ໂດຍຕອບສະໜອງຕາມຄຳເຊີນຂອງທ່ານ ສີຈີ້ນຜິງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຈີນ, ປະທານປະເທດ ແຫ່ງ ສປ ຈີນ, ທ່ານ ຫວໍວັນເຖືອງ ປະທານປະເທດຫວຽດນາມ ໄດ້ນຳໜ້າຄະນະຜູ້ແທນຂັ້ນສູງຫວຽດນາມ ເດີນທາງໄປເຂົ້າຮ່ວມເວທີປາໄສຮ່ວມມືສາກົນຂັ້ນສູງ “ໜຶ່ງແລວ, ໜຶ່ງເສັ້ນທາງ” ຄັ້ງທີ 3 ຢູ່ປັກກິ່ງ, ຈີນ, ໃນລະຫວ່າງວັນທີ 17-20 ຕຸລາ.
ເນື່ອງໃນໂອກາດນີ້, ທ່ານ ຫງວຽນມິງຫວູ ຮອງລັດຖະມົນຕີກະຊວງການຕ່າງປະເທດຫວຽດນາມ ໄດ້ໃຫ້ສຳພາດກ່ຽວກັບຄວາມໝາຍທີ່ພົ້ນເດັ່ນ ກໍ່ຄືຄວາມຫວັງໃນການຮ່ວມມືທີ່ຈະໄດ້ຮັບການຊຸກຍູ້ໃນການໄປປະຕິບັດງານຂອງທ່ານປະທານປະເທດ ຫວໍວັນເຖືອງ.
ນັກຂ່າວ: ຂໍຮຽນທ່ານຮອງລັດຖະມົນຕີ ໃຫ້ຮູ້ກ່ຽວກັບຄວາມໝາຍອັນພົ້ນເດັ່ນໃນການເດີນທາງໄປຢ້ຽມຢາມຈີນ ແລະເຂົ້າຮ່ວມເວທີປາໄສຮ່ວມມືສາກົນຂັ້ນສູງ “ໜຶ່ງແລວ, ໜຶ່ງເສັນທາງ” ຄັ້ງທີ 3 ຂອງທ່ານປະທານປະເທດ ຫວໍວັນເຖືອງ?
ທ່ານຮອງລັດຖະມົນຕີ ຫງວຽນມິງຫວູ: ນີ້ແມ່ນການໄປປະຕິບັດງານຢູ່ຈີນ ແລະກໍ່ແມ່ນການເຄື່ອນໄຫວພົວພັນຕ່າງປະເທດຄັ້ງທຳອິດຂອງທ່ານປະທານປະເທດ ຫວໍວັນເຖືອງ ໃນຖານະຕຳແໜ່ງໃໝ່. ນີ້ກໍ່ແມ່ນເວທີປາໄສຮ່ວມມືສາກົນຂັ້ນສູງ "ໜຶ່ງແລວ, ໜຶ່ງເສັ້ນທາງ" ທໍາອິດ ພາຍຫຼັງທີ່ຖືກຂາດວັກຂາດຕອນມາເປັນເວລາດົນນານ ຍ້ອນພະຍາດແຜ່ລະບາດ, ສະນັ້ນປະເທດຈີນ ແລະປະເທດຕ່າງໆ ຈຶ່ງໄດ້ມີຄວາມເອົາໃຈໃສ່ ແລະຖືເປັນສຳຄັນທີ່ສຸດ. ຍ້ອນເຫດນັ້ນ, ການເຂົ້າຮ່ວມເວທີປາໄສໃນຄັ້ງນີ້ຂອງທ່ານປະທານປະເທດ ຫວໍວັນເຖືອງ ແມ່ນສຳຄັນທີ່ສຸດທັງດ້ານສອງຝ່າຍ ແລະຫຼາຍຝ່າຍ.
 |
| ທ່ານ ຫງວຽນມິງຫວູ ຮອງລັດຖະມົນຕີກະຊວງການຕ່າງປະເທດຫວຽດນາມ. ພາບ: ດວ່ານກາ |
ໃນຂອບເຂດຫຼາຍຝ່າຍ, ໃນສະພາບທີ່ເສດຖະກິດໂລກຟື້ນຟູຊັກຊ້າ, ບັນດາປະເທດປາດຖະໜາຢາກເພີ່ມທະວີການຮ່ວມສຳພັນເສດຖະກິດໃນພາກພື້ນ ແລະທົ່ວໂລກ ເພື່ອຊຸກຍູ້ວິວັດການຟື້ນຟູເສດຖະກິດ, ເລື່ອງທ່ານປະທານປະເທດ ຫວໍວັນເຖືອງ ໄປເຂົ້າຮ່ວມເວທີປາໄສດັ່ງກ່າວ ໄດ້ສະແດງໃຫ້ເຫັນຄຳໝັ້ນສັນຍາຢ່າງແຂງແຮງຂອງຫວຽດນາມ ຕໍ່ກັບລັດທິຫຼາຍຝ່າຍ, ການເປັນເຈົ້າການ, ຕັ້ງໜ້າໃນການເພີ່ມທະວີການຮ່ວມມື ແລະຮ່ວມສໍາພັນເສດຖະກິດໃນພາກພື້ນ ກໍ່ຄືໃນທົ່ວໂລກ. ທ່ານປະທານປະເທດ ຫວໍວັນເຖືອງ ພ້ອມກັບການນຳ ແລະຜູ້ຕາງໜ້າຂອງ 140 ກວ່າປະເທດ ແລະອົງການຈັດຕັ້ງສາກົນ ເພື່ອປຶກສາຫາລືບັນດາເນື້ອໃນ ແລະ ຫົວຂໍ້ສຳຄັນທີ່ໄດ້ຮັບຖືວ່າເປັນກຳລັງໜູນໃໝ່ຂອງວິວັດການຟື້ນຟູເສດຖະກິດຂອງແຕ່ລະປະເທດ ກໍ່ຄືພື້ນຖານເສດຖະກິດທົ່ວໂລກ ຄື: ການຫັນປ່ຽນສີຂຽວ, ການຫັນເປັນດີຈີຕອນ, ກະສິກໍາທັນສະໄໝ, ການພັດທະນາວິສາຫະກິດຂະໜາດກາງ ແລະນ້ອຍ, ການເລີ່ມດຳເນີນທຸລະກິດ...
ໃນຂອບເຂດສອງຝ່າຍ, ການນຳຂອງສອງປະເທດ ໄດ້ຖືເປັນສຳຄັນທີ່ສຸດຕໍ່ການໄປປະຕິບັດງານຄັ້ງນີ້ຂອງທ່ານປະທານປະເທດ ຫວໍວັນເຖືອງ. ນີ້ແມ່ນການເຄື່ອນໄຫວພົວພັນຕ່າງປະເທດຂັ້ນສູງ ໃນປີສະເຫຼີມສະຫຼອງ 15 ປີແຫ່ງວັນສ້າງຕັ້ງການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ຈີນ. ບັນດາການພົບປະລະຫວ່າງທ່ານປະທານປະເທດ ຫວໍວັນເຖືອງ ກັບການນຳຫຼັກແຫຼ່ງຂອງຈີນ ຈະປະກອບສ່ວນເພີ່ມທະວີຄວາມໄວ້ເນື້ອເຊື່ອໃຈທາງດ້ານການເມືອງ, ຮັກສາທ່າຂອງການພົວພັນ ກໍ່ຄືສ້າງກາລະໂອກາດຮ່ວມມືໃໝ່, ຜ່ານນັ້ນກໍ່ປະກອບສ່ວນນໍາການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ຈີນ ພັດທະນາຢ່າງປອດໃສ, ໝັ້ນຄົງ ແລະຍືນຍົງກວ່າໃນໄລຍະຈະມາເຖິງ.
ນັກຂ່າວ: ສະເໜີທ່ານຮອງລັດຖະມົນຕີໃຫ້ຮູ້ກ່ຽວກັບຄວາມຫວັງການຮ່ວມມືທີ່ຈະໄດ້ຮັບການຊຸກຍູ້ໃນການໄປປະຕິບັດງານຄັ້ງນີ້ ຂອງທ່ານປະທານປະເທດ ຫວໍວັນເຖືອງ ?
ທ່ານຮອງລັດຖະມົນຕີ ຫງວຽນມິງຫວູ: ທີໜຶ່ງ, ໃນສະພາບການເສດຖະກິດໂລກຊຸດໂຊມ, ລັດທິອາລັກຂາເພີ່ມຂຶ້ນ ແລະການຫັນເປັນໂລກາພິວັດ ມີສັນຍານຊ້າລົງ, ການເຂົ້າຮ່ວມເວທີປາໄສຮ່ວມມືສາກົນຂັ້ນສູງ “ໜຶ່ງແລວ, ໜຶ່ງເສັ້ນທາງ” ຄັ້ງທີ 3 ຂອງປະທານປະເທດ ຫວໍວັນເຖືອງ ຈະປະກອບສ່ວນປັບປຸງທ່າອ່ຽງເພີ່ມທະວີການການຮ່ວມສໍາພັນເສດຖະກິດໃນພາກພື້ນ ແລະໃນທົ່ວໂລກ, ພິເສດແມ່ນເມື່ອຫວຽດນາມ ແມ່ນປະເທດເປີດກວ້າງເສດຖະກິດໃນລະດັບໃຫຍ່.
ທີສອງ, ເລື່ອງປະທານປະເທດ ຫວໍວັນເຖືອງ ພ້ອມດ້ວຍບັນດາການນໍາຂອງຈີນ ແລະປະເທດຕ່າງໆ ແລກປ່ຽນ ແລະປຶກສາຫາລືບັນດາເນື້ອໃນທີ່ເໝາະສົມກັບການກຳນົດທິດພັດທະນາຂອງຫວຽດນາມ ຈະປະກອບສ່ວນນໍາມາເຊິ່ງບົດຮຽນ, ປະສົບການ, ຜ່ານນັ້ນ ກໍ່ສາມາດຍາດແຍ່ງເອົາແຫຼ່ງກໍາລັງ ແລະເປີດກວ້າງການຮ່ວມມືດ້ານເສດຖະກິດ. ບັນດາການພົບປະລະຫວ່າງທ່ານປະທານປະເທດ ຫວໍວັນເຖືອງ ກັບການນຳຫຼັກແຫຼ່ງຂອງຈີນ ກໍ່ຄືກັບການນໍາສາກົນອື່ນໆ ທີ່ມາເຂົ້າຮ່ວມເວທີປາໄສ ຈະເປີດກາລະໂອກາດຮ່ວມມືໃໝ່ຫຼາຍຢ່າງໃຫ້ແກ່ຫວຽດນາມ. ສຳລັບຈີນ ແລ້ວ, ສອງຝ່າຍຈະແລກປ່ຽນກ່ຽວກັບມາດຕະການເພີ່ມທະວີການພົບປະແລກປ່ຽນຂັ້ນສູງ ແລະທຸກຂັ້ນ; ຊຸກຍູ້ການພົວພັນດ້ານເສດຖະກິດ, ການຄ້າ ແລະການລົງທຶນແບບຍືນຍົງ, ດຸ່ນດ່ຽງກວ່າໃນໄລຍະຈະມາເຖິງ; ເພີ່ມທະວີການຮ່ວມມື, ຮ່ວມສໍາພັນດ້ານພື້ນຖານໂຄງລ່າງ, ພິເສດແມ່ນໃນຂອບເຂດການເຊື່ອມຕໍ່ “ສອງແລວ, ໜຶ່ງເສັ້ນທາງ” ແລະ “ໜຶ່ງແລວ, ໜຶ່ງເສັ້ນທາງ”, ສ້າງການກຳນົດທິດຮ່ວມມືທີ່ມີຄວາມສຳຄັນທີ່ສຸດໃຫ້ບັນດາກະຊວງ, ຂະແໜງການ ແລະ ທ້ອງຖິ່ນຂອງຫວຽດນາມ ພ້ອມກັນສົມທົບກັບຄູ່ຮ່ວມມືຕ່າງໆຂອງຈີນ ເພື່ອສືບຕໍ່ນຳການພົວພັນສອງປະເທດ ໃຫ້ກ້າວເຂົ້າສູ່ໄລຍະພັດທະນາໃໝ່, ດ້ວຍລະດັບຄວາມໄວ້ເນື້ອເຊື່ອໃຈດ້ານການເມືອງທີ່ສູງກວ່າ, ການຮ່ວມມືທີ່ແທດຈິງກວ່າ, ພື້ນຖານສັງຄົມໄດ້ຮັບການປັບປຸງທີ່ດີກວ່າ ແລະຄວາມບໍ່ລົງລອຍກັນໄດ້ຮັບການແກ້ໄຂທີ່ດີກວ່າ.
ນັກຂ່າວ: ຂໍຂອບໃຈທ່ານຮອງລັດຖະມົນຕີ!
ບູນມີ
