| ການພົວພັນຮ່ວມມືລະຫວ່າງ ອົງການພາສີ ຫວຽດນາມ - ລາວ ນັບມື້ນັບແໜ້ນແຟ້ນ | |
| ຮ່ວມສາຍແມ່ນ້ຳຂອງ 2023: ຮັດແໜ້ນນ້ຳໃຈມິດຕະພາບລະຫວ່າງສາມປະເທດ ຫວຽດນາມ, ລາວ, ກຳປູເຈຍ |
 |
| ການເຮັດວຽກລະຫວ່າງສອງຝ່າຍ (ພາບ: nhandan.vn) |
ນີ້ແມ່ນຄຳຢືນຢັນຂອງທ່ານເລຂາຄະນະພັກ, ເຈົ້າແຂວງແຂວງອັດຕະປື - ເລັດ ໄຊຍະພອນ ເນື່ອງໃນໂອກາດຄະນະຜູ້ແທນຂັ້ນສູງແຂວງອັດຕະປື, ສປປ ລາວ ເດີນທາງມາຢ້ຽມຢາມ ແລະ ເຮັດວຽກ ຢູ່ແຂວງ ເທື່ອທຽນເຫ້ວ ໃນຕອນເຊົ້າວັນທີ 27 ມີນາ.
ທີ່ການພົບປະກັບຄະນະຜູ້ແທນຂັ້ນສູງແຂວງອັດຕະປື, ທ່ານກຳມະການສູນກາງພັກ, ເລຂາຄະນະພັກແຂວງ, ຫົວໜ້າຄະນະຜູ້ແທນສະພາແຫ່ງຊາດແຂວງ, ປະທານສະພາປະຊາຊົນແຂວງ ເລເຈື່ອງລຶວ ຮັບຮູ້ວ່າ: ໃນໄລຍະຜ່ານມາ, ການພົວພັນມິດຕະພາບທີ່ເປັນມູນເຊື້ອແບບພິເສດລະຫວ່າງສອງແຂວງ ສືບຕໍ່ໄດ້ຮັບການເພີ່ມທະວີ ແລະ ພັດທະນາອັນດີງາມ, ນັບມື້ນັບມີຄວາມສະໜິດຕິດພັນ, ມີຄວາມໄວ້ເນື້ອເຊື່ອໃຈ, ມີປະສິດທິຜົນ ແລະ ແທດຈິງໃນທຸກຂົງເຂດນັບແຕ່ດ້ານການເມືອງ, ການທູດ, ການປ້ອງກັນຊາດ ແລະ ປ້ອງກັນຄວາມສະຫງົບ, ວັດທະນະທຳ, ການສຶກສາ, ສາທາລະນະສຸກ...
ທ່ານເລຂາຄະນະພັກແຂວງສະເໜີວ່າ: ໃນໄລຍະຈະມາເຖິງ, 2 ຝ່າຍຄວນສົມທົບກັນປະຕິບັດຂໍ້ຕົກລົງຮ່ວມມືໄລຍະ 2023-2027 ຢ່າງມີປະສິດທິຜົນ ເພື່ອແນໃສ່ຄຸ້ມຄອງ ແລະ ປົກປັກຮັກສາເສັ້ນຊາຍແດນຢ່າງໝັ້ນແກ່ນ, ສະກັດກັ້ນ ແລະ ຕ້ານອາດຊະຍາກຳຂ້າມຊາດ, ຮ່ວມມືກັນປ້ອງກັນ, ຕ້ານຢາເສບຕິດເພື່ອຮັບປະກັນຄວາມໝັ້ນຄົງແຫ່ງຊາດ, ປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍທາງສັງຄົມ ແລະ ຄວາມປອດໄພຂອງແຕ່ລະຝ່າຍ.
ໃນກອງປະຊຸມຄັ້ງນີ້, ທ່ານ ເລຂາຄະນະພັກ, ເຈົ້າແຂວງແຂວງອັດຕະປື ເລັດ ໄຊຍະພອນ ໄດ້ຂອບໃຈແຂວງເທື່ອທຽນເຫ້ວ ທີ່ໄດ້ໃຫ້ການໜູນຊ່ວຍ ແລະ ຊ່ວຍເຫຼືອ ແຂວງອັດຕະປື ຕະຫຼອດໄລຍະຜ່ານມາ. ພ້ອມກັນນັ້ນ, ກໍ່ຢືນຢັນຄວາມສາມັກຄີມິດຕະພາບທີ່ເປັນມູນເຊື້ອລະຫວ່າງປະຊາຊົນສອງປະເທດ ລາວ - ຫວຽດນາມ ເວົ້າລວມ ແລະ ອັດຕະປື - ເທື່ອທຽນເຫ້ວ ເວົ້າສະເພາະ ໃຫ້ນັບມື້ນັບພັດທະນາ ແລະ ເລິກເຊິ່ງກ່ວາອີກ.
ທ່ານເລຂາຄະນະພັກ, ເຈົ້າແຂວງແຂວງອັດຕະປື ກ່າວວ່າ ການຢ້ຽມຢາມ ແລະ ເຮັດວຽກຢູ່ ແຂວງ ເທື່ອທຽນເຫ້ວ ຂອງຄະນະຜູ້ແທນແຂວງອັດຕະປື ໃນຄັ້ງນີ້ ໄດ້ຮັດແໜ້ນ, ປັບປຸງສາຍພົວພັນມິດຕະພາບ, ຄວາມສາມັກຄີລະຫວ່າງ 2 ແຂວງໃນທຸກຂົງເຂດ, ພິເສດແມ່ນການສຶກສາ, ກະສິກຳ, ການຄ້າ, ການລົງທຶນ ແລະ ການທ່ອງທ່ຽວ.
ບຸນຄົງ
