ກະຊວງຕຳຫຼວດ ຫວຽດນາມ ປາດຖະໜາວ່າ ລາວ ຈະແບ່ງປັນ ແລະ ໜູນຊ່ວຍ ຫວຽດນາມ ໃນການແກ້ໄຂບັນດາບັນຫາກ່ຽວກັບຜົນປະໂຫຍດຍຸດທະສາດ; ຢືນຢັນວ່າ ຫວຽດນາມ ຈະໜູນຊ່ວຍລາວ ຮັບປະກັນຄວາມໝັ້ນຄົງ, ຄວາມເປັນລະບຽບຮຽບຮ້ອຍໃນປີເປັນປະທານອາຊຽນ 2024.
ຕອນບ່າຍວັນທີ 17 ມີນາ, ຢູ່ຮ່າໂນ້ຍ, ທ່ານພົນເອກ ໂຕເລິມ, ກຳມະການກົມການເມືອງ, ລັດຖະມົນຕີກະຊວງຕຳຫຼວດ ຫວຽດນາມ ໄດ້ໃຫ້ການຕ້ອນຮັບ ທ່ານພົນໂທ ກົງທອງ ພົງວິຈິດ, ກໍາມະການສູນກາງພັກປະຊາຊົນປະຕິວັດລາວ, ຮອງລັດຖະມົນຕີກະຊວງປ້ອງກັນຄວາມສະຫງົບ ລາວ.
ຕາງໜ້າຄະນະພັກຕຳຫຼວດສູນກາງ, ການນຳກະຊວງຕຳຫຼວດ, ທ່ານລັດຖະມົນຕີ ໂຕເລິມ ໄດ້ສະແດງຄວາມຂອບອົກຂອບໃຈຄະນະພັກຕຳຫຼວດສູນກາງ, ການນຳກະຊວງປ້ອງກັນຄວາມສະຫງົບສປປ ລາວ ທີ່ໄດ້ແຕ່ງຕັ້ງທ່ານພົນໂທ ກົງທອງ ພົງວິຈິດ ມາຢ້ຽມຢາມ ແລະ ຮ່ວມເປັນປະທານກອງປະຊຸມການຮ່ວມມືດ້ານຄວາມໝັ້ນຄົງ ຫວຽດນາມ - ລາວ ຄັ້ງທີ 13 ທີ່ໄດ້ໄຂຂຶ້ນໃນວັນທີ 15 ມີນານີ້, ຢູ່ນະຄອນດ່ານັງ.
 |
| ທ່ານພົນເອກ ໂຕເລິມ, ລັດຖະມົນຕີກະຊວງຕຳຫຼວດ ຫວຽດນາມ ໃຫ້ການຕ້ອນຮັບ ທ່ານພົນໂທ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ ລາວ (ພາບ: TTXVN) |
ທ່ານລັດຖະມົນຕີ ໂຕເລິມ ໄດ້ຕີລາຄາສູງ 2 ຄະນະຜູ້ແທນກຳລັງປ້ອງກັນຄວາມສະຫງົບລາວ ແລະ ຫວຽດນາມ ໄດ້ສົມທົບກັນກະກຽມ ແລະ ການຈັດຕັ້ງກອງປະຊຸມຄັ້ງນີ້ໃຫ້ປະສົບຜົນສຳເລັດ ດ້ວຍຫຼາຍເນື້ອໃນທີ່ໄດ້ປຶກສາຫາລື ແລະ ບັນລຸຄວາມເຫັນດີເຫັນພ້ອມຢ່າງສູງ.
ພິເສດ, ສອງຝ່າຍໄດ້ເຊັນບົດບັນທຶກຊ່ວຍຈຳກ່ຽວກັບກອງປະຊຸມການຮ່ວມມືດ້ານປ້ອງກັນຄວາມສະຫງົບລະຫວ່າງ ຫວຽດນາມ ແລະ ລາວ ຄັ້ງທີ 13 ດ້ວຍຫຼາຍຂົງເຂດໃໝ່ຄື: ການສົມທົບກັນໃນການຄຸ້ມຄອງບໍລິຫານລັດ ກັບບັນດາອົງການຈັດຕັ້ງບໍ່ຂຶ້ນກັບລັດຖະບານຕ່າງປະເທດທີ່ມີການກະທຳລະເມີດຄວາມໝັ້ນຄົງສອງປະເທດ, ວຽກງານຮັບປະກັນຄວາມໝັ້ນຄົງ, ຄວາມປອດໄພທາງອາກາດ, ວຽກງານຕໍ່ສູ້ຕ້ານອາດຊະຍາກຳເຕັກໂນໂລຢີສູງ, ອາດຊະຍາກຳເຄື່ອນໄຫວໃນອິນເຕີເນັດ, ວຽກງານຕໍ່ສູ້ປະຕິເສດບັນດາທັດສະນະຜິດພາດ, ເປັນປໍລະປັກໃນອິນເຕີເນັດ, ສື່ສັງຄົມອອນລາຍ…
ໂດຍເລີ່ມມາຈາກທີ່ຕັ້ງພູມມີສາດ ແລະ ມູນເຊື້ອປະຫວັດສາດ, ຫວຽດນາມ - ລາວ ມີຜົນປະໂຫຍດລວມ ແລະ ມີຄວາມສະໜິດຕິດພັນຢ່າງແໜ້ນແຟ້ນກ່ຽວກັບຄວາມໝັ້ນຄົງ ແລະ ການພັດທະນາ. ຫວຽດນາມ ສະເໝີຕົ້ນສະເໝີປາຍຍາມໃດກໍ່ຮັກສາການພົວພັນມິດຕະພາບພິເສດ ຫວຽດນາມ - ລາວ, ພ້ອມແລ້ວທີ່ຈະໜູນຊ່ວຍລາວ ຜ່ານຜ່າຄວາມຫຍຸ້ງຍາກໃນສະເພາະໜ້າ, ສືບຕໍ່ພັດທະນາເສດຖະກິດ - ສັງຄົມ, ສະໜັບສະໜູນລາວໃນການຫັນການພົວພັນທາງການທູດເປັນຫຼາຍຮູບຫຼາຍແບບ ເພື່ອພັດທະນາປະເທດຊາດ, ຍົກສູງທີ່ຕັ້ງ, ບົດບາດໃນອາຊຽນ.
ທ່ານລັດຖະມົນຕີ ໂຕເລິມ ເນັ້ນໜັກວ່າ: ກະຊວງຕຳຫຼວດ ຫວຽດນາມ ປາດຖະໜາຢາກຮ່ວມມືກັບກະຊວງຕຳຫຼວດລາວ ຮັກສາຄວາມເປັນເອກະລາດ, ເປັນເຈົ້າຕົນເອງ, ຮັກສາສະຖຽນລະພາບດ້ານການເມືອງ, ຮັກສາການພົວພັນກັບບັນດາປະເທດ, ບໍ່ໃຫ້ກຳລັງຕ່າງປະເທດສວຍໃຊ້ປະເທດນີ້ທຳຜົນເສຍຫາຍຕໍ່ຄວາມໝັ້ນຄົງ ແລະ ສະຖຽນລະພາບຂອງປະເທດອື່ນ ແລະ ເຮັດໃຫ້ການພົວພັນລະຫວ່າງສອງປະເທດຖືກແບ່ງແຍກ, ທ່ານຫວັງວ່າ ລາວຈະແບ່ງປັນ ແລະ ສະໜັບສະໜູນ ຫວຽດນາມ ໃນການແກ້ໄຂບັນດາບັນຫາກ່ຽວກັບຜົນປະໂຫຍດຍຸດທະສາດ, ຢັ້ງຢືນວ່າ ກະຊວງຕຳຫຼວດ ຫວຽດນາມ ພ້ອມແລ້ວທີ່ຈະໜູນຊ່ວຍລາວໃນການຮັບປະກັນຄວາມໝັ້ນຄົງ ຄວາມເປັນລະປຽບຮຽບຮ້ອຍໃນປີເປັນປະທານອາຊຽນ 2024.
ທ່ານລັດຖະມົນຕີສະເໜີໃຫ້ກຳລັງປ້ອງກັນຄວາມສະຫງົບຂອງສອງປະເທດຮັກສາການພົວພັນແບບພິເສດທີ່ເປັນມູນເຊື້ອ, ເຊື່ອມໂຍງຢ່າງແໜ້ນແຟ້ນບົນພື້ນຖານຄວາມໄວ້ເນື້ອເຊື່ອໃຈດ້ານການເມືອງສູງ, ຄວາມຈິງໃຈ, ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ; ສົມທົບກັນປະຕິບັດວຽກງານທີ່ສອງຝ່າຍໄດ້ເຫັນດີເປັນເອກະພາບໃນບົດບັນທຶກຊ່ວຍຈຳຢູ່ກອງປະຊຸມ; ຮັບປະກັນລັກສະນະແທດຈິງ, ມີປະສິດທິຜົນ, ເພື່ອຄວາມໝັ້ນຄົງ, ຜົນປະໂຫຍດແຫ່ງຊາດ ຂອງແຕ່ລະປະເທດ ແລະ ປະຊາຊົນສອງປະເທດ, ສືບຕໍ່ເອົາໃຈໃສ່ເຖິງການຮັບປະກັນຄວາມໝັ້ນຄົງ, ຄວາມປອດໄພ ແລະ ຜົນປະໂຫຍດຂອງວິສາຫະກິດ, ປະຊາຄົມຊາວຫວຽດນາມ ອາໄສຢູ່ລາວ, ຊຸກຍູ້ການຮ່ວມມືໃນການໄຈ້ແຍກ, ຕີລາຄາສະພາບການ, ເປັນເສນາທິການຍຸດທະສາດເພື່ອແກ້ໄຂບັນດາຄວາມສ່ຽງ, ສິ່ງທ້າທາຍນາບຂູ່ຄວາມໝັ້ນຄົງ, ຜົນປະໂຫຍດລວມຂອງສອງປະເທດ.
ບຸນຄົງ
