ທີ່ການພົບປະ, ທ່ານນາງ ຫງວຽນເຟືອງຮວ່າ ໄດ້ຕີລາຄາສູງບັນດາການເຄື່ອນໄຫວຂອງສູນພົບປະແລກປ່ຽນວັດທະນະທຳ ຍີ່ປຸ່ນ ປະຈຳ ຫວຽດນາມ ໃນໄລຍະມໍ່ໆມານີ້ ດ້ວຍບັນດາຂີດໝາຍສຳຄັນຄື: ການຈັດຕັ້ງລາຍການສະແດງສິລະປະ, ງານວາງສະແດງ, ງານມະຫາກຳຮູບເງົາ ຍີ່ປຸ່ນ, ພິເສດແມ່ນເນື່ອງໃນໂອກາດສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ ຫວຽດນາມ - ຍີ່ປຸ່ນ.
 |
| ທ່ານ ນາງ ຫງວຽນເຟືອງຮວ່າ ຫົວໜ້າກົມຮ່ວມມືສາກົນ, ກະຊວງວັດທະນະທຳ, ກິລາ ແລະ ທ່ອງທ່ຽວ ຫວຽດນາມ (ຂວາ) ໄດ້ມອບໃບອະນຸຍາດສ້າງຕັ້ງ ແລະ ດຳເນີນເຄື່ອນໄຫວໃຫ້ແກ່ທ່ານ Yoshioka Norihiko ຜູ້ອຳນວຍການສູນແລກປ່ຽນວັດທະນະທຳ ຍີ່ປຸ່ນ ປະຈຳ ຫວຽດນາມ. (ພາບ: icd.gov.vn) |
ທ່ານນາງ ຫງວຽນເຟືອງຮວ່າ ໃຫ້ຮູ້ວ່າ ໃນຊຸມປີມໍ່ໆມານີ້, ກະຊວງວັດທະນະທຳ, ກິລາ ແລະ ທ່ອງທ່ຽວ ຫວຽດນາມ ໄດ້ເປັນເຈົ້າການສົມທົບກັບບັນດາທ້ອງຖິ່ນຂອງ ຍີ່ປຸ່ນ ເພື່ອຈັດຕັ້ງງານບຸນ ຫວຽດນາມ ຫຼາຍຄັ້ງຄື: ງານສົ່ງເສີມການທ່ອງທ່ຽວ - ວັດທະນະທຳ ຫວຽດນາມ ຢູ່ Tokyo, Kanagawa ແລະ Hokkaido ເພື່ອເພີ່ມທະວີບັນດາການເຄື່ອນໄຫວສົ່ງເສີມ, ໂຄສະນາການທ່ອງທ່ຽວ, ການພົບປະແລກປ່ຽນວັດທະນະທຳ, ກິລາກັບບັນດາທ້ອງຖິ່ນຂອງ ຍີ່ປຸ່ນ. ນອກຈາກນັ້ນ, ຫວຽດນາມ ກໍ່ຍັງໄດ້ເຂົ້າຮ່ວມງານວາງສະແດງສາກົນ EXPO 2025 Osaka, Kansai, ຍີ່ປຸ່ນ ດ້ວຍຄວາມມຸ່ງມາດປາດຖະໜາຢາກໂຄສະນາ ຫວຽດນາມ ເຖິງປະຊາຊົນ ຍີ່ປຸ່ນ ແລະ ເພື່ອນມິດສາກົນ.
ທ່ານກໍປາດຖະໜາວ່າ ໃນໄລຍະຈະມາເຖິງ, ສູນພົບປະແລກປ່ຽນວັດທະນະທຳ ຍີ່ປຸ່ນ ປະຈຳ ຫວຽດນາມ ຈະສົມທົບກັບກະຊວງວັດທະນະທຳ, ກິລາ ແລະ ທ່ອງທ່ຽວ ເພື່ອຈັດຕັ້ງບັນດາການເຄື່ອນໄຫວແລກປ່ຽນວັດທະນະທຳບໍ່ພຽງແຕ່ຢູ່ບັນດານະຄອນໃຫຍ່ຂອງ ຫວຽດນາມ ເຊັ່ນ ຮ່າໂນ້ຍ, ດານັງ, ນະຄອນ ໂຮ່ຈີມິນ ເທົ່ານັ້ນ ແຕ່ຈະແຜ່ລາມອອກສູ່ຫຼາຍທ້ອງຖິ່ນຂອງ ຫວຽດນາມ. ໂດຍຜ່ານນັ້ນ ກໍຈະປະກອບສ່ວນຊຸກຍູ້ການຮ່ວມມື, ພົບປະແລກປ່ຽນວັດທະນະທຳລະຫວ່າງ 2 ປະເທດ, ເພີ່ມທະວີຄວາມເຂົ້າໃຈຂອງປະຊາຊົນ ຫວຽດນາມ ກ່ຽວກັບພື້ນຖານວັດທະນະທຳ ຍີ່ປຸ່ນ.
ພ້ອມກັນນັ້ນ, ທ່ານນາງ ຫງວຽນເຟືອງຮວ່າ ຍັງປາດຖະໜາວ່າ ສູນພົບປະແລກປ່ຽນວັດທະນະທຳ ຍີ່ປຸ່ນ ຢູ່ ຫວຽດນາມ ຈະແມ່ນຂົວເຊື່ອມຕໍ່ບັນດານະຄອນສ້າງສັນຂອງ ຫວຽດນາມ ກັບບັນດານະຄອນສ້າງສັນຂອງ ຍີ່ປຸ່ນ, ເພື່ອໃຫ້ 2 ຝ່າຍ ໄດ້ສາມາດຮ່ຳຮຽນເອົາປະສົບການຂອງກັນ.
ໂດຍເຫັນດີເປັນເອກະພາບກັບຂໍ້ສະເໜີຂອງທ່ານນາງ ຫງວຽນເຟືອງຮວ່າ, ຜູ້ອຳນວຍການສູນພົບປະແລກປ່ຽນວັດທະນະທຳ ຍີ່ປຸ່ນ ປະຈຳຫວຽດນາມ Yoshioka Norihiko ໃຫ້ຮູ້ວ່າ ລັດຖະບານ ຍີ່ປຸ່ນ ກໍ່ໄດ້ຕີລາຄາສູງບົດບາດຂອງການແລກປ່ຽນວັດທະນະທຳຢູ່ບັນດາທ້ອງຖິ່ນຂອງ ຍີ່ປຸ່ນ, ຜ່ານນັ້ນ ກໍຊຸກຍູ້ຂະແໜງການທ່ອງທ່ຽວໃຫ້ພັດທະນາ, ປະກອບສ່ວນເຂົ້າໃນການເຕີບໂຕເສດຖະກິດຂອງປະເທດຊາດ.
ທ່ານ Yoshioka Norihiko ໄດ້ແບ່ງປັນຂໍ້ມູນກ່ຽວກັບໂຄງການ “ໂຄງການ WA 2.0” ເຊິ່ງເປັນໂຄງການແລກປ່ຽນວັດທະນະທໍາ, ແລກປ່ຽນປະຊາຊົນຮອບດ້ານ ເຊິ່ງໄດ້ປະກາດເລີ່ມຕົ້ນ ໂດຍທ່ານນາຍົກລັດຖະມົນຕີ ຍີ່ປຸ່ນ Kishida Fumio ຢູ່ກອງປະຊຸມຂັ້ນສູງສະເຫຼີມສະຫຼອງ 50 ປີແຫ່ງວັນມິດຕະພາບ ແລະ ການຮ່ວມມື ອາຊຽນ-ຍີ່ປຸ່ນ. ໂຄງການນີ້ ຈະໄດ້ຮັບການຜັນຂະຫຍາຍຢ່າງເຂັ້ມເເຂງໃນສິບປີຂ້າງໜ້າ (2024 - 2034) ດ້ວຍສອງໂຄງການຫຼັກແຫຼ່ງແມ່ນ "ການແລກປ່ຽນຄວາມຮູ້ ແລະ ວັດທະນະທຳສອງສົ້ນ" ແລະ ຄູ່ຮ່ວມມືພາສາ ຍີ່ປຸ່ນ ໂດຍກອງທຶນແລກປ່ຽນສາກົນ ຍີ່ປຸ່ນ ປະຕິບັດ. ໂຄງການນີ້ ຄາດວ່າຈະລົງເລິກການແລກປ່ຽນດ້ານວັດທະນະທຳ, ພາສາລະຫວ່າງ ຍີ່ປຸ່ນ ແລະ ບັນດາປະເທດ ອາຊຽນ, ພິເສດແມ່ນ ຫວຽດນາມ.
ບົນພື້ນຖານນັ້ນ, ສູນແລກປ່ຽນວັດທະນະທຳ ຍີ່ປຸ່ນ ຢູ່ ຫວຽດນາມ ຈະເພີ່ມທະວີການຈັດຕັ້ງບັນດາການເຄື່ອນໄຫວແລກປ່ຽນວັດທະນະທຳຫຼາຍຢ່າງຄື ງານມະຫະກຳຮູບເງົາ ຍີ່ປຸ່ນ, ງານວາງສະແດງ, ການສອນພາສາ ຍີ່ປຸ່ນ, ການຄົ້ນຄວ້າ, ແລກປ່ຽນປະສົບການກ່ຽວກັບອຸດສາຫະກຳວັດທະນະທຳລະຫວ່າງສອງປະເທດ. ທ່ານ Yoshioka Norihiko ໄດ້ຕີລາຄາສູງການໜູນຊ່ວຍ, ປະສານງານຂອງກົມຮ່ວມມືສາກົນ, ກະຊວງວັດທະນະທຳ, ກິລາ ແລະ ທ່ອງທ່ຽວ ຫວຽດນາມ ໃນການຈັດຕັ້ງບັນດາການເຄື່ອນໄຫວແລກປ່ຽນວັດທະນະທຳທີ່ຟົດຟື້ນໃນໄລຍະມໍ່ໆມານີ້; ຫວັງວ່າກົມ ຈະສືບຕໍ່ໜູນຊ່ວຍ, ສ້າງເງື່ອນໄຂເພື່ອສູນແລກປ່ຽນວັດທະນະທຳ ຍີ່ປຸ່ນ ຢູ່ ຫວຽດນາມ ສືບຕໍ່ດຳເນີນງານຢ່າງມີປະສິດທິຜົນໃນໄລຍະຈະມາເຖິງ.
ເນື່ອງໃນໂອກາດນີ້, ທ່ານນາງ ຫງວຽນເຟືອງຮວ່າ ໄດ້ມອບໃບອະນຸຍາດສ້າງຕັ້ງ ແລະ ເຄື່ອນໄຫວໃຫ້ແກ່ທ່ານ Yoshioka Norihiko ຜູ້ອຳນວຍການສູນແລກປ່ຽນວັດທະນະທຳ ຍີ່ປຸ່ນ ປະຈຳ ຫວຽດນາມ.
ມິງດຶກ
