| ກະຊວງປ້ອງກັນປະເທດ ລາວ ຈັດການໂອ້ລົມຫົວເລື່ອງສະເພາະກ່ຽວກັບໄຊຊະນະ ດ້ຽນບຽນຝູ | |
| ຫວຽດນາມ ໄດ້ອອກຖະແຫຼງການກ່ຽວກັບເລື່ອງຈີນປະກາດຫ້າມຫາປາຢູ່ທະເລຕາເວັນອອກ |
ການເຄື່ອນໄຫວອາສາສະໝັກລະດູຮ້ອນຢູ່ລາວ ແມ່ນການເຄື່ອນໄຫວປະຈຳປີຂອງຄະນະຊາວໜຸ່ມນະຄອນໂຮ່ຈິມິນ ດ້ວຍພາລະກິດເຊື່ອມຕໍ່, ກໍ່ສ້າງ ແລະ ເພີ່ມພູນຄູນສ້າງນໍ້າໃຈມິດຕະພາບ ຫວຽດນາມ - ລາວ. ປີ 2024 ກໍ່ແມ່ນປີຄົບຮອບ 20 ປີແຫ່ງການເຄື່ອນໄຫວອາສາສະໝັກລະດູຮ້ອນຂອງຊາວໜຸ່ມນະຄອນໂຮ່ຈິມິນ ຢູ່ ສປປ ລາວ (2004-2024).
ເພື່ອນໃໝ່, ບົດຮຽນໃໝ່
ການເຄື່ອນໄຫວອາສາສະໝັກລະດູຮ້ອນຂອງຄະນະຊາວໜຸ່ມນະຄອນໂຮ່ຈິມິນ ປະຈຳ ສປປ ລາວ ໄດ້ໄຂຂຶ້ນໃນວັນທີ 15 ມິຖຸນາ ຢູ່ທີ່ສະໂມສອນເຍົາວະຊົນນະຄອນ. ທິມອາສາສະໝັກ ໄດ້ເຄື່ອນໄຫວເປັນເວລາ 15 ວັນ ຢູ່ແຂວງອັດຕະປື ແລະ ແຂວງຈໍາປາສັກ, ສປປ ລາວ. ພາຍຫຼັງ 18 ຊົ່ວໂມງຂອງການເດີນທາງ, ຄະນະທັງໝົດໄດ້ມາມີໜ້າຢູ່ດ່ານຊາຍແດນສາກົນເບີອີ່ (ກອນຕູ່ມ) ແລະ ໄດ້ປະກອບເອກະສານເຂົ້າເມືອງ, ເຂົ້າປະເທດເພື່ອນບ້ານຢ່າງເປັນທາງການ.
ໃນແຕ່ລະມື້ຢູ່ທີ່ນີ້, ຄະນະໄດ້ດຳເນີນຫຼາຍກິດຈະກຳຄື: ກວດພະຍາດ, ແຈກຢາຍຢາໃຫ້ປະຊາຊົນໂດຍບໍ່ເສຍຄ່າ; ຈັດຕັ້ງສະໜາມຫຼິ້ນ ແລະ ມອບຂອງຂວັນໃຫ້ເດັກນ້ອຍຢູ່ທ້ອງຖິ່ນ; ຈັດຕັ້ງການແຕ້ມລະບາຍສີ ແລະ ກໍ່ສ້າງເດີ່ນຫຼິ້ນ; ຝຶກອົບຮົມທັກສະວິຊາຊີບການເລີ່ມປະກອບອາຊີບ ແລະ ກະສິກຳໃຫ້ແກ່ຊາວໜຸ່ມ ແລະ ປະຊາຊົນທ້ອງຖິ່ນ...
ເປັນໜ້າສົນໃຈ, ບັນດານັກຮົບຂອງທິມອາສາສະໝັກປະຕິບັດ 3 ໂຄງການແຕ້ມຮູບລະບາຍສີ. ໃນນັ້ນ, ມີງານແຕ້ມຮູບ 2 ໂຄງການສົມທົບກັບສະໜາມຫຼິ້ນໃນຮົ່ມ ແລະ 1 ໂຄງການແຕ້ມຮູບຢູ່ກາງແຈ້ງ. ໂດຍເປັນຜູ້ຮັບຜິດຊອບໂຄງການແຕ້ມລະບາຍສີ, ນາງ ເຈີ່ນທິຮ່ວາຮະ (ນັກສຶກສາປີ 3, ມະຫາວິທະຍາໄລວິຈິດສິນ ນະຄອນໂຮ່ຈິມິນ) ໄດ້ມີຄວາມປະທັບໃຈເປັນພິເສດເຖິງຮູບແຕ້ມທີ່ທັງທີມປະຕິບັດຢູ່ໂຮງຮຽນປະຖົມ ຫຼັກທີ 43, ເມືອງປະທຸມພອນ, ແຂວງຈຳປາສັກ. ຮວ່າຮະ ໃຫ້ຮູ້ວ່າ ທິມງານແຕ້ມຮູບພ້ອມກັບການຊ່ວຍເຫຼືອຂອງທິມອື່ນໆ, ໄດ້ສຳເລັດໂຄງການພາຍໃນ 1 ວັນເຄິ່ງ, ເປັນເວລາໄວເມື່ອທຽບໃສ່ 2 ໂຄງການກ່ອນໜ້ານີ້. ເມື່ອຫວນຄືນເບິ່ງໂຄງການທີ່ສຳເລັດແລ້ວ, ຮວ່າຮະ ສຸດທີ່ມີຄວາມດີໃຈຫຼາຍທີ່ໄດ້ປະກອບສ່ວນເຂົ້າໃນບັນຍາກາດການຮຽນ, ການຫຼິ້ນໃຫ້ເດັກນ້ອຍຢູ່ຮາກຖານ. ການໄປຄັ້ງນີ້ຍັງໄດ້ຊ່ວຍໃຫ້ຮ່ວາຮະ ມີເພື່ອນມິດໃໝ່ ແລະ ໄດ້ຮຽນຮູ້ຫຼາຍສິ່ງຫຼາຍຢ່າງ.
ຖືກແຕ່ງຕັ້ງສົ່ງໄປເຂົ້າຮ່ວມເປັນຄັ້ງທີ 2, ທ່ານ ເຈີ່ນມິງດາດ, ນັກສຶກສາປີ 2, ມະຫາວິທະຍາໄລ ສັບພະວິຊາ (ມະຫາວິທະຍາໄລແຫ່ງຊາດນະຄອນ ໂຮ່ຈີມິນ) ໄດ້ທໍາຄວາມລື້ງເຄີຍຢ່າງໄວວາ ໃນການໄປປະເທດລ້ານຊ້າງນີ້. ໃນແຕ່ລະມື້ທີ່ເຄື່ອນໄຫວພົບປະສື່ສານກັບເດັກນ້ອຍ ມິງດາດ ໄດ້ຮຽນບັນດາປະໂຫຍກໃນການສື່ສານງ່າຍໆຄື ວິທີເອີ້ນເດັກນ້ອຍມາຫຼິ້ນນຳກັນ, ກິນເຂົ້າໜົມ... ຍ້ອນພາສາທີ່ແຕກຕ່າງກັນ, ເມື່ອຢາກໃຫ້ເດັກນ້ອຍໄດ້ຫຼິ້ນ, ມິງດາດ ຈະເຮັດໃຫ້ເດັກນ້ອຍເບິ່ງ ແລະ ປະຕິບັດຕາມ. ມິງດາດ ໃຫ້ຮູ້ວ່າ ຄວາມຊົງຈຳດີທີ່ສຸດແມ່ນເມື່ອໄປເຮັດວຽກຢູ່ໂຮງຮຽນມິດຕະພາບ ຫວຽດນາມ - ລາວ, ແຂວງຈຳປາສັກ. ເດັກນ້ອຍຢູ່ໂຮງຮຽນໄດ້ຮ້ອງເພງເຊັ່ນ: ຄືມີລຸງໂຮ່ໃນວັນແຫ່ງໄຊຊະນະ.
“ຂ້າພະເຈົ້າຮູ້ສຶກຕື່ນເຕັ້ນເມື່ອໄດ້ຍິນພວກເດັກນ້ອຍຮ້ອງເພງ ແລະ ຮູ້ສຶກເຖິງສາຍພົວພັນລະຫວ່າງສອງປະເທດ ແລະ ຄວາມຮັກແພງຂອງຊາວລາວ ທີ່ມີຕໍ່ລຸງໂຮ່”.
ເຫດການສຳຄັນທີ່ບໍ່ອາດລືມໄດ້ຂອງຊີວິດນັກສຶກສາ
ການເຂົ້າຮ່ວມທິມອາສາສະໝັກລະດູຮ້ອນຢູ່ ສປປ ລາວ ໃນຄັ້ງນີ້ ຍັງມີນັກສຶກສາມະຫາວິທະຍາໄລສ້າງຄູ ນະຄອນໂຮ່ຈິມິນ ຈຳນວນ 8 ຄົນ. ທິມປະຕິບັດວຽກງານການສອນຜ່ານການເຄື່ອນໄຫວສິດສອນພາສາຫວຽດນາມ ຢູ່ມະຫາວິທະຍາໄລຈຳປາສັກ ແລະ ຝຶກອົບຮົມຄູສອນຢູ່ໂຮງຮຽນມິດຕະພາບ ຫວຽດນາມ - ລາວ, ແຂວງຈຳປາສັກ. ບັນດາການເຄື່ອນໄຫວຢູ່ໂຮງຮຽນມິດຕະພາບ ຫວຽດນາມ - ລາວ ແມ່ນດຳເນີນໄປເພື່ອແນໃສ່ບັນດາຄູອາຈານ ແລະ ນັກຮຽນຊັ້ນ ປໍ 1-5 ທີ່ເປັນລູກຫຼານຊາວຫວຽດນາມ ອາໄສຢູ່ນະຄອນປາກເຊ, ແຂວງຈໍາປາສັກ.
 |
| ທິມນັກສຶກສາມະຫາວິທະຍາໄລສ້າງຄູ ນະຄອນໂຮ່ຈິມິນ ແນະນຳໃຫ້ນັກສຶກສາແຕ້ມຮູບລະບາຍສີຊຸດເສື້ອຍາວ. |
ນາງ ຫງວຽນທິຈຸກລ່າມ (ນັກສຶກສາປີ 4, ມະຫາວິທະຍາໄລສ້າງຄູ ນະຄອນໂຮ່ຈິມິນ) ໃຫ້ຮູ້ວ່າ ພາສາແມ່ນຄວາມຫຍຸ້ງຍາກໃຫຍ່ທີ່ສຸດ. ສິ່ງນີ້ເຮັດໃຫ້ທີິມງານບໍ່ສາມາດຖ່າຍທອດໄດ້ຢ່າງເຕັມສ່ວນ. ຢ່າງໃດກໍຕາມ, ຈຸກລ່າມ ແລະສ ະມາຊິກທີມຂອງລາວ ກໍ່ພະຍາຍາມສຸດຄວາມສາມາດຂອງເຂົາເຈົ້າ. ການໄດ້ຍິນພາສາຫວຽດນາມ ຢູ່ປະເທດອື່ນ ແລະ ເຫັນວ່າຄູອາຈານຢູ່ທີ່ນີ້ຍັງຮັກສາ ແລະ ເຜີຍແຜ່ພາສາຫວຽດນາມ ໃຫ້ແກ່ລູກຫຼານຄົນລຸ້ນຫຼັງນັ້ນ ກໍ່ເປັນທີ່ຊື່ນຊົມທີ່ສຸດສຳລັບອາສາສະໝັກທຸກຄົນແລ້ວ.
ນອກນັ້ນ, ທິມງານຍັງມີລາຍການການເຄື່ອນໄຫວແນະນຳວັດທະນະທຳ ຫວຽດນາມ ຜ່ານບັນດາຊຸດອາພອນ, ງານບຸນປະເພນີໄປສູ່ນັກຮຽນ ແລະ ປະຊາຊົນລາວ. ໂດຍເປັນຄົນທີ່ຢືນຢູ່ເທິງໜ້າກະດານສອນແນະນຳບັນດານັກຮຽນ, ຈຸກລ່າມ ຮູ້ສຶກເຖິງຄວາມຮັກແພງທີ່ຫຼວງຫຼາຍຈາກບັນດານ້ອງໆ. ໃນນັ້ນ, ຈຸກລ່າມ ໄດ້ຮັບຮູບພາບຈາກເດັກຍິງຊື່ວ່າ ລິ່ງດານ.
ຈຸກລ່າມ ໃຫ້ຮູ້ວ່າ: “ລິ່ງດານ ແມ່ນເດັກນ້ອຍທີ່ເວົ້າພາສາຫວຽດນາມ ໄດ້ດີ. ຍ້ອນມີຄວາມຮັກ, ນາງໄດ້ແຕ້ມຮູບຂ້າພະເຈົ້າໃນຂະນະທີ່ຂ້າພະເຈົ້າກໍາລັງສອນ". ນາງກ່າວວ່າ: “ເມື່ອເບິ່ງຄືນໃນ 15 ວັນທີ່ຜ່ານມາ, ທຸກໆຄັ້ງທີ່ສອນພາສາຫວຽດນາມ ໃຫ້ແກ່ນັກຮຽນລາວ ແລະ ຊາວລາວ ເຊື້ອສາຍຫວຽດນາມ, ຍາມໃດກໍຮູ້ສຶກພາກພູມໃຈທີ່ສຸດຕໍ່ພາລະກິດນຳພາສາຫວຽດນາມ ແລະ ວັດທະນະທຳ ຫວຽດນາມ ຫຍັບມາໃກ້ນັກຮຽນໃນປະເທດນີ້ຫຼາຍກວ່າອີກ".
ໃນມື້ສຸດທ້າຍຂອງການເດີນທາງ, ບັນດານັກຮົບອາສາສະໝັກໄດ້ມີການພົບປະກັບກົງສຸນໃຫຍ່ ສາທາລະນະລັດ ສັງຄົມນິຍົມ ຫວຽດນາມ ປະຈຳ ລາວ. ນີ້ແມ່ນຄວາມພາກພູມໃຈອັນໃຫຍ່ຫຼວງຂອງບັນດານັກຮົບໃນທິມງານ.
ກັບຄືນເມືອນະຄອນ ໂຮ່ຈີມິນ ພາຍຫຼັງ 15 ວັນປະຕິບັດວຽກງານ, ປະສົບການຢູ່ປະເທດເພື່ອນແມ່ນຄວາມຊົງຈຳທີ່ໜ້າຈົດຈຳຂອງບັນດານັກຮົບ. ສຳລັບ ກວິ່ງຍື່ (ນັກສຶກສາປີ 3, ມະຫາວິທະຍາໄລວິທະຍາສາດສັງຄົມ ແລະ ມະນຸດສາດ - ມະຫາວິທະຍາໄລແຫ່ງຊາດ ນະຄອນ ໂຮ່ຈີມິນ) ແລ້ວ, ການເດີນທາງໄດ້ນໍາມາເຊິ່ງບັນດາບົດຮຽນ ແລະ ປະສົບການຕົວຈິງໃນວຽກງານສື່ສານ. ກວິ່ງຍື່ ກໍ່ຍັງໄດ້ຮຽນຮູ້ເພີ່ມເຕີມກ່ຽວກັບທັກສະການສື່ສານ, ການດໍາລົງຊີວິດ ແລະ ມີຄວາມເຄົາລົບຕໍ່ຄວາມເອົາໃຈໃສ່ຈາກສະມາຊິກພາຍໃນທິມທີ່ມີຕໍ່ກັນ, ອາດເວົ້້າໄດ້ວ່າ 15 ວັນທີ່ອາສາສະໝັກ ຢູ່ລາວ ແມ່ນໜື່ງໃນບັນດາຂີດໝາຍທີ່ມີຄວາມໝາຍເປັນພິເສດ ໂດຍສະເພາະແມ່ນໃນຊີວິດນັກຮຽນຂອງບັນດານັກຮົບທ່ີ່ເຂົ້າຮ່ວມອາສາສະໝັກ.
ຊ ສະຫວັດ
