| ນ້ຳກ້າມຂາວປົກຄຸມທົ່ວຈອມພູ ອູບໍ່, ເຊີນລາ | |
| ບຸນເຕັດໄດ້ໄປຮອດ ເຈື່ອງຊາ |
ເພີ່ມພູນຄູນສ້າງຄວາມສາມັກຄີມິດຕະພາບຮ່ວມສາຍພູເຈື່ອງເຊີນ
ຜ່ານການເຄື່ອນໄຫວແຮກສ່ຽວລະຫວ່າງບ້ານ-ບ້ານ, ປະຊາຊົນສອງຟາກຊາຍແດນຫວຽດນາມ-ລາວ ຮ່ວມສາຍພູເຈື່ອງເຊີນ ບໍ່ພຽງແຕ່ຊ່ວຍເຊິ່ງເຫຼືອເຊິ່ງກັນ ແລະກັນໃນການກໍ່ສ້າງໂຄງການສ້າງເຮືອນຢູ່ຊຸມຊົນ; ຊ່ວຍເຫຼືອຕົ້ນເບ້ຍໄມ້, ອຸປະກອນຮັບໃຊ້ວຽກງານປ້ອງກັນໄພທຳມະຊາດ ແລະ ພະຍາດລະບາດເຊິ່ງກັນ ແລະ ກັນເທົ່ານັ້ນ… ຫາກຍັງແລກປ່ຽນປະສົບການໃນການພັດທະນາເສດຖະກິດ; ຈັດຕັ້ງການເຄື່ອນໄຫວພົບປະແລກປ່ຽນວັດທະນະທຳ, ສິລະປະ, ກິລາ ແລະ ກາຍຍະກຳ.
ແຂວງເງະອານ ມີເສັ້ນຊາຍແດນຍາວກວ່າ 468 ກິໂລແມັດ (84 ບ້ານ, 27 ຕາແສງ, 6 ເມືອງ) ຕິດກັບ (40 ບ້ານໃນກຸ່ມບ້ານ, 6 ເມືອງ) 3 ແຂວງຄື: ຫົວພັນ, ຊຽງຂວາງ ແລະ ບໍລິຄຳໄຊ ສປປ ລາວ.
ເມື່ອ 10 ປີກ່ອນ, ວັນທີ 30 ພະຈິກ 2013, ຄູ່ບ້ານເມື່ອງຟູ້ (ຕາແສງ ໂທງຖູ້, ເມືອງ ເກ໋ຟ່ອງ, ແຂວງ ເງະອານ, ສາທາລະນະລັດ ສັງຄົມນິຍົມ ຫວຽດນາມ) ແລະ ບ້ານນ້ຳໄຕ (ກຸ່ມບ້ານວຽງພັນ, ເມືອງຊຳໃຕ້, ແຂວງຫົວພັນ, ສາທາລະນະລັດ ປະຊາທິປະໄຕ ປະຊາຊົນລາວ) ໄດ້ຖືກຄັດເລືອກໃຫ້ຈັດພິທີແຮກສ່ຽວບ້ານ-ບ້ານ ຄັ້ງທຳອິດຂອງບ້ານຊາຍແດນ ແຂວງເງະອານ ຕິດກັບບ້ານຂອງ 3 ແຂວງຂອງລາວ.
|
ໂດຍປະຕິບັດບັນດາເນື້ອໃນທີ່ໄດ້ລົງນາມ, ປະຊາຊົນທັງສອງບ້ານແຮກສ່ຽວສອງຟາກຊາຍແດນ ໄດ້ຮ່ວມກັນປົກປັກຮັກສາເສັ້ນຊາຍແດນ ແລະ ຫຼັກໝາຍແຫ່ງຊາດ, ຊ່ວຍເຫຼືອເຊິ່ງກັນ ແລະ ກັນພັດທະນາເສດຖະກິດ ແລະ ຊີວິດການເປັນຢູ່. ປະຈຸບັນ, ສະພາບການດ້ານການເມືອງ ຢູ່ເຂດສອງຟາກຊາຍແດນມີຄວາມໝັ້ນຄົງ, ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນ.
ທ່ານ ເລືອງວັນຫງວຽນ, ນາຍບ້ານ ເມື່ອງຟູ້, ຕາແສງ ໂທງຖູ້, ເມືອງ ເກີ໋ຟ່ອງ ໃຫ້ຮູ້ວ່າ: ສອງຝ່າຍໄດ້ມອບເບ້ຍໄມ້ ແລະ ພັນສັດ, ຊ່ວຍເຊິ່ງກັນ ແລະ ກັນໃນດ້ານເຕັກນິກການປູກຝັງ ລ້ຽງສັດ. ພາຍຫຼັງສອງບ້ານໄດ້ຈັດຕັ້ງແຮກສ່ຽວ, ນ້ຳໃຈມິດຕະພາບລະຫວ່າງປະຊາຊົນສອງຟາກ ນັບມື້ນັບສະໜິດແໜ້ນ, ພ້ອມກັນປົກປັກຮັກສາ ແລະ ປ້ອງກັນຄວາມສະຫງົບປອດໄພຊາຍແດນຮ່ວມ.
 |
| ພິທີແຮກສ່ຽວ ລະຫວ່າງ ຄູ່ບ້ານ ຜາຈຽງ, ເມືອງ ກີເຊີນ, ແຂວງ ເງະອານ, ສາທາລະນະລັດ ສັງຄົມນິຍົມ ຫວຽດນາມ ແລະ ບ້ານ ປຸ້ງວ້າຍ, ກຸ່ມບ້ານ ຜາແດງ, ເມືອງກວັນ, ແຂວງ ຫົວພັນ, ສປປ ລາວ |
ມາຮອດປະຈຸບັນ ແຂວງ ເງະອານ ແລະ 3 ແຂວງປະເທດເພື່ອນທີ່ມີຊາຍແດນຮ່ວມ ໄດ້ລົງນາມແຮກສ່ຽວ 21 ຄູ່ ບ້ານ-ບ້ານ ສອງຟາກຊາຍແດນ. ຜ່ານການເຄື່ອນໄຫວແຮກສ່ຽວບ້ານ-ບ້ານ ລະຫວ່າງແຂວງ ເງະອານ ກັບບັນດາແຂວງທີ່ມີຊາຍແດນຮ່ວມກັບລາວ ໄດ້ຊ່ວຍໃຫ້ປະຊາຊົນສອງຝັ່ງຊາຍແດນ ມີຄວາມເຂົ້າໃຈຢ່າງເລິກເຊິ່ງກວ່າເກົ່າກ່ຽວກັບແນວທາງ ແລະ ນະໂຍບາຍກົດໝາຍຂອງແຕ່ລະປະເທດ, ກໍ່ຄືຄວາມຮັບຮູ້, ມີສະຕິຄວາມຮັບຜິດຊອບໃນການປະສານສົມທົບ ແລະ ເຂົ້າຮ່ວມການປົກປັກຮັກສາອະທິປະໄຕ ແລະ ຄວາມໝັ້ນຄົງຂອງເຂດຊາຍແດນ; ປະກອບສ່ວນສຳຄັນເຂົ້າໃນການຮັກສາ ແລະ ປະຕິບັດລະບຽບກົດໝາຍທີ່ກ່ຽວຂ້ອງເຖິງຊາຍແດນຂອງແຕ່ລະຝ່າຍ; ຮ່ວມກັນສ້າງເສັ້ນຊາຍແດນທີ່ມີສັນຕິພາບ, ມິດຕະພາບ, ສະຖຽນລະພາບ ແລະ ການພັດທະນາ. ພະນັກງານ ແລະ ປະຊາຊົນບັນດາບ້ານສອງຟາກຊາຍແດນ ກໍ່ໄດ້ແລກປ່ຽນຂໍ້ມູນຂ່າວສານເຊິ່ງກັນ ແລະ ກັນ ໂດຍສະເພາະແມ່ນສະພາບການເຄື່ອນໄຫວຂ້າມຊາຍແດນທີ່ຜິດກົດໝາຍ, ການລ່າສັດທີ່ຫາຍາກ, ການຂຸດຄົ້ນ ແລະ ຂົນສົ່ງຜະບິດຕະພັນໄມ້ທີ່ຜິດກົດໝາຍ,...
 |
| ກອງບັນຊາການທະຫານຊາຍແດນແຂວງ ເງະອານ ໃຫ້ການໜູນຊ່ວຍດ້ານງົບປະມານ ແລະ ເລີ່ມກໍ່ສ້າງອ່າງເກັບນໍ້າໃຫ້ແກ່ບ້ານ ປຸ້ງວ້າຍ, ກຸ່ມບ້ານຜາແດງ ເມືອງກວັນ, ແຂວງ ຫົວພັນ, ສປປ ລາວ. |
 |
| ຜູ້ຕາງໜ້າກອງບັນຊາການທະຫານຊາຍແດນ ແຂວງເງະອານ ໄດ້ຈັດພິທີເປີດນຳໃຊ້ “ເຮືອນວັດທະນະທໍາຊຸມຊົນ” ທີ່ມອບໃຫ້ແກ່ບ້ານນ້ຳໄຕ້, ກຸ່ມບ້ານວຽງພັນ, ເມືອງຊຳໃຕ້, ແຂວງຫົວພັນ (ລາວ) |
 |
| ປ້ອມທະຫານປ້ອງກັນຊາຍແດນມີ້ລີ້ ເງະອານ ໄດ້ຊ່ວຍເຫຼືອດ້ານລາຍຈ່າຍ ໃຫ້ແກ່ນັກຮຽນທີ່ຢູ່ບ້ານຕິດຊາຍແດນລາວ ທີ່ປະສົບກັບຄວາມຫຍຸ້ງຍາກ. |
ທ່ານພັນເອກ ເຈີ່ນດັ່ງຄວາ, ຮອງຫົວໜ້າການເມືອງກອງບັນຊາການທະຫານຊາຍແດນແຂວງ ເງະອານ ໃຫ້ຮູ້ວ່າ: ຫົວໜ່ວຍໄດ້ເປັນເສນາທິການໃຫ້ຄະນະກໍາມະການປະຊາຊົນແຂວງ ເງະອານ ໜູນຊ່ວຍລາຍຈ່າຍຊ່ວຍບັນດາບ້ານຕິດກັບຊາຍແດນຂອງປະເທດເພື່ອນ ກໍ່ສ້າງພື້ນຖານການດຳລົງຊີວິດຂອງປະຊາຊົນຄື: ຊ່ວຍເຫຼືອບ້ານນໍ້າໄຕ້, ກຸ່ມບ້ານວຽງພັນ, ເມືອງຊຳໃຕ້, ແຂວງຫົວພັນ ສ້າງ “ເຮືອນວັດທະນະທຳຊຸມຊົນ” 1 ຫລັງ ແລະ ສ້າງ “ເຮືອນມິດຕະພາບ” 3 ຫຼັງ ໃຫ້ແກ່ຄອບຄົວທຸກຍາກ ດ້ວຍມູນຄ່າເກືອບ 1,3 ຕື້ດົ່ງ; ກໍ່ສ້າງໂຮງໝໍມິດຕະພາບ ທະຫານ-ພົນລະເຮືອນ ຢູ່ບ້ານ ສົບເຕິງ, ກຸ່ມບ້ານນ້ຳອອນ, ເມືອງໄຊຈຳພອນ, ແຂວງບໍລິຄຳໄຊ ມູນຄ່າກວ່າ 14,9 ຕື້ດົ່ງ; ໂຄງການນ້ຳສະອາດບ້ານປຸ້ງວ້າຍ, ກຸ່ມບ້ານຜາແດງ, ເມືອງກວັນ, ແຂວງຫົວພັນ...
ເນື່ອງໃນໂອກາດວັນບຸນໃຫຍ່ ແລະ ວັນບຸນປີໃໝ່ປະເພນີຂອງ 2 ປະເທດ, ລັດຖະບານ ແລະ ປະຊາຊົນບ້ານທີ່ແຮກສ່ຽວ ໄດ້ສົມທົບກັນຈັດຕັ້ງບັນດາການເຄື່ອນໄຫວແລກປ່ຽນວັດທະນະທຳ, ສິລະປະ, ກິລາ, ເຮັດໃຫ້ຊີວິດການເປັນຢູ່ດ້ານວັດທະນະທຳ ແລະ ຈິດໃຈຂອງປະຊາຊົນບັນດາເຜົ່າຢູ່ຊາຍແດນມີຄວາມອຸດົມສົມບູນກວ່າ. ພ້ອມນັ້ນ, ກໍ່ໄດ້ປະກອບສ່ວນ ເພີ່ມທະວີຄວາມໄວ້ເນື້ອເຊື່ອໃຈ ແລະ ຄວາມສະໜິດສະໜົມລະຫວ່າງປະຊາຊົນສອງຟາກຊາຍແດນ, ກໍ່ສ້າງເສັ້ນຊາຍແດນຫວຽດນາມ - ລາວ ທີ່ມີສັນຕິພາບ, ມິດຕະພາບ, ສະຖຽນລະພາບ ແລະ ພັດທະນາ./.
ອານຸໄຊ ສະຫວັດ
