| ຊຸກຍູ້ການລົງທຶນ ແລະ ການຄ້າ ຫວຽດນາມ - ກຳປູເຈຍ | |
| ປະທານສະພາແຫ່ງຊາດ ຫວຽດນາມ ເວືອງດິ່ງເຫວະ ຕ້ອນຮັບຫົວໜ້າກຳມາທິການການຕ່າງປະເທດສະພາແຫ່ງຊາດລາວ ແລະ ກຳປູເຈຍ |
ທ່ານລັດຖະມົນຕີ Dith Tina ໄດ້ໃຫ້ການຕ້ອນຮັບທ່ານລັດຖະມົນຕີ ເລມີິງຮວານ ທີ່ມາຢ້ຽມຢາມ ແລະ ເຮັດວຽກຢູ່ ກຳປູເຈຍ; ຖືວ່າ ການຢ້ຽມຢາມ ແລະ ເຮັດວຽກຄັ້ງນີ້ ສະແດງໃຫ້ເຫັນຄວາມສົນໃຈຢ່າງເລິກເຊິ່ງຂອງຝ່າຍຫວຽດນາມ ໃນການຮ່ວມມືດ້ານກະສິກຳກັບ ກຳປູເຈຍ ພາຍຫຼັງສອງກະຊວງໄດ້ລົງນາມໃນຂໍ້ຕົກລົງຮ່ວມມື ໃນໂອກາດທີ່ທ່ານນາຍົກລັດຖະມົນຕີ ຟ້າມມິງຈິ້ງ ຢ້ຽມຢາມ ກຳປູເຈຍ ໃນວັນທີ 8-9 ພະຈິກ.
ທ່ານລັດຖະມົນຕີ ເລມີິງຮວານ ໄດ້ສະແດງຄວາມຂອບອົກຂອບໃຈຝ່າຍ ກຳປູເຈຍ ທີ່ໄດ້ໃຫ້ການຕ້ອນຮັບຢ່າງສົມກຽດ ແລະ ຈິງໃຈ; ຊົມເຊີຍທ່ານລັດຖະມົນຕີ Dith Tina ທີ່ໄດ້ຮັບການແຕ່ງຕັ້ງເປັນລັດຖະມົນຕີກະຊວງກະສິກຳ, ປ່າໄມ້ ແລະ ການປະມົງຂອງກຳປູເຈຍ; ພ້ອມກັນນັ້ນ ກໍສະແດງຄວາມດີໃຈທີ່ກຳປູເຈຍໄດ້ຮັບລາງວັນທີໜຶ່ງຂອງການປະກວດສາກົນ ເຂົ້າແຊບ ປີ 2022. ນີ້ແມ່ນຈຸດໝາຍທີ່ດີທີ່ສຸດເພື່ອໃຫ້ຫວຽດນາມ ແລະ ກຳປູເຈຍແບ່ງປັນປະສົບການໃນການພັດທະນາກະສິກຳໃນໄລຍະຈະມາເຖິງ.
| |
| ຫວຽດນາມ - ກຳປູເຈຍ ຖືເປັນສຳຄັນການຊຸກຍູ້ການຮ່ວມມືດ້ານກະສິກຳ 2 ຝ່າຍ. |
ທ່ານລັດຖະມົນຕີ ເລມີິງຮວານ ໃຫ້ຮູ້ວ່າ: ຫວຽດນາມ ແລະ ກຳປູເຈຍ ແມ່ນສອງປະເທດບ້ານໃກ້ເຮືອນຄຽງທີ່ສະໜິດສະໜົມ ແລະ ມີມູນເຊື້ອອັນດີງາມມາແຕ່ດົນນານ, ໄດ້ຮັບຄວາມເອົາໃຈໃສ່ ແລະ ຊີ້ນຳຂອງການນຳສອງພັກ, ສອງລັດ ແລະ ສອງລັດຖະບານ. ຫວຽດນາມ ແລະ ກຳປູເຈຍ ສາມາດຍາດແຍ່ງທ່າໄດ້ປຽບຂອງ 2 ປະເທດໄດ້ເປັນຢ່າງດີທີ່ສຸດ ເພື່ອຊຸກຍູ້ການພັດທະນາການຜະລິດ, ປຸງແຕ່ງ, ຈຳໜ່າຍ, ຍົກສູງມູນຄ່າເພີ່ມຂຶ້ນ ແລະ ພັດທະນາຂະແໜງການກະສິກຳແບບຍືນຍົງ, ຮັບໃຊ້ຜົນປະໂຫຍດຂອງປະຊາຊົນ ແລະ ວິສາຫະກິດຂອງ 2 ປະເທດ.
 |
ລັດຖະມົນຕີ 2 ທ່ານ ຖືວ່າ ການລົງນາມໃນສັນຍາຮ່ວມມືລະຫວ່າງ 2 ກະຊວງ ເປັນຈຸດໝາຍສຳຄັນ ເພື່ອຊຸກຍູ້ການຮ່ວມມືດ້ານກະສິກຳໃຫ້ເຂັ້ມແຂງໃນໄລຍະຈະມາເຖິງ. ລັດຖະມົນຕີ 2 ທ່ານ ໄດ້ເຫັນດີເປັນເອກະສັນກັນ ຊີ້ນຳບັນດາອົງການວິຊາສະເພາະສົມທົບກັນຢ່າງແໜ້ນແຟ້ນ ໃນການເຊື່ອມໂຍງເຕັກນິກ, ສ້າງເງື່ອນໄຂສະດວກໃຫ້ແກ່ວິສາຫະກິດ, ຊຸກຍູ້ການຮ່ວມມືດ້ານການຄ້າ ແລະ ການລົງທຶນໃນຂົງເຂດກະສິກຳລະຫວ່າງ 2 ປະເທດ. ພ້ອມກັນນັ້ນ, ຫວຽດນາມ ແລະ ກຳປູເຈຍ ກໍມີລະບົບນິເວດຮ່ວມອັນດຽວກັນ ຢູ່ອ່າງແມ່ນ້ຳຂອງ, ສະນັ້ນ ຕ້ອງເພີ່ມທະວີການຮ່ວມມືໃນການຄຸ້ມຄອງການຜະລິດ ແລະ ທຸລະກິດປ່າໄມ້, ການປະມົງແບບຍືນຍົງ, ຄຸ້ມຄອງຊັບພະຍາກອນທຳມະຊາດ, ການອະນຸລັກຊີວະນາໆພັນຫຼາຍຮູບຫຼາຍແບບ ແລະ ການຮັບມືກັບການປ່ຽນແປງດິນຟ້າອາກາດ.
ທ່ານລັດຖະມົນຕີ Dith Tina ມີຄວາມສົນໃຈເປັນພິເສດ ເຖິງການຮ່ວມມືໃນຂົງເຂດເຂົ້າສານ ແລະ ອາຫານທະເລກັບ ຫວຽດນາມ. ທ່ານລັດຖະມົນຕີ ເລມີິງຮວານ ເຫັນດີເປັນເອກະພາບສູງກັບນະໂຍບາຍໝູນໃຊ້ທ່າໄດ້ປຽບຂອງແຕ່ລະຝ່າຍ ເພື່ອຍົກສູງມູນຄ່າເພີ່ມຂຶ້ນ, ຫຼຸດຜ່ອນຄ່າໃຊ້ຈ່າຍ, ເພີ່ມລາຍຮັບໃຫ້ຊາວກະສິກອນ ແລະ ພັດທະນາຂະແໜງການເຂົ້າສານຂອງສອງປະເທດຢ່າງຍືນຍົງ ໂດຍຜ່ານການຮ່ວມມືດ້ານວິທະຍາສາດການສຶກສາ ແລະ ຖ່າຍທອດເຕັກໂນໂລຊີ, ແລກປ່ຽນຂໍ້ມູນຂ່າວສານຕາມລະດູການ, ສ້າງເງື່ອນໄຂສະດວກໃຫ້ການຊຸກຍູ້ການຮ່ວມມືດ້ານທຸລະກິດເຂົ້າສານຂອງສອງປະເທດ. ກ່ຽວກັບອາຫານທະເລ, ຫວຽດນາມ ພ້ອມແລ້ວທີ່ຈະໜູນຊ່ວຍການຖ່າຍທອດເຕັກໂນໂລຊີລ້ຽງປານ້ຳຈືດໃຫ້ກຳປູເຈຍ ຢູ່ບັນດາໜອງ ແລະ ແມ່ນ້ຳ.
 |
| ຊາວນາ ກຳປູເຈຍ ເກັບກ່ຽວເຂົ້ານາ. |
ນີ້ແມ່ນພື້ນຖານປັດໄຈເພື່ອປັບປຸງຊີວິດການເປັນຢູ່ແບບຍືນຍົງ ຂອງປະຊາຊົນກຳປູເຈຍ, ໃນນັ້ນມີຊາວຫວຽດນາມ ທີ່ພວມດຳລົງຊີວິດຢູ່ກຳປູເຈຍຈຳນວນໜຶ່ງ. ທີ່ການພົບປະ, ລັດຖະມົນຕີສອງທ່ານ ໄດ້ເປັນສັກຂີພິຍານໃນພິທີລົງນາມສັນຍາຮ່ວມມືປະຕິບັດໂຄງການ “ສ້າງຕົວແບບ ແລະ ຖ່າຍທອດເຕັກນິກການລ້ຽງສິນໃນນ້ຳຢູ່ເຂດ ປ໊ຽນໂຫ່ ກຳປູເຈຍ” ດ້ວຍຍອດຈຳນວນທຶນປະມານ 70 ຕື້ ດົງ ແລະ ໄດ້ຮັບການປະຕິບັດໃນໄລຍະ 5 ປີ (2021-2025), ໂດຍນຳໃຊ້ແຫຼ່ງຊ່ວຍເຫຼືອຂອງລັດຖະບານ ຫວຽດນາມ ໃຫ້ສຳລັບລັດຖະບານ ກຳປູເຈຍ.
ໃນຕອນທ້າຍຂອງກອງປະຊຸມ, ທ່ານລັດຖະມົນຕີ ເລມີິງຮວານ ໄດ້ເຊີນທ່ານລັດຖະມົນຕີ Dith Tina ມາຢ້ຽມຢາມ ແລະ ເຮັດວຽກກັບກະຊວງກະສິກຳ ແລະ ພັດທະນາຊົນນະບົດ ຫວຽດນາມ. ທ່ານລັດຖະມົນຕີ Dith Tina ຍິນດີຮັບຄຳເຊີນ ແລະ ຈະຈັດເວລາໄປຢ້ຽມຢາມ ຫວຽດນາມ ໂດຍໄວ.
ຄຳຮຸ່ງ
