ປະທານປະເທດ ຕ້ອນຮັບເອກອັກຄະລັດຖະທູດກຳປູເຈຍ ແລະສີລັງກາ ເຂົ້າຢ້ຽມອຳລາ

	ປະທານປະເທດ ຫງວຽນຊວນຟຸກ ຕ້ອນຮັບເອກອັກຄະລັດຖະທູດໂຮນລັງ, ສະວິດ ເຂົ້າຢ້ຽມອຳລາ
	ເພີ່ມທະວີການຮ່ວມມື ລະຫວ່າງ ຫວຽດນາມ ແລະສີລັງກາ

ທີ່ການຕ້ອນຮັບທ່ານເອກອັກຄະລັດຖະທູດກຳປູເຈຍ Chay Navuth, ທ່ານ ຫງວຽນຊວນຟຸກ ປະທານປະເທດຫວຽດນາມ ໄດ້ເຕື້ອງເຖິງບັນດາຜົນງານຮ່ວມມືອັນດີງາມລະຫວ່າງສອງປະເທດ; ໃນນັ້ນ, ຄວາມໄວ້ເນື້ອເຊື່ອໃຈດ້ານການເມືອງນັບມື້ນັບໄດ້ຮັບການປັບປຸງ ແລະເພີ່ມທະວີ. ສອງຝ່າຍພວມສົມທົບກັນຢ່າງມີປະສິດທິຜົນໃນບັນດາຂົງເຂດຮ່ວມມື, ໃນນັ້ນມີບັນຫາການສ້າງເສັ້ນຊາຍແດນຫວຽດນາມ-ກຳປູເຈຍ ໃຫ້ມີສັນຕິພາບ, ສະຖຽນລະພາບ, ມິດຕະພາບ ແລະການຮ່ວມມືພ້ອມກັນພັດທະນາ.

ທ່ານ ຫງວຽນຊວນຟຸກ ປະທານປະເທດຫວຽດນາມ ຕ້ອນຮັບທ່ານ Chay Navuth ເອກອັກຄະລັດຖະທູດກຳປູເຈຍ ເຂົ້າຢ້ຽມອຳລາ. ພາບ: ສຳນັກຂ່າວສານຫວຽດນາມ.

ທ່ານ ຫງວຽນຊວນຟຸກ ຊົມເຊີຍເລື່ອງສອງຝ່າຍສົມທົບກັນຈັດຕັ້ງຫຼາຍກິດຈະກຳໃນຂອບເຂດ “ປີມິດຕະພາບຫວຽດນາມ-ກຳປູເຈຍ 2022”, ພິເສດແມ່ນພິທີສະເຫຼີມສະຫຼອງ 45 ປີ “ເສັ້ນທາງມຸ່ງໄປເຖິງການໂຄ່ນລົ້ມລະບອບດັບສູນເຊື້ອຊາດປອນປົດ” ຂອງທ່ານ Hun Sen ນາຍົກລັດຖະມົນຕີກໍາປູເຈຍ ແລະພິທີສະເຫຼີມສະຫຼອງ 55 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ-ກຳປູເຈຍ ຢູ່ຮ່າໂນ້ຍ ຢ່າງສົມກຽດ.

ທ່ານ Chay Navuth ເອກອັກຄະລັດຖະທູດກໍາປູເຈຍ ສະແດງຄວາມຂອບອົກຂອບໃຈມາຍັງພັກ, ລັດ, ປະຊາຊົນຫວຽດນາມ ໄດ້ຊ່ວຍເຫຼືອກຳປູເຈຍ ຢ່າງຕັ້ງໜ້າໃນສະພາບການສຸມກຳລັງຕ້ານໂລກລະບາດ; ຢືນຢັນວ່າ ເຖິງວ່າຢູ່ໃນຖານະຕຳແໜ່ງໃດກໍ່ຕາມ, ຍາມໃດກໍ່ຈະມານະພະຍາຍາມປະກອບສ່ວນເພີ່ມພູນຄູນສ້າງການພົວພັນທີ່ເປັນມູນເຊື້ອມິດຕະພາບຫວຽດນາມ-ກຳປູເຈຍ ໃຫ້ຍິ່ງໆຂຶ້ນ.

ທ່ານ ຫງວຽນຊວນຟຸກ ປະທານປະເທດຫວຽດນາມ ຕ້ອນຮັບທ່ານ Prasanna Gamage ເອກອັກຄະລັດຖະທູດສີລັງກາ. ພາບ: ສຳນັກຂ່າວສານຫວຽດນາມ.

ຕ້ອນຮັບທ່ານ Prasanna Gamage ເອກອັກຄະລັດຖະທູດສີລັງກາ, ທ່ານປະທານປະເທດ ຫງວຽນຊວນຟຸກ ຢັ້ງຢືນວ່າ ຫວຽດນາມ ຍາມໃດກໍ່ຖືເປັນສຳຄັນການພົວພັນມິດຕະພາບທີ່ເປັນມູນເຊື້ອ ແລະການຮ່ວມມືຫຼາຍດ້ານກັບສີລັງກາ; ສະແດງຄວາມຂອບອົກຂອບໃຈ ສີລັງກາ ທີ່ໄດ້ສະໜັບສະໜູນຫວຽດນາມ ອອກສະໝັກເລືອກຕັ້ງເຂົ້າເປັນສະມາຊິກສະພາສິດທິມະນຸດ ສະຫະປະຊາຊາດ ອາຍຸການ 2023-2025 ປະສົບຜົນສໍາເລັດ.

ທ່ານ ຫງວຽນຊວນຟຸກ ສະເໜີໃຫ້ ສີລັງກາ ສືບຕໍ່ສະໜັບສະໜູນຫຼັກໝັ້ນລວມຂອງອາຊຽນ ກ່ຽວກັບບັນຫາທະເລຕາເວັນອອກ, ຮັກສາສັນຕິພາບ, ຄວາມເສລີໃນການເດີນເຮືອ ແລະການບິນ, ເຄົາລົບກົດໝາຍສາກົນ, ກົດບັດສະຫະປະຊາຊາດ ກ່ຽວກັບກົດໝາຍວ່າດ້ວຍທະເລ (UNCLOS) 1982.