 |
ກອງປະຊຸມອົງການປົກຄອງນະຄອນຫຼວງວຽງຈັນ (ນວ) ຄັ້ງທີ 28 ຈັດຂຶ້ນວັນທີ 28-29 ມັງກອນ 2020.(ພາບ: vientianemai.net)
ກອງປະຊຸມໄດ້ຮັບຟັງລາຍງານ ແລະ ພິຈາລະນາໃຫ້ທິດຊີ້ນຳກ່ຽວກັບບັນຫາຕ່າງໆຂອງ ນວ ເປັນຕົ້ນ: ການຈັດຕັ້ງປະຕິບັດຮ່າງຂໍ້ຕົກລົງວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງ ຄົມ ແລະ ງົບປະມານປະຈຳປີ 2020 ຈາກທ່ານຫົວໜ້າພະແນກແຜນການ ແລະ ການລົງທຶນ ພະແນກການເງິນ ນວ ແລະ ການລາຍງານເພີ່ມເຕີມຂອງ 9 ຕົວເມືອງ ຂະແໜງສ່ວຍສາອາກອນ ກອງຄຸ້ມຄອງພາສີເຂດ V ແລະ ຄັງເງິນປະຈຳ ນວ ໃຫ້ທິດຊີ້ນຳກ່ຽວກັບແຜນການປະດັບປະດາຕົວເມືອງ ກະກຽມໃຫ້ແກ່ການສະເຫຼີມສະຫຼອງວັນບຸນໃຫຍ່ຂອງຊາດປີ 2020 ພິຈາລະນາໃຫ້ທິດຊີ້ນຳໂຄງການສ້ອມແປງທາງແຕ່ຫຼັກ 21 ຫາເຂດກວມລວມໄຊເສດຖາຫາ ເສັ້ນທາງ 450 ປີ ແລະ ເສັ້ນ ທາງເລກທີ 13 ໃຕ້ຫາບ້ານປາກກວາງ ເມືອງປາກງື່ມ ການກຳນົດແຜນຜັງ ແລະ ການພັດທະນາມໍ ລະດົກພະທາດຫຼວງ-ສະໜາມຫຼວງ ແລະ ສະພາບການແກ້ໄຂບັນຫາລາຄາຊີ້ນໝູເໜັງຕີງປັບຂຶ້ນຢູ່ ນວ ການກະກຽມຄວາມພ້ອມເຂົ້າຮ່ວມງານມະຫະກຳກີລາແຫ່ງຊາດ ຄັ້ງທີ XI ຢູ່ແຂວງຊຽງຂວາງ ແລະ ໃຫ້ທິດຊີ້ນຳກ່ຽວກັບການຄຸ້ມຄອງອອກອະນຸຍາດ ແລະ ກວດກາແກ້ໄຂບັນຫາຫຍໍ້ທໍ້ໃນຮ້ານອິນເຕີເນັດກາເຟ ການພິຈາລະນາກຳນົດເອົາ 300 ບ້ານ ເປັນບ້ານເປົ້າໝາຍສະອາດ ແລະ ການກຳ ຈັດຂີ້ເຫຍື້ອ ການຈັດຕັ້ງປະຕິບັດຮ່າງຂໍ້ຕົກລົງວ່າດ້ວຍການປະສານງານລະຫວ່າງບັນດາພະແນກການ ອົງການລັດທຽບເທົ່າພະແນກການ ແລະ ອົງການປົກຄອງຂັ້ນເມືອງກັບຫ້ອງວ່າການ ນວ.
ກອງປະຊຸມສະໄໝສາມັນ ເທື່ອທີ 8 ສະພາປະຊາຊົນ ນະຄອນຫຼວງວຽງຈັນ (ສປ ນວ) ຊຸດທີ I ດຳເນີນມາເປັນເວລາ 5 ວັນ ເຖິງວັນທີ 24 ມັງກອນ 2020 ຈຶ່ງໄດ້ອັດລົງດ້ວຍຜົນສຳເລັດຈົບງາມ ຢູ່ ຫ້ອງວ່າການປົກຄອງ ນວ ໂດຍການເປັນປະທານຂອງທ່ານ ອານຸພາບ ຕຸນາລົມ ປະທານ ສປ ນວ ໂດຍມີທ່ານ ສິນລະວົງ ຄຸດໄພທູນ ເຈົ້າຄອງ ນວ ພ້ອມດ້ວຍການນຳ ນວ ສະມາຊິກສະພາແຫ່ງຊາດ (ສສຊ) ສະມາຊິກສະພາປະຊາຊົນ ນະຄອນຫຼວງວຽງຈັນ (ສສ ນວ) ເຂົ້າຮ່ວມ. ທ່ານ ອານຸພາບ ຕຸນາລົມ ກ່າວອັດກອງປະຊຸມວ່າ: ກອງປະຊຸມຄັ້ງນີ້ ໄດ້ຮັບຮອງເອົາບົດລາຍງານຂອງທ່ານເຈົ້າຄອງ ນວ ກ່ຽວກັບຜົນຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຜນງົບ ປະມານປີ 2019 ແລະ ທິດທາງປີ 2020 ເຊິ່ງຕີລາຄາສູງຕໍ່ຄວາມພະຍາຍາມຂອງອົງການປົກຄອງ ໃນການຊີ້ນຳ-ນຳພາ ບັນດາພະແນກການ ອົງການ ໃນການສູ້ຊົນຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ ແລະ ແຜນງົບປະມານປີ 2019 ໄດ້ຮັບຜົນສຳເລັດຫຼາຍດ້ານ ເຮັດໃຫ້ ນວ ສືບຕໍ່ມີສະຖຽນລະພາບດ້ານການເມືອງ ສັງຄົມມີຄວາມສະຫງົບໂດຍພື້ນຖານ ຊີວິດການເປັນຢູ່ຂອງປະຊາຊົນໄດ້ຮັບການຍົກລະດັບດີຂຶ້ນເປັນກ້າວໆ ຄຽງຄູ່ກັນນີ້ ກອງປະຊຸມຍັງໄດ້ປະກອບຄຳເຫັນຢ່າງກົງໄປກົງມາຕໍ່ບັນຫາຂໍ້ຄົງຄ້າງ ສິ່ງທ້າທາຍ ແລະ ອຸດຕັນ ໃນການຄຸ້ມຄອງບໍລິຫານລັດ ດ້ານເສດຖະກິດ-ສັງຄົມ ພ້ອມທັງສະເໜີຫຼາຍມາດຕະການ ແລະ ວິທີແກ້ໄຂຕົວຈິງ ເພື່ອສູ້ຊົນຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມ ແລະ ແຜນງົບປະມານປີ 2020 ໃຫ້ບັນລຸຕາມຄາດໝາຍທີ່ວາງໄວ້ ນອກນີ້ ຍັງໄດ້ຮັບຮອງເອົາບົດລາຍງານຜົນການເຄື່ອນໄຫວວຽກງານ ປີ 2019 ແລະ ທິດທາງ ປີ 2020 ຂອງອົງການກວດສອບປະຈຳພາກກາງ ບົດລາຍງານຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານ ປີ 2018 ຂອງ ນວ ໂດຍໄດ້ສະແດງຄວາມຊົມເຊີຍອົງການດັ່ງກ່າວ ທີ່ພະຍາຍາມກວດສອບ ແລະ ສາມາດລາຍງານຜົນຂອງການກວດສອບ ເຊິ່ງໄດ້ສະເໜີຕໍ່ອົງການປົກຄອງ ໂດຍສະເພາະ ພະ ແນກການເອົາໃຈໃສ່ຊີ້ນຳ ແລະ ຊຸກຍູ້ ແກ້ໄຂຜົນການກວດສອບ ຕາມມະຕິກອງປະຊຸມສະພາຄັ້ງນີ້ ໃຫ້ເປັນຮູບປະທຳ ແນໃສ່ສະກັດກັ້ນປາກົດການຫຍໍ້ທໍ້ ໃນການລະເມີດວິໄນແຜນການ-ວິໄນການເງິນ ແລະ ກົດໝາຍໃຫ້ຫຼຸດລົງ.
（ໄຊພອນ）
