ານ ໂຕເລິມ ເລຂາທິການໃຫຍ່, ປະທານປະເທດ ເນັ້ນໜັກວ່າ ຫວຽດນາມ ປາດຖະໜາຢາກໃຫ້ວິສາຫະກິດໄອແລນ, ດ້ວຍຄວາມສາມາດ, ແຫຼ່ງກຳລັງຂອງຕົນ, ສືບຕໍ່ລົງທຶນເຂົ້າຫວຽດນາມ ຫຼາຍກວ່າອີກ. ທ່ານ ໂຕເລິມ ເລຂາທິການໃຫຍ່, ປະທານປະເທດ ຢືນຢັນວ່າ: ຫວຽດນາມ ຍາມໃດກໍ່ຍິນດີຕ້ອນຮັບວິສາຫະກິດໄອແລນ ເປີດກວ້າງການຮ່ວມມື; ບັນດາອົງການຂອງຫວຽດນາມ ຍາມໃດກໍ່ຮ່ວມເດີນທາງ, ພ້ອມແລ້ວທີ່ຈະແບ່ງປັນ, ສ້າງທຸກເງື່ອນໄຂສະດວກໃຫ້ບັນດາວິສາຫະກິດຕ່າງປະເທດ, ໃນນັ້ນມີບັນດາວິສາຫະກິດໄອແລນ ລົງທຶນດຳເນີນທຸລະກິດຢ່າງມີປະສິດທິຜົນ, ປະກອບສ່ວນພັດທະນາເສດຖະກິດ - ສັງຄົມຂອງສອງປະເທດ.

ຕອນຄ່ຳວັນທີ 3 ຕຸລາ, ຢູ່ນະຄອນຫຼວງ Dublin, ທ່ານ ໂຕເລິມ ເລຂາທິການໃຫຍ່, ປະທານປະເທດ ແລະຄະນະຜູ້ແທນຂັ້ນສູງຫວຽດນາມ ໄດ້ມີການພົບປະກັບຜູ້ຕາງໜ້າຊາວຫວຽດນາມ ອາໄສຢູ່ຕ່າງປະເທດ 130 ຄົນ ທີ່ພວມດຳລົງຊີວິດ, ຮ່ຳຮຽນ ແລະເຮັດວຽກຢູ່ໄອແລນ ແລະຜູ້ຕາງໜ້າພະນັກງານ, ລັດຖະກອນຂອງສະຖານທູດຫວຽດນາມ ປະຈໍາ ລາຊະອານາຈັກອັງກິດ ແລະໄອແລນເໜືອ ທັງຮັບຜິດຊອບໄອແລນ.

ສະມາຄົມພຸດທະສາສະໜາ ​ຫວຽດ​ນາມ: ຂົວຕໍ່​ສັນ​ຕິ​ພາບ​ໃນ​ການ​ທູດ​ປະ​ຊາ​ຊົນ ຍສໝ - ດ້ວຍປະຫວັດສາດອັນຍາວນານ, ມູນເຊື້ອ ແລະ ຄຸນຄ່າທາງດ້ານວັດທະນະທຳສາສະໜາທີ່ອຸດົມສົມບູນ, ສະມາຄົມພຸດທະສາສະໜາ ​ຫວຽດ​ນາມ ບໍ່ພຽງແຕ່ແມ່ນອົງການສາສະໜາທີ່ມີໜ້າທີ່ເຜີຍແຜ່ພະທຳເທົ່ານັ້ນ ຫາກຍັງເປັນຂົວຕໍ່ທີ່ສຳຄັນໃນວຽກງານການທູດປະຊາຊົນ, ຊຸກຍູ້​ການ​ພົວພັນ​ມິດຕະພາບລະຫວ່າງ​ ຫວຽດນາມ ​ແລະ ປະຊາ​ຄົມສາກົນ.

ການ​ນຳ​ພັກ​, ​ລັດ​ ຫວຽດ​ນາມ ​ສົ່ງໂທລະເລກອວຍພອນສະ​ເຫຼີມ​ສະ​ຫຼອງ 75 ປີ​ແຫ່ງ​ວັນ​ຊາດ​ຈີນ ຍສໝ -​ ​ເນື່ອງ​ໃນ​ໂອກາດ​ສະ​ເຫຼີ​ມສະຫຼອງ 75 ປີ​ແຫ່ງ​ວັນ​ສ້າງ​ຕັ້ງ​ສາທາລະນະ​ລັດ​ປະຊາຊົນ​ຈີນ (1 ຕຸລາ 1949 – 1 ຕຸລາ 2024), ສະຫາຍ​ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ​ກອມ​ມູນິດ​ ຫວຽດນາມ, ປະທານ​ປະ​ເທດ ສາທາລະນະ​ລັດ ສັງຄົມ​ນິຍົມ ຫວຽດນາມ ໂຕເລີມ ໄດ້ມີໂທລະເລກ​ສົ່ງຄວາມ​ຊົມ​ເຊີຍ​ເຖິງ ສະຫາຍ​ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ​ກອມ​ມູນິດຈີນ​, ປະທານ​ປະ​ເທດສາທາລະນະ​ລັດ​ປະຊາຊົນ​ຈີນ ສີ​ຈິ້ນ​ຜິງ.