ຫວ່າງແລ້ວນີ້, ທ່ານເອກອັກຄະລັດຖະທູດຫວຽດນາມ ປະຈຳ ອາກຊັງຕິນ ເຢືອງກວກແທງ ໄດ້ມີການພົບປະ ແລະ ເຮັດວຽກກັບຜູ້ວ່າການແຂວງ Buenos Aires Axel Kicillof ແລະ ເປັນປະທານກອງປະຊຸມປຶກສາຫາລືກັບບັນດາພະແນກການຕ່າງປະເທດ, ພະລັງງານ, ພັດທະນາກະສິກຳ, ການຜະລິດ, ວິທະຍາສາດ ແລະ ປ່ຽນແປງໃໝ່ເຕັກໂນໂລຊີ ພ້ອມກັບສະມາຊິກສະພາສູງຂັ້ນແຂວງຈຳນວນນຶ່ງ ຢູ່ La Plata, Buenos Aires.
 |
| ທ່ານເອກອັກຄະລັດຖະທູດຫວຽດນາມ ປະຈຳ ອາກຊັງຕິນ ເຢືອງກວກແທງ ແລະທ່ານຜູ້ວ່າການແຂວງ Buenos Aires Axel Kicillof. ພາບ: baoquocte.vn |
ທ່ານເອກອັກຄະລັດຖະທູດ ເຢືອງກວກແທງ ໃຫ້ຮູ້ວ່າ: ຫວຽດນາມ ພວມຕັ້ງໜ້າຜັນຂະຫຍາຍຫັນການພົວພັນດ້ານການຄ້າເປັນຫຼາຍຮູບຫຼາຍແບບ ແລະ ມີຄວາມສົນໃຈເຖິງພາກພື້ນ ອາເມລິກາໃຕ້ ເວົ້າລວມ ແລະກໍ່ຄື ອາກຊັງຕິນ ເວົ້າສະເພາະ. ໃນສະພາບການທີ່ສອງປະເທດຈະສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດໃນປີ 2023, ສອງຝ່າຍຕ້ອງຊຸກຍູ້ການຮ່ວມມືລະຫວ່າງບັນດາທ້ອງຖິ່ນຢ່າງແຮງກວ່າອີກ ເພື່ອບັນລຸໄດ້ບັນດາໝາກຜົນອັນຕັ້ງໜ້າ ແລະ ສຸມໃສ່ເຂົ້າໃນຫຼາຍຂົງເຂດຮ່ວມມືທີ່ແຂວງມີທ່າແຮງຄື ກະສິກຳ ແລະ ພະລັງງານ.
ທ່ານຜູ້ວ່າການ Kicillof ໄດ້ສະແດງຄວາມຍິນດີຕໍ່ການພັດທະນາການພົວພັນລະຫວ່າງສອງປະເທດກໍ່ຄື ແຂວງ Buenos Aires ກັບ ຫວຽດນາມ ໃນຊຸມປີມໍ່ໆມານີ້ ແລະ ເນັ້ນໜັກວ່າ: ໃນສະພາບເສດຖະກິດໂລກປະສົບກັບຄວາມຫຍຸ້ງຍາກຫຼາຍຢ່າງຄືໃນປະຈຸບັນ, ອາກຊັງຕິນ ເວົ້າລວມ ແລະ ແຂວງ Buenos Aires ເວົ້າສະເພາະ ພ້ອມແລ້ວທີ່ຈະສືບຕໍ່ເສີມຂະຫຍາຍທ່າແຮງດ້ານກະສິກຳ ແລະ ພະລັງງານຂອງຕົນກວ່າອີກ, ເພີ່ມທະວີການສົ່ງອອກ, ດຶງດູດການລົງທຶນຈາກບັນດາປະເທດ, ໃນນັ້ນຖື ຫວຽດນາມ ເປັນບຸລິມະສິດພິເສດ.
ທີ່ການໂອ້ລົມສົນທະນາກັບບັນດາອົງການອໍານາດການປົກຄອງ ແລະ ນິຕິບັນຍັດ ຂອງແຂວງ, ສອງຝ່າຍໄດ້ແລກປ່ຽນກ່ຽວກັບສະພາບການການເມືອງ ແລະ ໂຄງປະກອບເສດຖະກິດຂອງຫວຽດນາມ ກໍ່ຄືແຂວງ Buenos Aires ແລະ ເຫັນດີເປັນເອກະພາບວ່າ ຄຽງຂ້າງການຍູ້ແຮງການແລກປ່ຽນການຄ້າ ຈະສົມທົບກັນພິຈາລະນາການຮ່ວມມື ແລະ ແລກປ່ຽນບົດຮຽນປະສົບການໃນບັນດາໂຄງການເຕັກໂນໂລຊີກະສິກຳ, ກໍ່ສ້າງຕາໜ່າງພະລັງງານທົດແທນ ແລະ ບັນດາໂຄງການຫັນເປັນເສດຖະກິດດີຈີຕອນ.
ບູນມີ
