ພິທີມອບຈັດຂຶ້ນໃນຂອບເຂດການຢ້ຽມຢາມ ແລະເຮັດວຽກຢູ່ປະເທດລາວຂອງຄະນະປະຕິບັດງານສະພາມະຫາບັນດິດວິທະຍາສາດ ແລະ ເຕັກໂນໂລຊີ ຫວຽດນາມ (VAST) ນໍາໂດຍ ທ່ານ ສາດສະດາຈານ, ບັນດິດ ເຈົາວັນມິງ ປະທານສະຖາບັນ ນໍາໜ້າ.
ນາມມະຍົດນີ້ແນໃສ່ເພື່ອຮັບຮູ້ການປະກອບສ່ວນອັນໃຫຍ່ຫຼວງຂອງ ທ່ານ ບໍ່ວຽງຄໍາ ວົງດາລາ ໃນການຊຸກຍູ້ເຄື່ອນໄຫວການຮ່ວມມື, ການຝຶກອົບຮົມຊັບພະຍາກອນມະນຸດເພື່ອຄຸ້ມຄອງວິທະຍາສາດ ແລະ ເຕັກໂນໂລຊີ ລະຫວ່າງ ສະພາມະຫາບັນດິດວິທະຍາສາດ - ເຕັກໂນໂລຊີ ຫວຽດນາມ (VAST) ແລະ ກະຊວງເຕັກໂນໂລຊີ ແລະ ການສື່ສານຂອງລາວ, ກໍ່ຄືການບຸກບືນຕ່າງໆໃນວຽກປົກປັກຮັກສາ ແລະ ເສີມຂະຫຍາຍການພົວພັນຮ່ວມມືຮອບດ້ານ, ຄວາມສາມັກຄີແບບພິເສດ ລະຫວ່າງ ລາວ -ຫວຽດນາມ.
 |
| ຕາງໜ້າສະຖາບັນວິທະຍາສາດ ແລະ ເຕັກໂນໂລຊີຂຶ້ນກັບ ສະພາມະຫາບັນດິດວິທະຍາສາດ ແລະ ເຕັກໂນໂລຊີ ສສ ຫວຽດນາມ ໄດ້ມອບນາມມະຍົດສາດສະດາຈານກິຕິມະສັກໃຫ້ ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານລາວ. (ພາບ: ສໍານັກຂ່າວສານຫວຽດນາມ) |
ໃນຂອບເຂດການຢ້ຽມຢາມ, ສະພາມະຫາບັນດິດວິທະຍາສາດ - ເຕັກໂນໂລຊີ ຫວຽດນາມ (VAST) ແລະ ກະຊວງເຕັກໂນໂລຊີ ແລະ ສື່ສານລາວ ໄດ້ຈັດກອງປະຊຸມສອງຝ່າຍຄັ້ງທີ 3. ສອງຝ່າຍໄດ້ພ້ອມກັນອັບເດດສະພາບການປະຕິບັດເນື້ອໃນການຮ່ວມມືຕ່າງໆກ່ຽວກັບຮ່າງສະເໜີໃນການພັດທະນາໂຄງການ “ກໍ່ສ້າງສູນຂໍ້ມູນ ແລະ ສື່ສານກ່ຽວກັບໄພທຳມະຊາດ (ແຜ່ນດິນໄຫວ) ໃຫ້ປະເທດລາວ”; “ກໍ່ສ້າງສູນແຫ່ງຊາດກ່ຽວກັບການເກັບກໍາຂໍ້ມູນ ແລະ ການປະມວນຜົນແບບ Cloud ໃນລະບົບອິນເຕີເນັດ (Cloud Computing) ຢູ່ລາວ” ເຊິ່ງໄດ້ຮັບຮູ້ຈາກລັດຖະບານ 2 ປະເທດໃນບົດບັນທຶກກອງປະຊຸມຄັ້ງທີ 46 ຂອງຄະນະກໍາມະການລະຫວ່າງລັດຖະບານກ່ຽວກັບການຮ່ວມມືສອງຝ່າຍ ລາວ - ຫວຽດນາມ ໃນປີ 2024.
ສອງຝ່າຍເຫັນດີສືບຕໍ່ແລກປ່ຽນ ແລະ ຈັດຕັ້ງຜັນປະຕິບັດໃຫ້ມີປະສິດທິຜົນກ່ຽວກັບບັນດາເນື້ອໃນທີ່ໄດ້ຕົກລົງກັນໃນກອງປະຊຸມຄັ້ງນີ້ ແລະ ຊີ້ນໍາບັນດາຫົວໜ່ວຍທີ່ຂຶ້ນກັບໂດຍກົງເພື່ອເຊື່ອມໂຍງ, ຊຸກຍູ້, ຜັນຂະຫຍາຍການເຄື່ອນໄຫວຮ່ວມມືຕົວຈິງ; ສືບຕໍ່ສະຫຼຸບຕີລາຄາ ແລະ ກຳນົດແຜນການຮ່ວມມືສຳຄັນໃນໄລຍະຈະມາເຖິງ ໃນກອງປະຊຸມຄັ້ງທີ 4 ປີ 2025 ຢູ່ຫວຽດນາມ.
ທ່ານ ເຈົາວັນມິງ ປະທານສະພາມະຫາບັນດິດວິທະຍາສາດ - ເຕັກໂນໂລຊີ ຫວຽດນາມ (VAST) ແລະ ທ່ານລັດຖະມົນຕີ ບໍ່ວຽງຄໍາ ວົງດາລາ ໄດ້ເປັນສັກຂີພິຍານໃນພິທີລົງນາມຂໍ້ຕົກລົງການຮ່ວມມືລະຫວ່າງສະຖາບັນເຕັກໂນໂລຊີຂໍ້ມູນຂ່າວສານ ຂຶ້ນກັບສະພາມະຫາບັນດິດວິທະຍາສາດ - ເຕັກໂນໂລຊີ ຫວຽດນາມ (VAST) ກັບສະຖາບັນຄົ້ນຄວ້າຄວ້າແອັບພລິເຄຊັ່ນອັດສະລິຍະພາຍໃຕ້ MTC, ສ້າງພື້ນຖານທາງດ້ານນິຕິກຳໃຫ້ແກ່ການຜັນຂະຫຍາຍການເຄື່ອນໄຫວຮ່ວມມືກ່ຽວກັບຂໍ້ມູນໃຫຍ່ ແລະ Cloud Computing. ຄຽງຂ້າງກັນນັ້ນ, ສະພາມະຫາບັນດິດວິທະຍາສາດ - ເຕັກໂນໂລຊີ ຫວຽດນາມ (VAST) ແລະ ກະຊວງເຕັກໂນໂລຊີ ແລະ ການສື່ສານລາວ ຍັງໄດ້ປຶກສາຫາລື, ເປັນເອກະພາບສືບຕໍ່ການຮ່ວມມືໃນການພັດທະນາຊັບພະຍາກອນມະນຸດ, ເພີ່ມທະວີຄວາມສາມາດດ້ານວິຊາສະເພາະໃນຂົງເຂດເຕັກໂນໂລຊີ ແລະ ນະສັດຕະກຳ; ປະສົບການໃນການພັດທະນາເຕັກໂນໂລຊີດິຈິຕອນ.
ໃນຂອບເຂດການຢ້ຽມຢາມ, ວັນທີ 6 ສິງຫາ, ສະພາມະຫາບັນດິດວິທະຍາສາດ - ເຕັກໂນໂລຊີ ຫວຽດນາມ (VAST) ໄດ້ສົມທົບກັບກະຊວງເຕັກໂນໂລຊີ ແລະ ການສື່ສານລາວ ຈັດພິທີເປີດສະຫຼອງນຳໃຊ້ຫ້ອງທົດລອງຂໍ້ມູນ ແລະ ການສື່ສານກ່ຽວກັບໄພທຳມະຊາດຢູ່ລາວ.
ຫ້ອງທົດລອງໄດ້ເລີ່ມດັດແປງ ແລະ ຕິດຕັ້ງອຸປະກອນ ແລະ ຊອບແວໃນທ້າຍເດືອນກໍລະກົດ ທີ່ຜ່ານມາ ໂດຍມີຈໍສະແດງຜົນ 4 ໜ່ວຍ, ຄອມພິວເຕີຕັ້ງໂຕະ 2 ໜ່ວຍ ແລະ ອຸປະກອນອື່ນໆຈຳນວນໜຶ່ງທີ່ໃຊ້ເຂົ້າໃນວຽກເລັ່ງ ແລະ ວັດແທກສະພາບແຜ່ນດິນໄຫວຕາມເວລາຕົວຈິງ.
ອີງຕາມນັກທໍລະນີສາດກ່າວວ່າ: ຫ້ອງທົດລອງຈະມີບົດບາດສໍາຄັນໃນການຄົ້ນຄວ້າ ແລະ ການພັດທະນາບັນດາວິທີແກ້ໄຂເຕັກໂນໂລຊີທີ່ທັນສະໄຫມໃນຂົງເຂດຂໍ້ມູນ ແລະ ການເຜີຍແຜ່ສື່ສານ ກ່ຽວກັບໄພທໍາມະຊາດ; ເພີ່ມທະວີຄວາມສາມາດໃນການຄາດຄະເນ, ເຕືອນໄພ ແລະ ການຮັບມືກັບບັນດາປະກົດການໄພທຳມະຊາດ; ຝຶກອົບຮົມແຫຼ່ງຊັບພະຍາກອນມະນຸດທີ່ມີຄຸນນະພາບສູງໃນຂົງເຂດນີ້ໃຫ້ແກ່ລາວ ແລະ ຊຸກຍູ້ການຮ່ວມມືດ້ານການຄົ້ນຄ້ວາລະຫວ່າງນັກວິທະຍາສາດ ຫວຽດນາມ - ລາວ.
ນີ້ກໍເປັນການຢັ້ງຢືນເຖິງການເຊື່ອມໂຍງ ແລະ ແລກປ່ຽນລະຫວ່າງສອງປະເທດໃນຂົງເຂດວິທະຍາສາດ ແລະ ເຕັກໂນໂລຊີ, ປະກອບສ່ວນປັບປຸງນໍ້າໃຈມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ລາວ - ຫວຽດນາມ.
ທອງມີ ສີຫາວົງ
