| ຖ້ຽວບິນໂດຍກົງ ຮ່າໂນ້ຍ - Kuala Lumpur: ເປີດກາລະໂອກາດຫຼາຍຢ່າງ ເພື່ອຊຸກຍູ້ການແລກປ່ຽນປະຊາຊົນ. | |
| ປະກາດຂໍ້ຕົກລົງສ້າງຕັ້ງສະມາຄົມມິດຕະພາບມາເລເຊຍ - ຫວຽດນາມ |
ໂດຍບູລະນະບຸກຄະລາກອນ, ປັບປຸງ, ກໍ່ສ້າງ ແລະ ເປີດກວ້າງເຄືອຂ່າຍຄູ່ຮ່ວມມື ມາເລເຊຍ, ເພີ່ມທະວີການໂຄສະນາ, ເຜີຍແຜ່, ປະກອບສ່ວນແນະນຳໃຫ້ປະຊາຊົນ, ພິເສດແມ່ນໄວໜຸ່ມສອງປະເທດກ່ຽວກັບປະເທດຊາດ ແລະ ປະຊາຊົນແຕ່ລະປະເທດ…ແມ່ນວຽກງານຈຸດສຸມຂອງສະມາຄົມມິດຕະພາບ ຫວຽດນາມ - ມາເລເຊຍ ໃນໄລຍະຈະມາເຖິງ.
ເນື່ອງໃນໂອກາດສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ມາເລເຊຍ (30/3/1973 – 30/03/2023), ວາລະສານ ຍຸກສະໄໝ ໄດ້ມີການສຳພາດຕໍ່ທ່ານ ໂງແຊກທຶກ, ປະທານສະມາຄົມມິດຕະພາບ ຫວຽດນາມ - ມາເລເຊຍ ກ່ຽວກັບການພົວພັນມິດຕະພາບ ລະຫວ່າງສອງປະເທດ.
 |
| ທ່ານ ໂງແຊກທຶກ, ປະທານສະມາຄົມມິດຕະພາບ ຫວຽດນາມ - ມາເລເຊຍ |
ຮຽນທ່ານ, ການທູດປະຊາຊົນ ຫວຽດນາມ - ມາເລເຊຍ ມີບົດບາດແນວໃດໃນການພົວພັນລະຫວ່າງສອງປະເທດ?
ວັນທີ 30 ມີນາ 1973, ຫວຽດນາມ ແລະ ມາເລເຊຍ ໄດ້ສ້າງຕັ້ງການພົວພັນທາງການທູດ. ນັບແຕ່ນັ້ນມາ, ການພົວພັນລະຫວ່າງສອງປະເທດກໍ່ໄດ້ຮັບການພັດທະນາຢ່າງບໍ່ຢຸດຢັ້ງ. 2 ປະເທດພວມຜັນຂະຫຍາຍບັນດາໂຄງການເຄື່ອນໄຫວປະຕິບັດການພົວພັນຄູ່ຮ່ວມມືຍຸດທະສາດ ໄລຍະ 2021-2025, ເຊິ່ງໄດ້ຮັບການຮັບຮອງເອົາທີ່ກອງປະຊຸມຄັ້ງທີ 6 ຂອງຄະນະກຳມະການຮ່ວມມືດ້ານເສດຖະກິດ, ວິທະຍາສາດ ແລະ ເຕັກໂນ ຫວຽດນາມ - ມາເລເຊຍ (JCM 6, 15 ພະຈິກ 2021). .
ໃນການພົວພັນ ຫວຽດນາມ - ມາເລເຊຍ, ການທູດປະຊາຊົນມີບົດບາດສຳຄັນພິເສດ ແລະ ຈະນັບມື້ນັບສຳຄັນກວ່າອີກຍ້ອນຕົວຈິງຂອງການພົວພັນລະຫວ່າງປະຊາຊົນສອງປະເທດໃນຊຸມປີມໍ່ໆມານີ້.
ການຮ່ວມມືຂອງປະຊາຊົນໃນຂົງເຂດຄື: ແຮງງານ, ການສຶກສາ, ການທ່ອງທ່ຽວ... ລ້ວນແຕ່ບັນລຸໄດ້ສັນຍານທີ່ດີຫຼາຍຢ່າງໃນຊຸມປີຜ່ານມາ. ຂໍ້ຕົກລົງການຮ່ວມມືດ້ານແຮງງານທີ່ໄດ້ລົງນາມໃນປີ 2015 ແລະ ເນື້ອໃນຂອງໂຄງການກະທຳຜັນຂະຫຍາຍການພົວພັນຄູ່ຮ່ວມມືຍຸດທະສາດ 2021-2025 ພວມໄດ້ຮັບການຜັນຂະຫຍາຍຢ່າງຕັ້ງໜ້າ. ແຕ່ລະປີ, ມີນັກສຶກສາຫວຽດນາມຫຼາຍຄົນໄດ້ຮັບທຶນສຶກສາໄປຮຽນຢູ່ມາເລເຊຍ, ການແລກປ່ຽນນັກສຶກສາກໍ່ມີຫຼາຍຂະແໜງວິຊາ. ການທ່ອງທ່ຽວລະຫວ່າງສອງປະເທດຍັງມີການຂະຫຍາຍຕົວຢ່າງບໍ່ຢຸດຢັ້ງ ເມື່ອນັກທ່ອງທ່ຽວຫວຽດນາມໄປທ່ຽວມາເລເຊຍນັບມື້ນັບເພີ່ມຂຶ້ນ ແລະ ກົງກັນຂ້າມ. ຕາມສະຖິຕິ, ປີ 2022, ມາເລເຊຍ ນອນໃນ 10 ຕະຫຼາດທີ່ມີນັກທ່ອງທ່ຽວອາຊີ ມາທ່ຽວຫວຽດນາມຫຼາຍທີ່ສຸດ…
ອາດເຫັນໄດ້ວ່າ, ການພົວພັນ ຫວຽດນາມ - ມາເລເຊຍ ຍັງມີຄວາມສາມາດບົ່ມຊ້ອນຫຼາຍຢ່າງເພື່ອພັດທະນາ. ການທູດປະຊາຊົນຈະສືບຕໍ່ເປັນກຳລັງຫຼັກແຫຼ່ງແນໃສ່ນຳເອົາການພົວພັນລະຫວ່າງສອງປະເທດ, ສອງວັດທະນະທຳເຂົ້າໃກ້ເປົ້າໝາຍການຮ່ວມມື ແລະ ເຊື່ອມໂຍງ.
ປີ 2023 ຈະມີເຫດການ, ການເຄື່ອນໄຫວການທູດປະຊາຊົນທີ່ໂດດເດັ່ນຫຍັງແດ່, ຮຽນທ່ານ?
ປີ 2023 ແມ່ນປີຄົບຮອບ 50 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ ຫວຽດນາມ ແລະ ມາເລເຊຍ. ນີ້ແມ່ນໂອກາດເພື່ອໃຫ້ 2 ຝ່າຍຫວນຄືນຂະບວນການພັດທະນາ ແລະ ຖອດຖອນບົດຮຽນປະສົບການອັນລ້ຳຄ່າໃຫ້ແກ່ອະນາຄົດ. ນີ້ກໍ່ແມ່ນຈຸດເວລາເພື່ອໃຫ້ສອງຝ່າຍມີບັນດາການເຄື່ອນໄຫວທີ່ແທດຈິງ ແລະ ລະອຽດເພື່ອເພີ່ມທະວີການເຊື່ອມຕໍ່, ພິເສດແມ່ນປະຊາຊົນສອງປະເທດ.
ປະຈຸບັນ, ສະມາຄົມມິດຕະພາບຫວຽດນາມ - ມາເລເຊຍ ພວມສົມທົບກັບສະຖານທູດມາເລເຊຍ ປະຈຳ ຫວຽດນາມ, ສະຖານທູດຫວຽດນາມ ປະຈຳ ມາເລເຊຍ ແລະ ສະມາຄົມມິດຕະພາບມາເລເຊຍ - ຫວຽດນາມ ເພື່ອກໍ່ສ້າງແຜນການສະເຫຼີມສະຫຼອງ 50 ປີແຫ່ງວັນສ້າງສາຍພົວພັນທາງການທູດລະຫວ່າງສອງປະເທດ, ຄາດວ່າຈະຈັດຂຶ້ນໃນເດືອນເມສາປີ 2023. ນອກຈາກນັ້ນ, ສະມາຄົມຍັງຈະຈັດຕັ້ງການໂຄສະນາເຜີຍແຜ່ບັນດາຫົວຂໍ້ກ່ຽວກັບ 50 ປີແຫ່ງການພົວພັນຫວຽດນາມ - ມາເລເຊຍ; ຄົ້ນຄວ້າ ແລະ ສ້າງແຜນການຈັດຕັ້ງການແຮກສ່ຽວ ລະຫວ່າງແຂວງ/ນະຄອນ ຫວຽດນາມ ແລະ ແຂວງ/ນະຄອນຂອງ ມາເລເຊຍ; ຈັດຄະນະຜູ້ແທນໄປມາເລເຊຍ ເພື່ອແລກປ່ຽນ ແລະ ຊຸກຍູ້ການຮ່ວມມືລະຫວ່າງປະຊາຊົນກັບປະຊາຊົນ; ສົມທົບກັບຂະແໜງອຸດສາຫະກຳ ແລະ ການຄ້າ ຈັດຕັ້ງກອງປະຊຸມສຳມະນາ ແລະ ສົ່ງເສີມການຄ້າຢູ່ ຫວຽດນາມ...
ບຸນຄົງ
