 | ແຂວງ ບິ່ງດິ້ງ ປາດຖະໜາຢາກດຶງດູດນັກທ່ອງທ່ຽວສາກົນດ້ວຍກິລາທະເລ |
| ຍອດພູທີ່ມີຮູບຮ່າງມັງກອນຂຶ້ນສູ່ທະເລໄດ້ດຶງດູດນັກທ່ອງທ່ຽວມາເຊັກອິນຢູ່ບິ່ງດິ້ງ |
ຄວາມດຶງດູດຂອງມໍລະດົກວັດທະນະທຳຫວຽດນາມ
ການທີ່ໄດ້ຮັບເຊີດຊູ ເປັນຈຸດປາຍທາງມໍລະດົກແຖວໜ້າຂອງໂລກ ໃນປີ 2023 ໄດ້ສືບຕໍ່ຢືນຢັນຄວາມສາມາດບົ່ມຊ້ອນ, ຄວາມດຶງດູດກ່ຽວກັບຊັບພະຍາກອນທຳມະຊາດ, ຄຸນຄ່າມໍລະດົກວັດທະນະທຳອັນດົນນານຂອງຫວຽດນາມ.
ກົມທ່ອງທ່ຽວແຫ່ງຊາດ ຫວຽດນາມ, ກະຊວງວັດທະນະທຳ, ກິລາ ແລະ ທ່ອງທ່ຽວ ໃຫ້ຮູ້ວ່າ: ຫວຽດນາມ ສືບຕໍ່ໄດ້ຮັບເຊີດຊູເປັນຈຸດໝາຍປາຍທາງ ມໍລະດົກແຖວໜ້າຂອງໂລກ ໃນປີ 2023 ທີ່ພິທີມອບລາງວັນການທ່ອງທ່ຽວໂລກ (World Travel Awards) ຢູ່ ນະຄອນດູໄບ, ສະຫະລັດ ອາຣັບ ເອມິເລັດ.
ນີ້ເປັນຄັ້ງທີ 4 ທີ່ ຫວຽດນາມ ໄດ້ຮັບລາງວັນນີ້, ໄດ້ລື່ນກາຍ ບັນດາປະເທດລົງຄັດເລືອກທີ່ມີທ່າແຮງກວ່າຄື: ອີຢິບ, ເກຼັກ, ຍີ່ປຸ່ນ, ສະຫະລັດ ອາຣັບ ເອມິເລັດ, ບຣາຊິນ ແລະ ອາເມເນຍ.
ບັນດາການເຊີດຊູຂອງຫວຽດນາມໃນເມື່ອກ່ອນແມ່ນປີ 2019, 2020 ແລະ 2022. ນັ້ນສະແດງໃຫ້ເຫັນຄຸນຄ່າອັນພົ້ນເດັ່ນໃນທົ່ວໂລກ ແລະ ຄວາມດຶງດູດຂອງມໍລະດົກວັດທະນະທຳຫວຽດນາມ ຕໍ່ກັບວົງຄະນະຍາດສາກົນ.
 |
| ເມືອງບູຮານໂຮ້ຍອານ (ຫວຽດນາມ) ໄດ້ຮັບການຮັບຮອງຈາກອົງການວິທະຍາສາດ, ການສຶກສາ ແລະ ວັດທະນະທຳຂອງສະຫະປະຊາຊາດ (UNESCO) ເປັນມໍລະດົກວັດທະນະທຳໂລກ ໃນເດືອນທັນວາ 1999 (ພາບ: ໜັງສືພິມເຍີນ). |
ຕາມອົງການທ່ອງທ່ຽວແຫ່ງຊາດຫວຽດນາມ ແລ້ວ, ການໄດ້ຮັບການເຊີດຊູເປັນຈຸດໝາຍປາຍທາງແຖວໜ້າມໍລະດົກໂລກ ສືບຕໍ່ຢືນຢັນຄວາມສາມາດບົ່ມຊ້ອນ ແລະ ຄວາມດຶງດູດແຖວໜ້າກ່ຽວກັບຊັບພະຍາກອນທຳມະຊາດ ແລະ ຄຸນຄ່າມໍລະດົກວັດທະນະທຳທີ່ມີມາແຕ່ດົນນານ.
ລາງວັນດັ່ງກ່າວ ຈະປະກອບສ່ວນໂຄສະນາພາບພົດການທ່ອງທ່ຽວຫວຽດນາມ ໄປສູ່ເພື່ອນມິດສາກົນໃຫ້ກວ້າງຂວາງຕື່ມອີກ, ພ້ອມທັງຢືນຢັນຄວາມມານະພະຍາຍາມ ໃນການປົກປັກຮັກສາ ແລະ ເຊີດຊູຄຸນຄ່າມໍລະດົກຂອງວົງຄະນະຍາດ ປະຊາຊົນ.
ທ່ານ ຮ່າວັນຊຽວ ຮອງຫົວໜ້າກົມທ່ອງທ່ຽວແຫ່ງຊາດ ຫວຽດນາມ ຢືນຢັນວ່າ: ມໍລະດົກວັດທະນະທຳ ແມ່ນແຫຼ່ງຊັບພະຍາກອນທ່ອງທ່ຽວທີ່ມີກຳລັງເພື່ອດຶງດູດນັກທ່ອງທ່ຽວນັບມື້ນັບຫຼາຍຂຶ້ນ, ພິເສດແມ່ນແຂກທ່ອງທ່ຽວສາກົນມາຍັງຫວຽດນາມ. ຂະແໜງທ່ອງທ່ຽວ ຖືມໍລະດົກວັດທະນະທຳເປັນພື້ນຖານ ແລະ ເສົາຄໍ້າທີ່ສຳຄັນ ໃນການພັດທະນາເສດຖະກິດການທ່ອງທ່ຽວ; ເຄື່ອງມືໜູນຊ່ວຍຢ່າງຕັ້ງໜ້າ ໃນການຈັດຕັ້ງຮູບພາບ ແລະ ການສ້າງເຄື່ອງໝາຍການທ່ອງທ່ຽວຫວຽດນາມ.
ບັນດາການເຄື່ອນໄຫວທ່ອງທ່ຽວ ແມ່ນອີງໃສ່ມໍລະດົກຢູ່ຫຼາຍແຫ່ງຄື: ເຫ້ວ, ໂຮ້ຍອານ, ຮ່າລອງ, ຈ່າງອານ, ຮ່າໂນ້ຍ... ໄດ້ສ້າງລາຍຮັບ ແລະ ວຽກເຮັດງານທຳໃຫ້ຄົນທ້ອງຖິ່ນ. ການທ່ອງທ່ຽວມໍລະດົກ ຍັງປະກອບສ່ວນເພີ່ມທະວີຄວາມເຂົ້າໃຈ ແລະ ຄວາມເຄົາລົບໃນຄວາມຫຼາກຫຼາຍ ແລະ ການພົວພັນລະຫວ່າງພື້ນຖານວັດທະນະທຳ, ເປັນພື້ນຖານການສ້າງກົດແຫ່ງການປະພຶດທີ່ເໝາະສົມ ລະຫວ່າງປະຊາຊົນກັບນັກທ່ອງທ່ຽວ ແລະ ມໍລະດົກ.
ບັນດາຜົນປະໂຫຍດຂອງການທ່ອງທ່ຽວມໍລະດົກແມ່ນບໍ່ໜ້ອຍ. ສ່ວນລາຍຮັບຈາກການທ່ອງທ່ຽວມໍລະດົກ ແມ່ນໄດ້ລົງທຶນຄືນໃໝ່ເຂົ້າໃນການປົກປັກຮັກສາ, ບູລະນະ ແລະ ຄຸ້ມຄອງມໍລະດົກ. ອາດເຫັນໄດ້ວ່າ ການທ່ອງທ່ຽວມໍລະດົກໄດ້ປະກອບສ່ວນຢ່າງໃຫຍ່ຫຼວງເຂົ້າໃນການອະນຸລັກຮັກສາ ແລະ ເສີມຂະຫຍາຍມໍລະດົກວັດທະນະທຳ...
ຄຽງຄູ່ກັບນາມມະຍົດເປັນຈຸດໝາຍປາຍທາງມໍລະດົກແຖວໜ້າຂອງໂລກ 2023, ຫວຽດນາມ ກໍ່ຍັງມີບັນດາສະຖານທີ່ທ່ອງທ່ຽວຢູ່ຂັ້ນທ້ອງຖິ່ນທີ່ໄດ້ຮັບການເຊີດຊູອີກດ້ວຍ. ໃນນັ້ນ, ຮ່າໂນ້ຍ ໄດ້ຮັບນາມມະຍົດເປັນແຫຼ່ງທ່ອງທ່ຽວຕົວເມືອງແຖວໜ້າຂອງໂລກໃນປີ 2023. ຟູ້ກວກ ໄດ້ຮັບນາມມະຍົດເປັນສະຖານທີ່ທ່ອງທ່ຽວໝູ່ເກາະທຳມະຊາດແຖວໜ້າຂອງໂລກໃນປີ 2023. ມົກເຈົ່າ ແມ່ນ “ຈຸດໝາຍທ່ອງທ່ຽວທຳມະຊາດຂັ້ນທ້ອງຖິ່ນແຖວໜ້າຂອງໂລກ 2023”. ຮ່ານາມ ຍາດໄດ້ລາງວັນ “ຈຸດໝາຍປາຍທາງວັດທະນະທຳທ້ອງຖິ່ນ ແຖວໜ້າຂອງໂລກ 2023”. ຕາມດາວ ໄດ້ຮັບນາມມະຍົດ "ຈຸດຫມາຍປາຍທາງເທດສະບານແຖວໜ້າຂອງໂລກ 2023...
ອານຸໄຊ ສະຫວັດ
