ກອງປະຊຸມຫົວໜ້າຕໍາຫຼວດອາຊຽນ ຄັ້ງທີ 41

	ກອງປະຊຸມຄັ້ງທີ 41 ຄະນະກໍາມະການລະຫວ່າງລັດຖະບານແຫ່ງ ສສ ຫວຽດນາມ ແລະ ລັດຖະບານ ສປປ ລາວ ໄດ້ໄຂຂຶ້ນຢ່າງເປັນທາງການ
	ທ່ານນາຍົກລັດຖະມົນຕີທອງລຸນສີສຸລິດຈະເຂົ້າຮ່ວມແລະເປັນປະທານຮ່ວມກອງປະຊຸມຄັ້ງທີ 41 ຄະນະກຳມະການລະຫວ່າງລັດຖະບານຫວຽດນາມ-ລາວ

ຕອນເຊົ້າວັນທີ 17 ຕຸລາ, ພິທີໄຂກອງປະຊຸມຫົວໜ້າຕໍາຫຼວດອາຊຽນ ຄັ້ງທີ 41 ດ້ວຍຫົວຂໍ້ “ເພີ່ມທະວີການພົວພັນຄູ່ຮ່ວມມື, ຊຸກຍູ້ສັນຕິພາບ, ສະຖຽນລະພາບ ແລະຄວາມໝັ້ນຄົງ” ໄດ້ດໍາເນີນຢູ່ນະຄອນຫຼວງວຽງຈັນ, ລາວ.

ກ່າວຄໍາເຫັນທີ່ພິທີໄຂ, ທ່ານພົນເອກ ວິໄລ ຫຼ້າຄຳຟອງ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບລາວ ເນັ້ນໜັກວ່າ ກອງປະຊຸມໄດ້ຈັດຕັ້ງໃນສະພາບການເຄື່ອນໄຫວອາດຊະຍາກຳຂ້າມຊາດນໍາໃຊ້ເຕັກໂນໂລຢີທັນສະໄໝ, ເພື່ອກະທຳຜິດນັບມື້ນັບແນບນຽນ, ກາຍເປັນສິ່ງທ້າທາຍ, ນາບຂູ່ໂດຍກົງ ແລະໂດຍທາງອ້ອມເຖິງສະຖຽນລະພາບດ້ານການເມືອງ, ການພັດທະນາເສດຖະກິດ-ສັງຄົມ ກໍ່ຄືຊີວິດການເປັນຢູ່ຂອງປະຊາຊົນໃນພາກພື້ນ ແລະໂລກ.

ຜູ້ແທນກໍາລັງຕໍາຫຼວດບັນດາປະເທດອາຊຽນ ທີ່ພິທີໄຂ. ພາບ: nhandan.vn

ທ່ານ ພົນເອກ ວິໄລ ຫຼ້າຄຳຟອງ ຢັ້ງຢືນວ່າ ການສະກັດກັ້ນ, ຕໍ່ສູ້ຕ້ານອາດຊະຍາກໍານີ້ ແມ່ນໜ້າທີ່ສໍາຄັນ, ໂດຍກົງ, ໜັກໜ່ວງ ແລະຈໍາເປັນ, ຮຽກຮ້ອງຕ້ອງສຸມໃສ່ເພີ່ມທະວີການຮ່ວມມືທັງພາກພື້ນ ແລະສາກົນ.

ທ່ານລັດຖະມົນຕີກະຊວງປ້ອງກັນຄວາມສະຫງົບລາວ ສະເໜີໃຫ້ສຸມໃສ່ຍົກສູງບົດບາດຂອງຄະນະເລຂາທິການຕໍາຫຼວດອາຊຽນ ເພື່ອກາຍເປັນອົງການຜູ້ຕາງໜ້າທີ່ສໍາຄັນຂອງຕໍາຫຼວດບັນດາປະເທດສະມາຊິກອາຊຽນ ໃນການຮ່ວມມື, ສົມທົບກັນ, ເກັບກໍາຂໍ້ມູນຮັບໃຊ້ວຽກງານສະກັດກັ້ນ, ຕໍ່ສູ້ຕ້ານອາດຊະຍາກໍາຂ້າມຊາດໃນພາກພື້ນ ແລະສາກົນ...

ໂດຍດໍາເນີນໃນວັນທີ 17, 18, 19 ຕຸລາ, ກອງປະຊຸມຫົວໜ້າຕໍາຫຼວດອາຊຽນ ຄັ້ງທີ 41 ຄາດວ່າຈະປຶກສາຫາລື, ແລກປ່ຽນຄວາມເຫັນກ່ຽວກັບການຮ່ວມມືວຽກງານຕໍາຫຼວດລະຫວ່າງ ບັນດາປະເທດສະມາຊິກຕໍາຫຼວດອາຊຽນ, ບັນດາຄູ່ຮ່ວມມືເຈລະຈາ ແລະຜູ້ສັງເກດການ ເພື່ອແກ້ໄຂບັນດາບັນຫາອາດຊະຍາກໍາຂ້າມຊາດຄື ການຄ້າຢາເສບຕິດ, ການກໍ່ການຮ້າຍ, ການຄ້າມະນຸດ, ການຄ້າອາວຸດ, ການຄ້າສັດປ່າ, ອາດຊະຍາກໍາທາງທະເລ, ອາດຊະຍາກໍາການຄ້າ...

ບູນມີ