ເນື່ອງໃນໂອກາດເດີນທາງໄປເຂົ້າຮ່ວມສັບປະດາຂັ້ນສູງ ຊຸດທີ 78 ສະມັດຊາສະຫະປະຊາຊາດ, ຕອນບ່າຍວັນທີ 22 ກັນຍາ (ຕາມເວລາທ້ອງຖິ່ນ), ຢູ່ນະຄອນນິວຢອກ, ອາເມລິກາ, ທ່ານ ຟ້າມມີງຈິ໊ງ ນາຍົກລັດຖະມົນຕີຫວຽດນາມ ໄດ້ມີການພົບປະກັບເພື່ອນມິດອາເມລິກາ.
ເຂົ້າຮ່ວມການພົບປະກັບເພື່ອນມິດ ເຊິ່ງຍາມໃດເຂົາເຈົ້າກໍ່ສະໜິດຕິດພັນ ແລະສະໜັບສະໜູນຫວຽດນາມ ໃນພາລະກິດແຫ່ງການຕໍ່ສູ້ຍາດເອົາເອກະລາດແຫ່ງຊາດ, ທ້ອນໂຮມປະເທດຊາດເປັນເອກະພາບ, ມີຄວາມມານະພະຍາຍາມຫຼາຍຢ່າງໃນການຮຳບາດສົງຄາມ, ແກ້ໄຂຜົນຮ້າຍຢ້ອນຫຼັງຈາກສົງຄາມ, ຊຸກຍູ້ຂັ້ນຕອນສ້າງ ແລະປັບປຸງ, ພັດທະນາການພົວພັນຫວຽດນາມ-ອາເມລິກາ ໃນຫຼາຍປີຜ່ານມາ ໃຫ້ເປັນປົກກະຕິ.
 |
ທ່ານ ຟ້າມມີງຈິ໊ງ ນາຍົກລັດຖະມົນຕີຫວຽດນາມ ກ່າວຄຳເຫັນທີ່ການພົບປະ. (ພາບ: TTXVN) |
ກ່າວຄຳເຫັນທີ່ການພົບປະ, ທ່ານນາຍົກລັດຖະມົນຕີ ຟ້າມມີງຈິ໊ງ ສະເໜີໃຫ້ເພື່ອນມິດອາເມລິກາ ສືບຕໍ່ສ້າງກຳລັງໜູນ, ສ້າງແຮງບັນດານໃຈໃຫ້ລຸ້ນໜຸ່ມ, ປະກອບສ່ວນເຂົ້າໃນການເພີ່ມພູນຄູນສ້າງໃຫ້ແກ່ການພົວພັນຫວຽດນາມ-ອາເມລິກາ ບົນເນື້ອໃນຈິດໃຈເຄົາລົບນັບຖືລະບອບລະບຽບການ, ເຄົາລົບເອກະລາດ, ອະທິປະໄຕຂອງກັນໃຫ້ຄືດັ່ງຄຳປາດຖະໜາຂອງອາເມລິກາ ທີ່ມີຕໍ່ຫວຽດນາມ ນັ້ນແມ່ນ “ເຂັ້ມແຂງ, ເປັນເອກະລາດ, ສ້າງຄວາມເຂັ້ມແຂງດ້ວຍຕົນເອງ, ວັດທະນາຖາວອນ” ເພື່ອສັນຕິພາບ, ສະຖຽນລະພາບ ແລະການພັດທະນາໃນໂລກ; ສົມທົບກັບສະຫະພັນບັນດາອົງການມິດຕະພາບຫວຽດນາມ ຈັດຕັ້ງການເຄື່ອນໄຫວພົບປະແລກປ່ຽນປະຊາຊົນ, ປະກອບສ່ວນເພີ່ມທະວີຄວາມເຂົ້າໃຈ, ນໍ້າໃຈມິດຕະພາບ, ຄວາມເຄົາລົບນັບຖືເຊິ່ງກັນ ແລະກັນລະຫວ່າງປະຊາຊົນສອງປະເທດ.
ບັນດາຜູ້ແທນອາເມລິກາ ປາດຖະໜາ ແລະເຊື່ອໝັ້ນວ່າ ຫວຽດນາມ ຈະສືບຕໍ່ບັນລຸໄດ້ຜົນງານໃໝ່ໃຫຍ່ຫຼວງກວ່າອີກໃນພາລະກິດສ້າງສາ ແລະປົກປັກຮັກສາປະເທດຊາດ. ຫຼາຍຄຳເຫັນໄດ້ຢັ້ງຢືນເຖິງຄວາມຕັດສິນໃຈມີການກະທຳ, ມີແຜນການຢ່າງລະອຽດເພື່ອປະກອບສ່ວນຜັນຂະຫຍາຍຂອບເຂດການພົວພັນຮ່ວມມືໃໝ່ໃຫ້ບັນລຸໝາກຜົນແທ້ຈິງ.
ຮຸ່ງເຊົ້າຂອງວັນທີ 23 ກັນຍາ, ເຮືອບິນພິເສດນຳສົ່ງທ່ານນາຍົກລັດຖະມົນຕີ ຟ້າມມີງຈິ໊ງ ແລະຄະນະຜູ້ແທນຫວຽດນາມ ໄດ້ອອກຈາກສະໜາມບິນສາກົນ John F. Kennedy, ນະຄອນນິວຢອກ, ສິ້ນສຸດການປະຕິບັດງານເຂົ້າຮ່ວມສັບປະດາຂັ້ນສູງ ຊຸດທີ 78 ສະມັດຊາສະຫະປະຊາຊາດ ແລະການເຄື່ອນໄຫວສອງຝ່າຍຢູ່ອາເມລິກາ, ເດີນທາງໄປຢ້ຽມຢາມປະເທດ ບຣາຊິນ ຢ່າງເປັນທາງການຕາມຄໍາເຊີນຂອງທ່ານ Lula da Silva ປະທານາທິບໍດີບຣາຊິນ, ແຕ່ວັນທີ 23-26 ກັນຍາ.
ຄຳຮຸ່ງ
