 | ການຢ້ຽມຢາມ ຫວຽດນາມ ຂອງ ເຟຣເດີຣິກ ອົງມົງກຸດລາຊະກຸມມານ ແຫ່ງລາຊະອານາຈັກເດນມາກ ໄດ້ປະກອບສ່ວນຊຸກຍູ້ການພົວພັນສອງຝ່າຍໃຫ້ດີຍິງຂຶ້ນອີກ |
| ຫວຽດນາມ ແລະ ກຳປູເຈຍ ພ້ອມກັນຮັກສາ, ເພີ່ມພູນຄູນສ້າງການພົວພັນສອງຝ່າຍອັນດີງາມ |
ເນື່ອງໃນໂອກາດນີ້, ທ່ານນາງ ຫງວຽນທິບິກຖາວ ເອກອັກຄະລັດຖະທູດ ຫວຽດນາມ ປະຈຳ ຮຸງກາຣີ ແລະ Croatia ໄດ້ໃຫ້ສຳພາດຕໍ່ນັກຂ່າວສຳນັກຂ່າວສານ ຫວຽດນາມ ປະຈຳ ເອີລົບ ໃຕ້ ກ່ຽວກັບຄວາມໝາຍຂອງເຫດການ , ກໍ່ຄືບັນດາໝາກຜົນທີ່ບັນລຸໄດ້ ແລະ ແງ່ຫວັງການຮ່ວມມືລະຫວ່າງ 2 ປະເທດໃນເວລາຈະມາເຖິງ. ຕໍ່ໄປນີ້ແມ່ນເນື້ອໃນຂອງການສົນທະນາ.
 |
| ທ່ານນາງເອກອັກຄະລັດຖະທູດ ຫງວຽນທິບິກຖາວ. |
ຮຽນທ່ານນາງເອກອັກຄະລັດຖະທູດ, ການພົວພັນລະຫວ່າງ ຫວຽດນາມ - Croatia ສືບຕໍ່ພັດທະນາຢ່າງເຂັ້ມແຂງ, ເຂົ້າສູ່ລວງເລິກ ແລະ ແທດຈິງໃນທຸກຂົງເຂດ. ຂໍຮຽນທ່ານນາງ ທົບທວນຄືນບາງຜົນງານທີ່ພົ້ນເດັ່ນຂອງການພົວພັນຮ່ວມມືໃນໄລຍະ 30 ປີຜ່ານມາ ແລະ ບັນດາທ່າແຮງທີ່ຕ້ອງໄດ້ຮັບການເສີມຂະຫຍາຍ.
ຫວຽດນາມ ຍາມໃດກໍ່ຖືເປັນສຳຄັນການປັບປຸງ ແລະ ພັດທະນາການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫຼາຍດ້ານທີ່ດີກັບບັນດາເພື່ອນມິດທີ່ເປັນມູນເຊື້ອຢູ່ເຂດ Balkan, ໃນນັ້ນ Croatia ແມ່ນບຸລິມະສິດ.
ໃນຕະຫຼອດໄລຍະ 3 ທົດສະວັດຜ່ານມາ, ການພົວພັນ ຫວຽດນາມ - Croatia ໄດ້ພັດທະນາຢ່າງຕັ້ງໜ້າ, ໄດ້ເປີດກວ້າງໃນຫຼາຍຂົງເຂດ, ເປັນໜ້າປະທັບໃຈທີ່ສຸດແມ່ນດ້ານການເມືອງ - ການທູດ, ເສດຖະກິດ, ການຄ້າ ແລະ ພວມມີຄວາມສາມາດບົ່ມຊ້ອນ ແລະ ທ່າແຮງຫຼາຍຢ່າງ. ໃນດ້ານການເມືອງ - ການທູດ, 2 ຝ່າຍຮັກສາການແລກປ່ຽນຄະນະຜູ້ແທນທຸກຂັ້ນ. ທ່ານ Stjepan Mesic ປະທານາທິບໍດີ Croatia ໄດ້ມາຢ້ຽມຢາມ ຫວຽດນາມ ໃນປີ 2008, ຫວ່າງກ່ອນນີ້ ແມ່ນການຢ້ຽມຢາມຢ່າງເປັນທາງການຂອງທ່ານນາງຮອງປະທານປະເທດ ຫວຽດນາມ ຫວໍທິແອ໋ງຊ່ວນ ຢູ່ Croatia (ເດືອນ ຕຸລາ ປີ 2022).
ການພົວພັນລະຫວ່າງການນຳຂັ້ນສູງຂອງສອງປະເທດຢູ່ນອກເວທີປາໄສຫຼາຍຝ່າຍໄດ້ດຳເນີນໄປຢ່າງເປັນປະຈຳ. ຫວ່າງມໍ່ໆມານີ້, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ໄດ້ມີການພົບປະກັບທ່ານນາຍົກລັດຖະມົນຕີ Croatia ຢູ່ນອກກອງປະຊຸມຂັ້ນສູງສະເຫຼີມສະຫຼອງວັນສ້າງຕັ້ງການພົວພັນ ອາຊຽນ - EU ຄົບຮອບ 45 ປີ ຢູ່ Brussels (ເດືອນທັນວາ ປີ 2022); ທ່ານລັດຖະມົນຕີກະຊວງການຕ່າງປະເທດ ຫວຽດນາມ ບຸ່ຍແທງເຊີນ ໄດ້ມີການພົບປະກັບທ່ານ Gordan Grlic Radman ລັດຖະມົນຕີກະຊວງການຕ່າງປະເທດ ແລະ ບັນດາບັນຫາ ເອີລົບ Croatian ຢູ່ນອກກອງປະຊຸມ OECD ຢູ່ ຝລັ່ງ (ເດືອນພຶດສະພາ ປີ 2024), 2 ຝ່າຍໄດ້ດຳເນີນການປຶກສາຫາລືດ້ານການເມືອງຂັ້ນຮອງລັດຖະມົນຕີການຕ່າງປະເທດຢູ່ Zagreb (ເດືອນມີນາ ປີ 2024).
ສອງປະເທດໄດ້ສົມທົບກັນຢ່າງຕັ້ງໜ້າກ່ຽວກັບບັນດາບັນຫາໃນພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ, ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສຫຼາຍຝ່າຍຄື ສປຊ, ສົມທົບກັນຊຸກຍູ້ການພັດທະນາການພົວພັນຄູ່ຮ່ວມມືຍຸດທະສາດ ອາຊຽນ - EU ຢ່າງແຮງ. ຫວຽດນາມ ແລະ Croatia ໄດ້ລົງນາມໃນສັນຍາອັນສຳຄັນຫຼາຍສະບັບ ສ້າງກອບນິຕິກຳໃຫ້ແກ່ການຮ່ວມມື ແລະ ພັດທະນາການພົວພັນລະຫວ່າງ 2 ປະເທດ, ພິເສດແມ່ນໃນຂົງເຂດການທູດ, ເສດຖະກິດ ແລະ ການຄ້າ.
ທ່ານນາງເອກອັກຄະລັດຖະທູດຕີລາຄາແນວໃດຕໍ່ກັບຄວາມສາມາດບົ່ມຊ້ອນການຮ່ວມມືລະຫວ່າງສອງປະເທດໃນໄລຍະຈະມາເຖິງ, ທັງໃນການພົວພັນລະຫວ່າງສອງຝ່າຍ ກໍ່ຄືການສົມທົບກັນໃນເວທີສາກົນ ແລະ ຢູ່ບັນດາເວທີປາໄສຫຼາຍຝ່າຍ, ຂໍຮຽນທ່ານນາງ?
ຄວາມສາມາດບົ່ມຊ້ອນການຮ່ວມມືລະຫວ່າງສອງປະເທດຍັງມີຂອບຂະໜາດໃຫຍ່ຫຼວງ, ບົນພື້ນຖານການເສີມຂະຫຍາຍທ່າແຮງທີ່ມີລັກສະນະຊ່ວຍຊູກັນ ແລະ ທ່າໄດ້ປຽບແກ່ງແຍ້ງຂອງແຕ່ລະປະເທດ, ຜ່ານຊ່ອງທາງສອງຝ່າຍ ແລະ ຫຼາຍຝ່າຍ. ດ້ວຍທັດສະນີຍະພາບທີ່ມີຊື່ສຽງໃນໂລກຫຼາຍແຫ່ງ ແລະ ມີຝັ່ງທະເລຍາວ, 2 ຝ່າຍມີຄວາມສາມາດບົ່ມຊ້ອນອັນໃຫຍ່ຫຼວງໃນການຮ່ວມມືດ້ານການທ່ອງທ່ຽວ, ເສດຖະກິດທາງທະເລ, ການຂົນສົ່ງ ແລະ ການພົບປະແລກປ່ຽນປະຊາຊົນ... ຫວຽດນາມ ພ້ອມແລ້ວທີ່ຈະເປັນປະຕູໃຫ້ສິນຄ້າຂອງ Croatia ເຂົ້າເຖິງທ້ອງຕະຫຼາດ ຫວຽດນາມ ແລະ ອາຊຽນ. ໃນບັນດາເວທີປາໄສຫຼາຍຝ່າຍ, ສອງປະເທດຈະເພີ່ມທະວີການຮ່ວມມືໃນຂອບເຂດ ອາຊຽນ - EU, ASEM ກໍ່ຄືໃນຂົງເຂດຮັກສາສັນຕິພາບ, ການຮັບມືກັບການປ່ຽນແປງຂອງດິນຟ້າອາກາດ, ການໜູນຊ່ວຍດ້ານມະນຸດສະທຳ...
ຂໍຮຽນທ່ານນາງເອກອັກຄະລັດຖະທູດ ຂໍໃຫ້ທ່ານນາງແບ່ງປັນກ່ຽວກັບແຜນການຂອງສະຖານທູດທີ່ສົມທົບກັບບັນດາອົງການທີ່ກ່ຽວຂ້ອງຂອງ Croatia ເພື່ອຈັດຕັ້ງບັນດາການເຄື່ອນໄຫວເພື່ອສະເຫຼີມສະຫຼອງ 30 ປີແຫ່ງວັນສ້າງຕັ້ງສາຍພົວພັນທາງການທູດລະຫວ່າງ 2 ປະເທດ.
ເນື່ອງໃນໂອກາດສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດ, ທ່ານນາງຮອງລັດຖະມົນຕີການຕ່າງປະເທດ ຫວຽດນາມ ເລທິທູຮັ່ງ ໄດ້ໄປຢ້ຽມຢາມ Croatia ເພື່ອປຶກສາຫາລືດ້ານການເມືອງກັບທ່ານລັດຖະມົນຕີກະຊວງການຕ່າງປະເທດ ແລະ ບັນດາບັາຫາ ເອີລົບ Frano Matusic (ເດືອນ ມີນາ ປີ 2024). ຫວ່າງມໍ່ໆມານີ້, ທ່ານລັດຖະມົນຕີກະຊວງການຕ່າງປະເທດ ບຸ່ຍແທງເຊີນ ໄດ້ແລກປ່ຽນຈົດໝາຍອວຍພອນກັບທ່ານລັດຖະມົນກະຊວງການຕ່າງປະເທດ ແລະ ບັນດາບັນຫາ ເອີລົບ ຂອງ Croatia Gordan Grlić Radman ເນື່ອງໃນໂອກາດສະເຫຼີມສະຫຼອງນີ້.
ພິເສດ, ວັນທີ 7 ກໍລະກົດ ປີ 2024, ສະຖານທູດ ຫວຽດນາມ ຈະນຳໜ້າຄະນະຜູ້ແທນວິສາຫະກິດ, ບັນດາສະມາຄົມ ຫວຽດນາມ 70 ກວ່າຄົນໄປຍັງ Croatia ເພື່ອສົມທົບກັບອຳນາດການປົກຄອງປະຈຳຖິ່ນ, ກະຊວງການຕ່າງປະເທດ ແລະ ບັນດາບັນຫາ ເອີລົບ ຂອງ Croatia ຈັດຕັ້ງ “ວັນວັດທະນະທຳ ຫວຽດນາມ “ຢູ່ Croatia ເນື່ອງໃນໂອກາດສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - Croatia. ຄາດວ່າເຫດການນີ້ຈະດຶງດູດຊາວທ້ອງຖິ່ນ ແລະ ຄະນະຜູ້ແທນທາງການທູດຢູ່ Croatia ນັບພັນຄົນ ດ້ວຍບັນດາການເຄື່ອນໄຫວໂຄສະນາວັດທະນະທຳ ຫວຽດນາມ ຜ່ານບັນດາລາຍການພິເສດຄື: ການສະແດງດົນຕີ ແລະ ຟ້ອນ, ງານວາງສະແດງຮູບພາບ ແລະ ລາຍການສາຍຮູບເງົາກ່ຽວກັບ ຫວຽດນາມ, ແນະນຳອາຫານການກິນຂອງ ຫວຽດນາມ, ແຕ້ມໂຕໜັງສືຈີນ, ແນະນຳບັນດາເຄື່ອງຫັດຖະກຳ, ສິລະປະວິຈິດສິນ, ຜະລິດຕະພັນກະເສດຂອງ ຫວຽດນາມ, ອອກແບບບັນດາເຂດລະຫຼິ້ນ, ແນະນຳໃຫ້ລູກຫຼານຊາວ Croatia ທາສີ ແລະ ວາດພາບທິວທັດທຳມະຊາດ, ບ້ານເກີດຂອງ ຫວຽດນາມ... ຂ້າພະເຈົ້າຫວັງວ່າເຫດການນີ້ຈະບັນລຸຜົນສຳເລັດອັນໃຫຍ່ຫຼວງ, ເຜີຍແຜ່ພາບພົດທີ່ເປັນມິດຂອງຊາວ ຫວຽດນາມ ໃນໃຈຊາວ Croatian.
ຕາມທ່ານນາງເອກອັກຄະລັດຖະທູດແລ້ວ, ສອງປະເທດຕ້ອງເຮັດແນວໃດເພື່ອໃຫ້ການພົວພັນສອງຝ່າຍສືບຕໍ່ພັດທະນາໃນໄລຍະຈະມາເຖິງ?
ຫວຽດນາມ ແລະ Croatia ຕ້ອງສືບຕໍ່ເພີ່ມທະວີການແລກປ່ຽນຄະນະຜູ້ແທນທຸກຂັ້ນໃນທຸກຊ່ອງທາງຂອງລັດ ແລະ ສະພາແຫ່ງຊາດ, ລະຫວ່າງບັນດາກະຊວງ, ຂະແໜງການ, ທ້ອງຖິ່ນ ເພື່ອແນໃສ່ເພີ່ມທະວີຄວາມໄວ້ເນື້ອເຊື່ອໃຈທາງດ້ານການເມືອງ ແລະ ຄວາມເຂົ້າໃຈເຊິ່ງກັນ ແລະ ກັນ, ເປັນພື້ນຖານຊຸກຍູ້ການຮ່ວມມື.
ສອງປະເທດຕ້ອງກຳນົດການຮ່ວມມືດ້ານເສດຖະກິດ, ການຄ້າ ແລະ ການລົງທຶນ ເປັນເສົາຄ້ຳສຳຄັນຂອງການພົວພັນສອງຝ່າຍໃນໄລຍະຈະມາເຖິງ, ເປີດກວ້າງການລົງນາມບັນດາຂໍ້ຕົກລົງໃນບັນດາຂົງເຂດອື່ນໆຄື: ວັດທະນະທຳ, ກິລາ, ການສຶກສາ, ການທ່ອງທ່ຽວ, ແຮງງານ…; ຊຸກຍູ້ການສ້າງຕັ້ງຄະນະກຳມະການລະຫວ່າງລັດຖະບານສອງປະເທດກ່ຽວກັບການຮ່ວມມືດ້ານເສດຖະກິດ; ສຸມໃສ່ປະຕິບັດສັນຍາການຄ້າເສລີ ຫວຽດນາມ - ສະຫະພາບ ເອີລົບ (EVFTA) ຢ່າງມີປະສິດທິຜົນ ແລະ ຄົບຖ້ວນ ແລະ ໄລຍະທີ່ຈະມາເຖິງແມ່ນ ສັນຍາອາລັກຂາການລົງທຶນລະຫວ່າງ EU ແລະ ຫວຽດນາມ (EVIPA) . ພ້ອມກັນນັ້ນ, ສອງຝ່າຍຍັງຕ້ອງສຸມໃສ່ສະໜອງຂໍ້ມູນຂ່າວສານ ແລະ ສ້າງບັນດາໂຄງການສົ່ງເສີມການຄ້າ ແລະ ການລົງທຶນ ເພື່ອສ້າງເງື່ອນໄຂໃຫ້ປະຊາຄົມວິສາຫະກິດ 2 ປະເທດມີຄວາມເຂົ້າໃຈກວ່າອີກກ່ຽວກັບສະພາບແວດລ້ອມແຫ່ງການດຳເນີນທຸລະກິດ ແລະ ການລົງທຶນຂອງກັນ.
ຂໍຮຽນທ່ານນາງເອກອັກຄະລັດຖະທູດກະລຸນາໃຫ້ຮູ້ກ່ຽວກັບຈຸດສຸມຂອງການຮ່ວມມືລະຫວ່າງ ຫວຽດນາມ ແລະ Croatia ໃນປີ 2024 ກໍ່ຄືໃນຊຸມປີຕໍ່ໄປ?
ບົນພື້ນຖານການຮ່ວມມືອັນດີງາມລະຫວ່າງສອງປະເທດ, ໃນປີນີ້ກໍຄືໃນໄລຍະຈະມາເຖິງ, ຫວຽດນາມ ແລະ Croatia ຈະສຸມໃສ່ຊຸກຍູ້ ແລະ ເພີ່ມທະວີການແລກປ່ຽນຄະນະຜູ້ແທນຂັ້ນສູງ; ສ້າງຕັ້ງບັນດາກົນໄກການຮ່ວມມືໃໝ່; ເປີດກວ້າງການຮ່ວມມືຂອງລັດຖະສະພາ.
ນອກຈາກນັ້ນ, ສອງປະເທດກໍ່ສືບຕໍ່ຂຸດຄົ້ນ ແລະ ເປີດກວ້າງການພົວພັນໃນບັນດາຂົງເຂດທີ່ມີຄວາມສາມາດບົ່ມຊ້ອນ ແລະ ມີທ່າແຮງຊ່ວຍຊູກັນຕື່ມອີກຄື: ການປຸງແຕ່ງສະບຽງອາຫານ, ການຂົນສົ່ງ, ການຫັນປ່ຽນພະລັງງານສະອາດ, ເຕັກໂນໂລຢີສູງ, ເສດຖະກິດດີຈີຕອນ, ການຢາ… ໃນໄລຍະຈະມາເຖິງ, ຫວຽດນາມ ຄາດຄະເນວ່າ ຈະແຕ່ງຕັ້ງກົງສຸນກິດຕິມະສັກຢູ່ Zagreb ເພື່ອຊຸກຍູ້ການພົວພັນສອງຝ່າຍ, ພິເສດແມ່ນໃນຂົງເຂດເສດຖະກິດ, ການຄ້າ ແລະ ໜູນຊ່ວຍພົນລະເມືອງ ຫວຽດນາມ ຢູ່ Croatia.
ຂໍຂອບໃຈທ່ານນາງເອກອັກຄະລັດຖະທູດ!
 | ຫວຽດນາມ-ອິນເດຍ ມີກໍາລັງບົ່ມຊ້ອນຫຼາຍຢ່າງ ເພື່ອພັດທະນາການພົວພັນສອງຝ່າຍ ຍສໝ - ລະຫວ່າງ ຫວຽດນາມ ແລະ ອິນເດຍ ມີວິໄສທັດ ແລະ ວິທີການເຂົ້າເຖິງ ກັບບັນດາບັນຫາສາກົນໃຫຍ່, ບັນດາບັນຫາໃນພາກພື້ນ. |
 | ບັນດາໝາກຜົນສຳຄັນໃນການພົວພັນສອງຝ່າຍ ແລະ ຫລາຍຝ່າຍ ຍສໝ - ການຢ້ຽມຢາມ ແລະ ເຄື່ອນໄຫວຢູ່ ບູນກາຣີ, ປອກຕູການ ແລະ ເກຼັກ ຂອງທ່ານນາງ ຫວໍທິແອງຊວນ ຮອງປະທານປະເທດ ຫວຽດນາມ ໄດ້ສືບຕໍ່ສະແດງໃຫ້ເຫັນການປະກອບສ່ວນຂອງ ຫວຽດນາມ ຢູ່ບັນດາເວທີປາໄສການທູດຫຼາຍຝ່າຍ. |
ມິງດຶກ
