| ຫວຽດນາມ ໄດ້ເຂົ້າອັນດັບໃນ 15 ປະເທດ ແລະ ເຂດແຄວ້ນທີ່ກ້າວໜ້າທີ່ສຸດໃນອາຊີ | |
| ບ້ານເຮືອນທີສອງຂອງນັກສຶກສາລາວຢູ່ ດານັງ |
ໄລຍະທີ່ຜ່ານມາ, ນະຄອນ ດານັງ ໄດ້ຕັ້ງໜ້າ, ເປັນເຈົ້າການໃນການປະຕິບັດວຽກງານເຊື່ອມໂຍງເຂົ້າກັບສາກົນດ້ວຍຫຼາຍລາຍການ, ໂຄງການຮ່ວມມືກັບບັນດາຄູ່ຮ່ວມມືຕ່າງປະເທດ. ຜ່ານນັ້ນ, ການເຊື່ອມໂຍງເຂົ້າກັບສາກົນ ກໍ່ໄດ້ເປີດທາງ, ເສີມຂະຫຍາຍກຳລັງແຮງພາຍໃນຂອງທ້ອງຖິ່ນສູງສຸດ ກ່ຽວກັບທີ່ຕັ້ງພູມສາດ, ແຫຼ່ງຊັບພະຍາກອນ, ພື້ນຖານໂຄງລ່າງ, ແຫຼ່ງຊັບພະຍາກອນມະນຸດ ແລະ ບັນດາທ່າໄດ້ປຽບທຽບດຶງດູດການລົງທຶນ, ການຄ້າ, ການທ່ອງທ່ຽວ ໃນສະພາບການເຊື່ອມໂຍງເຂົ້າກັບສາກົນ, ປະກອບສ່ວນເປີດກາລະໂອກາດ, ເຊື່ອມຕໍ່ຄູ່ຮ່ວມມື, ຂຸດຄົ້ນທ້ອງຕະຫຼາດທີ່ມີກຳລັງບົ່ມຊ້ອນ.
ສະເພາະໃນປີ 2023, ນະຄອນ ໄດ້ຕ້ອນຮັບຄະນະຜູ້ແທນສາກົນເກືອບ 400 ຄະນະມາຢ້ຽມຢາມ ແລະ ເຮັດວຽກ, ເພີ່ມຂຶ້ນ 208 ຄະນະເມື່ອທຽບໃສ່ໄລຍະປີ 2022. ນະຄອນ ກໍ່ໄດ້ຈັດຕັ້ງຄະນະຜູ້ແທນການນຳນະຄອນຫຼາຍຄະນະ ໄປເຮັດວຽກຢູ່ ອາເມລິກາ, ຍີ່ປຸ່ນ, ສ.ເກົາຫຼີ, ຈີນ, ອັງກິດ, ເຢຍລະມັນ, ກາຕາ... ຢ່າງສຳເລັດຜົນ.
ນອກຈາກນັ້ນ, ຍັງໄດ້ມີການພົບປະສອງຝ່າຍ, ຫຼາຍຝ່າຍນັບຮ້ອຍຄັ້ງລະຫວ່າງການນຳນະຄອນ, ບັນດາພະແນກ, ຄະນະ, ຂະແໜງການ ແລະ ບັນດາຄູ່ຮ່ວມມືຕ່າງປະເທດ ເຊິ່ງໄດ້ເປີດກາລະໂອກາດໃໝ່ໃຫ້ນະຄອນ ດານັງ ໃນການສົ່ງເສີມ, ຜັນຂະຫຍາຍບັນດາລາຍການຮ່ວມມືໃນໄລຍະຈະມາເຖິງ, ພິເສດ ໃນບັນດາຂົງເຂດປາຍແຫຼມ ແລະ ບັນດາຂົງເຂດທີ່ນະຄອນມີຄວາມສົນໃຈ ເຊັ່ນ: ການທ່ອງທ່ຽວ, ການບໍລິການ, ການເງິນ, ເຕັກໂນໂລຢີສູງ, ອຸດສາຫະກໍາຈິບແຜງເຄິ່ງຊັກນຳໄຟຟ້າ, ...
 |
ນະຄອນ ດານັງ ໄດ້ສ້າງຕັ້ງການພົວພັນມິດຕະພາບ, ການຮ່ວມມືກັບ 48 ທ້ອງຖິ່ນຂອງ 22 ປະເທດ ແລະ ເຂດແຄວ້ນ ດ້ວຍສັນຍາທີ່ໄດ້ລົງນາມ 104 ສະບັບ. |
ບັນດາລາຍການ, ການເຄື່ອນໄຫວຮ່ວມມືລະອຽດ ໄດ້ຮັບການຮັກສາ ແລະ ຜັນຂະຫຍາຍຢ່າງມີປະສິດທິຜົນ, ໄດ້ຮັບການແລກປ່ຽນຂໍ້ມູນຂ່າວສານເປັນປະຈຳ ເພື່ອສົ່ງເສີມບັນດາລາຍການການຮ່ວມມືໃໝ່. ດານັງ ໄດ້ຜັນຂະຫຍາຍບັນດາການເຄື່ອນໄຫວພົບປະ, ແລກປ່ຽນ, ປຶກສາຫາລື ເພື່ອເພີ່ມທະວີການຮ່ວມມືກັບບັນດານະຄອນຄື: Daegu (ສ.ເກົາຫຼີ), Kisarazu, Yokohama, Sakai (ຍີ່ປຸ່ນ), ຊານຕົງ, ຫຼຽວໜິງ (ຈີນ), ອັດຕະປື, ເຊກອງ, ສາລະວັນ, ຈຳປາສັກ, ສະຫວັນນະເຂດ (ລາວ) …
ວຽກງານການທູດເສດຖະກິດ ໄດ້ຮັບການຜັນຂະຫຍາຍຢ່າງມີປະສິດທິຜົນ, ເປີດຊ່ອງທາງແຫຼ່ງຊັບພະຍາກອນການຮ່ວມມືສາກົນ, ປະກອບສ່ວນການພັດທະນາເສດຖະກິດ, ສັງຄົມຂອງທ້ອງຖິ່ນ. ນະຄອນ ໄດ້ປະສົບຜົນສຳເລັດໃນການສົມທົບກັບບັນດາກະຊວງ, ຂະແໜງການສູນກາງ ແລະ ບັນດາຄູ່ຮ່ວມມື ຈັດຕັ້ງຫຼາຍເຫດການສາກົນທີ່ສຳຄັນ. ດານັງ ກໍ່ໄດ້ດຶງດູດ 1.015 ໂຄງການ FDI ດ້ວຍຍອດຈຳນວນເງິນລົງທຶນກວ່າ 4,1 ຕື້ດົ່ງ.
ກ່ຽວກັບການເຄື່ອນໄຫວການທູດປະຊາຊົນ ກໍໄດ້ດຳເນີນໄປຢ່າງຟົດຟື້ນ, ໄລ່ຮອດວັນທີ 31 ທັນວາ 2023, ນະຄອນ ດານັງ ໄດ້ຮັບເອົາ, ດັດປັບ 43 ບ້ວງຊ່ວຍເຫຼືອທີ່ບໍ່ຂຶ້ນກັບລັດຖະບານຕ່າງປະເທດ ດ້ວຍມູນຄ່າ 124,3 ຕື້ດົ່ງ, ປະກອບສ່ວນຢ່າງມີປະສິດທິຜົນເຂົ້າໃນການປະຕິບັດນະໂຍບາຍຮັບປະກັນຊີວິດສັງຄົມຂອງນະຄອນ.
ບັນດາລາຍການ, ໂຄງການໄດ້ສຸມໃສ່ເຂົ້າກັບບັນດາຜູ້ທີ່ບໍ່ມີທ່າແຮງໃນສັງຄົມເຊັ່ນ ເດັກກ່ຳພ້າ, ມີສະພາບຫຍຸ້ງຍາກ, ຄົນພິການ, ແມ່ຍິງຕົວຄົນດຽວ, .... ແລະ ໃນຂົງເຂດສາທາລະນະສຸກ, ການສຶກສາ, ຝຶກອົບຮົມວິຊາຊີບ, ສິ່ງແວດລ້ອມ, ໜູນຊ່ວຍການພັດທະນາຊຸມຊົນ ແລະ ແກ້ໄຂບັນດາບັນຫາສັງຄົມ, ປະກອບສ່ວນປະຕິບັດວຽກງານຮັບປະກັນຊີວິດສັງຄົມທີ່ດີໃນບໍລິເວນນະຄອນ.
ຈາກຕົວເລກທີ່ດີທີ່ກ່າວມາຂ້າງເທິງນັ້ນ ສາມາດເຫັນໄດ້ວ່າ ການເຄື່ອນໄຫວການຕ່າງປະເທດຂອງນະຄອນ ດານັງ ໄດ້ປະກອບສ່ວນຢ່າງຕັ້ງໜ້າເຂົ້າໃນການພັດທະນານະຄອນ, ໄດ້ສະແດງໃຫ້ເຫັນເຖິງຈິດໃຈທີ່ຂະຫຍັນຂັນເຄື່ອນ, ປ່ຽນແປງໃໝ່, ປະດິດສ້າງຂອງສູນກາງເສດຖະກິດ - ສັງຄົມໃຫຍ່ຂອງທົ່ວປະເທດຢ່າງຈະແຈ້ງ.
ສາມາດເຫັນໄດ້ວ່າ ຮູບການການຕ່າງປະເທດຂອງນະຄອນ ດານັງ ນັບມື້ນັບຮອບດ້ານ ແລະ ເຂັ້ມແຂງ, ລະດົມບັນດາຂະແໜງການ, ຫຼາຍຂັ້ນ ແລະ ບັນດາປະຊາຊົນທຸກຊັ້ນວັນນະເຂົ້າຮ່ວມ, ປະກອບສ່ວນທັງແຫຼ່ງຊັບພະຍາກອນມະນຸດ ແລະ ແຫຼ່ງຊັບພະຍາກອນວັດຖຸ ເພື່ອຫັນເປັນຫຼາຍຮູບຫຼາຍແບບ ແລະ ຍົກລະດັບຂອບຂະໜາດຈັດຕັ້ງບັນດາການເຄື່ອນໄຫວການຕ່າງປະເທດ. ຜ່ານນັ້ນ, ກໍ່ເຫັນໄດ້ວ່າ ກຳລັງແຮງ, ຄວາມສາມາດບົ່ມຊ້ອນ ແລະ ທ່າໄດ້ປຽບຂອງແນວຮົບການທູດແມ່ນໃຫຍ່ຫຼວງທີ່ສຸດ.
ມິງດຶກ
