| ເພີ່ມທະວີການຮ່ວມມືລະຫວ່າງຄະນະເລຂາທິການ ສະພາແຫ່ງຊາດ ຫວຽດນາມ ແລະ ລາວ | |
| ເພີ່ມທະວີການພົວພັນມິດຕະພາບທີ່ເປັນມູນເຊື້ອ ລະຫວ່າງຄະນະຜູ້ແທນຫວຽດນາມ ແລະ ລາວ ປະຈຳສະຫະປະຊາຊາດ |
ທີ່ກອງປະຊຸມ, ຜູ້ຕາງໜ້າການນຳບັນດາກຸ່ມບໍລິສັດ ແລະ ວິສາຫະກິດຂອງ 2 ປະເທດ ໄດ້ລາຍງານກ່ຽວກັບສະພາບການສະໜອງໄຟຟ້າ ແລະ ການນຳເຂົ້າຖ່ານຫີນໃນປີ 2023; ບັນດາຄວາມຫຍຸ້ງຍາກ, ບັນຫາ ແລະ ສະເໜີມາດຕະການການແກ້ໄຂ, ສະເໜີແນະໃຫ້ກະຊວງອຸດສາຫະກຳ ແລະ ການຄ້າ ໃນບັນດາເຄື່ອນໄຫວນຳເຂົ້າໄຟຟ້າ ແລະ ຖ່ານຫີນຈາກ ລາວ. ບັນດາຂໍ້ສະເໜີດັ່ງກ່າວໄດ້ຮັບການຮັບຟັງ ແລະ ຕອບຈາກການນຳກະຊວງ; ພ້ອມກັນນັ້ນ ບັນດາກົມ, ອົງການທີ່ມີໜ້າທີ່ຂອງກະຊວງກໍ່ໄດ້ສະເໜີບັນດາມາດຕະການແກ້ໄຂລະອຽດ ແລະ ແທດຈິງເພື່ອແກ້ໄຂຄວາມຫຍຸ້ງຍາກ, ໜູນຊ່ວຍວິສາຫະກິດ.
 |
ພາບທີ່ກອງປະຊຸມ |
ກ່າວຄຳປາໄສທີ່ກອງປະຊຸມ, ທ່ານລັດຖະມົນຕີ ຫງວຽນຮົ່ງຢຽນ ໃຫ້ຮູ້ວ່າ ຕາມຂໍ້ຕົກລົງຂັ້ນສູງ ລະຫວ່າງຫວຽດນາມ - ລາວ, ກະຊວງອຸດສາຫະກຳ ແລະ ການຄ້າ ຫວຽດນາມ ແລະ ກະຊວງພະລັງງານ ແລະ ບໍ່ແຮ່ ລາວ ໄດ້ລົງນາມໃນບົດບັນທຶກຊ່ວຍຈຳກ່ຽວກັບການຮ່ວມມືໃນຂົງເຂດຖ່ານຫີນ. ນີ້ແມ່ນເຫດການສຳຄັນ, ເປັນຂີດໝາຍໃໝ່ໃນການຮ່ວມມືດ້ານພະລັງງານລະຫວ່າງ 2 ປະເທດ. ການນຳເຂົ້າໄຟຟ້າ ແລະ ຖ່ານຫີນຈາກລາວ ບໍ່ພຽງແຕ່ຊ່ວຍພັດທະນາເສດຖະກິດລະຫວ່າງສອງປະເທດເທົ່ານັ້ນ, ແຕ່ຍັງປະຕິບັດເປົ້າໝາຍຄວບຄູ່ກ່ຽວກັບຄວາມໝັ້ນຄົງປ້ອງກັນຊາດ ແລະ ສະໜອງພະລັງງານໃຫ້ແກ່ພື້ນຖານເສດຖະກິດນຳອີກ. ຕາມນັ້ນແລ້ວ, ທ່ານລັດຖະມົນຕີກໍ່ໄດ້ຮຽກຮ້ອງໃຫ້ບັນດາຫົວໜ່ວຍທີ່ເຂົ້າຮ່ວມກອງປະຊຸມຜັນຂະຫຍາຍບັນດາໜ້າທີ່ ແລະ ມາດຕະການແກ້ໄຂຕົ້ນຕໍລວມມີ:
ກ່ຽວກັບການສະໜອງຖ່ານຫີນ, ແກັດເຜົາໄໝ້ໃຫ້ແກ່ຂະແໜງໄຟຟ້າ, ທ່ານລັດຖະມົນຕີ ຫງວຽນຮົ່ງຢຽນ ຮຽກຮ້ອງວ່າ ໂດຍອີງໃສ່ຕາຕະລາງສະໜອງຖ່ານໃນປີ 2024, ກົມນ້ຳມັນເຊື້ອໄຟ ແລະ ຖ່ານຫີນ ເປັນຜູ້ຮັບຜິດຊອບຮ່ວມກັບ ບໍລິສັດ EVN, TKV, PVN, ບໍລິສັດໃຫຍ່ ດົງບັກ, PvGas ແລະ ບັນດາຫົວໜ່ວຍທີ່ກ່ຽວຂ້ອງ ເພື່ອກວດກາຄືນ ແລະ ດັດສົມແຜນການສະໜອງຖ່ານຫີນປະຈຳໄຕມາດ ແລະ ລາຍງານໃນເດືອນສຸດທ້າຍຂອງໄຕມາດ, ບັນດາວິສາຫະກິດຕ້ອງພັດທະນາການສະໜອງຖ່ານຫີນ, ສຳຮອງຖ່ານປະຈຳເດືອນສົ່ງໃຫ້ໜ່ວຍງານວິຊາສະເພາະຂອງກະຊວງກວດກາຄືນ ແລະ ລາຍງານໃຫ້ການນຳກະຊວງ. ໂຮງງານໄຟຟ້າຖ່ານຫີນ ຕ້ອງນຳເຂົ້າ ແລະ ສຳຮອງຖ່ານຫີນ, ແກັດເຜົາໄໝ້ພື່ອຮັບໃຊ້ການຜະລິດໄຟຟ້າໃນທຸກສະຖານະການ ຕາມຄໍາແນະນໍາຂອງນາຍົກລັດຖະມົນຕີ ແລະ ກະຊວງອຸດສາຫະກຳ ແລະ ການຄ້າ.
ທ່ານລັດຖະມົນຕີຮຽກຮ້ອງໃຫ້ບໍລິສັດ TKV, ບໍລິສັດໃຫຍ່ ດົງບັກ ຕ້ອງເອົາໃຈໃສ່ແກ້ໄຂຄວາມຫຍຸ້ງຍາກໃນລະບຽບການບໍລິຫານ ແລະ ນິຕິກຳ; ການປັບໂຄງສ້າງທາງດ້ານການເງິນຂອງວິສາຫະກິດ; ປ່ຽນແປງໃໝ່ເຕັກໂນໂລຊີ ເພື່ອເພີ່ມຄວາມສາມາດຂຸດຄົ້ນ, ຜະລິດ, ປຸງແຕ່ງຖ່ານຫີນພາຍໃນປະເທດ ເພື່ອຜະລິດໄຟຟ້າ. ພ້ອມກັນນັ້ນ, ກໍ່ເລັ່ງເຈລະຈາລົງນາມໃນສັນຍາການນຳເຂົ້າຖ່ານຫີນ, ສະໜອງຖ່ານຫີນໃຫ້ໂຮງໄຟຟ້າພະລັງຄວາມຮ້ອນ, ຮັບປະກັນການປະຕິບັດສັນຍາທີ່ໄດ້ລົງນາມຢ່າງເຂັ້ມງວດ; ເປັນຜູ້ຮັບຜິດຊອບປະສານສົມທົບກັບບັນດາຫົວໜ່ວຍທີ່ກ່ຽວຂ້ອງ ເພື່ອສະເໜີກົນໄກສະເພາະການນຳເຂົ້າຖ່ານຫີນ, ໂດຍສະເພາະການນຳເຂົ້າຖ່ານຫີນຈາກ ລາວ ອີງຕາມຂໍ້ຕົກລົງລະຫວ່າງລັດຖະບານເພື່ອລາຍງານຕໍ່ນາຍົກລັດຖະມົນຕີຫຼືອົງການທີ່ມີສິດອຳນາດ.
ນອກຈາກນັ້ນ, ເພື່ອປະຕິບັດນະໂຍບາຍການນຳເຂົ້າຖ່ານຫີນຈາກ ລາວ ຕາມຂໍ້ຕົກລົງຂັ້ນສູງ, ທ່ານລັດຖະມົນຕີໄດ້ມອບໝາຍໃຫ້ ບໍລິສັດ TKV ແລະ ບໍລິສັດໃຫຍ່ ດົງບັກ ສະເໜີກົນໄກການນຳເຂົ້າ (ລາຄາຊື້ ແລະ ຂາຍ) ຖ່ານຫີນຈາກ ລາວ ໄປຍັງ ຫວຽດນາມ; ການແກ້ໄຂເພື່ອຍົກສູງຄວາມສາມາດຮັບເອົາຖ່ານຫີນເຂົ້າມາຍັງ ຫວຽດນາມ; ເຊັນສັນຍາຫຼັກການກັບບັນດາຄູ່ຮ່ວມມືຂອງ ລາວ ວະອຽດກ່ຽວກັບຜົນຜະລິດ ແລະ ຈະຈັດຕັ້ງປະຕິບັດທັນທີຫຼັງຈາກສັນຍາ ໄດ້ຮັບການຮັບຮອງ.
ສ່ວນຝ່າຍລາວ, ທ່ານລັດຖະມົນຕີ ຮຽກຮ້ອງໃຫ້ກະຊວງພະລັງງານ ແລະ ບໍ່ແຮ່ຂອງ ລາວ, ຜູ້ຕາງໜ້າສະຖານທູດ ລາວ ປະຈໍາ ຫວຽດນາມ ແລະ ວິສາຫະກິດສະໜອງຖ່ານຫີນຂອງ ລາວ ຕ້ອງລາຍງານໂດຍໄວ ແລະ ສະເໜີໃຫ້ລັດຖະບານລາວ ຫຼຸດຜ່ອນພາສີການສົ່ງອອກຖ່ານຫີນ ແລະ ຄ່າບໍລິການທີ່ກ່ຽວຂ້ອງ ເພື່ອຫຼຸດຜ່ອນຄ່າໃຊ້ຈ່າຍໃນເວລາສົ່ງອອກໄປຍັງ ຫວຽດນາມ; ລົງທຶນ, ຍົກລະດັບ ຫຼື ໜູນຊ່ວຍບັນດາວິສາຫະກິດໃນລະບົບພື້ນຖານໂຄງລ່າງ, ສາງ, ການຂົນສົ່ງຖ່ານຫີນມາຍັງ ຫວຽດນາມ.
ພາຍຫຼັງສິ້ນສຸດກອງປະຊຸມ, ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ມອບໃຫ້ກົມໄຟຟ້າ ແລະ ພະລັງງານທົດແທນ ເປັນປະທານ, ປະສານສົມທົບກັບກົມນ້ຳມັນເຊື້ອໄຟ ແລະ ຖ່ານຫີນ, ກົມຄຸ້ມຄອງໄຟຟ້າ, ບັນດາກຸ່ມບໍລິສັດ, ບໍລິສັດໃຫຍ່ ແລະ ຫົວໜ່ວຍທີ່ກ່ຽວຂ້ອງ ເພື່ອຮີີບເຮັ່ງສະເໜີກັບເຈົ້າໜ້າທີ່ມີສິດໃນດ້ານກົນໄກສະເພາະໃຫ້ບັນດາໂຄງການໄຟຟ້າອາຍແກັສ.
ນອກນັ້ນ, ບັນດາໜ່ວຍງານວິຊາສະເພາະຂອງກະຊວງອຸດສາຫະກຳ ແລະ ການຄ້າ ເປັນຕົ້ນແມ່ນອົງການກວດກາກະຊວງ, ກົມໄຟຟ້າ ແລະ ພະລັງງານທົດແທນ, ກົມທີ່ກ່ຽວຂ້ອງ ອີງຕາມການມອບໝາຍໜ້າທີ່ວຽກງານ ແລະ ການຊີ້ນຳຂອງລັດຖະບານ, ກະຊວງອຸດສາຫະກຳ ແລະ ການຄ້າ ແລະ ສະຫຼຸບພາຍຫຼັງກອງປະຊຸມຄັ້ງນີ້ ເພື່ອດຳເນີນວຽກງານກວດກາ, ຕິດຕາມກວດກາຢ່າງເປັນປະຈຳ, ຄຸ້ມຄອງ ຫຼື ແນະນຳໃຫ້ທັນເວລາໃນການແກ້ໄຂບັນດາການລະເມີດ (ຖ້າມີ) ຕາມຂໍ້ກຳນົດຂອງກົດໝາຍ.
ມິງດຶກ
