| ກອງປະຊຸມ WEF ປີ 2023: ຊຸກຍູ້ການຮ່ວມມືໃນໂລກທີ່ຖືກຈັດແບ່ງ | |
| CIEM ຄາດວ່າ GDP ຫວຽດນາມ ອາດຈະມີການເຕີບໂຕຢູ່ລະດັບ 6,83% ໃນປີ 2023 |
 |
| ທ່ານນາງປະທານ VUFO ຫງວຽນເຟືອງງາ |
ປີ 2023, ຫົວຂໍ້ວຽກງານຈຸດສຸມຂອງລະບົບສະຫະພັນບັນດາອົງການຈັດຕັ້ງມິດຕະພາບ ຫວຽດນາມ (VUFO) ແມ່ນ “ການທູດປະຊາຊົນຮັບໃຊ້ໃຫ້ແກ່ການພັດທະນາເສດຖະກິດ - ສັງຄົມ”. ນັ້ນແມ່ນຄຳຢັ້ງຢືນຂອງທ່ານນາງປະທານ VUFO ຫງວຽນເຟືອງງາ ໃນການແລກປ່ຽນກັບສື່ມວນຊົນກ່ອນປີໃໝ່ປີແມວ 2023.
ທ່ານນາງປະທານ VUFO ຫງວຽນເຟືອງງາ ເວົ້າວ່າ: ພວກຂ້າພະເຈົ້າໄດ້ເລືອກເອົາຫົວຂໍ້ນີ້ ໂດຍອີງໃສ່ບັນດາບຸລິມະສິດຂອງພັກ ແລະ ລັດ ຫວຽດນາມ ກຳນົດໃນປີ 2023 ແມ່ນປີບານພັບໃນການປະຕິບັດໜ້າທີ່ເສດຖະກິດ - ສັງຄົມ 5 ປີ ຕາມມະຕິກອງປະຊຸມໃຫຍ່ຄັ້ງທີ XIII ຂອງພັກ.
ໃນວິວັດການແກ້ໄຂຜົນຮ້າຍຢ້ອນຫຼັງຈາກພະຍາດໂຄວິດ - 19, ພວກເຮົາຕ້ອງເສຍເວລາປະມານ 2 ປີຫຼັງກອງປະຊຸມໃຫຍ່ ແລະ ປັດຈຸບັນແມ່ນປີທີ 3 ເຊິ່ງແມ່ນປີທີ່ມີຄວາມໝາຍຕັດສິນ. ພວກເຮົາຕ້ອງມານະພະຍາຍາມຟື້ນຟູ, ພັດທະນາເສດຖະກິດ - ສັງຄົມ, ພ້ອມທັງສ້າງໂຄງປະກອບເສດຖະກິດຄືນໃໝ່, ປ່ຽນແປງໃໝ່ຮູບແບບການເຕີບໂຕຕາມທິິດມຸ່ງໄປເຖິງການພັດທະນາສີຂຽວ, ພັດທະນາແບບຍືນຍົງ.
ໜ້າທີ່ຂອງການທູດປະຊາຊົນ, ໂດຍແມ່ນໜຶ່ງໃນບັນດາເສົາຄ້ຳສຳຄັນຂອງພື້ນຖານການທູດ ຫວຽດນາມ ແມ່ນຮັບຜິດຊອບພາລະກຳ, ບົດບາດນຳໜ້າໃນການສ້າງ ແລະ ຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບ, ລະດົມແຫຼ່ງກຳລັງພາຍນອກເພື່ອພັດທະນາປະເທດຊາດ, ຍົກສູງທີ່ຕັ້ງບົດບາດ, ອິດທິພົນຊື່ສຽງສາກົນຂອງ ຫວຽດນາມ.
ຂໍຮຽນທ່ານ, ເຊີນທ່ານໃຫ້ຮູ້ການກຳນົດທິດລາຍການກະທຳສຳລັບຫົວຂໍ້ວຽກງານນີ້
ປີ 2023, ຫວຽດນາມ ໄດ້ຈັດຕັ້ງການສະເຫຼີມສະຫຼອງການພົວພັນການຕ່າງປະເທດກັບບັນດາປະເທດຄື: ຍີ່ປຸ່ນ, ການາດາ, ອັກຊັງຕິນ, ຝລັ່ງ, ແບນຊິກ, ອີຕາລີ, ໂຮນລັງ, ລາຊະອານາຈັກອັງກິດ…ນີ້ກໍ່ແມ່ນປີສະເຫຼີມສະຫຼອງ 50 ປີແຫ່ງວັນເຊັນສັນຍາ ປາຣີ ກ່ຽວກັບການຢຸດຕິສົງຄາມ, ສ້າງສັນຕິພາບຢູ່ ຫວຽດນາມ ຄືນໃໝ່.
ພວກເຮົາຕ້ອງຍາດແຍ່ງກາລະໂອກາດນີ້ ເພື່ອຮັດແໜ້ນນ້ຳໃຈມິດຕະພາບລະຫວ່າງປະຊາຊົນ ຫວຽດນາມ ກັບປະຊາຊົນບັນດາປະເທດ. VUFO ໄດ້ກຳນົດການເພີ່ມທະວີລັກສະນະແທດຈິງ, ມີປະສິດທິຜົນຂອງບັນດາການເຄື່ອນໄຫວສ້າງສັນຕິພາບ, ຄວາມສາມັກຄີ, ມິດຕະພາບ, ຈັດຕັ້ງບັນດາການເຄື່ອນໄຫວສະເຫຼີມສະຫຼອງ ເພື່ອຂຸດຄົ້ນ ແລະ ເປີດກວ້າງເຄືອຂ່າຍຄູ່ຮ່ວມມື.
ພວກເຮົາຈະເອົາໃຈໃສ່ເປັນພິເສດເຖິງບັນດາເປົ້າໝາຍພັດທະນາເສດຖະກິດ ສັງຄົມ ເພື່ອລະດົມແຫຼ່ງປັນຍາຊົນ, ປະສົບການ, ເຕັກໂນໂລຢີຮັບໃຊ້ການພັດທະນາປະເທດຊາດ.
ປີ 2023, ພວກເຮົາໄດ້ສະເຫຼີມສະຫຼອງ 50 ປີແຫ່ງວັນເຊັນສັນຍາ ປາຣີ ກ່ຽວກັບການຢຸດຕິສົງຄາມ, ສ້າງສັນຕິພາບ ຢູ່ ຫວຽດນາມ ຄືນໃໝ່. ນີ້ກໍ່ແມ່ນໂອກາດເພື່ອເພີ່ມທະວີຄວາມສະໜິດຕິດພັນກັບເພື່ອນມິດ. ພວກເຮົາຈະຕ້ອນຮັບເພື່ອນມິດສາກົນ ທີ່ເຄີຍໜູນຊ່ວຍຫວຽດນາມ ໃນວິວັດການເຈລະຈາສັນຍາ, ກໍ່ຄືບັນດາເພື່ອນມິດທີ່ໄດ້ມີການປະກອບສ່ວນເຂົ້າໃນການຕໍ່ສູ້ຮຽກຮ້ອງຢຸດຕິສົງຄາມ ແລະ ຫຼັງຈາກນັ້ນແມ່ນ ຂົນຂວາຍການຫັນເປັນປົກກະຕິ ແລະ ໜູນຊ່ວຍ ຫວຽດນາມ ແກ້ໄຂຜົນຮ້າຍຢ້ອນຫຼັງຈາກສົງຄາມ, ສ້າງສາປະເທດຊາດ.
ຂໍຮຽນທ່ານ, ທ່ານຈົ່ງໃຫ້ຮູ້ບັນດາມາດຕະການຫຼັກເພື່ອປະຕິບັດໂຄງການນີ້?
ຕາມຂ້າພະເຈົ້າແລ້ວ, ສິ່ງທຳອິດແມ່ນເຊື່ອມຊືມຢ່າງເລິກເຊິ່ງ, ໝູນໃຊ້ແນວທາງການທູດຂອງພັກຢ່າງມີຫົວຄິດປະດິດສ້າງ, ມີໄຫວພິບ, ພິເສດແມ່ນນະໂຍບາຍ, ແນວທາງເຊິ່ງກອງປະຊຸມໃຫຍ່ຄັ້ງທີ 13 ຂອງພັກ ວາງອອກ. ສິ່ງນີ້ກໍ່ສະແດງໃຫ້ເຫັນຢ່າງຈະແຈ້ງໃນບົດກ່າວຄຳເຫັນຊີ້ນຳຂອງທ່ານເລຂາທິການໃຫຍ່ ຫງວຽນຝຸຈ້ອງ ຢູ່ກອງປະຊຸມການທູດທົ່ວປະເທດຜັນຂະຫຍາຍການປະຕິບັດມະຕິກອງປະຊຸມໃຫຍ່ຄັ້ງທີ 13 ຂອງພັກ. ເຮັດແນວໃດເພື່ອໃຫ້ພວກເຮົດຢຶດໝັ້ນກັບເປົ້າໝາຍ, ປົກປ້ອງຜົນປະໂຫຍດແຫ່ງຊາດ, ຊົນຊາດ, ພ້ອມກັນນັ້ນ ກໍ່ມີໄຫວພິບກ່ຽວກັບຍຸດທະສາດ ເພື່ອສົມທົບກັນຢ່າງກົມກຽວ ດ້ວຍການປະກອບສ່ວນເຂົ້າໃນຜົນປະໂຫຍດລວມຂອງມວນມະນຸດ ເພື່ອຄວາມກ້າວໜ້າ, ຄວາມຍຸຕິທຳ ແລະ ການພັດທະນາແບບຍືນຍົງ.
ທີສອງແມ່ນການສົມທົບລະຫວ່າງສາມເສົາຄ້ຳສຳຄັນຂອງການທູດເປັນຢ່າງເປັນເອກະພາບ ແລະ ແໜ້ນແຟ້ນ: ການພົວພັນຕ່າງປະເທດຂອງພັກ, ການຕ່າງປະເທດຂອງລັດ ແລະ ການທູດປະຊາຊົນ
ທີສາມແມ່ນການສະໜິດຕິດພັນລະຫວ່າງຂັ້ນສູນກາງ ແລະ ທ້ອງຖິ່ນ. ປີ 2022, ວຽກງານການທູດປະຊາຊົນ ຢູ່ບັນດາທ້ອງຖິ່ນມີຄວາມຕັ້ງໜ້າທີ່ສຸດ, ມີຫຼາຍຮູບແບບ, ວິທີການປະດິດຄິດສ້າງ, ດຶງດູດການເຂົ້າຮ່ວມຂອງປະຊາຊົນຫຼາຍຊັ້ນຄົນຈາກ ກາວບັ່ງ ໄປຍັງ ກາເມົາ.
ຕາມທ່ານແລ້ວ, ປີ 2023 ວຽກງານການທູດປະຊາຊົນຈະມີຄວາມສະດວກ ແລະ ຂໍ້ຫຍຸ້ງຍາກຫຍັງແດ່?
ປີ 2023 ໄດ້ຮັບການຄາດຄະເນວ່າ ຊ້ອນແຝງໄປດ້ວຍຄວາມຫຍຸ້ງຍາກ ແລະ ສິ່ງທ້າທາຍຫຼາຍຢ່າງ. ມີຄຳເຫັນຖືວ່າ ນີ້ແມ່ນຈຸດເວລາທີ່ມີລັກສະນະບາດລ້ຽວ, ໂລກຈະຫັນໄປຍັງສະໄໝໃໝ່. ພວກເຮົາກໍ່ຕ້ອງປະເຊີນໜ້າກັບສິ່ງທ້າທາຍນາໆປະມານຄື: ການແກ້ງແຍ້ງລະຫວ່າງບັນດາປະເທດໃຫຍ່, ການປະທະກັນຢູ່ຢູແກຼນ, ໄພເງິນເຟີ້, ວິກິດການດ້ານພະລັງງານ, ລາຄາສະບຽງອາຫານ, ລາຄາພະລັງງານທີ່ຜິດປົກກະຕິ, ຄວາມສ່ຽງວິກິດການກ່ຽວກັບອາຫານການກິນທີ່ໃຫຍ່ຫຼວງທີ່ສຸດ… ການທູດປະຊາຊົນກໍ່ຕ້ອງປະເຊີນໜ້າກັບບັນດາຄວາມຫຍຸ້ງຍາກນີ້. ປີ 2022 ເຖິງວ່າພວກເຮົາບັນລຸໄດ້ຜົນງານຫຼາຍຢ່າງ ແຕ່ການທູດປະຊາຊົນກໍ່ຍັງມີຂໍ້ຈຳກັດໃດໜຶ່ງ.
ທີໜຶ່ງ, ພວກເຮົາຍັງມີຂໍ້ຈຳກັດ ກ່ຽວກັບແຫຼ່ງກຳລັງ, ນັບທັງມະນຸດ ແລະ ວັດຖຸ. ກ່ຽວກັບຄວາມຮັບຮູ້: ບໍ່ແມ່ນທຸກແຫ່ງ, ທຸກບອ່ນ, ທຸກອົງການ ລ້ວນແຕ່ມີຄວາມຮັບຮູ້ຢ່າງເລິກເຊິ່ງກ່ຽວກັບບົດບາດຂອງການທູດປະຊາຊົນ, ກ່ຽວກັບບົດບາດໜ້າທີ່ຂອງ VUFO.
ຂ້າພະເຈົ້າຖືວ່າ ເຖິງວ່າປະສົບກັບຄວາມຫຍຸ້ງຍາກຫຼາຍຢ່າງ ແຕ່ການທູດປະຊາຊົນຍັງສືບຕໍ່ມີບັນດາບາດກ້າວເຕີບໃຫຍ່ ດ້ວຍຜົນງານໃໝ່ໃນປີ 2023.
ຕ້ອນຮັບປີໃໝ່ປີແມວ 2023, ທ່ານຢາກສົ່ງສານຫຍັງໄປຍັງພໍ່ແມ່ປະຊາຊົນຫວຽດນາມ ທີ່ອາໄສຢູ່ຕ່າງປະເທດ ແລະ ເພື່ອນມິດສາກົນ?
ພວກເຮົາຕ້ອນຮັບປີໃໝ່ປີແມວ 2023 ດ້ວຍຄວາມຫວັງຫຼາຍຢ່າງ. ຂ້າພະເຈົ້າຂໍອວຍພອນໃຫ້ພໍ່ແມ່ປະຊາຊົນຊາວຫວຽດນາມ ທີີ່ພວມດຳລົງຊີວິດ, ຮ່ຳຮຽນ ແລະ ເຮັດວຽກຢູ່ຕ່າງປະເທດ ກໍ່ຄືເພື່ອນມິດສາກົນ ມີປີໃໝ່ທີ່ມີສັນຕິພາບ, ມີຄວາມຜາສຸກ ແລະ ວັດທະນາຖາວອນ. ຫວັງວ່າປະຊາຊົນໝົດທຸກຄົນໃນໂລກ ຈະໄດ້ດຳລົງຊີວິດໃນສັນຕິພາບ ແລະ ຄວາມອີ່ມໜຳສຳລານ, ສົມບູນພູນສຸກ.
ຂໍຂອບໃຈທ່ານນາງ
ບຸນຄົງ
