ໂດຍຕອບຮັບຄໍາເຊີນຂອງກະຊວງປ້ອງກັນປະເທດໄທ, ຄະນະຜູ້ແທນກະຊວງປ້ອງກັນປະເທດຫວຽດນາມ ໂດຍທ່ານພົນໂທ ຟຸ່ງສີເຕິ໊ນ, ຮອງຫົວໜ້າກົມໃຫຍ່ເສນາທິການ ກອງທັບປະຊາຊົນຫວຽດນາມ ເປັນຫົວໜ້າຄະນະ ໄດ້ເຂົ້າຮ່ວມງານວາງສະແດງກ່ຽວກັບການປ້ອງກັນຊາດ-ປ້ອງກັນຄວາມສະຫງົບ 2023 ຢູ່ໄທ ແຕ່ວັນທີ 6 ຫາວັນທີ 9 ພະຈິກ.ງານວາງສະແດງປ້ອງກັນຊາດ-ປ້ອງກັນຄວາມສະຫງົບ 2023 ມີການເຂົ້າຮ່ວມຂອງກ່ວາ 500 ບໍລິສັດຜະລິດອຸດສາຫະກຳປ້ອງກັນຊາດແຖວໜ້າໃນພາກພື້ນ ແລະໃນໂລກ; ໄດ້ຕ້ອນຮັບ 400 ຄະນະຜູ້ແທນທາງການ ລວມມີການນຳກະຊວງປ້ອງກັນປະເທດ, ກອງທັບ ແລະບໍລິສັດການຄ້າ ທີ່ມາຈາກ 50 ກວ່າປະເທດໃນພາກພື້ນ ແລະໃນໂລກ. ງານວາງສະແດງໄດ້ວາງສະແດງອຸປະກອນ ແລະອາວຸດຍຸດໂທປະກອນຂອງ 3 ກໍາລັງ: ທະຫານເຮືອ, ທະຫານບົກ, ທະຫານອາກາດ, ເຊິ່ງໄດ້ຈັດເປັນບັນດາຮ້ານວາງສະແດງຜະລິດຕະພັນ, ຄື: ປືນ, ລູກສອນໄຟ, ລົດຕັງ, UAV, ດາວທຽມ ແລະການໂທລະຄົມມະນາຄົມ, ເຕັກໂນໂລຢີປ້ອງກັນທາງເອເລັກໂຕນິກ, ຄວາມປອດໄພດ້ານໄຊເບີ, ກູ້ໄພ...
 |
| ຄະນະຜູ້ແທນຫວຽດນາມ ແລະໄທ ທີ່ງານວາງສະແດງປ້ອງກັນຊາດ-ປ້ອງກັນຄວາມສະຫງົບ 2023. ພາບ: ທູເຮືອງ |
ໃນຂອບເຂດງານວາງສະແດງ, ທ່ານພົນໂທ ຟຸ່ງສີເຕິ໊ນ ພ້ອມດ້ວຍຄະນະໄດ້ເຂົ້າຢ້ຽມຂໍ່ານັບທ່ານພົນເອກ Songwit Noonpakde, ຜູ້ບັນຊາການກຳລັງປ້ອງກັນຊາດໄທ. ທີ່ການຕ້ອນຮັບ, ທ່ານພົນເອກ Songwit Noonpakde ໃຫ້ຮູ້ວ່າ: ກ່ຽວກັບການຮ່ວມມືດ້ານປ້ອງກັນຊາດ, ສອງຝ່າຍຕີລາຄາສູງໝາກຜົນແຫ່ງການຮ່ວມມືລະຫວ່າງສອງກອງທັບໃນໄລຍະຜ່ານມາ ແລະ ເປັນເອກະພາບສືບຕໍ່ຊຸກຍູ້ການແລກປ່ຽນຄະນະຜູ້ແທນທຸກຂັ້ນ, ກໍ່ຄືຮັກສາບັນດາກົນໄກປຶກສາຫາລື, ສົນທະນາທີ່ມີຢູ່ແລ້ວໃນໄລຍະຈະມາເຖິງ. ທ່ານພົນໂທ ຟຸ່ງສີເຕິ໊ນ ສະແດງຄວາມຂອບໃຈຕໍ່ກະຊວງປ້ອງກັນປະເທດ, ກອງທັບໄທ, ຄະນະຈັດຕັ້ງງານວາງສະແດງ ທີ່ໄດ້ໃຫ້ການຕ້ອນຮັບຄະນະຢ່າງສົມກຽດ ແລະເຊື້ອເຊີນການນໍາກະຊວງປ້ອງກັນປະເທດ ແລະກອງທັບໄທ ກໍ່ຄືບັນດາວິສາຫະກິດການປ້ອງກັນຊາດຂອງໄທ ມາເຂົ້າຮ່ວມ ແລະວາງສະແດງບັນດາຜະລິດຕະພັນ ທີ່ງານວາງສະແດງປ້ອງກັນຊາດສາກົນຫວຽດນາມ ຄັ້ງທີ 2 ໂດຍກະຊວງປ້ອງກັນປະເທດຫວຽດນາມ ຈະຈັດຕັ້ງໃນເດືອນທັນວາ 2024.
ທີ່ການພົບປະເຮັດວຽກຢູ່ນອກເຫດການກັບທ່ານ Daniel Blazkovec ຮອງລັດຖະມົນຕີກະຊວງປ້ອງກັນປະເທດ ເຊັກໂກ, ສອງຝ່າຍໄດ້ຕີລາຄາສູງການພົວພັນຮ່ວມມືມິດຕະພາບທີ່ເປັນມູນເຊື້ອລະຫວ່າງສອງປະເທດ ແລະກອງທັບສອງປະເທດ; ເຫັນດີເປັນເອກະພາບຕີລາຄາວ່າ ສອງຝ່າຍຍັງມີຄວາມສາມາດບົ່ມຊ້ອນຫຼາຍຢ່າງໃນການຮ່ວມມື, ພິເສດແມ່ນໃນຂົງເຂດອຸດສາຫະກຳປ້ອງກັນຊາດ ແລະການຄ້າການທະຫານ. ທ່ານຮອງລັດຖະມົນຕີກະຊວງປ້ອງກັນປະເທດເຊັກໂກ ໄດ້ສະແດງຄວາມປະທັບໃຈຕໍ່ງານວາງສະແດງການປ້ອງກັນຊາດສາກົນຫວຽດນາມ ຄັ້ງທີ 1 ປີ 2022 ແລະ ໄດ້ຕອບຮັບຄຳເຊີນມາຢ້ຽມຢາມ ຫວຽດນາມ ແລະ ເຂົ້າຮ່ວມງານວາງສະແດງປ້ອງກັນຊາດສາກົນຫວຽດນາມ ຄັ້ງທີ 2.
ບູນມີ
