ວັນທີ 13 ແລະ 19 ມີນາ, ຢູ່ສໍານັກງານໃຫຍ່ຢູ່ ນິວຢອກ (ອາເມລິກາ), ສະພາຄວາມໝັ້ນຄົງສະຫະປະຊາຊາດ ໄດ້ຈັດຕັ້ງກອງປະຊຸມປຶກສາຫາລືເປີດກວ້າງ ດ້ວຍຫົວຂໍ້ “ຊຸກຍູ້ການສະກັດກັ້ນການປະທະກັນ - ມອບສິດໃຫ້ແກ່ແມ່ຍິງ ແລະ ຊາວໜຸ່ມ” ໂດຍການເປັນປະທານຂອງ ຍີ່ປຸ່ນ - ປະເທດປະທານສະພາຄວາມໝັ້ນຄົງສະຫະປະຊາຊາດ ໃນເດືອນມີນາ 2024.
ໂດຍເຂົ້າຮ່ວມ ແລະ ກ່າວຄຳປາໄສທີ່ເຫດການທີ່ມີ ທ່ານຮອງເລຂາທິການໃຫຍ່ສະຫະປະຊາຊາດ ຮັບຜິດຊອບດ້ານການເມືອງ ແລະ ສ້າງສັນຕິພາບ, ຜູ້ຕາງໜ້າຂອງອົງການສາກົນຈຳນວນໜຶ່ງ, 15 ສະມາຊິກສະພາຄວາມໝັ້ນຄົງ ແລະ ເກືອບ 80 ປະເທດສະມາຊິກອື່ນໆຂອງສະຫະປະຊາຊາດ.
ທ່ານຮອງເລຂາທິການໃຫຍ່ Rosemary DiCarlo ແລະ ບັນດາຜູ້ແທນ ໄດ້ເນັ້ນໜັກເຖິງບົດບາດ, ຄວາມຮັບຜິດຊອບຂອງສະພາຄວາມໝັ້ນຄົງໃນການສະກັດກັ້ນການປະທະກັນ; ຮຽກຮ້ອງໃຫ້ປະຕິບັດມະຕິເລກທີ 1325 ຂອງສະພາຄວາມໝັ້ນຄົງກ່ຽວກັບແມ່ຍິງ, ສັນຕິພາບ ແລະ ຄວາມປອດໄພ ຢ່າງມີປະສິດທິຜົນ ກໍຄືຊຸກຍູ້ການເຂົ້າຮ່ວມ, ປະກອບສ່ວນຂອງຊາວໜຸ່ມໃນການສ້າງສັນຕິພາບ.
ຫຼາຍຄຳເຫັນຕີລາຄາສູງ “ໂຄງການດຳເນີນງານໃໝ່ກ່ຽວກັບສັນຕິພາບ” ຂອງເລຂາທິການໃຫຍ່ສະຫະປະຊາຊາດ ດ້ວຍຈຸດສຸມໃນການສະກັດກັ້ນການປະທະກັນ; ໂດຍຊົມເຊີຍບົດບາດຂອງຄະນະກຳມະການສ້າງສັນຕິພາບສະຫະປະຊາຊາດ (PBC) ໃນການຊຸກຍູ້ການຮ່ວມມືລະຫວ່າງບັນດາອົງການສະຫະປະຊາຊາດ, ອົງການຈັດຕັ້ງສາກົນ, ພາກພື້ນ ແລະ ບັນດາປະເທດເພື່ອສະກັດກັ້ນການປະທະກັນ ແລະ ຮັກສາສັນຕິພາບ, ຄວາມປອດໄພແບບຍືນຍົງ.
 |
| ທ່ານອຸປະທູດ ຫງວຽນຮວ່າງຫງວຽນ. (ພາບ: ກວາງຮູຍ /TTXVN) |
ກ່າວຄຳປາໄສທີ່ວາລະປະຊຸມ, ທ່ານອຸປະທູດ ຫງວຽນຮວ່າງຫງວຽນ, ຮອງຫົວໜ້າຄະນະປະຈຳ ຫວຽດນາມ ປະຈຳສະຫະປະຊາຊາດ, ຮຽກຮ້ອງສະພາຄວາມໝັ້ນຄົງຕ້ອງມີວິທີເຂົ້າເຖິງຢ່າງຮອບດ້ານ, ກວມລວມ ແລະ ຖືປະຊາຊົນເປັນໃຈກາງ; ສຸມໃສ່ແກ້ໄຂສາເຫດຕົ້ນຕໍຂອງການປະທະກັນ ເພື່ອຫຼຸດພົ້ນອອກຈາກວົງຈອນຂອງສະພາບການດ້ອຍພັດທະນາ, ບໍ່ສະເໝີພາບ, ບໍ່ຍຸຕິທຳ ແລະ ນຳໃຊ້ຄວາມຮຸນແຮງ.
ຜູ້ຕາງໜ້າ ຫວຽດນາມ ກໍ່ຖືວ່າ ສະພາຄວາມໝັ້ນຄົງຕ້ອງຂຸດຄົ້ນບັນດາເຄື່ອງມືທີ່ມີຢູ່ແລ້ວຢ່າງມີປະສິດທິຜົນກວ່າອີກຄື ການທູດປ້ອງກັນ, ການໄກ່ເກ່ຍ, ແກ້ໄຂການຂັດແຍ່ງ ດ້ວຍສັນຕິວິທີບົນພື້ນຖານປະຕິບັດບັນດາຫຼັກການພື້ນຖານຂອງກົດໝາຍສາກົນ ແລະ ກົດບັດສະຫະປະຊາຊາດ; ບູລິມະສິດການລົງທຶນຫຼາຍກ່ວາໃຫ້ແກ່ບັນດາຄວາມພະຍາຍາມສ້າງຄວາມໄວ້ວາງໃຈ, ກົນໄກການເຕືອນໄພລ່ວງໜ້າ.
ທ່ານຮອງຫົວໜ້າຄະນະຜູ້ແທນ ຫວຽດນາມ ໄດ້ເນັ້ນໜັກເຖິງຄວາມສຳຄັນຂອງການມອບສິດໃຫ້ແກ່ແມ່ຍິງໃນການສະກັດກັ້ນການປະທະກັນ; ຢືນຢັນວ່າ ຫວຽດນາມ ໄດ້ປະຕິບັດບັນດາບາດກ້າວສະເພາະເພື່ອຍົກສູງບົດບາດນຳພາ ແລະ ການເຂົ້າຮ່ວມຂອງແມ່ຍິງໃນທຸກຂັ້ນຂອງການຄຸ້ມຄອງ; ໃຫ້ຄຳໝັ້ນສັນຍາສືບຕໍ່ເພີ່ມທະວີການເຂົ້າຮ່ວມ, ປະກອບສ່ວນຂອງແມ່ຍິງ ຫວຽດນາມ ເຂົ້າໃນບັນດາການເຄື່ອນໄຫວຮັກສາສັນຕິພາບຂອງສະຫະປະຊາຊາດ; ພ້ອມກັນນັ້ນ, ກໍ່ແກ້ໄຂບັນຫາທີ່ກ່ຽວຂ້ອງກັບຊາວໜຸ່ມເຊັ່ນ ການສຶກສາ, ວຽກເຮັດງານທຳ ແລະ ສະຫວັດດິການເປັນກຸນແຈ ເພື່ອສະກັດກັ້ນລັດທິຂວາຈັດ (ຫົວຮຸນແຮງ), ການໃຊ້ຄວາມຮຸນແຮງ ກໍຄືຄວາມສ່ຽງທີ່ເກີດ ແລະ ເກີດການປະທະກັນຄືນອີກ.
ມິງດຶກ
