ກະຊວງວັດທະນະທຳ, ກິລາ ແລະ ທ່ອງທ່ຽວ ຫວຽດນາມ ໃຫ້ຮູ້ວ່າ ໃນໄລຍະອາຍຸການ 4 ປີຢູ່ ຫວຽດນາມ, ທ່ານເອກອັກຄະລັດຖະທູດ Yamada Takio ໄດ້ມີຫຼາຍການປະກອບສ່ວນອັນໃຫຍ່ຫຼວງເຂົ້າໃນການຊຸກຍູ້ການຮ່ວມມືດ້ານວັດທະນະທຳ, ກິລາ ແລະ ທ່ອງທ່ຽວລະຫວ່າງ 2 ປະເທດ ຫວຽດນາມ - ຍີ່ປຸ່ນ.
 |
| ທ່ານລັດຖະມົນຕີກະຊວງວັດທະນະທຳ, ກິລາ ແລະ ທ່ອງທ່ຽວ ຫວຽດນາມ ຫງວຽນວັນຮຸ່ງ ໄດ້ມອບຫຼຽນກາລະນຶກ “ເພື່ອພາລະກິດວັດທະນະທຳ, ກິລາ ແລະ ທ່ອງທ່ຽວ” ໃຫ້ທ່ານເອກອັກຄະລັດຖະທູດ Yamada Takio (ພາບ: ກະຊວງວັດທະນະທຳ, ກິລາ ແລະ ທ່ອງທ່ຽວ). |
ຂີດໝາຍອາຍຸການຂອງທ່ານເອກອັກຄະລັດຖະທູດ Yamada Takio ໃນຂົງເຂດວັດທະນະທຳ, ກິລາ ແລະ ທ່ອງທ່ຽວ ໄດ້ຮັບການສະແດງໃຫ້ເຫັນຢ່າງຈະແຈ້ງຜ່ານການຈັດຕັ້ງການເຄື່ອນໄຫວວັດທະນະທຳສິລະປະ, ກິລາ 500 ກ່ວາແຫ່ງ ເພື່ອສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ຍີ່ປຸ່ນ ປີ 2023, ພົ້ນເດັັ່ນ ແມ່ນງານວາງສະແດງໂຄງການ opera “ເຈົ້າຍິງ Anio” ຢູ່ໂຮງລະຄອນໃຫຍ່ ຮ່າໂນ້ຍ ເຊິ່ງເປັນກຽດໄດ້ຕ້ອນຮັບເຈົ້າຟ້າຊາຍ ຍີ່ປຸ່ນ Akishino ແລະ ເຈົ້າຍິງພ້ອມກັນກັບ ທ່ານຮອງນາຍົກລັດຖະມົນຕີ ຫວຽດນາມ ເຈີ່ນລິວກວາງ ມາຮັບຊົມ, ລາຍການ “ຊຸດເສື້ອຍາວ - Kimono Fashion Show” (ມີນາ 2023), ການພົບປະແລກປ່ຽນນ້ຳຊາຂອງນິກາຍ Urasenke (ມີນາ 2023), ການສະແດງລະຄອນຊວນຫົວພື້ນເມືອງ Kyogen ຢູ່ ຮ່າໂນ້ຍ ແລະ ຮ່ານາມ (ພຶດສະພາ 2023), ລາຍການ “ດົນຕີປະສານສຽງບໍ່ມີຊື່” (ກໍລະກົດ 2023), ການອຸປະຖຳໃຫ້ລາຍການ "ງານມະໂຫລານຂັບລຳພື້ນເມືອງ ຫວຽດນາມ - ຍີ່ປຸ່ນ 2023”, ຈັດຕັ້ງຄ່ຳຄືນງານມະໂຫລານປິດພິທີປີສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ ຫວຽດນາມ - ຍີ່ປຸ່ນ...
ພາຍໃຕ້ການຊີ້ນຳ, ການເເນະນຳຂອງທ່ານເອກອັກຄະລັດຖະທູດ Yamada, ສູນຂໍ້ມູນວັດທະນະທຳ ໄດ້ຮັບການສ້າງຕັ້ງຂຶ້ນຢູ່ພາຍໃນສະຖານທູດ, ເປີດປະຕູຮັບໃຊ້ມະຫາຊົນນັບແຕ່ເດືອນທັນວາ 2022. ນອກຈາກການຈັດຕັ້ງບັນດາລາຍການພົບປະແລກປ່ຽນ, ເຫດການແນະນຳວັດທະນະທຳຂອງສະຖານທູດ ຢ່າງຕໍ່ເນື່ອງ, ສະຖານທີ່ນີ້ ຍັງເປີດປະຕູໃຫ້ປະຊາຊົນເຂົ້າຮ່ວມ ແລະ ຖືກນຳໃຊ້ເປັນສະຖານທີ່ຈຸດສຸມໃນການພົບປະແລກປ່ຽນ ຍີ່ປຸ່ນ - ຫວຽດນາມ ເພື່ອເພີ່ມທະວີຄວາມເຂົ້າໃຈເຊິ່ງກັນ ແລະ ກັນ ແລະ ຊຸກຍູ້ການພົວພັນມິດຕະພາບລະຫວ່າງ ຍີ່ປຸ່ນ - ຫວຽດນາມ.
ຄຽງຄູ່ກັບການຈັດຕັ້ງຫຼາຍລາຍການແນະນຳວັດທະນະທຳ ຍີ່ປຸ່ນ ຢູ່ ຫວຽດນາມ, ທ່ານເອກອັກຄະລັດຖະທູດ ໄດ້ໜູນຊ່ວຍໃຫ້ກະຊວງວັດທະນະທຳ, ກິລາ ແລະ ທ່ອງທ່ຽວ ຈັດຕັ້ງການເຄື່ອນໄຫວແນະນຳວັດທະນະທຳ, ທ່ອງທ່ຽວ ຫວຽດນາມ ຢູ່ ຍີ່ປຸ່ນ ຫຼາຍແຫ່ງເຊັ່ນ: ງານບຸນສົ່ງເສີມການທ່ອງທ່ຽວ - ວັດທະນະທຳ ຫວຽດນາມ ຢູ່ Tokyo, ງານບຸນສົ່ງເສີມການທ່ອງທ່ຽວ- ວັດທະນະທຳ ຫວຽດນາມ ຢູ່ Kanagawa ແລະ ງານບຸນ ຫວຽດນາມ ຢູ່ Sapporo, Hokkaido; ໜູນຊ່ວຍຄະນະນັກສິລະປິນເຂົ້າຮ່ວມວົງດົນຕີປະສານສຽງງານບຸນ ຫວຽດນາມ - ຍີ່ປຸ່ນ ແລະ ການສະແດງດົນຕີປະສານສຽງຢູ່ 06 ແຂວງ/ນະຄອນຂອງ ຍີ່ປຸ່ນ (Tokyo, Gunma, Fukushima, Miyagi, Iwate, Nara) (ເດືອນຕຸລາ 2023); ຈັດຕັ້ງການສະແດງ “ເຈົ້າຍິງ Anio” ຢູ່ Tokyo (ເດືອນພະຈິກ 2023); ໜູນຊ່ວຍສະຖານີໂທລະພາບ ຍີ່ປຸ່ນ NHK ເພື່ອຜັນຂະຫຍາຍໂຄງການຮູບເງົາສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດ ຍີ່ປຸ່ນ ດ້ວຍຫົວຂໍ້ “ຫວຽດນາມ no hibiki” (ສຽງກັງວານຂອງຫວຽດນາມ).
ນອກຈາກນັ້ນ, ຍີ່ປຸ່ນ ຍັງໄດ້ຮ່ວມມືໃນການປະຕິສັງຂອນ ແລະ ປົກປັກຮັກສາບັນດາຮ່ອງຮອຍເປັນເວລາຫຼາຍປີ, ໃນນັ້ນ ມີຮ່ອງຮອຍກຳແພງພະລາຊະວັງ ທັງລອງ ຢູ່ ຮ່າໂນ້ຍ ແລະ ວັດ ເກົາ ຢູ່ ໂຮ້ຍອານ. ເດືອນພະຈິກ 2023, ທ່ານເອກອັກຄະລັດຖະທູດ Yamada ແລະ ທ່ານຮອງລັດຖະມົນຕີ ຫວຽດນາມ ຮວ່າງດ້າວເກື່ອງ ໄດ້ລົງນາມໃນຈົດໝາຍທາງການແລກປ່ຽນຂອງ “ໂຄງການຍົກສູງກຳລັງຄວາມສາມາດປົກປັກຮັກສາ ແລະ ຟື້ນຟູມໍລະດົກວັດທະນະທຳຢູ່ຫໍພິພິທະພັນປະຫວັດສາດແຫ່ງຊາດ ຫວຽດນາມ” ດ້ວຍມູນຄ່າທຶນ ODA ຂອງຍີ່ປຸ່ນ ໃຫ້ແກ່ ຫວຽດນາມ 85.300.000 Yen (ປະມານ 15 ຕື້ດົ່ງ).
ໃນຂົງເຂດກິລາ, ການພົວພັນຮ່ວມມືລະຫວ່າງ 2 ປະເທດ ກໍມີບາດກ້າວພັດທະນາຂຶ້ນ, ໃນນັ້ນ ທ່ານເອກອັກຄະລັດຖະທູດ Yamada Takio ໄດ້ໜູນຊ່ວຍ ເພື່ອຈັດຕັ້ງການແຂ່ງຂັນນັດມິດຕະພາບແບບພິເສດລະຫວ່າງ Kawasaki Frontale ແລະ ສະໂມສອນ Becamex ບິ່ງເຢືອງ (ເດືອນທັນວາ 2022), ການແຂ່ງຂັນກິລາບານເຕະເຍົາວະຊົນສາກົນ U13 ຫວຽດນາມ - ຍີ່ປຸ່ນ ຢູ່ແຂວງ ບິ່ງເຢືອງ (ເດືອນທັນວາ 2023).
ກ່ຽວກັບການຮ່ວມມືດ້ານການທ່ອງທ່ຽວ, ທ່ານເອກອັກຄະລັດຖະທູດ Yamada ໄດ້ຮັບດຳລົງຕຳແໜ່ງໃນເດືອນເມສາ 2020 ໃນທ່າມກາງການແຜ່ລະບາດຂອງ Covid-19, ບັນດາການເຄື່ອນໄຫວທ່ອງທ່ຽວທີ່ພວມຢູ່ໃນໄລຍະຢຸດສະງັກ. ແຕ່ເຖິງຢ່າງໃດກໍ່ຕາມ, ນັບແຕ່ເດືອນຕຸລາປີ 2022 ເປັນຕົ້ນມາ, ເມື່ອ ຍີ່ປຸ່ນ ເປີດຄືນປະຕູໃຫ້ນັກທ່ອງທ່ຽວເຂົ້າມາຍີ່ປຸ່ນຢ່າງເປັນທາງການ, ທ່ານເອກອັກຄະລັດຖະທູດ Yamada ໄດ້ຊຸກຍູ້ການເຊື່ອມຕໍ່ຄືນບັນດາການເຄື່ອນໄຫວທ່ອງທ່ຽວຢ່າງເຂັ້ມແຂງ ພາຍຫຼັງເວລາຢຸດຊົ່ວຄາວຍ້ອນພະຍາດໂຄວິດ-19. ປີ 2023, ຈຳນວນນັກທ່ອງທ່ຽວ ຍີ່ປຸ່ນ ໄປ ຫວຽດນາມ ໄດ້ຟື້ນຟູ 62% (ບັນລຸ 589.522 ເທື່ອຄົນ); ນັກທ່ອງທ່ຽວ ຫວຽດນາມ ໄປ ຍີ່ປຸ່ນ ເພີ່ມຂຶ້ນ 16% ເມື່ອທຽບໃສ່ໄລຍະກ່ອນໂລກລະບາດ (ບັນລຸ 573.876 ເທື່ອຄົນ).
ບັນດາການປະກອບສ່ວນຢ່າງບໍ່ຢຸດຢັ້ງຂອງທ່ານເອກອັກຄະລັດຖະທູດ ໄດ້ນຳມາເຊິ່ງໝາກຜົນທີ່ແທດຈິງ, ປະກອບສ່ວນເຂົ້າໃນການເພີ່ມທະວີຄວາມເຂົ້າໃຈ ແລະ ຄວາມຮັບຮູ້ຢ່າງເລິກເຊິ່ງຂອງຊາວ ຍີ່ປຸ່ນ ແລະ ຫວຽດນາມ ກ່ຽວກັບຈຸດຄ້າຍຄືກັນ, ສະໜິດຕິດພັນໃນວັດທະນະທຳຂອງ 2 ປະເທດ.
ເພື່ອຮັບຮູ້ບັນດາການປະກອບສ່ວນຢ່າງຕັ້ງໜ້າຂອງທ່ານເອກອັກຄະລັດຖະທູດ ໃນໄລຍະອາຍຸການທີ່ປະຕິບັດງານຢູ່ ຫວຽດນາມ, ກະຊວງວັດທະນະທຳ, ກິລາ ແລະ ທ່ອງທ່ຽວ ຫວຽດນາມ ໄດ້ຕົກລົງມອບຫຼຽນກາລະນຶກ “ເພື່ອພາລະກິດວັດທະນະທຳ, ກິລາ ແລະ ທ່ອງທ່ຽວ” ໃຫ້ທ່ານເອກອັກຄະລັດຖະທູດ Yamada Takio.
ມິງດຶກ
