ຕາມຜູ້ຕາງໜ້າພິເສດສຳນັກຂ່າວ ຫວຽດນາມ ແລ້ວ, ໃນລາຍການເຂົ້າຮ່ວມກອງປະຊຸມຂັ້ນສູງສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນ ອາຊຽນ - ຍີ່ປຸ່ນ ແລະ ດຳເນີນບັນດາການເຄື່ອນໄຫວສອງຝ່າຍຢູ່ ຍີ່ປຸ່ນ, ຕອນບ່າຍວັນທີ 16 ທັນວາ, ຢູ່ ໂຕກຽວ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິ໋ງ ໄດ້ມີການພົບປະເຈລະຈາກັບທ່ານນາຍົກລັດຖະມົນຕີ ຍີ່ປຸ່ນ Kishida Fumio. ນີ້ແມ່ນການພົບປະເຈລະຈາຄັ້ງທີ 6 ຂອງນາຍົກລັດຖະມົນຕີສອງປະເທດໃນ 2 ປີທີ່ຜ່ານມາ ແລະ ຄັ້ງທີ 2 ໃນປີ 2023.
ທີ່ການເຈລະຈາ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິ໋ງ ໃດ້ສະແດງຄວາມຊົມເຊີຍການຈັດຕັ້ງກອງປະຊຸມຂັ້ນສຸງສະເຫຼີມສະຫຼອງ ອາຊຽນ - ຍີ່ປຸ່ນ ຂອງ ຍີ່ປຸ່ນ ໃນໂອກາດສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນ ອາຊຽນ - ຍີ່ປຸ່ນ.
 |
| ທ່ານນາຍົກລັດຖະມົນຕີ ຫວຽດນາມ ຟ້າມມິງຈິ໋ງ ແລະ ທ່ານນາຍົກລັດຖະມົນຕີ ຍີ່ປຸ່ນ Kishida Fumio |
ທ່ານນາຍົກລັດຖະມົນຕີ ຍີ່ປຸ່ນ Kishida Fumio ສະແດງຄວາມຂອບໃຈທ່ານນາຍົກລັດຖະມົນຕີ ຫວຽດນາມ ຟ້າມມິງຈິ໋ງ ທີ່ໄດ້ເຂົ້າຮ່ວມ ແລະ ສະແດງຄວາມເຊື່ອໝັ້ນການເຂົ້າຮ່ວມ, ການປະກອບສ່ວນຢ່າງຕັ້ງໜ້າຂອງຄະນະຜູ້ແທນ ຫວຽດນາມ ຈະປະກອບສ່ວນສຳຄັນເຂົ້າໃນຜົນສຳເລັດລວມຂອງກອງປະຊຸມ.
ບົນຈິດໃຈ “ຄວາມຮັກແພງ, ຄວາມຈິງໃຈ, ເຊື່ອໃຈ, ເນື້ອແທ້, ມີປະສິດທິຜົນ”, ການນຳສອງປະເທດໄດ້ແລກປ່ຽນຄວາມຄິດຄວາມເຫັນ ແລະ ສົມທົບກັນຢ່າງແໜ້ນແຟ້ນ ແລະ ຊີ້ນຳບັນດາກະຊວງ, ຂະແໜງການເພື່ອຫັນບັນດາເນື້ອໃນຢູ່ຖະແຫຼງການຮ່ວມກ່ຽວກັບການຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດຮອບດ້ານເພື່ອສັນຕິພາບ ແລະ ຄວາມວັດຖະນາຖາວອນຢູ່ ອາຊີ ແລະ ໂລກ ເຊິ່ງການນຳຂັ້ນສູງຂອງສອງປະເທດຫາກໍ່ໄດ້ຮັບການຮັບຮອງເອົາ ໃນທ້າຍເດືອນພະຈິກນີ້ເປັນອັນລະອຽດ.
ການນຳສອງປະເທດ ໄດ້ແບ່ງປັນຄວາມຮັບຮູ້ລວມກ່ຽວກັບການປັບປຸງຄວາມເຊື່ອໃຈທາງດ້ານການເມືອງ, ເພີ່ມທະວີການພົບປະແລກປ່ຽນຂັ້ນສູງປະຈຳປີຜ່ານຊ່ອງທາງຂອງພັກ, ລັດຖະບານ, ສະພາແຫ່ງຊາດ...
ທ່ານນາຍົກລັດຖະມົນຕີ ຫວຽດນາມ ຟ້າມມິງຈິ໋ງ ໄດ້ສົ່ງຕໍ່ຄຳຢື້ຢາມຖາມຂ່າວ ແລະ ເຊື້ອເຊີນໄປຢ້ຽມຢາມ ຫວຽດນາມ ໃນໄວໆນີ້ ຈາກທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟຸຈ້ອງ, ທ່ານປະທານປະເທດ ຫວຽດນາມ ຫວໍວັນເຖືອງ ແລະ ທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫວະ ຝາກເຖິງກະສັດ ແລະ ພະລາຊິນີ, ນາຍົກລັດຖະມົນຕີ Kishida Fumio ແລະ ບັນດາການນຳຍີ່ປຸ່ນ; ໄດ້ສົ່ງຕໍ່ຄຳຂອບອົກຂອບໃຈຂອງທ່ານປະທານປະເທດ ຫວຽດນາມ ຫວໍວັນເຖືອງ ແລະ ພັນລະຍາກ່ຽວກັບການຕ້ອນຮັບຢ່າງອົບອຸ່ນ, ສະໜິດສະໜົມ ແລະ ພິຖີພິຖັນຂອງພະລາຊະວັງ, ສະພາແຫ່ງຊາດ, ລັດຖະບານ ແລະ ປະຊາຊົນ ຍີ່ປຸ່ນ ທີ່ມີໃຫ້ສຳລັບຄະນະຜູ້ແທນຂັ້ນສູງ ຫວຽດນາມ ໃນການຢ້ຽມຢາມ ຍີ່ປຸ່ນ ຢ່າງເປັນທາງການໃນທ້າຍເດືອນພະຈິກ ທີ່ຜ່ານມາ.
ທ່ານນາຍົກລັດຖະມົນຕີ 2 ທ່ານກໍ່ຢືນຢັນຈະເພີ່ມທະວີການຮ່ວມມືຢ່າງແທດຈິງ, ມີປະສິດທິຜົນໃນຂົງເຂດປ້ອງກັນປະເທດ ໂດຍຜ່ານການປະຕິບັດບັນດາຂໍ້ຕົກລົງຮ່ວມມືທີ່ໄດ້ລົງນາມຢ່າງມີປະສິດທິຜົນ.
ທ່ານນາຍົກລັດຖະມົນຕີ 2 ທ່ານ ຕີລາຄາສູງບັນດາຄວາມຄືບໜ້າຢ່າງຕັ້ງໜ້າໃນຫຼາຍໂຄງການຮ່ວມມືດ້ານເສດຖະກິດທີ່ສຳຄັນລະຫວ່າງ 2 ປະເທດໃນໄລຍະຜ່ານມາ ກໍ່ຄືເລື່ອງຍອດມູນຄ່າຂອງແຫຼ່ງທຶນໜູນຊ່ວຍເພື່ອການພັດທະນາ (ODA) ຢ່າງເປັນທາງການໃນປີ 2023 ບັນລຸໄດ້ລື່ນກາຍ 100 ຕື້ເຢນເປັນຄັ້ງທຳອິດນັບແຕ່ປີ 2017 ເປັນຕົ້ນມາ; ຢືນຢັນວ່າຈະສືບຕໍ່ເພີ່ມທະວີການຮ່ວມມືດ້ານເສດຖະກິດລະຫວ່າງສອງປະເທດ, ຊຸກຍູ້ການຮ່ວມມືເພື່ອຮັບປະກັນຄວາມໝັ້ນຄົງດ້ານເສດຖະກິດ; ເຫັນດີເປັນເອກະພາບສ້າງຕັ້ງກຸ່ມປະສານງານລວມລະຫວ່າງລັດຖະບານ 2 ປະເທດ ເພື່ອຊຸກຍູ້ລະດັບຄວາມຄືບໜ້າ ແລະ ປະສິດທິຜົນຂອງບັນດາໂຄງການເສດຖະກິດທີ່ພວມດຳເນີນຢູ່ລະຫວ່າງ 2 ປະເທດ, ໃນນັ້ນມີໂຄງການໂຮງງານກັ່ນຕອງນ້ຳມັນ ງີ່ເຊິ່ນ.
ທ່ານນາຍົກລັດຖະມົນຕີ ຫວຽດນາມ ຟ້າມມິງຈິ໋ງ ໄດ້ສະເໜີ ຍີ່ປຸ່ນ ຈະສືບຕໍ່ສະໜອງບັນດາບ້ວງກູ້ ODA ຮຸ່ນໃໝ່ໃຫ້ແກ່ບັນດາໂຄງການຍຸດທະສາດພັດທະນາພື້ນຖານໂຄງລ່າງຄົມມະນາຄົມຂົນສົ່ງ ເຊັ່ນ ໂຄງການທາງລົດໄຟຄວາມໄວສູງເໜືອ-ໃຕ້, ທາງລົດໄຟໃນຕົວເມືອງ, ອຸດສາຫະກໍາສຳຮອງ, ກຸ່ມອຸດສາຫະກໍາໃຫມ່, ການຮັບມືກັບການປ່ຽນແປງດິນຟ້າອາກາດ, ການຫັນເປັນດິຈິຕອນ, ການຫັນເປັນສີຂຽວ, ສາທາລະນະສຸກ... ໃນປະເທດຫວຽດນາມ; ໜູນຊ່ວຍ, ສ້າງເງື່ອນໄຂສະດວກໃຫ້ແກ່ວິສາຫະກິດ ຫວຽດນາມ ເຂົ້າຮ່ວມໃນລະບົບສະໜອງທົ່ວໂລກຂອງວິສາຫະກິດ ຍີ່ປຸ່ນ ໃນຂົງເຂດການຜະລິດລົດ, ເອເລັກໂຕນິກ, ອຸປະກອນການແພດ, ແຜ່ນແພ; ຊຸກຍຸ້ລະບຽບການກວດກາ ແລະ ຕີລາຄາຄຸນະພາບເພື່ອເປີດປະຕູຕະຫຼາດສໍາລັບ ໝາກກ້ຽງໃຫຍ່ເປືອກສີຂຽວ ຫວຽດນາມ ແລະ ໝາກອາງຸຸ່ນ ຍີ່ປຸ່ນ.
ທ່ານນາຍົກລັດຖະມົນຕີ ຍີ່ປຸ່ນ Kishida Fumio ຢືນຢັນວ່າ ຍີ່ປຸ່ນ ຫວັງວ່າ ສອງປະເທດພ້ອມກັນພັດທະນາ ແລະ ປະກອບສ່ວນເຂົ້າໃນການພັດທະນາລວມຂອງພາກພື້ນ; ຈະສືບຕໍ່ສະຫນັບສະຫນູນ ຫວຽດນາມ ປະຕິບັດການຫັນເປັນອຸດສາຫະກຳ, ຫັນເປັນທັນສະໄໝ, ການກໍ່ສ້າງເສດຖະກິດເອກະລາດ, ເປັນເຈົ້າຕົນເອງ, ເຊື່ອມຕົວເຂົ້າກັບສາກົນຢ່າງເລິກເຊິ່ງກວ້າງຂວາງ, ປະຕິບັດຍຸດທະສາດການຫັນເປັນອຸດສາຫະກຳ, ຫັນເປັນທັນສະໄໝຢ່າງສໍາເລັດຜົນ.
ການນຳທັງ 2 ຝ່າຍກໍໃດ້ເຫັນດີເປັນເອກະພາບຈະເປີດກ້ວາງການຮ່ວມມືໃນບັນດາຂົງເຂດການຫັນເປັນສີຂຽວ, ການຮັບມືການປ່ຽນແປງຂອງດິນຟ້າອາກາດ ... ຜ່ານບັນດາໂຄງການປະຕິບັດຕົວຈິງ.
ທ່ານນາຍົກລັດຖະມົນຕີ ຍີ່ປຸ່ນ Kishida Fumio ຢືນຢັນວ່າ ຈະຊຸກຍູ້ການຮ່ວມມືກັບຫວຽດນາມ ໃນການຫັນປ່ຽນພະລັງງານ, ຫຼຸດຜ່ອນການປ່ອຍອາຍພິດໂດຍຜ່ານສູນຂໍ້ລິເລີ່ມປະຊາຄົມການປ່ອຍລະພິດລົງເປັນ 0 ຢູ່ ອາຊຽນ (AZEC) ໂດຍ ຍີ່ປຸ່ນ ສ້າງຕັ້ງ.
ໂດຍຕີລາຄາສຸງການທີ່ 2 ປະເທດໄດ້ຈັດຕັ້ງກວ່າ 500 ການເຄື່ອນໄຫວເພື່ອສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນໃນປີ 2023, ການນຳ 2 ປະເທດໄດ້ເຫັນດີເປັນເອກະພາບສືບຕໍ່ເພີ່ມທະວີການຮ່ວມມືດ້ານບຳລຸງສ້າງຊັບພະຍາກອນມະນຸດ, ພິເສດແມ່ນພະນັກງານຄຸ້ມຄອງລະດັບຍຸດທະສາດ, ການພົບປະແລກປ່ຽນວັດທະນະທຳ, ການແລກປ່ຽນປະຊາຊົນ, ການຮ່ວມມືທ້ອງຖິ່ນ ແລະ ທ່ອງທ່ຽວ. ທ່ານນາຍົກລັດຖະມົນຕີ ຫວຽດນາມ ຟ້າມມິງຈິ໋ງ ຈະສະເໜີໃຫ້ ຍີ່ປຸ່ນ ສືບຕໍ່ສ້າງເງື່ອນໄຂສະດວກ, ຜ່ອນຜັນ ແລະ ກ້າວໄປເຖິງການຍົກເວັ້ນວີຊາໃຫ້ຊາວ ຫວຽດນາມ ທີ່ເຂົ້າມາ ຍີ່ປຸ່ນ.
ທ່ານນາຍົກລັດຖະມົນຕີ ຍີ່ປຸ່ນ Kishida Fumio ຢັ້ງຢືນວ່າ ແຫຼ່ງຊັບພະຍາກອນມະນຸດຂອງ ຫວຽດນາມ, ປະກອບມີແຫຼ່ງຊັບພະຍາກອນມະນຸດທີ່ມີຄຸນນະພາບສູງ ແລະ ນັກເຝິກງານທັກສະວິຊາຊີບ, ແມ່ນສິ່ງທີ່ຂາດບໍ່ໄດ້ສໍາລັບການພັດທະນາເສດຖະກິດ-ສັງຄົມຂອງ ຍີ່ປຸ່ນ; ສະແດງຄວາມດີໃຈທີ່ສອງຝ່າຍຈະຈັດຕັ້ງການສອບເສັງຮັບນັກຝຶກງານທັກສະສະເພາະຢູ່ ຫວຽດນາມ.
ການນຳສອງທ່ານຢືນຢັນຈະສືບຕໍ່ສົມທົບກັນຢ່າງແໜ້ນແຟ້ນໃນບັນດາບັນຫາພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ, ປະກອບສ່ວນຢ່າງຕັ້ງໜ້າເຂົ້າໃນການຮັກສາສັນຕິພາບ, ສະຖຽນລະພາບ ແລະ ການພັດທະນາຢູ່ພາກພື້ນ ແລະ ໃນໂລກ; ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສຫຼາຍຝ່າຍ, ອົງການຈັດຕັ້ງສາກົນ ແລະ ພາກພື້ນ.
ທ່ານນາຍົກລັດຖະມົນຕີ ຫວຽດນາມ ຟ້າມມິງຈິ໋ງ ໄດ້ຕີລາຄາສູງການ ຍີ່ປຸ່ນ ຈັດຕັ້ງກອງປະຊຸມຂັ້ນສຸງປະຊາຄົມການປ່ອຍລະພິດລົງເປັນ 0 ອາຊຽນ (AZEC) ໃນຂອບເຂດກອງປະຊຸມຂັ້ນສຸງສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນ ອາຊຽນ - ຍີ່ປຸ່ນ.
ເນື່ອງໃນໂອກາດນີ້, ການນຳສອງປະເທດ ໄດ້ເປັນສັກຂີພິຍານພິທີມອບ-ຮັບເອກະສານຮ່ວມມື ODA ລະຫວ່າງສອງປະເທດ ປະກອບມີຈົດໝາຍທາງການແລກປ່ຽນບ້ວງເງິນກູ້ຄັ້ງທີ 4 ສຳລັບໂຄງການກໍ່ສ້າງທາງລົດໄຟໃນຕົວເມືອງນະຄອນ ໂຮ່ຈິມິນ, ເຂດ ເບັ໋ນແທ່ງ - ຊ໋ວຍຕ່ຽນ,ຈົດໝາຍທາງການແລກປ່ຽນໂຄງການທຶນການສຶກສາພັດທະນາຊັບພະຍາກອນມະນຸດ (JDS), ແລະ ຈົດໝາຍທາງການແລກປ່ຽນໂຄງການສະໜອງອຸປະກອນໃຫ້ໂຮງໝໍ K ໂດຍມູນຄ່າທັງໝົດປະມານ 42,3 ຕື້ເຢນ (ເກືອບ 300 ລ້ານ USD).
ມິງດຶກ
