 |
ທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມ ກ່າວຄຳເຫັນທີ່ພິທີ (ພາບ: Ban Tổ Chức Vesak 2019)
ເຂົ້າຮ່ວມວັນບຸນ ມີທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມ; ທ່ານປະທານາທິບໍດີ ມຽນມາ Win Myint, ທ່ານຮອງປະທານາທິບໍດີ, ປະທານສະພາສູງ ອິນເດຍ Venkaiah Naidu, ນາຍົກລັດຖະມົນຕີ ເນປານ KP Sharma Oli, ປະທານສະພາສູງ ບູຖານ ທ່ານ Tashi Dorji, ຮອງເລຂາທິການໃຫຍ່ ສປຊ Asha Rose Migiro. ການນຳຂັ້ນສູງ ແລະ ຜູ້ມີຍົດສັກຕຳແຫນ່ງຕ່າງໆຂອງສະມາຄົມພຸດທະສາສະຫນາ, ອົງການສາສະຫນາທີ່ມາຈາກ 112 ປະເທດ, ເຂດແຄ້ວນ ຢູ່ໃນໂລກ ແລະ ຫວຽດນາມ ພ້ອມກັບພະສົງສຳມະເນນພຸດທະສາສະນິກະຊົນນັບພັນໆຄົນຢູ່ພາຍໃນ ແລະ ຕ່າງປະເທດ.
ກ່າວຄຳເຫັນນະພິທີໄຂ, ພະມະຫາອາຈານ ທຽກທ້ຽນເຍີນ ປະທານສະພາບໍລິຫານງານພຸດທະສາສະຫນາ, ປະທານຄະນະກຳມະການຈັດຕັ້ງ Vesak 2019 ຢູ່ ຫວຽດນາມ ຢືນຢັນວ່າ:
“ຫົວຂໍ້ຂອງ Vesak 2019: ແມ່ນວິທີການສຳຜັດຂອງສາສະຫນາພຸດ ກ່ຽວກັບການຊີ້ນຳນຳພາທົ່ວໂລກ ແລະ ຄວາມຮັບຜິດຊອບ ພ້ອມກັນແບ່ງປັນ ເພື່ອສັງຄົມໝັ້ນຄົງ ເປັນການສະແດງໃຫ້ເຫັນສະຕິຄວາມຮັບຜິດຊອບອັນສູງສົ່ງຂອງສາສະຫນາພຸດຕໍ່ຫນ້າສະພາບການຜັນແປຂອງໂລກ. ໃນວັນບຸນວິສາຂະບູຊາພິເສດ ແລະ ເຄັ່ງຂຶມນີ້ ເປັນການປະກອບສ່ວນເຊີດຊູບັນດາຄຸນຄ່າທີ່ເປັນມູນເຊື້ອຂອງພຸດທະສາສະຫນາຫວຽດນາມ ຍາມໃດກໍ່ຮ່ວມເດີນທາງກັບຊາດໃນຫລາຍສະຫັດສະຫວັດຜ່ານມາ. ພຸດທະສາສະຫນາຫວຽດນາມ ຍາມໃດກໍ່ຮ່ວມເດີນທາງ ປະກອບສ່ວນສ້າງສາປະເທດຫວຽດນາມ ໃຫ້ຮັ່ງມີສວຍງາມ, ສັນຕິພາບ, ພັດທະນາແບບຍືນຍົງໃນໄລຍະເຊື່ອມໂຍງເຂົ້າກັບສາກົນ.”
ທ່ານນາຍົກລັດຖະມົນຕີ ຫວຽດນາມຫງວຽນຊວນຟຸກ ໄດ້ຢືນຢັນຄວາມເອກອ້າງທະນົງໃຈຕໍ່ເລື່ອງຫວຽດນາມ ໄດ້ຮັບເລືອກເຟັ້ນເປັນສະຖານທີ່ຈັດຕັ້ງ ວັນບຸນວິສາຂະບູຊາ Vesak 2019.
“ຫວຽດນາມ ແມ່ນປະເທດມີຫລາຍສາສະຫນາ, ໃນນັ້ນ ສາສະຫນາພຸດ ແມ່ນສາສະຫນາທີ່ເປັນມູນເຊື້ອ ແລະ ມີມາແຕ່ດົນນານ, ຕິດພັນກັບວັດທະນະທຳ, ມູນເຊື້ອ ແລະ ຮ່ວມເດີນທາງພ້ອມກັບຊາດ. ໃນຫລາຍປີຜ່ານມາ ສະມາຄົມພຸດທະສາສະຫນາຫວຽດນາມ ໄດ້ພັດທະນາຢ່າງບໍ່ຢຸດຢັ້ງ ແລະ ເຕີບໃຫຍ່. ເລື່ອງຈັດຕັ້ງ ວັນບຸນວິສາຂະບູຊາ Vesak 2019 ອີກຄັ້ງຫນຶ່ງ ຢືນຢັນ ຫວຽດນາມຍາມໃດກໍ່ເອົາໃຈໃສ່, ເຄົາລົບບັນດາຄຸນຄ່າວັດທະນະທຳ, ສິ່ງທີ່ດີງາມຂອງບັນດາສາສະຫນາ, ໃນນັ້ນ ມີສາສະຫນາພຸດ.”
ນີ້ເປັນຄັ້ງທີ 3 ວັນບຸນວິສາຂະບູຊາ Vesak 2019 ໄດ້ຈັດຂຶ້ນຢູ່ຫວຽດນາມ. ວັນບຸນວິສາຂະບູຊາ Vesak 2019 ດຳເນີນໄປໃນເວລາ 3 ວັນ ແຕ່ວັນທີ 12-14 ພຶດສະພາ ດ້ວຍການເຄື່ອນໄຫວຫລາຍຢ່າງທາງດ້ານສາສະຫນາພຸດ, ວັດທະນະທຳ, ສິລະປະ ແລະ ກອງປະຊຸມສຳມະນາສາກົນ 5 ຄັ້ງ.
（ແຫຼ່ງຂໍ້ມູນ： VOVWORLD）
