ສະເໜີ ອາເມລິກາ ປະຕິບັດບັນດາຄຳໝັ້ນສັນຍາໜູນຊ່ວຍ ຫວຽດນາມ ໂດຍໄວ

08:32 | 15/02/2023

ຍສໝ - ທ່ານລັດຖະມົນຕີ ການຕ່າງປະເທດ ບຸຍແທັງເຊີນ ສະເໜີໃຫ້ ອາເມລິກາ ປະຕິບັດບັນດາຄຳໝັ້ນສັນຍາໜູນຊ່ວຍ ຫວຽດນາມ ແລະ ບັນດາປະເທດຜັນຂະຫຍາຍຂໍ້ຕົກລົງສາກົນກ່ຽວກັບການຮັບມືກັບການປ່ຽນແປງຂອງດິນຟ້າອາກາດໂດຍໄວ

	ທ່ານນາຍົກລັດຖະມົນຕີ ລາວ ຕີລາຄາສູງການໜູນຊ່ວຍຂອງ ຫວຽດນາມ ໃນຂົງເຂດກະສິກຳ
	ທະນາຄານໂລກ ໃຫ້ຄຳໝັ້ນສັນຍາໜູນຊ່ວຍ ຫວຽດນາມ ຕ້ານການປ່ຽນແປງຂອງດິນຟ້າອາກາດ

ທ່ານລັດຖະມົນຕີ ການຕ່າງປະເທດ ບຸຍແທັງເຊີນ ແລະ ທ່ານນາງ Katherine Tai ຜູ້ຕາງໜ້າທາງການຄ້າ ອາເມລິກາ (ພາບ: baoquocte.vn)

ສະເໜີ ອາເມລິກາ ປະຕິບັດບັນດາຄຳໝັ້ນສັນຍາໜູນຊ່ວຍ ຫວຽດນາມ ໂດຍໄວ

ທ່ານລັດຖະມົນຕີ ການຕ່າງປະເທດ ບຸຍແທັງເຊີນ ສະເໜີໃຫ້ ອາເມລິກາ ປະຕິບັດບບັນດາຄຳໝັ້ນສັນຍາໜູນຊ່ວຍ ຫວຽດນາມ ແລະ ບັນດາປະເທດຜັນຂະຫຍາຍຂໍ້ຕົກລົງສາກົນກ່ຽວກັບການຮັບມືກັບການປ່ຽນແປງຂອງດິນຟ້າອາກາດໂດຍໄວ.

ວັນທີ 13 ກຸມພາ, ຢູ່ຮ່າໂນ້ຍ, ທ່ານລັດຖະມົນຕີການຕ່າງປະເທດ ບຸຍແທັງເຊີນ ໄດ້ໃຫ້ການຕ້ອນຮັບ ທ່ານນາງ Katherine Tai ຜູ້ຕາງໜ້າທາງການຄ້າ ອາເມລິກາ.

ນີ້ແມ່ນການຢ້ຽມຢາມ ຫວຽດນາມ ຄັ້ງທຳອິດຂອງທ່ານຜູ້ຕາງໜ້າທາງການຄ້າ ນາງ Katherine Tai, ພ້ອມທັງແມ່ນການຢ້ຽມຢາມຂັ້ນລັດຖະມົນຕີກ່ຽວກັບເສດຖະກິດຄັ້ງທຳອິດຂອງ ອຳນາດການປົກຄອງ ປະທານາທິບໍດີ Joe Biden ມາຍັງ ຫວຽດນາມ. ການຢ້ຽມຢາມໄດ້ເປີດສາກໃຫ້ບັນດາການເຄື່ອນໄຫວສະເຫຼີມສະຫຼອງ 10 ປີແຫ່ງວັນສ້າງຕັ້ງການພົວພັນຄູ່ຮ່ວມມືຮອບດ້ານ ຫວຽດນາມ - ອາເມລິກາ. ທີ່ການຕ້ອນຮັບ, ທ່ານລັດຖະມົນຕີ ບຸຍແທັງເຊີນ ແລະ ທ່ານນາງ Katherine Tai ຜູ້ຕາງໜ້າທາງການຄ້າ ອາເມລິກາ ໄດ້ແລກປ່ຽນກ່ຽວກັບຫຼາຍບັນຫາເພື່ອແນໃສ່ຊຸກຍູ້ການພົວພັນລະຫວ່າງສອງປະເທດ.

ທ່ານລັດຖະມົນຕີ ບຸຍແທັງເຊີນ ແລະ ທ່ານຜູ້ຕາງໜ້າທາງການຄ້າ ນາງ Katherine Tai ກໍ່ໄດ້ແລກປ່ຽນກ່ຽວກັບການຮ່ວມມືລະຫວ່າງສອງປະເທດໃນຂອບເຂດເວທີປາໄສການຮ່ວມມືດ້ານເສດຖະກິດ ອາຊີ - ປາຊີຟິກ (APEC), ວິວັດການປຶກສາຫາລືກ່ຽວກັບຂອບເຂດເສດຖະກິດ ຢູ່ເຂດມະຫາສະໝຸດອິນເດຍ - ປາຊີຟິກ ເພື່ອຄວາມວັດທະນາຖາວອນ (IPEF), ການຮ່ວມມືເຂດອະນຸພາກພື້ນ, ການຮ່ວມມືໃນການຮັບມືກັບການປ່ຽນແປງຂອງດິນຟ້າອາກາດ, ການຫັນເປັນພະລັງງານ, ຫັນເປັນດີຈີຕອນ… ສອງຝ່າຍໄດ້ເນັ້ນໜັ້ກເຖິງຄວາມໝາຍສຳຄັນຂອງການຊຸກຍູ້ທາງການຄ້າເສລີ, ເປີດກວ້າງ, ຄວາມສະເໝີພາບ, ອີງຕາມກົດໝາຍສາກົນ ແລະ ການເຕີບໂຕແບບຍືນຍົງ, ກວມລວມຢູ່ພາກພື້ນ ໃນນັ້ນມີບັນດາປະເທດ ອາຊຽນ ທີ່ຮັກສາບົດບາດເປັນໃຈກາງ.

ທ່ານຜູ້ຕາງໜ້າທາງການຄ້າອາເມລິກາ ນາງ Katherine Tai ໄດ້ຕີລາຄາສູງການເຂົ້າຮ່ວມຂອງ ຫວຽດນາມ ໃນວິວັດການເຊື່ອມຕໍ່ເສດຖະກິດໃນພາກພື້ນໃນໄລຍະຜ່ານມາ. ທ່ານນາງ Katherine Tai ຜູ້ຕາງໜ້າທາງການຄ້າ ໃຫ້ຮູ້ວ່າ ການໃຫ້ບຸລິມະສິດໃຫຍ່ຂອງ ລັດຖະບານ ອາເມລິກາ ໃນປັດຈຸບັນ ແມ່ນການຊຸກຍູ້ການຟື້ນຟູທາງການຄ້າ ແລະ ການເຕີບໂຕດ້ານເສດຖະກິດຕາມທິດຍືນຍົງ, ສ້າງຄວາມເຂັ້ມແຂງດ້ວຍຕົນເອງ ແລະ ກວມລວມບົນພື້ນຖານບັນດາບົດຮຽນປະສົບການທີ່ຖອດຖອນມາໄດ້ຈາກວິວັດການຮັມບມືກັບໂຄວິດ - 19 ທີ່ຜ່ານມາ. ອາເມລິກາເອົາໃຈໃສ່ເປັນພິເສດເຖິງການປັບປຸງການພົວພັນຄູ່ຮ່ວມມືກັບບັນດາປະເທດໃນພາກພື້ນ ອາຊີ - ປາຊີຟິກ ແລະ ມະຫາສະໝຸດອິນເດຍ, ພ້ອມທັງຮັບປະກັນຜົນປະໂຫຍດຂອງປະຊາຊົນ, ຜູ້ອອກແຮງງານພາຍໃນປະເທດ. ອາເມລິກາ ຈະໃຫ້ບຸລິມະສິດຊຸກຍູ້ບັນດາຂອບເຂດການຮ່ວມມືເພື່ອແນໃສ່ສ້າງລະບົບນິເວດ ດ້ານເສດຖະກິດ, ການລົງທຶນທີ່ມີປະສິດທິຜົນ ແລະ ຍືນຍົງ, ຜ່ານນັ້ນ ກໍ່ສ້າງກຳລັງໜູນໃໝ່ໃຫ້ແກ່ການພັດທະນາເສດຖະກິດພາກພື້ນ. ທ່ານນາງ Katherine Tai ກໍ່ໄດ້ແບ່ງປັນບັນດາບຸລິມະສິດ ແລະ ແຜນການ APEC 2023 ເຊິ່ງ ອາເມລິກາ ສວມບົດບາດເປັນເຈົ້າພາບຈັດຕັ້ງ.

ທ່ານລັດຖະມົນຕີ ບຸຍແທັງເຊີນ ສະແດງຄວາມຊົມເຊີຍຕໍ່ການຢ້ຽມຢາມ, ພ້ອມທັງຕີລາຄາສູງບັນດາການປະກອບສ່ວນຂອງທ່ານນາງຜູ້ຕາງໜ້າທາງການຄ້າ ອາເມລິກາ ໃນການຊຸກຍູ້ກາຮ່ວມມືດ້ານເສດຖະກິດ - ການຄ້າ ລະຫວ່າງສອງປະເທດ. ໄປຄຽງຄູ່ກັບການຮ່ວມມືດ້ານເສດຖະກິດ, ການຄ້າ, ການລົງທຶນ, ທ່ານລັດຖະມົນຕີ ບຸຍແທັງເຊີນ ໄດ້ເນັ້ນໜັກເຖິງຄວາມສາມາດບົ່ມຊ້ອນໃນການຮ່ວມມືລະຫວ່າງສອງປະເທດໃນບັນດາຂົງເຂດຮັບມືກັບການປ່ຽນແປງຂອງດິນຟ້າອາກາດ, ຫັນເປັນພະລັງງານ, ຫັນເປັນດີຈີຕອນ ແລະ ການເຕີບໂຕສີຂຽວ.

ບຸນຄົງ