ຫວຽດນາມ-ຍີ່ປຸ່ນ ເພີ່ມທະວີການພົບປະແລກປ່ຽນລັດຖະສະພາ, ແລກປ່ຽນປະສົບການນິຕິບັນຍັດ

	ຍີ່ປຸ່ນ ເຊີດຊູ ທ່ານ ຮວ່າງບິ່ງກວນ ທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນການພົວພັນມິດຕະພາບ ຫວຽດນາມ - ຍີ່ປຸ່ນ
	ສື່​ມວນ​ຊົນ​ຍີ່ປຸ່ນ​ໄດ້​ຕີ​ລາຄາ​ສູງ​ການ​ຢ້ຽມຢາມ​ຍີ່ປຸ່ນ​ຂອງ​ທ່ານ​ປະທານ​ປະ​ເທດ ຫວໍວັນເຖືອງ

ຫວ່້າງແລ້ວນີ້, ທີ່ຫໍສະພາແຫ່ງຊາດ, ທ່ານ ເຈິ່ນແທັງເໝິນ ປະທານສະພາແຫ່ງຊາດຫວຽດນາມ ໄດ້ຕ້ອນຮັບທ່ານ Tokai Kisaburo, ສະມາຊິກສະພາຕໍ່າ, ຫົວໜ້າຄະນະຄົ້ນຄວ້ານະໂຍບາຍ ພັກ ປະຊາທິປະໄຕ ເສລີ (LDP) ຍີ່ປຸ່ນ.

ທ່ານ ເຈິ່ນແທັງເໝິນ ປະທານສະພາແຫ່ງຊາດຫວຽດນາມ ຕ້ອນຮັບທ່ານ Tokai Kisaburo, ສະມາຊິກສະພາຕໍ່າ, ຫົວໜ້າຄະນະຄົ້ນຄວ້ານະໂຍບາຍ ພັກ ປະຊາທິປະໄຕ ເສລີ (LDP) ຍີ່ປຸ່ນ. ພາບ: quochoi.vn

ທ່ານປະທານສະພາແຫ່ງຊາດຫວຽດນາມ ຕີລາຄາວ່າ ການພົວພັນ ຫວຽດນາມ-ຍີ່ປຸ່ນ ພວມຢູ່ໃນໄລຍະອັນດີງາມທີ່ສຸດ. ເພື່ອຊຸກຍູ້ການພົວພັນສອງປະເທດ ໃຫ້ພັດທະນາຢ່າງແທດຈິງ ແລະມີປະສິດທິຜົນກວ່າອີກ, ທ່ານປະທານສະພາແຫ່ງຊາດ ສະເໜີໃຫ້ສືບຕໍ່ເພີ່ມທະວີການແລກປ່ຽນຄະນະຜູ້ແທນຂັ້ນສູງ ແລະທຸກຂັ້ນ; ພົບປະແລກປ່ຽນສະມາຊິກລັດຖະສະພາ, ໂດຍສະເພາະແມ່ນສະມາຊິກລັດຖະສະພາໜຸ່ມ ແລະສະມາຊິກລັດຖະສະພາຍິງ; ແລກປ່ຽນບົດຮຽນດ້ານນິຕິບັນຍັດລະຫວ່າງສອງປະເທດ. ທ່ານປະທານສະພາແຫ່ງຊາດ ຫວຽດນາມ ຫວັງວ່າ ທ່ານ Tokai ຈະສະໜັບສະໜູນ, ຊຸກຍູ້ລັດຖະບານຍີ່ປຸ່ນ ສະໜອງທຶນ ODA ລຸ້ນໃໝ່ໃຫ້ແກ່ຫວຽດນາມ ດ້ວຍສິດທິພິເສດສູງ, ລະບຽບການງ່າຍດາຍ, ມີຄວາມໄຫວພິບ, ສຸມໃສ່ເຂົ້າໃນບັນດາໂຄງການພັດທະນາພື້ນຖານໂຄງລ່າງຍຸດທະສາດຂະໜາດໃຫຍ່ ຄື ເສັ້ນທາງລົດໄຟໃນຕົວເມືອງ, ເສັ້ນທາງລົດໄຟຄວາມໄວສູງ; ຊຸກຍູ້ການລົງທຶນ, ຖ່າຍທອດເຕັກໂນໂລຊີຂອງບັນດາວິສາຫະກິດຍີ່ປຸ່ນ, ໜູນຊ່ວຍວິສາຫະກິດຫວຽດນາມ ເຂົ້າຮ່ວມຢ່າງເລິກເຊິ່ງກວ້າງຂວາງກວ່າໃນລະບົບຕ່ອງໂສ້ການສະໜອງມູນຄ່າທົ່ວໂລກຂອງບັນດາຄູ່ຮ່ວມມືຍີ່ປຸ່ນ; ພິຈາລະນາເປີດປະຕູຕະຫຼາດ ສໍາລັບໝາກໄມ້ຂອງຫວຽດນາມ...

ທ່ານປະທານສະພາແຫ່ງຊາດຫວຽດນາມ ຖືວ່າ ສອງປະເທດຕ້ອງເອົາໃຈໃສ່, ຊຸກຍູ້ການຮ່ວມມືໃນຂົງເຂດຫັນເປັນສີຂຽວ, ຫັນເປັນດີຈີຕອນ, ຫຼຸດຜ່ອນການປ່ອຍອາຍພິດກາກບອນ, ຫັນປ່ຽນພະລັງງານ, ສືບຕໍ່ຊຸກຍູ້ໃຫ້ມີໂຄງການຮ່ວມມື, ໂຄງການໃໝ່ໃນຂອບເຂດຂໍ້ລິເລີ່ມປະຊາຄົມຫຼຸດຜ່ອນການປ່ອຍອາຍພິດກາກບອນໃຫ້ເປັນສູນ ຢູ່ອາຊີ (AZEC) ຕື່ມອີກ; ໜູນຊ່ວຍຫວຽດນາມ ປະຕິບັດເປົ້າໝາຍບໍາລຸງກໍ່ສ້າງນັກວິສະວະກອນຂະແໜງ Semiconductor ຮອດປີ 2030 ໃຫ້ໄດ້ 50.000 ຄົນ.

ພ້ອມກັນນັ້ນ, ສອງຝ່າຍ ກໍເພີ່ມທະວີການສົມທົບກັນ, ແບ່ງປັນຫຼັກໝັ້ນ, ຮ່ວມມືກັນໃນບັນດາບັນຫາພາກພື້ນ ແລະສາກົນທີ່ຕ່າງຝ່າຍຕ່າງມີຄວາມສົນໃຈ, ໃນນັ້ນມີບັນຫາທະເລຕາເວັນອອກ.

ສ່ວນທ່ານ Tokai Kisaburo ເນັ້ນໜັກວ່າ ຈຸດປະສົງຂອງການຢ້ຽມຢາມແມ່ນ ເພື່ອແນໃສ່ເພີ່ມທະວີການຮ່ວມມືລະຫວ່າງສອງປະເທດໃນບັນດາຂົງເຂດການສຶກສາ-ກໍ່ສ້າງ, ວິທະຍາສາດ-ເຕັກໂນໂລຊີ; ປ່ຽນແປງໃໝ່ປະດິດສ້າງ...; ເຫັນດີເປັນເອກະພາບກັບຂໍ້ສະເໜີຂອງທ່ານປະທານສະພາແຫ່ງຊາດຫວຽດນາມ ໃນການເພີ່ມທະວີການພົວພັນລະຫວ່າງສອງປະເທດ, ພິເສດແມ່ນການຮ່ວມມືພົບປະແລກປ່ຽນຊັບພະຍາກອນມະນຸດ, ໂດຍສະເພາະແມ່ນສະມາຊິກລັດຖະສະພາໜຸ່ມ ແລະສະມາຊິກລັດຖະສະພາຍິງ; ຫວັງວ່າ ສະພາແຫ່ງຊາດ ຫວຽດນາມ ຈະສືບຕໍ່ສ້າງກອບນິຕິກໍາ, ປັບປຸງສະພາບແວດລ້ອມແຫ່ງການລົງທຶນ, ດໍາເນີນທຸລະກິດ, ຫັນລະບຽບການບໍໍລິຫານເປັນງ່າຍດາຍ, ສ້າງເງື່ອນໄຂສະດວກໃຫ້ແກ່ບັນດາບໍລິສັດຍີ່ປຸ່ນ ທີ່ມາລົງທຶນ, ດໍາເນີນທຸລະກິດ ຢູ່ຫວຽດນາມ.

ວັນທີ 2 ສິງຫາ, ທີ່ສໍານັກງານຄະນະພົວພັນຕ່າງປະເທດສູນກາງ, ທ່ານ ເລຮວ່າຍຈູງ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ໄດ້ໃຫ້ການຕ້ອນຮັບທ່ານ Tokai Kisaburo, ຫົວໜ້າຄະນະຄົ້ນຄວ້າ ນະໂຍບາຍພັກປະຊາທິປະໄຕເສລີຍີ່ປຸ່ນ.

ທີ່ການຕ້ອນຮັບ, ທ່ານ ເລຮວ່າຍຈູງ ຢັ້້ງຢືນວ່າ ພັກ, ລັດຫວຽດນາມ ຍາມໃດກໍ່ຖືເປັນສໍາຄັນການພົວພັນຄູ່ຮ່ວມມືຍຸດທະສາດຮອບດ້ານກັບຍ່ີປຸ່ນ, ປາດຖະໜາຢາກພ້ອມກັບຝ່າຍຍີ່ປຸ່ນ ເຮັດໃຫ້ການພົວພັນສອງຝ່າຍເລິກເຊິ່ງຂຶ້ນຕື່ມ. ທ່ານ ເລຮວ່າຍຈູງ ສະເໜີສອງຝ່າຍສືບຕໍ່ເພີ່ມທະວີຄວາມເຂົ້າໃຈເຊິ່ງກັນ ແລະກັນ, ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງຜ່ານການແລກ ປ່ຽນການຢ້ຽມຢາມຂັ້ນສູງລະຫວ່າງລັດຖະບານ, ສະພາແຫ່ງຊາດ, ລະຫວ່າງພັກກອມມູນິດຫວຽດນາມ ແລະພັກປະຊາທິປະໄຕເສລີຍີ່ປຸ່ນ; ສົມທົບກັນປະຕິບັດຂອບການພົວພັນຄູ່ຮ່ວມມືຍຸດທະສາດຮອບດ້ານຢ່າງມີປະສິດທິຜົນ; ຊຸກຍູ້ການຮ່ວມມືດ້ານເສດຖະກິດ-ການຄ້າ-ການລົງທຶນ, ການປ້ອງກັນຊາດ, ປ້ອງກັນຄວາມສະຫງົບ, ການພົບປະແລກປ່ຽນປະຊາຊົນລະຫວ່າງສອງປະເທດ...

ທ່ານ ເລຮວ່າຍຈູງ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ແລະທ່ານ Tokai Kisaburo, ຫົວໜ້າຄະນະຄົ້ນຄວ້ານະໂຍບາຍພັກປະຊາທິປະໄຕເສລີຍີ່ປຸ່ນ. ພາບ: ສໍານັກຂ່າວສານຫວຽດນາມ

ທ່ານ Tokai Kisaburo ເນັ້ນໜັກວ່າ ຍີ່ປຸ່ນຖືຫວຽດນາມ ແມ່ນຄູ່ຮ່ວມມືສໍາຄັນໃນພາກພື້ນ, ພ້ອມແລ້ວທີ່ຈະໜູນຊ່ວຍຫວຽດນາມ ປະຕິບັດເປົ້າໝາຍກາຍເປັນປະເທດພັດທະນາທີ່ມີລາຍຮັບສູງໃນປີ 2045. ທ່ານ Tokai Kisaburo ກໍ່ຢືນຢັນວ່າ ຍີ່ປຸ່ນພ້ອມແລ້ວທີ່ຈະເພີ່ມທະວີການຮ່ວມມືກັບຫວຽດນາມ ໃນບັນດາຂົງເຂດ, ຄື: ພື້ນຖານໂຄງລ່າງ, ວິທະຍາສາດ-ເຕັກໂນໂລຢີ, ການປ່ຽນແປງໃໝ່ປະດິດສ້າງ, ບໍາລຸງກໍ່ສ້າງຊັບພະຍາກອນມະນຸດ, ການຫັນປ່ຽນດີຈີຕອນ, ການຫັນປ່ຽນສີຂຽວ, ທາດເຄິ່ງຊັກນໍາໄຟຟ້າ ແລະສະໜອງ ODA ລຸ້ນໃໝ່ໃຫ້ຫວຽດນາມ ເພື່ອຕອບສະໜອງຄວາມຕ້ອງການກ່ຽວກັບການພັດທະນາແບບຍືນຍົງ.

ໃນວັນດຽວກັນ, ທ່ານລັດຖະມົນຕີການຕ່າງປະເທດ ບຸ່ຍແທັງເຊີນ ໄດ້ໃຫ້ການຕ້ອນຮັບທ່ານ Tokai Kisaburo, ທ່ານ ບຸ່ຍແທັງເຊີນ ໃຫ້ຮູ້ວ່າ ຫວຽດນາມ ພ້ອມແລ້ວທີ່ຈະຮ່ວມມືໜູນຊ່ວຍຍີ່ປຸ່ນ ຮັບມືກັບບັນຫາພົນລະເມືອງມີອາຍຸສູງ, ຟື້ນຟູຂະແໜງເຄ່ິງຊັກນໍາໄຟຟ້າຂອງຍີ່ປຸ່ນ ຜ່ານການຈັດສົ່ງແຮງງານ, ໃນນັ້ນ ມີແຮງງານທີ່ມີຄຸນນະພາບສູງ; ສະເໜີ ຍີ່ປຸ່ນ ໜູນຊ່ວຍຫວຽດນາມປະຕິບັດເປົ້າໝາຍບຳລຸງສ້າງນັກວິສະວະກອນຂະແໜງເຄິ່ງຊັກນໍາໄຟຟ້າ 50.000 ຄົນຮອດປີ 2030, ເພີ່ມທຶນການສຶກສາໃຫ້ນັກສຶກສາຫວຽດນາມ ໄປຮຽນຢູ່ຍີ່ປຸ່ນ. ທ່ານລັດຖະມົນຕີກໍ່ສະເໜີໃຫ້ລັດຖະບານຍີ່ປຸ່ນ ຫັນເປັນງ່າຍດາຍ ແລະມຸ່ງເຖິງການຍົກເວັ້ນວີຊາໃຫ້ພົນລະເມືອງຫວຽດນາມ ເພື່ອແນໃສ່ຊຸກຍູ້ການຮ່ວມມືດ້ານການທ່ອງທ່ຽວລະຫວ່າງ 2 ປະເທດ.

ເຫັນດີເປັນເອກະພາບກັບຂໍ້ສະເໜີຂອງທ່ານລັດຖະມົນຕີ ບຸ່ຍແທັງເຊີນ, ທ່ານ Tokai Kisaburo ຢືນຢັນຈະສືບຕໍ່ສະໜັບສະໜູນ, ເປັນເສນາທິການໃຫ້ລັດຖະບານ ຍີ່ປຸ່ນ ມີບັນດານະໂຍບາຍເພີ່ມທະວີການພົວພັນ 2 ຝ່າຍໂດຍສຸມໃສ່ການຮ່ວມມື ແລະໜູນຊ່ວຍຫວຽດນາມ ບຳລຸງສ້າງຊັບພະຍາກອນມະນຸດທີ່ມີຄຸນນະພາບສູງໃນຂົງເຂດໃໝ່, ເຊັ່ນ: ການຫັນເປັນສີຂຽວ, ການຫັນເປັນດີຈີຕອນ, ເຄິ່ງຊັກນໍາໄຟຟ້າ...; ຖືວ່າ, ລັດຖະບານຍີ່ປຸ່ນ ຈະສືບຕໍ່ມີນະໂຍບາຍສ້າງເງື່ອນໄຂ ແລະດຶງດູດແຮງງານຕ່າງປະເທດ, ໃນນັ້ນມີແຮງງານຫວຽດນາມ.