ໃນລາຍການຢ້ຽມຢາມລາຊະອານາຈັກ ໂຮນລັງ ຢ່າງເປັນທາງການ, ຕອນເຊົ້າວັນທີ 12 ທັນວາ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ໄດ້ໄປຢ້ຽມຢາມສູນສວນສາກົນ ຢູ່ແຂວງພາກໃຕ້ ໂຮນລັງ. ນີ້ແມ່ນໜ່ວຍປະສົມແບບຢ່າງ ກ່ຽວກັບການເຊື່ອມຕໍ່ຕາມຮູບແບບ “ສາມຫຼ່ຽມຄຳ” ລະຫວ່າງລັດຖະບານ-ຮາກຖານຄົ້ນຄ້ວາ-ວິສາຫະກິດ. ທ່ານນາຍົກລັດຖະມົນຕີ ຟ້າມມິງຈິງ ຖືວ່າ, ໃນການຮ່ວມມືດ້ານກະສິກຳ, ໂຮນລັງ ສາມາດຊ່ວຍ ຫວຽດນາມ ດ້ານເຕັກໂນໂລຊີປຸ້ງແຕ່ງ, ຕະຫຼາດ, ບັນດາຜະລິດຕະພັນທີ່ເໝາະສົມກັບຄວາມຕ້ອງການໃຊ້ສອຍໃນໂລກ. ສ່ວນ ຫວຽດນາມ ສາມາດຊ່ວຍ ໂຮນລັງ ກ່ຽວກັບການພັດທະນາວັດຖຸດິບ. ຜ່ານນັ້ນ, ສອງຝ່າຍລ້ວນແຕ່ສາມາດເປີດກ້ວາງຕະຫຼາດໃຫ້ແກ່ກັນ.
 |
| (ພາບ: Dương Giang/TTXVN) |
ທ່ານນາຍົກລັດຖະມົນຕີ ຟ້າມມິງຈິງ ປາດຖະໜາວ່າ ໂຮນລັງ ສືບຕໍ່ໜູນຊ່ວຍດ້ານເຕັກນິກ ແລະ ລະດົມແຫ່ລງກຳລັງຕື່ມອີກ ຈາກບັນດານັກລົງທຶນ, ນັກອຸປະຖຳ, ຄູ່ຮ່ວມມືພັດທະນາໃຫ້ແກ່ ຫວຽດນາມ, ໂດຍສະເພາະແມ່ນຢູ່ເຂດທົ່ງພຽງແມ່ນ້ຳຂອງທາງພາກໃຕ້; ສືບຕໍ່ໜູນຊ່ວຍດ້ານເຕັກນິກໃຫ້ບັນດາອົງການຄຸ້ມຄອງ, ຄົນຄ້ວາ ແລະ ບຳລຸງສ້າງ ຫວຽດນາມ ເພື່ອເພີ່ມທະວີຄວາມສາມາດໃນການຫັນເປັນດີຕີຕອນໃນຂະແໜງກະສິກຳ.
ທຸກໆປີ, ສູນສວນໂລກໄດ້ຕ້ອນຮັບແຂກສາກົນ ແລະ ຜູ້ຊ່ຽວຊານປະມານ 30,000 ຄົນມາຢ້ຽມຢາມ, ຮຽນຮູ້, ແບ່ງປັນປະສົບການ, ປະດິດສ້າງໃນອຸດສາຫະກຳພືດສວນ ແລະ ເຂົ້າຮ່ວມງານວາງສະແດງ.
ນີ້ກໍ່ແມ່ນບ່ອນທີ່ 130 ວິສາຫະກິດນຳໜ້າໃນຂະແໜງກະສິກຳໄດ້ເຕົ້າໂຮມ, ວາງສະແດງ ແລະ ແລກປ່ຽນກັບບັນດາຜະລິດຕະພັນທີ່ທັນສະໄໝດ້ວຍກົນຈັກອັດຕະໂນມັດ, ລະບົບລະບາຍອາກາດ, ລະບົບຄຸ້ມຄອງນ້ຳ ແລະ ຄວາມຊຸ່ມຊື່ນ, ອຸນຫະພູມໃນເຮືອນແກ້ວເຖິງບັນດາຜະລິດຕະພັນເຊັ່ນ: ຟິມປ້ອງກັນພືດ, ຕາໜ່າງ. ການສະກັດແສງສະຫວ່າງໃນເຮືອນແກ້ວ, ແນວພັນພືດ, ຝຸ່ນຊີວະພາບ ...
ນອກຈາກນັ້ນ, ສູນດັ່ງກ່າວຍັງມີພື້ນທີ່ຄົ້ນຄວ້າທີ່ທັນສະໄໝ ມີ 40 ຫ້ອງທົດລອງ, ເຊິ່ງມີນັກຄົ້ນຄວ້າ, ຜູ້ປະກອບການ ແລະ ສະຖາບັນການສຶກສາຕ່າງໆ ດໍາເນີນການຄົ້ນຄວ້າຮ່ວມກັນ.
ວີໂອວີ
