ການ​ນຳ​ຂັ້ນ​ສູງ ຫວຽດ​ນາມ ມີການຕ້ອນ​ຮັບ ແລະ ພົບປະຂັ້ນສູງກັບ ນາຍົກລັດຖະມົນຕີກຳປູເຈຍ

	ຫວຽດນາມ - ກຳປູເຈຍ: ເສີມຂະຫຍາຍການຄວບຄຸມຮັກສາຄວາມປອດໄພ, ຄວາມເປັນລະບຽບຮຽບຮ້ອຍທາງບົກ ແລະ ທາງທະເລ
	ຫວຽດນາມ - ກຳປູເຈຍ ຖືເປັນສຳຄັນການຊຸກຍູ້ການຮ່ວມມືດ້ານກະສິກຳ 2 ຝ່າຍ

ວັນທີ 18 ກຸມພາ, ຢູ່ຮ່າໂນ້ຍ ໄດ້ດໍາເນີນການພົບປະຂັ້ນສູງລະຫວ່າງພັກກອມມູນິດຫວຽດນາມ ແລະພັກປະຊາຊົນກຳປູເຈຍ (CPP) ໂດຍການເປັນປະທານຮ່ວມຂອງທ່ານ ຫງວຽນຝູຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ແລະ ທ່ານ Hun Sen ປະທານພັກ CPP, ນາຍົກລັດຖະມົນຕີກຳປູເຈຍ.

ທ່ານເລຂາທິການໃຫຍ່ ຫງວຽນຝູຈ້ອງ ແລະ ທ່ານ Hun Sen ປະທານພັກ CPP

ທີ່ການພົບປະ, ທ່ານເລຂາທິການໃຫຍ່ ຫງວຽນຝູຈ້ອງ ແລະ ທ່ານ Hun Sen ປະທານພັກ CPP, ນາຍົກລັດຖະມົນຕີກຳປູເຈຍ ໄດ້ແຈ້ງໃຫ້ກັນຮັບຊາບກ່ຽວກັບສະພາບການຂອງແຕ່ລະພັກ, ແຕ່ລະປະເທດ, ຕີລາຄາກ່ຽວກັບສະພາບການໂລກ, ພາກພື້ນ; ໝາກຜົນການຮ່ວມມືລະຫວ່າງສອງພັກ, ສອງລັດ ໃນໄລຍະຜ່ານມາ ແລະ ທິດທາງການຮ່ວມມືໃນໄລຍະຈະມາເຖິງ. ທ່ານເລຂາທິການໃຫຍ່ ຫງວຽນຝູຈ້ອງ ໄດ້ເນັ້ນໜັກເຖິງຄວາມສໍາຄັນ, ຄວາມໝາຍດ້ານຍຸດທະສາດຂອງສາຍພົວພັນຫວຽດນາມ-ກໍາປູເຈຍ ທີ່ມີຕໍ່ຄວາມໝັ້ນຄົງ, ການພັດທະນາຂອງແຕ່ລະປະເທດ, ເພື່ອສັນຕິພາບ, ສະຖຽນລະພາບ ແລະ ການພັດທະນາຢູ່ພາກພື້ນ ແລະ ໃນໂລກ.

ສ່ວນທ່ານ Hun Sen ປະທານພັກ CPP, ນາຍົກລັດຖະມົນຕີກຳປູເຈຍ ຢັ້ງຢືນວ່າ ໄປພ້ອມກັບການປັບປຸງ ແລະ ພັດທະນາການພົວພັນດ້ານການເມືອງ, ສອງຝ່າຍຄວນເພີ່ມທະວີການຮ່ວມມືດ້ານເສດຖະກິດ, ການຄ້າ ເພື່ອຮັບໃຊ້ພາລະກິດພັດທະນາຂອງແຕ່ລະປະເທດ.

ຢູ່ທີ່ນີ້, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ກໍຕີລາຄາສູງໝາກຜົນການຮ່ວມມືໃນຂົງເຂດເສດຖະກິດ, ການຄ້າ, ການລົງທຶນ, ວັດທະນະທໍາ, ການສຶກສາ, ວິທະຍາສາດ - ເຕັກນິກ, ການປ້ອງກັນຊາດ - ປ້ອງກັນຄວາມສະຫງົບ, ພ້ອມທັງສະເໜີບາງທິດທາງການຮ່ວມມືລະອຽດລະຫວ່າງສອງປະເທດໃນໄລຍະຈະມາເຖິງ.

ສອງຝ່າຍເຫັນດີເປັນເອກະພາບນໍາກັນວ່າ ໃນສະພາບການປັດຈຸບັນ, ສອງພັກ, ສອງລັດ ຄວນເພີ່ມທະວີຄວາມສາມັກຄີ, ສົມທົບກັນຢ່າງແໜ້ນແຟ້ນ, ສະໜັບສະໜູນເຊິ່ງກັນແລະກັນ, ສືບຕໍ່ຖືການພົວພັນດ້ານການເມືອງແມ່ນມີຄວາມໝາຍສໍາຄັນແຖວໜ້າເພື່ອກໍານົດທິດໃຫ້ແກ່ການພົວພັນລະຫວ່າງສອງພັກ, ສອງລັດ. ສອງຝ່າຍໄດ້ເຫັນດີຍູ້ແຮງສາຍພົວພັນການຮ່ວມມືລະຫວ່າງບັນດາອົງການຂອງພັກ, ສະພາແຫ່ງຊາດ, ບັນດາກະຊວງ, ຂະແໜງການຂອງລັດຖະບານ, ແນວໂຮມ, ບັນດາອົງການຈັດຕັ້ງມະຫາຊົນ ແລະ ທ້ອງຖິ່ນຕ່າງໆຂອງສອງປະເທດ.