| ລາຍການສິລະປະພິເສດ “ສາຍໃຈ ຫວຽດ-ລາວ” | |
| ສາຍໃຈມິດຕະພາບຜ່ານ 5 ງານບຸນມະໂຫລານມິດຕະພາບປະຊາຊົນຫວຽດນາມ - ລາວ |
ການພົວພັນເຊື່ອມຕໍ່ຫວຽດນາມ - ລາວ ໄດ້ຮັບການສ້າງຂຶ້ນ ແລະ ຫຼໍ່ຫຼອມໃນປະຫວັດສາດ. ພາຍຫຼັງວັນທີ່ສັດຕູຖືກກວາດລ້າງ, ຫວຽດນາມ ແລະ ລາວ ກ້າວໄປພ້ອມກັນ, ກ້າວຂຶ້ນສູ່ສັງຄົມນິຍົມ. ຜ່ານນັ້ນ, ການຮ່ວມມືຮອບດ້ານລະຫວ່າງສອງປະເທດກໍບັນລຸໄດ້ບັນດາຜົນງານອັນໃຫຍ່ຫຼວງ, ພັດທະນາຢ່າງບໍ່ຢຸດຢັ້ງ, ເລິກເຊິ່ງ ແລະ ກ້ວາງຂວາງໃນຫຼາຍຂົງເຂດ. ໂດຍສືບຕໍ່ລາຍການສາລະຄະດີ “ສາຍໃຈ ຫວຽດນາມ - ລາວ, ໝັ້ນຄົງກວ່າພູຜາ ກວ່າແມ່ນ້ຳ”, ລາຍການມື້ນີ້ໄດ້ອອກອາກາດບົດທີ 2 ເຊິ່ງມີຫົວຂໍ້ວ່າ “ການຮ່ວມມືຮອບດ້ານເພື່ອອະນາຄົດທີ່ໃສແຈ້ງ”.
 |
| ທ່າກໍາປັ່ນສາກົນລາວ-ຫວຽດ (ພາບ:VOV) |
ແຕ່ຕອນຮຸ່ງເຊົ້າ, ຕາມເສັ້ນທາງເຂົ້າໄປທ່າກຳປັ່ນສາກົນລາວ-ຫວຽດນາມ, ເຂດເສດຖະກິດຫວູງອ໋າງ, ເທສະບານແຂວງ ກີແອັງ, ແຂວງ ຮ່າຕິ້ງ, ຂະບວນລົດບັນທຸກທີ່ຕິດປ້າຍທະບຽນລາວໄດ້ລຽນແຖວເພື່ອລໍຖ້າເຮັດລະບຽບການຜ່ານດ່ານ. ຢູ່ທ່າກຳປັ່ນ, ຄົນງານນັບຮ້ອຍຄົນກໍາລັງສຸມໃສ່ເຮັດວຽກ, ຄ່ຽນຖ່າຍສິນຄ້າ, ເພື່ອໃຫ້ກຳປັ່ນອອກຈາກທ່າກຳປັ່ນຕາມເວລາກຳນົດ.
ຢືນຢູ່ໜຶ່ງໃນສາມສູນຕິດຕໍ່ການຄ້າທາງທະເລສາກົນຂອງຫວຽດນາມ, ທ່າກຳປັ່ນສາກົນ ລາວ-ຫວຽດນາມ ໄດ້ກາຍເປັນຂົວເຊື່ອມຕໍ່ຂອງນໍ້າໃຈມິດຕະພາບລະຫວ່າງສອງປະເທດທີ່ແຂວງ ຮ່າຕິ້ງ. ຢູ່ທີ່ນີ້, ລັດຖະບານຫວຽດນາມ ໄດ້ສ້າງເງື່ອນໄຂສະດວກເພື່ອໃຫ້ລາວ ນຳໃຊ້ທ່າກຳປັ່ນຫວູງອ໋າງເລກທີ 1, 2, ແລະ 3 ທີ່ພວມດໍາເນີນການກໍ່ສ້າງ.
ໝາກຜົນການຂົນສົ່ງສິນຄ້າຜ່ານທ່າກຳປັ່ນຫວູງອ໋າງໃນຊຸມປີຜ່ານມານີ້ ໄດ້ປະກອບສ່ວນສຳຄັນເຂົ້າໃນການພັດທະນາເສດຖະກິດພາກກາງຕອນເໜືອຂອງຫວຽດນາມ, ພ້ອມກັນນັ້ນ ກໍຍັງຊຸກຍູ້ເສດຖະກິດລາວໃຫ້ເຕີບໂຕ, “ເປີດກວ້າງເສັ້ນທາງ” ໄປສູ່ທະເລໃຫຍ່. ບັນດາສິ່ງເຫຼົ່ານັ້ນ ໄດ້ຢືນຢັນຜ່ານການແບ່ງປັນຂອງທ່ານ ຫງວຽນຈິງເກືອງ, ຮອງຜູ້ອຳນວຍການບໍລິສັດຫຸ້ນສ່ວນທ່າກຳປັ່ນສາກົນລາວຫວຽດ.
ທ່ານ ຫງວຽນຈິງເກືອງ ໃຫ້ຮູ້ວ່າ ຖ້າຫາກບໍ່ຜ່ານແດນ ໄປຫວູງອ໋າງ ຕາມປົກກະຕິສິນຄ້າຂອງລາວທີ່ຢາກຈະສົ່ງອອກໄປປະເທດທີສາມແມ່ນຕ້ອງຜ່ານໄທ. ໄລຍະຫ່າງແຕ່ລາວຫາໄທ ທຽບໃສ່ສົ່ງສິນຄ້າມາຜ່ານຫງຽດນາມ ຈະໄກກວ່າປະມານ 400 ກິໂລແມັດ. ໃນຊຸມປີມໍ່ໆມານີ້, ບໍລິສັດກໍໄດ້ມີນະໂຍບາຍໜູນຊ່ວຍ ແລະ ສ້າງເງື່ອນໄຂສະດວກໃຫ້ແກ່ລູກຄ້າທີ່ມີສິນຄ້າຈາກລາວຜ່ານແດນຫວຽດນາມ ເພື່ອສົ່ງອອກໄປຍັງປະເທດທີສາມ, ຈະບຸລິມະສິດສາງ ແລະ ເດີ່ນໃຫ້ແກ່ລູກຄ້າດັ່ງກ່າວ.
 |
| ທ່ານ ຫງວຽນຈິງເກືອງ, ຮອງຜູ້ອຳນວຍການບໍລິສັດຫຸ້ນສ່ວນທ່າກຳປັ່ນສາກົນລາວຫວຽດ (ພາບ:VOV) |
ບົນພື້ນຖານຈິດໃຈມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ, ລັດຖະບານສອງປະເທດ ຫວຽດນາມ ແລະ ລາວ ກໍໄດ້ສ້າງທຸກເງື່ອນໄຂສະດວກເພື່ອຊຸກຍູ້ການຮ່ວມມືດ້ານເສດຖະກິດຕາມທິດທາງທີ່ມີແບບມີແຜນກວ່າ. ໃນຈໍານວນສ່ວນຫຼາຍໂຄງການລົງທຶນທີ່ມີປະສິດທິຜົນ ໄດ້ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດຂອງສອງປະເທດ, Unitel ແມ່ນສັນຍາລັກແຫ່ງຜົນສຳເລັດທີ່ເປັນແບບຢ່າງ.
ໃນຖານະເປັນບໍລິສັດຮ່ວມທຸລະກິດລະຫວ່າງກຸ່ມອຸດສາຫະກໍາ ແລະ ໂທລະຄົມມະນາຄົມກອງທັບ Viettel (ຫວຽດນາມ) ແລະ ລາວ ອາຊີ ໂທລະຄົມ, Unitel ໄດ້ຮັບການສ້າງຕັ້ງຂຶ້ນໃນປີ 2008. ການເດີນທາງ 14 ປີ ວິສາຫະກິດແຫ່ງນີ້ໄດ້ສ້າງຜົນງານທີ່ປະທັບໃຈຄື ຈາກວິສາຫະກິດໂທລະຄົມມະນາຄົມທີ່ມີຂອບຂະໜາດນ້ອຍທີ່ສຸດກາຍເປັນວິສາຫະກິດໂທລະຄົມມະນາຄົມນໍາໜ້າໃນລາວ ດ້ວຍສ່ວນກວມຕະຫຼາດເຖິງ 57%. ຄຽງຂ້າງນັ້ນ, Unitel ກໍສືບຕໍ່ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມລາວ ໃນການສ້າງວຽກເຮັດງານທຳໃຫ້ຄົນງານ 27,000 ຄົນ, ເປັນບໍລິສັດຢືນອັນດັບ 2 ຢູ່ລາວໃນການເສຍພາສີ ແລະ ງົບປະມານ.
ທ່ານ ຫງວຽນຫງອກລອງ, ຮອງຜູ້ອຳນວຍການໃຫຍ່ບໍລິສັດ Unitel ໃຫ້ຮູ້ວ່າ ຊາວຫວຽດນາມ ແລະ ລາວ ທີ່ເຮັດວຽກຢູ່ບໍລິສັດລ້ວນແຕ່ປອງດອງກັນ ແລະ ຖືກັນເປັນອ້າຍນ້ອງໃນຄອບຄົວດຽວ. ການຊ່ວຍເຫຼືອຂອງປະເທດລາວແມ່ນໃຫຍ່ຫຼວງ. ພວກຂ້າພະເຈົ້າມີຄວາມສະດວກສະບາຍຫຼາຍໃນການດໍາເນີນທຸລະກິດຢູ່ໃນລາວ.
 |
| ທ່ານ ຫງວຽນຫງອກລອງ, ຮອງຜູ້ອຳນວຍການໃຫຍ່ບໍລິສັດ Unitel (ພາບ:VOV) |
ໃນການຮ່ວມມືດ້ານການຄ້າ, 10 ເດືອນປີ 2022, ວົງເງິນການຄ້າລະຫວ່າງຫວຽດນາມ - ລາວ ບັນລຸ 1,4 ຕື້ USD, ເພີ່ມຂຶ້ນ 28% ເມື່ອທຽບໃສ່ໄລຍະດຽວກັນຂອງປີກາຍ ແລະ ຄາດວ່າຈະບັນລຸ 2 ຕື້ USD ໃນປີນີ້. ຫວຽດນາມ ສືບຕໍ່ເປັນໜຶ່ງໃນສາມນັກລົງທຶນໃຫຍ່ທີ່ສຸດຢູ່ລາວ. ຕາມທ່ານ ວຽງສະຫວັນ ວິໄລພອນ, ຮອງປະທານຄະນະປະຈຳຄະນະກຳມະການຮ່ວມມື ລາວ-ຫວຽດນາມ ແລ້ວ, ເຖິງວ່າ ຖືກຜົນສະທ້ອນຢ່າງໃຫຍ່ຫຼວງຈາກໂລກລະບາດໂຄວິດ-19, ແຕ່ວ່າການຮ່ວມມືດ້ານເສດຖະກິດລະຫວ່າງສອງຝ່າຍກໍ “ແຕກດອກອອກຜົນ” ຢ່າງບໍ່ຢຸດຢັ້ງ, ເຊິ່ງເຫັນໄດ້ຢ່າງຊັດເຈນຢູ່ບາງຂົງເຂດທີ່ໂດດເດັ່ນ.
“ສ່ວນໃຫຍ່ວິສາຫະກິດຫວຽດນາມລົງທຶນເຮັດທຸລະກິດຢູ່ລາວມີປະສິດທິຜົນ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ. ການລົງທຶນຂອງຫວຽດນາມ ມາຮອດປະຈຸບັນມີທັງໝົດ 417 ໂຄງການ, ດ້ວຍຍອດມູນຄ່າການລົງທຶນແມ່ນ 4,3 ຕື້ USD. ພິເສດ, ໃນປີ 2022 ນີ້, ໄດ້ຮັບການອະນຸມັດຜ່ານ 3 ໂຄງການໃໝ່ ແລະ 3 ໂຄງການປັບປຸງທຶນຈົດບຽນດ້ວຍມູນຄ່າ 65,92 ລ້ານ USD, ເພີ່ມຂຶ້ນ 2,5 ເທົ່າເມື່ອທຽບໃສ່ໄລຍະດຽວກັນຂອງປີ 2021” - ທ່ານ ວຽງສະຫວັນ ວິໄລພອນ ໃຫ້ຮູ້ວ່າ.
ຄຽງຂ້າງການຊຸກຍູ້ທາງດ້ານການຄ້າ, ການລົງທຶນສອງຝ່າຍແລ້ວ, ການຮ່ວມມືໃນດ້ານການສຶກສາກໍຍັງເປັນຈຸດພົ້ນເດັ່ນທີ່ສຳຄັນໃນການສ້າງສາຍພົວພັນມິດຕະພາບແບບພິເສດລະຫວ່າງ ຫວຽດນາມ - ລາວ. ປະຈຸບັນ, ມີນັກສຶກສາລາວປະມານ 14.000 ຄົນພວມສຶກສາຮ່ຳຮຽນຢູ່ຫວຽດນາມ. ລັດຖະບານລາວ ກໍໄດ້ບຳລຸງສ້າງພະນັກງານ ແລະ ນັກສຶກສາຫວຽດນາມ ເກືອບ 5,000 ຄົນ ໃນໄລຍະສອງສາມທົດສະວັດຜ່ານມາ. ນີ້ແມ່ນບັນດາຕົວເລກ ສະແດງໃຫ້ເຫັນຄວາມມານະພະຍາຍາມ, ຄວາມຕັດສິນໃຈ ແລະ ມີຄວາມໝາຍສຳຄັນໃນການຮ່ວມມືດ້ານການສຶກສາລະຫວ່າງສອງປະເທດ.
ຢູ່ມະຫາວິທະຍາໄລວິງ, ແຂວງ ເຫງະອານ, ເຊິ່ງເປັນຖິ່ນກໍາເນີດທີ່ມີມູນເຊື້ອມາແຕ່ດົນນານກ່ຽວກັບການບໍາລຸງສ້າງນັກສຶກສາລາວ, ບັນດາກິດຈະກໍາພົວພັນແລກປ່ຽນວັດທະນະທຳທີ່ເຕັມໄປດ້ວຍນໍ້າໃຈມິດຕະພາບ ໄດ້ດຳເນີນຢ່າງເປັນປະຈໍາ. ສະຖານທີ່ແຫ່ງນີ້ໄດ້ກາຍເປັນບ່ອນທີ່ໃຫ້ນັກສຶກສາຫວຽດນາມ - ລາວ ພ້ອມກັນສຶກສາຮ່ຳຮຽນ, ແບ່ງປັນ, ແກ້ໄຂຄວາມຫຍຸ້ງຍາກ ແລະ ແລກປ່ຽນບັນດາບັນຫາໃນຊີວິດປະຈໍາວັນ. ພາຍໃຕ້ໂຮງຮຽນແຫ່ງນີ້, ບັນດາສະໂມສອນດອກຈຳປາ, ສະໂມສອນພາສາຫວຽດ ໄດ້ສ້າງຕັ້ງ ເພື່ອສ້າງບ່ອນຫຼິ້ນ ແລະ ພົບປະແລກປ່ຽນວັດທະນະທຳທີ່ມີຄວາມໝາຍ, ໜູນຊ່ວຍຢ່າງຕັ້ງໜ້າໃຫ້ແກ່ນັກສຶກສາລາວໃນໄລຍະສຶກສາຮໍ່າຮຽນຢູ່ໂຮງຮຽນ.
 |
| ທ່າກໍາປັ່ນສາກົນລາວ-ຫວຽດ (ພາບ:VOV) |
ທ່ານ ສີວອນຣຶ ບຸນທະວີ, ນັກສຶກຄົ້ນຄວ້າຂອງມະຫາວິທະຍາໄລວິງ ແບ່ງປັນວ່າ: “13 ປີແຫ່ງການສຶກສາຮ່ຳຮຽນຢູ່ມະຫາວິທະຍາໄລວິງທີ່ອົບອຸ່ນ, ຂ້າພະເຈົ້າເອງຍາມໃດກໍໄດ້ຮັບການຊ່ວຍເຫຼືອຈາກໂຮງຮຽນ, ການໜູນຊ່ວຍຢ່າງຈິງໃຈຈາກໝູ່ເພື່ອນຫວຽດນາມ ຢູ່ມະຫາວິທະຍາໄລວິງ, ໂດຍສະເພາະແມ່ນໄດ້ຮັບການຊ່ວຍເຫຼືອຈາກບັນດາສະໂມສອນ".
ການສືບທອດມູນເຊື້ອມິດຕະພາບອັນດີງາມທີ່ໄດ້ສ້າງຂຶ້ນໃນ 60 ປີຜ່ານມາ, ໄດ້ມີຫຼາຍຮູບແບບ, ວິທີເຮັດທີ່ດີ , ຮັດແໜ້ນຄວາມສາມັກຄີ ແລະ ການຮ່ວມມືເພື່ອພັດທະນາຮ່ວມກັນ, ເປັນແບບຢ່າງແມ່ນຮູບການແຮກສ່ຽວບ້ານ-ບ້ານລະຫວ່າງ 10 ແຂວງຂອງລາວທີ່ມີເສັ້ນຊາຍແດນຕິດຈອດກັນກັບ 10 ແຂວງຂອງຫວຽດນາມ. ການແຮກສ່ຽວຍັງໄດ້ແຜ່ກະຈາຍອອກຢ່າງກວ້າງຂວາງໃນລະຫວ່າງບັນດາແຂວງ, ນະຄອນທີ່ບໍ່ມີຊາຍແດນຮ່ວມກັນ. ການເຄື່ອນໄຫວດັ່ງກ່າວໄດ້ປະກອບສ່ວນຊຸກຍູ້ການຮ່ວມມືໃນບັນດາຂົງເຂດຄື: ເສດຖະກິດ, ການຄ້າ, ການລົງທຶນ, ການທ່ອງທ່ຽວ, ວັດທະນະທຳ, ການສຶກສາ, ສາທາລະນະສຸກ ແລະ ການປ້ອງກັນປະເທດຊາດ.
ສອງຝ່າຍສົມທົບກັນເປັນຢ່າງດີໃນການເຄື່ອນໄຫວວຽກງານໂຄສະນາໃຫ້ແກ່ພະນັກງານ, ປະຊາຊົນກ່ຽວກັບມູນເຊື້ອຄວາມສາມັກຄີ, ນໍ້າໃຈມິດຕະພາບພິເສດຫວຽດນາມ - ລາວ, ພ້ອມກັນປະຕິບັດສັນຍາວ່າດ້ວຍຂໍ້ກຳນົດກົດລະບຽບຊາຍແດນແຫ່ງຊາດເປັນຢ່າງດີ, ເປັນເອກະພາບນະໂຍບາຍ, ວິທີການເພື່ອແນໃສ່ທັບມ້າງກົນອຸບາຍຂອງພວກສັດຕູ ປະກອບສ່ວນເຂົ້າໃນການຮັກສາຄວາມໝັ້ນຄົງດ້ານການເມືອງ, ສະພາບແວດລ້ອມແຫ່ງສັນຕິພາບ, ມິດຕະພາບ, ສະຖຽນລະພາບ, ການຮ່ວມມື ແລະ ການພັດທະນາແບບຍືນຍົງ.
ທ່ານ ຟ້ມຫງອກແກ໊ງ, ຮອງຫົວໜ້າພະແນກໂຄສະນາສຶກສາແຂວງ ເຫງະອານ ໃຫ້ຮູ້ວ່າ ຈາກການແຮກສ່ຽວນັ້ນ ປະຊາຊົນຂອງສອງປະເທດໄດ້ມີຄວາມເຂົ້າໃຈກັນດີກ່ວາອີກ, ພ້ອມກັນເພື່ອເປົ້າໝາຍລວມແມ່ນນໍ້າໃຈມິດຕະພາບຂອງສອງປະເທດ. ກ່ອນການແຜ່ລະບາດໂຄວິດ-19, ເຫງະອານໄດ້ຈັດຕັ້ງບັນດາໜ່ວຍງານອາສາສະໝັກ ໂດຍການເຂົ້າຮ່ວມຂອງປະເທດເພື່ອນລາວຄື ສອນພາສາຫວຽດນາມ, ກວດກາ ແລະ ປິ່ນປົວພະຍາດ ແລະ ມີບາງຮູບການພັດທະນາເສດຖະກິດ. ຈາກຕົວຈິງນັ້ນ, ເປັນທີ່ແນ່ນອນວ່ານໍ້າໃຈລະຫວ່າງປະຊາຊົນສອງປະເທດຊາດຈະມີຄວາມສະໜິດແໜ້ນກວ່າ ແລະ ມີຄວາມຮັບຜິດຊອບນຳກັນໃນການພັດທະນາ”.
ທຸກໆບາດກ້າວໄປຂອງສອງປະເທດຊາດໃນທຸກວັນນີ້ ລ້ວນແຕ່ໄດ້ຮັບຮູ້ເຖິງການປະກອບສ່ວນຢ່່າງຕັ້ງໜ້າຂອງສອງຝ່າຍ, ເຮັດໃຫ້ການພົວພັນແບບພິເສດຫວຽດນາມ - ລາວ ນັບມື້ນັບສະໜິດຕິດແໜ້້ນ. ກົງກັບຄຳອະທິຖານທີ່ພິທີບາສີສູ່ຂວັນໃນໂອກາດແຮກສ່ຽວ ຫວຽດນາມ - ລາວ:
“ໄດ້ຮັກກັນແລ້ວ, ບັດນີ້ເຮົາມັດແຂນ
ເສັ້ນຝ້າຍນີ້ ຮັດແໜ້ນສາຍໃຈລາວ-ຫວຽດ
ເສັ້ນຝ້າຍນີ້ແທນຄໍາອະທິຖານ
ຂໍໃຫ້ມີຄວາມສະຫງົບສຸກ, ຂໍໃຫ້ມີຄວາມຜາສຸກ.... ອ້າຍນ້ອງເຮີ້ຍ”.
ຫອມມາລາ
