ໃນຕະຫຼອດ 60 ປີຜ່ານມານັບແຕ່ວັນສ້າງຕັ້ງການພົວພັນທາງການທູດ (ວັນທີ 2 ທັນວາ 1960), ເຖິງວ່າສະພາບການໂລກມີການປ່ຽນແປງຫຼາຍຢ່າງກໍ່ຕາມ, ແຕ່ການພົວພັນສາມັກຄີແບບພິເສດ ຫວຽດນາມ - ກູບາ ໂດຍປະທານໂຮ່ຈີມິນ ແລະການນຳ Fidel Castro ເປັນຜູ້ສ້າງຕັ້ງ, ເຊິ່ງການນຳລຸ້ນຕ່າງໆ ແລະປະຊາຊົນສອງປະເທດໄດ້ເພີ່ມພູນຄູນສ້າງ, ນັບມື້ນັບໝັ້ນແກ່ນ, ເລິກເຊິ່ງ ແລະອົບອຸ່ນ. ໃນສະພາບການທີ່ດີຂອງການພົວພັນລະຫວ່າງສອງປະເທດ, ນອກຈາກບັນດາຂົງເຂດຮ່ວມມືອື່ນໆ, ການຮ່ວມມືດ້ານປ້ອງກັນຊາດຫວຽດນາມ - ກູບາ ກໍ່ພວມພັດທະນາຢ່າງບໍ່ຢຸດຢັ້ງ ທັງລວງກວ້າງ ແລະລວງເລິກ.
ຫວນຄືນປະຫວັດສາດການພົວພັນດ້ານປ້ອງກັນຊາດ ຫວຽດນາມ - ກູບາ, ນັບແຕ່ຕົ້ນປີ 1964, ຫວຽດນາມ ໄດ້ເປີດຫ້ອງການທູດປ້ອງກັນຊາດ ປະຈໍາ ກູບາ ແລະ ປີ 1966, ກູບາ ໄດ້ເປີດຫ້ອງການທູດການທະຫານ ປະຈໍາ ຫວຽດນາມ. ເມື່ອຫາກໍ່ສ້າງຕັ້ງການພົວພັນ, ບັນດາເນື້ອໃນຂອງການຮ່ວມມືດ້ານປ້ອງກັນຊາດລະຫວ່າງສອງຝ່າຍຕົ້ນຕໍແມ່ນສຸມໃສ່ແລກປ່ຽນຜູ້ຊ່ຽວຊານ, ແບ່ງປັນບົດຮຽນດ້ານເຕັກນິກການສູ້ຮົບ... ຝ່າຍກູບາ ໄດ້ສົ່ງຄະນະຜູ້ແທນການທະຫານຈຳນວນໜຶ່ງມາຫວຽດນາມ ເພື່ອຄົ້ນຄ້ວາ ແລະຖອດຖອນບົດຮຽນກ່ຽວກັບສົງຄາມ ແລະເຂົ້າຮ່ວມການສູ້ຮົບກັບກອງທັບ ແລະປະຊາຊົນຫວຽດນາມ. ພາຍຫຼັງປີ 1975, ສອງຝ່າຍສືບຕໍ່ເພີ່ມທະວີການແລກປ່ຽນບົດຮຽນກ່ຽວກັບສົງຄາມປະຊາຊົນ. ແຕ່ປີ 1985 – 1992, ຫວຽດນາມ ໄດ້ສົ່ງຜູ້ຊ່ຽວຊານການທະຫານທ້ອງຖິ່ນ, ຊ່ຽວຊານກຳລັງຕິພິເສດ, ຊ່າງແສງ, ນັກຊ່ຽວຊານປ້ອງກັນອາກາດ... ມາຊ່ວຍເຫຼືອ ກູບາ ສ້າງລະບົບປ້ອງກັນບັນດາຂັ້ນ ແລະຝຶກຊ້ອມກຳລັງທະຫານທ້ອງຖິ່ນ ແລະກຳລັງປ້ອງກັນຕົວ.
 |
| ທ່ານພົນເອກ ຟານວັນຢາງ ແລະທ່ານພົນໂທ Álvaro Lopez Miera ລົງນາມໃນແຜນການຮ່ວມມືໄລຍະ 2023-2025. ພາບ: qdnd.vn |
ປີ 2011, ບົນພື້ນຖານຄວາມຕ້ອງການ ແລະຄວາມປາດຖະໜາຢາກຊຸກຍູ້ການພົວພັນດ້ານປ້ອງກັນຊາດສອງຝ່າຍ, ສອງຝ່າຍໄດ້ລົງນາມໃນສັນຍາພັດທະນາການຮ່ວມມືດ້ານປ້ອງກັນຊາດ. ນີ້ແມ່ນຂີດໝາຍ ແລະພື້ນຖານນິຕິກຳທີ່ສຳຄັນເພື່ອໃຫ້ກອງທັບສອງປະເທດຊຸກຍູ້ການຮ່ວມມືຮອບດ້ານໃນຂົງເຂດປ້ອງກັນຊາດ. ດ້ວຍຈຸດປະສົ່ງນຳການພົວພັນດ້ານປ້ອງກັນຊາດໃຫ້ເລິກເຊິ່ງ, ມີປະສິດທິຜົນ ແລະແທດຈິງກວ່າອີກ, ສອງຝ່າຍໄດ້ລົງນາມໃນແຜນການຮ່ວມມືດ້ານປ້ອງກັນຊາດ ໄລຍະ 2014-2016, ໄລຍະ 2017-2019, ໄລຍະ 2020-2022. ບົນພື້ນຖານບັນດາເອກະສານ, ສັນຍາທີ່ໄດ້ຮັບການລົງນາມ, ພິເສດແມ່ນແຜນການຮ່ວມມືໄລຍະ 2020-2022, ສອງຝ່າຍໄດ້ສົມທົບກັນຜັນຂະຫຍາຍຫຼາຍຂົງເຂດຮ່ວມມືຢ່າງມີປະສິດທິຜົນ ແລະບັນລຸໄດ້ບັນດາໝາກຜົນທີ່ພົ້ນເດັ່ນໃນຂົງເຂດຕ່າງໆ, ຄື: ແລກປ່ຽນຄະນະຜູ້ແທນທຸກຂັ້ນ, ພິເສດແມ່ນຄະນະຜູ້ແທນຂັ້ນສູງ; ວຽກງານພັກ, ວຽກງານການເມືອງ; ອຸດສາຫະກໍາປ້ອງກັນຊາດ; ການກໍ່ສ້າງຊັບພະຍາກອນມະນຸດ; ໂຄສະນາເຜີຍແຜ່ກ່ຽວກັບການພົວພັນມິດຕະພາບທີ່ເປັນມູນເຊື້ອແບບພິເສດລະຫວ່າງສອງພັກ, ສອງລັດ, ສອງກອງທັບ, ໂດຍສະເພາະແມ່ນການຮຽບຮຽງປື້ມ “60 ປີແຫ່ງວັນປະຫວັດສາດການພົວພັນດ້ານປ້ອງກັນຊາດ ຫວຽດນາມ - ກູບາ”; ແພດການທະຫານ; ກະສິກຳ...
ເມື່ອພະຍາດໂຄວິດ-19 ພວມຜັນແປຢ່າງສັບສົນ, ຫວຽດນາມ ແລະກູບາ ໄດ້ເປັນເຈົ້າການ, ຕັ້ງໜ້າຊຸກຍູ້ການຮ່ວມມື ແລະໜູນຊ່ວຍກັນໃນການປ້ອງກັນ ແລະຄວບຄຸມພະຍາດໃນຂອບເຂດການຮ່ວມມືດ້ານປ້ອງກັນຊາດ. ນີ້ແມ່ນພະຍານຫຼັກຖານທີ່ມີຊີວິດຊີວາກ່ຽວກັບນ້ຳໃຈມິດສະຫາຍ, ອ້າຍນ້ອງ ແລະຄວາມສາມັກຄີແບບສະເໝີຕົ້ນສະເໝີປາຍ ເຊິ່ງສອງປະເທດໄດ້ສະຫງວນໃຫ້ກັນໃນໄລຍະທີ່ຫຍຸ້ງຍາກ ແລະອັນຕະລາຍທີ່ສຸດ.
 |
| ທ່ານພົນເອກ ຟານວັນຢາງ ແລະທ່ານພົນໂທ Álvaro Lopez Miera ພ້ອມດ້ວຍບັນດາຜູ້ແທນຖ່າຍຮູບເປັນທີ່ລະນຶກ. ພາບ: qdnd.vn |
ເດືອນ ມິຖຸນາ 2023, ທ່ານພົນເອກ ຟານວັນຢາງ, ກຳມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດຫວຽດນາມ ແລະທ່ານພົນໂທ Álvaro Lopez Miera ກໍາມະການກົມການເມືອງພັກກອມມູນິດກູບາ, ລັດຖະມົນຕີກະຊວງບັນດາກໍາລັງປະກອບອາວຸດປະຕິວັດກູບາ ໄດ້ລົງນາມໃນແຜນການຮ່ວມມືໄລຍະ 2023-2025 ເນື່ອງໃນໂອກາດມາຢ້ຽມຢາມຫວຽດນາມ ຢ່າງເປັນທາງການຂອງທ່ານພົນໂທ Álvaro Lopez Miera. ທີ່ການພົບປະເຈລະຈາ, ສອງຝ່າຍເຫັນດີເປັນເອກະພາບສຸມໃສ່ຜັນຂະຫຍາຍການພົວພັນຮ່ວມມືໃນຫຼາຍຂົງເຂດ, ຄື: ສືບຕໍ່ເພີ່ມທະວີການພົບປະ, ແລກປ່ຽນຄະນະຜູ້ແທນທຸກຂັ້ນ, ພິເສດແມ່ນຄະນະຜູ້ແທນຂັ້ນສູງ; ແລກປ່ຽນປະສົບການດ້ານວິຊາຊີບ; ພົບປະແລກປ່ຽນນາຍທະຫານໜຸ່ມຂອງສອງປະເທດ; ອຸດສາຫະກໍາປ້ອງກັນຊາດ; ຮ່ວມມືໃນການກໍ່ສ້າງຊັບພະຍາກອນມະນຸດ; ແພດການທະຫານ; ວຽກງານພັກ ແລະວຽກງານການເມືອງ...
ໃນການພົວພັນຮ່ວມມືລະຫວ່າງສອງປະເທດ, ການຮ່ວມມືດ້ານປ້ອງກັນຊາດຍາມໃດກໍ່ຖືເປັນໜຶ່ງໃນບັນດາເສົາຄ້ຳ, ເປັນແບບຢ່າງເພື່ອຊຸກຍູ້ການຮ່ວມມືໃນຂົງເຂດອື່ນໆ. ບົນພື້ນຖານການພົວພັນດ້ານການເມືອງອັນດີງາມ ແລະຄວາມໄວ້ເນື້ອເຊື່ອໃຈເຊິ່ງກັນ ແລະກັນລະຫວ່າງສອງປະເທດເວົ້າລວມ ແລະກອງທັບສອງປະເທດເວົ້າສະເພາະ, ພວກເຮົາເຊື່ອໝັ້ນວ່າ ການພົວພັນຮ່ວມມືດ້ານປ້ອງກັນຊາດ ຫວຽດນາມ - ກູບາ ຈະສືບຕໍ່ໄດ້ຮັບການເພີ່ມທະວີ, ນັບມື້ນັບເຂົ້າສູ່ລວງເລິກ, ມີປະສິດທິຜົນ ແລະຍືນຍົງ, ປະກອບສ່ວນຊຸກຍູ້ການພົວພັນສາມັກຄີ, ມິດຕະພາບແບບພິເສດ, ການຮ່ວມມືຮອບດ້ານລະຫວ່າງສອງປະເທດ.
ບູນມີ
