 |
| ມີຜູ້ແທນເປັນຈຳນວນຫຼວງຫຼາຍເຂົ້າຮ່ວມງານມະໂຫລານ |
ລະອຽດ:
ທີໜຶ່ງແມ່ນ: ສືບຕໍ່ຈັດຕັ້ງການເຄື່ອນໄຫວທີ່ຫຼາກຫຼາຍ ແລະ ອຸດົມສົມບູນ, ມີເນື້ອໃນທີ່ເລິກເຊິ່ງ; ຍູ້ແຮງວຽກງານໂຄສະນາ, ສຶກສາ ແລະ ຂົນຂວາຍປະຊາຊົນທຸກຊັ້ນວັນນະຂອງສອງປະເທດ ປະກອບສ່ວນຊຸກຍູ້ ແລະ ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງປະເທດ.
ທີສອງແມ່ນ: ສະມາຄົມມິດຕະພາບ ລາວ - ຫວຽດນາມ ແລະ ສະມາຄົມມິດຕະພາບ ຫວຽດນາມ - ລາວ ສົມທົບກັນໃນວຽກງານການສຶກສາ, ສະໜອງຂໍ້ມູນຂ່າວສານໃຫ້ແກ່ປະຊາຊົນສອງປະເທດ, ພິເສດແມ່ນຊາວໜຸ່ມ, ເຍົາວະຊົນ ແລະ ຄົນລຸ້ນຫຼັງໄດ້ເຂົ້າໃຈແຈ້ງ ແລະ ເລິກເຊິ່ງກວ່າກ່ຽວກັບມູນເຊື້ອອັນບໍລິສຸດຜຸດຜ່ອງ, ຊື່ສັດ ແລະ ຫາຍາກໃນໂລກ ໂດຍ ທ່ານປະທານ ໂຮ່ຈິມິນ, ປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່ແສນເຄົາລົບຮັກ ໄດ້ກໍ່ສ້າງ ແລະ ເພີ່ມພູນຄູນສ້າງ, ຈາກສິ່ງດັ່ງກ່າວນັ້ນ ກໍມີຄວາມຮັບຮູ້, ເປັນເຈົ້າການໃນການຮັກສາ ແລະ ສືບຕໍ່ປັບປຸງການພົວພັນໃຫ້ນັບມື້ນັບຂຽວສົດງົດງາມ, ແຕກດອກອອກຜົນ.
ທີສາມແມ່ນ: ສືບຕໍ່ສະໜັບສະໜູນ ແລະ ຊຸກຍູ້ບັນດາກະຊວງ, ອົງການ, ຂະແໜງການ, ນັກທຸລະກິດ ແລະ ປະຊາຊົນທຸກຊັ້ນວັນນະຂອງ 2 ປະເທດ ຈັດຕັ້ງ ແລະ ຜັນຂະຫຍາຍບັນດາໂຄງການຮ່ວມມືຮອບດ້ານລະຫວ່າງ 2 ພັກ ແລະ ລັດ ໃຫ້ບັນລຸປະສິດທິຜົນສູງ, ພິເສດແມ່ນການຮ່ວມມືດ້ານເສດຖະກິດ, ການຄ້າ, ວັດທະນະທໍາ-ສັງຄົມ, ການສຶກສາ-ກິລາ, ວິທະຍາສາດ ແລະ ເຕັກໂນໂລຊີ...
ທີສີ່ແມ່ນ: ເພີ່ມທະວີການຈັດຕັ້ງການພົບປະ ແລະ ແລກປ່ຽນລະຫວ່າງບັນດາອົງການມິດຕະພາບຂອງສອງປະເທດຢູ່ທ້ອງຖິ່ນ ແລະ ແຂວງຕິດກັບເຂດຊາຍແດນສອງປະເທດ, ປະກອບສ່ວນສ້າງເສັ້ນຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມື. ເພີ່ມທະວີການປັບປຸງ, ເປີດກວ້າງວຽກງານຈັດຕັ້ງສະມາຄົມມິດຕະພາບຂອງແຕ່ລະປະເທດໃນແຕ່ລະໄລຍະໃຫ້ສອດຄ່ອງກັບສະພາບການໃໝ່, ເປັນຕົ້ນແມ່ນບັນດາແຂວງທີ່ມີເສັ້ນຊາຍແດນຮ່ວມກັນ; ເພີ່ມທະວີການຮ່ວມມື, ແບ່ງປັນບົດຮຽນປະສົບການໃນການເຄື່ອນໄຫວລະຫວ່າງສອງສະມາຄົມ; ເປັນຂົວຕໍ່ທີ່ມີປະສິດທິຜົນ, ປະກອບສ່ວນປົກປັກຮັກສາ, ເພີ່ມທະວີສາຍພົວພັນແບບພິເສດ ແລະ ຊຸກຍູ້ການຮ່ວມມືຮອບດ້ານລະຫວ່າງສອງປະເທດ ລາວ - ຫວຽດນາມ.
ທີຫ້າແມ່ນ: 2 ສະມາຄົມເຫັນດີເປັນເອກະພາບສືບຕໍ່ຈັດຕັ້ງງານບຸນມະໂຫລານມິດຕະພາບປະຊາຊົນລາວ - ຫວຽດນາມ ຄັ້ງທີ 6 ຢູ່ ສປປ ລາວ ໃນປີ 2027.
ກ່າວຄຳເຫັນທີ່ພິທີປິດ, ທ່ານ ສັນຕິພາບ ພົມວິຫານ ກຳມະການສູນກາງພັກ, ເຈົ້າແຂວງສະຫວັນນະເຂດ ໄດ້ສົ່ງຄຳຊົມເຊີຍ ແລະ ສະແດງຄວາມຂອບໃຈຢ່າງຈິງໃຈ ໄປຍັງຄະນະຜູ້ແທນຂັ້ນສູງສູນກາງສະມາຄົມມິດຕະພາບ ລາວ - ຫວຽດນາມ, ຫວຽດນາມ - ລາວ, ສະຫາຍການນຳບັນດາແຂວງ, ນະຄອນ ຂອງສາທາລະນະລັດ ສັງຄົມນິຍົມ ຫວຽດນາມ ທີ່ໄດ້ນຳມາເຊິ່ງນ້ຳໃຈມິດຕະພາບອັນບໍລິສຸດຜຸດຜ່ອງ ແລະ ຄວາມສາມັກຄີສະໜິດຕິດພັນອ້າຍນ້ອງຂອງ ພັກ, ລັດ ແລະ ປະຊາຊົນ ຫວຽດນາມ ມາຍັງອົງຄະນະພັກ, ອຳນາດການປົກຄອງ ແລະ ປະຊາຊົນແຂວງ ສະຫວັນນະເຂດ.
ເຈົ້າແຂວງສະຫວັນນະເຂດ ເນັ້ນໜັກວ່າ: ພັກ, ລັດ ແລະ ປະຊາຊົນລາວ ຮູ້ສຶກເອກອ້າງທະນົງໃຈທີ່ສຸດ ແລະ ເຫັນວ່າ ໃນຊຸມປີແຫ່ງການຕໍ່ສູ້ ແລະ ໄຊຊະນະຂອງສອງປະເທດ, ພວກເຮົາໄດ້ປະກອບສ່ວນຈົນສຸດຄວາມສາມາດຂອງຕົນເຂົ້າໃນພາລະກິດແຫ່ງການຕໍ່ສູ້ຍາດເອົາໄຊຊະນະຂອງປະຊາຊົນຫວຽດນາມ. ການຄົງຕົວຂອງ “ເສັ້ນທາງໂຮ່ຈີມິນ” ດັ່ງທີ່ຮູ້ກັນວ່າ ໄດ້ຢັ່ງຢາຍຍາວຢຽດໄປທົ່ວຜືນປ່າ, ສາຍພູ, ແມ່ນ້ຳລຳເຊທີ່ຍາວນັບພັນກິໂລແມັດຜ່ານດິນແດນລາວ, ອັນໄດ້ສ້າງເງື່ອນໄຂສະດວກ ກາຍເປັນເສັ້ນທາງຂົນສົ່ງເຄື່ອນຍ້າຍ, ເປັນບ່ອນເຕົ້າໂຮມກຳລັງແຮງ ແລະ ຂົນສົ່ງອາວຸດຍຸດໂທປະກອນເພື່ອປົດປ່ອຍຫວຽດນາມໃຕ້.
ສ່ວນທ່ານ ເຈີ່ນວັນຕູຍ, ອະດີດກຳມະການຄະນະບໍລິຫານງານສູນກາງພັກ, ອະດີດປະທານກຳມາທິການວຽກງານຜູ້ແທນສະພາ ຄະນະປະຈຳສະພາແຫ່ງຊາດ, ປະທານສະມາຄົມມິດຕະພາບຫວຽດນາມ - ລາວ ໄດ້ແບ່ງປັນວ່າ: ໃນຊຸມວັນດຳເນີນງານບຸນມະໂຫາລານມິດຕະພາບປະຊາຊົນຫວຽດນາມ - ລາວ ຄັ້ງທີ 5 ໄດ້ເປັນຄວາມຊົງຈຳທີ່ເລິກເຊິ່ງສຳລັບພວກຂ້າພະເຈົ້າແຕ່ລະຄົນທີ່ບໍ່ອາດລືມໄດ້. ພວກຂ້າພະເຈົ້າກໍດີໃຈທີ່ໄດ້ເຫັນປະຈັກຕາການພັດທະນາທີ່ເຂັ້ມແຂງຂອງແຂວງສະຫວັນນະເຂດ. ໃນໂອກາດນີ້, ຂ້າພະເຈົ້າຂໍສະແດງຄວາມຊົມເຊີຍຢ່າງສຸດໃຈຕໍ່ບັນດາຜົນງານອັນໃຫຍ່ຫຼວງທີ່ປະຊາຊົນລາວ ເວົ້າລວມ ແລະ ປະຊາຊົນແຂວງສະຫວັນນະເຂດ ເວົ້າສະເພາະ ບັນລຸໄດ້ໃນການສ້າງສາ ແລະ ພັດທະນາປະເທດຊາດໃນຕະຫຼອດໄລຍະຜ່ານມາ.
ໂດຍຕາງໜ້າໃຫ້ຄະນະຈັດຕັ້ງ ແລະ ບັນດາຜູ້ແທນທີ່ເຂົ້າຮ່ວມງານບຸນມະໂຫລານ, ທ່ານ ເຈີ່ນວັນຕູຍ ສະແດງຄວາມຂອບອົກຂອບໃຈບັນດາການນຳຂອງພັກ, ລັດ, ບັນດາອົງການສູນກາງຫວຽດນາມ ແລະ ລາວ, ການນຳ ແລະ ປະຊາຊົນສອງແຂວງ ກວາງຈິ - ສະຫວັນນະເຂດ ທີ່ໄດ້ໃຫ້ການສະໜັບສະໜູນ, ຕອບສະໜອງ ແລະ ເຂົ້າຮ່ວມບັນດາການເຄື່ອນໄຫວຂອງງານມະໂຫລານຢ່າງຕັ້ງໜ້າ, ສ້າງທຸກເງື່ອນໄຂສະດວກໃຫ້ງານບຸນມະໂຫລານມິດຕະພາບປະຊາຊົນຫວຽດນາມ - ລາວ ຄັ້ງທີ 5 ປະສົບຜົນສຳເລັດຢ່າງຈົບງາມ.
ບຸນຄົງ
