| ແງ່ຫວັງພົ້ນເດັ່ນໃນການຮ່ວມມືດ້ານທ່ອງທ່ຽວລະຫວ່າງຫວຽດນາມ ແລະ ອິນເດຍ | |
| ນຳການພົວພັນຄູ່ຮ່ວມມື ແລະ ຮ່ວມມືຍຸດທະສາດ ຫວຽດນາມ - ຝລັ່ງ ໄປສູ່ໄລຍະພັດທະນາໃໝ່ |
 |
| ທ່ານ ຫງວຽນວັນເນັນ ກຳມະການກົມການເມືອງ, ເລຂາຄະນະພັກນະຄອນ ໂຮ່ຈີມິນ ພົບປະກັບທ່ານຮອງນາຍົກລັດຖະມົນຕີ ສອນໄຊ ສີພັນດອນ (ພາບ: TTXVN) |
ຫວ່າງແລ້ວນີ້, ທ່ານ ຫງວຽນວັນເນັນ ກຳມະການກົມການເມືອງ, ເລຂາຄະນະພັກນະຄອນ ໂຮ່ຈີມິນ ໄດ້ມີການພົບປະກັບທ່ານຮອງນາຍົກລັດຖະມົນຕີ ສອນໄຊ ສີພັນດອນ ພ້ອມກັບຄະນະຜູ້ແທນ ທີ່ພວມມີການຢ້ຽມຢາມ ແລະ ເຮັດວຽກຢູ່ ຫວຽດນາມ.
ທີ່ການພົບປະ, ທ່ານ ຫງວຽນວັນເນັນ ສະແດງຄວາມປະຕິຊົມຊື່ນເມື່ອໄດ້ຕ້ອນຮັບທ່ານຮອງນາຍົກລັດຖະມົນຕີລາວ ສອນໄຊ ສີພັນດອນ, ທ່ານເນັ້ນໜັກວ່າ ການພົວພັນຕ່າງປະເທດ, ການພົວພັນທີ່ເປັນມູນເຊື້ອອັນດີງາມລະຫວ່າງປະຊາຊົນສອງປະເທດ ຫວຽດນາມ - ລາວໄດ້ຜ່ານຜ່າຄວາມຫຍຸ້ງຍາກ, ສິ່ງທ້າທາຍຫຼາຍຢ່າງເພື່ອກາຍເປັນການພົວພັນແບບຢ່າງ, ຈົງຮັກພັກດີ ທີ່ຫາຍາກ. ພິເສດ, ພາຍຫຼັງສອງປະເທດເຊັນສົນທິສັນຍາມິດຕະພາບ ແລະ ການຮ່ວມມື (ປີ 1977), ການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ - ຫວຽດນາມ ສືບຕໍ່ໄດ້ຮັບການເພີ່ມພູນຄູນສ້າງ, ເສີມຂະຫຍາຍ, ນັບມື້ນັບນຳມາເຊິ່ງຜົນປະໂຫຍດທີ່ແທດຈິງມາໃຫ້ປະຊາຊົນສອງປະເທດ.
ທ່ານ ຫງວຽນວັນເນັນ ເລຂາຄະນະພັກນະຄອນ ໄດ້ຕີລາຄາສູງ ບັນດາໂຄງການຮ່ວມມືລະຫວ່າງນະຄອນໂຮ່ຈີມິນ ແລະ ບັນດາທ້ອງຖິ່ນ ລາວ, ເປັນຕົ້ນແມ່ນເວທີປາໄສການຄ້າ ແລະ ການລົງທຶນ ຫວຽດນາມ - ລາວຢູ່ນະຄອນໂຮ່ຈີມິນ ໂດຍຄະນະກຳມະການປະຊາຊົນນະຄອນ ສົມທົບກັບສະຖານກົງສູນ ສປປ.ລາວ ປະຈຳ ນະຄອນໂຮ່ຈິມິນຈັດຂຶ້ນໃນຫວ່າງແລ້ວນີ້. ຜ່ານນັ້ນກໍສະແດງໃຫ້ເຫັນວ່າ ຫວຽດນາມ - ລາວມີຄວາມສາມາດບົ່ມຊ້ອນຫຼາຍຢ່າງໃນການຮ່ວມມືດ້ານການຄ້າ ແລະ ການລົງທຶນ, ພິເສດ ລາວຈະແມ່ນສະຖານທີ່ລົງທຶນທີ່ມີຄວາມສາມາດບົ່ມຊ້ອນຫຼາຍຢ່າງໃນຫຼາຍຂົງເຂດໃຫ້ແກ່ວິສາຫະກິດ ຫວຽດນາມ ໃນໄລຍະຈະມາເຖິງ.
ໂດຍສະແດງຄວາມເຄົາລົບຕໍ່ບັນດາຄວາມມານະພະຍາຍາມຂອງລັດຖະບານລາວ, ທ່ານເລຂາຄະນະພັກນະຄອນ ຫງວຽນວັນເນັນ ແບ່ງປັນວ່າ ທ່ານຮູ້ໄດ້ເຖິງບັນດາຄວາມຫຍຸ້ງຍາກຂອງບັນດາທ້ອງຖິ່ນ ກໍ່ຄືບັນດາວິສາຫະກິດ, ນັກລົງທຶນລາວ ທີ່ໄດ້ຜັນຂະຫຍາຍຫຼາຍການເຄື່ອນໄຫວຮ່ວມມືເສດຖະກິດ, ດຶງດູດການລົງທຶນ, ປະກອບສ່ວນຊຸກຍູ້ການພົວພັນສອງປະເທດໃຫ້ນັບມື້ນັບພັດທະນາວັດທະນາຖາວອນ, ພ້ອມທັງເນັ້ນໜັກວ່າ ການເຊັນບັນດາບົດບັນທຶກຊ່ວຍຈຳ, ສັນຍາເສດຖະກິດແມ່ນບາດກ້າວເບື້ອງຕົນເພື່ອວາງອອກບັນດາແຜນການໃໝ່ ແລະ ລະອຽດ ແລະ ມີປະສິດທິຜົນກ່ວາ ບົນຈິດໃຈເວົ້າໄປຄຽງຄູ່ກັບການກະທຳ - ຕ້ອງກະທຳຢ່າງມີປະສິດທິຜົນ ຄືຄວາມຫວັງຂອງນາຍົກລັດຖະມົນຕີ ສອງປະເທດ.
ນະຄອນໂຮ່ຈີມິນ ແມ່ນທ້ອງຖິ່ນນຳໜ້າດ້ານເສດຖະກິດຂອງທົ່ວປະເທດ, ບັນດາວິສາຫະກິດ, ປະຊາຊົນນະຄອນຍາມໃດກໍ່ມີຄວາມຂະຫຍັນຂັນເຄື່ອນ, ປະດິດສ້າງ, ກ້າຄິດກ້າທຳ ແລະ ຍາມໃດກໍ່ມານະພະຍາຍາມຜ່ານຜ່າຄວາມຫຍຸ້ງຍາກ, ສິ່ງທ້າທາຍ. ດັ່ງນັ້ນພວກເຮົາຕ້ອງເຮັດສິ່ງທີ່ດີທີ່ສຸດ, ວຽກງານທີ່ຈຳເປັນທີ່ສຸດ, ສ້າງເງື່ອນໄຂດີທີ່ສຸດເພື່ອໃຫ້ປະຊາຊົນ, ວິສາຫະກິດ, ນັກລົງທຶນສອງປະເທດພົບປະແລກປ່ຽນ, ເຊື່ອມຕໍ່, ທຳມາຫາກິນ, ສົ່ງເສີມການລົງທຶນຢ່າງມີປະສິດທິຜົນຢູ່ບັນດາທ້ອງຖິ່ນ. ທ່ານ ຫງວຽນວັນເນັນ ເນັ້ນໜັກ.
ສ່ວນທ່ານຮອງນາຍົກລັດຖະມົນຕີ ລາວ ສອນໄຊ ສີພັນດອນ ສະແດງຄວາມປະທັບໃຈ, ຕີລາຄາສູງບັນດາວິສາຫະກິດ, ນັກລົງທຶນ ຫວຽດນາມ ໃນການເຄື່ອນໄຫວຜະລິດທຸລະກິດ, ຄວາມເອົາໃຈໃສ່ຂອງອົງການປົກຄອງນະຄອນໂຮ່ຈີມິນທຸກຂັ້ນໃນການລົງທຶນ, ພັດທະນາບັນດາເຂດຕົວເມືອງໃໝ່ຢູ່ບັນດາທ້ອງຖິ່ນ, ເປັນຕົ້ນແມ່ນນະຄອນ ຖູດຶກ. ການເຊື່ອມຕໍ່ບັນດາຮາກຖານພື້ນຖານໂຄງລ່າງນັບແຕ່ຂັ້ນຕົວເມືອງ, ການຄ້າ, ສວນສາທາລະນະ, ຄົມມະນາຄົມເຂດຕົວເມືອງ, ເຕັກໂນໂລຢີຂໍ້ມູນຂ່າວສານ… ໄດ້ສະແດງໃຫ້ເຫັນຄວາມຂະຫຍັນຂັນເຄື່ອນ, ຄວາມຫ້າວຫັນຂອງນະຄອນ, ປະກອບສ່ວນສ້າງຄວາມວັດທະນາຖາວອນ, ຄວາມຜາສຸກໃຫ້ປະຊາຊົນ.
ບຸນຄົງ
