ທ່ານນາງ ສີວິໄຊ ທຳມະລັງສີ ອຳນວຍການລາວອິນເຕີຄລີນິກ ໃຫ້ສຳພາດວັນທີ 21 ພຶດສະພາ 2019 ວ່າ: ກິດຈະກຳແບບນີ້ໄດ້ຈັດຂຶ້ນມາຫຼາຍປີ ເພື່ອເປັນການສົ່ງເສີມສຸຂະພາບຂອງປະຊາຊົນ ໂດຍຄລີນິກພວກເຮົາໄດ້ມີສ່ວນຮ່ວມ ແລະ ເປັນສ່ວນໜຶ່ງຊ່ວຍພັກ-ລັດ ໂດຍສະເພາະ ກະຊວງສາທາລະນະສຸກ ໃນການປິ່ນປົວຄົນເຈັບມາຕະຫຼອດ. ເຊິ່ງໃນໂອກາດວັນກຳມະກອນ 1 ພຶດສະພາ 2019 ກໍໄດ້ຈັດກິດຈະກຳກວດສຸຂະພາບໂດຍບໍ່ເສຍຄ່າໃຫ້ພະນັກງານ ທະຫານ ຕຳຫຼວດ ແລະ ປະຊາຊົນ ມີຜູ້ເຂົ້າມາກວດຫຼາຍກວ່າ 200 ຄົນ.
 |
ທ່ານນາງ ສີວິໄຊ ທຳມະລັງສີ - ອຳນວຍການລາວອິນເຕີຄລີນິກ. (ພາບ: vientianemai)
ໃນໂອກາດວັນເດັກນ້ອຍສາກົນທີ່ຈະມາເຖິງນີ້ ລາວອິນເຕີຄລີນິກ ກໍໄດ້ສືບຕໍ່ຈັດກິດຈະກຳກວດສຸຂະພາບໂດຍບໍ່ເສຍຄ່າໃຫ້ນັກຮຽນຕື່ມອີກ ເຊິ່ງການກວດສຸຂະພາບແມ່ນຈະກວດດ້ວຍເຄື່ອງຄອມພິວເຕີທີ່ທັນສະໄໝຮູ້ຜົນກວດທັນທີ ດັ່ງນັ້ນ ລາວອິນເຕີຄລີນິກ ຈຶ່ງແຈ້ງມາຍັງນັກຮຽນທີ່ມີອາຍຸແຕ່ 8-18 ປີ ຜູ້ທີ່ມີຄວາມສົນໃຈຢາກມາກວດສຸຂະພາບຂອງຕົນ ກໍໃຫ້ມາລົງທະບຽນນັບແຕ່ນີ້ເປັນຕົ້ນໄປ ສ່ວນມື້ກວດສຸຂະພາບແມ່ນວັນທີ 1 ມິຖຸນາ 2019 ເລີ່ມແຕ່ເວລາ 8-16:00 ໂມງ ເຊິ່ງສະຖານທີ່ຄລີນິກແມ່ນຕັ້ງຢູ່ຖະໜົນມິດຕະພາບລາວ-ໄທ ບ້ານສະພານທອງເໜືອ ເມືອງສີສັດຕະນາກ ນະຄອນຫຼວງວຽງຈັນ.
（ແຫຼ່ງຂໍ້ມູນ： vientianemai.net）
