ທ່ານ ປະດີດ ວັນນະລັດສະໝີ ຫົວໜ້າພະແນກກະສິກຳ ແລະ ປ່າໄມ້ ແຂວງຈຳປາສັກໄດ້ໃຫ້ສຳພາດອາທິດຜ່ານມາວ່າ: ເນື້ອທີ່ການຜະລິດຖືກນ້ຳຖ້ວມທົ່ວແຂວງ 42.433 ເຮັກຕາ ເນື້ອທີ່ເສຍຫາຍ 23.795 ເຮັກຕາ (ໃນນັ້ນ ເຂົ້ານາປີ 20.822 ເຮັກຕາ ແລະ ພືດ 2.973 ເຮັກຕາ) ໜອງປາເສຍຫາຍ 1.038 ໜອງ ລູກປາເສຍຫາຍ 16.574.000 ກວ່າໂຕ ປາກະຊັງຖືກເສຍຫາຍ (ກະຊັງເພ ປານ໊ອກ ນ້ຳຕາຍ) 51 ກະຊັງ ປາເສຍຫາຍ ແລະ ຕາຍ 116 ໂຕນ ໄດ້ເຄື່ອນຍ້າຍສັດໄປໄວ້ທີ່ສູງ ແຫຼ່ງອາຫານ ຄອກຖືກນ້ຳຖ້ວມ ງົວ 27.293 ໂຕ ຕາຍ 618 ໂຕ ຄວາຍ 13.953 ໂຕ ຕາຍ 158 ໂຕ ແບ້ 3.905 ໂຕ ຕາຍ 321 ໂຕ ໝູ 3.406 ໂຕ ຕາຍ 325 ໂຕ ສັດປີກ 139.492 ໂຕ ຕາຍ 92.947 ໂຕ ລະບົບຊົນລະປະທານຖືກເປ່ເພ 58 ແຫ່ງ ມູນຄ່າເສຍຫາຍທັງໝົດ 157.906 ລ້ານກີບ ຍ້ອນສະພາບດັ່ງກ່າວ ພະແນກກະສິກຳ ແລະ ປ່າໄມ້ ໄດ້ຖືສຳຄັນໃນການສຸມໃສ່ຊຸກຍູ້ຊາວກະສິກອນເອົາໃຈໃສ່ປົກປັກຮັກສາເກັບກູ້ຜົນຜະລິດລະດູນີ້ ແລະ ກະກຽມໃສ່ການຜະລິດລະດູແລ້ງປີ 2020 ໂດຍໄດ້ວາງຄາດໝາຍສູ້ຊົນ ຄືວາງແຜນປູກເຂົ້ານາແຊງ 5.069 ເຮັກຕາ ຄາດຄະເນສາມັດຖະພາບ 5,17 ໂຕນຕໍ່ເຮັກຕາ ຄາດຄະເນຜົນຜະລິດ 26.207 ໂຕນ ເນື້ອທີ່ປູກພືດແຜນການ 31.825 ເຮັກຕາ ຄາດຄະເນຜົນຜະລິດ 561.282 ໂຕນ (ປູກໃນເຂດຊົນລະປະທານ 3.511 ເຮັກຕາ ນອກເຂດຊົນລະປະທານ 28.314 ເຮັກຕາ).
 |
ທ່ານ ປະດີດ ວັນນະລັດສະໝີ ຫົວໜ້າພະແນກກະສິກຳ ແລະ ປ່າໄມ້ ແຂວງຈຳປາສັກ.
ສຳລັບແນວພັນເຂົ້າເພື່ອການຜະລິດເຂົ້ານາແຊງຕ້ອງການແນວພັນ 400 ກວ່າໂຕນ ຜ່ານການສຳຫຼວດເຫັນວ່າແນວພັນເຂົ້າສາມາດພຽງພໍກັບຄວາມຕ້ອງການຂອງຊາວກະສິກອນ ໃນນັ້ນ ພະແນກກະສິກຳ ໄດ້ຮັບແນວພັນເຂົ້າຈາກກະຊວງກະສິກຳ ແລະ ປ່າໄມ້ (ບ້ວງແກ້ໄຂໄພພິບັດສຸກເສີນ) 131 ໂຕນ ແລະ ໄດ້ແຈກຢາຍໃຫ້ນະຄອນປາກເຊ 4,6 ໂຕນ ເມືອງຊະນະສົມບູນ 32,7 ໂຕນ ບາຈຽງຈະເລີນສຸກ 4,8 ໂຕນ ປະທຸມພອນ 24,3 ໂຕນ ໂພນທອງ 6,8 ໂຕນ ຈຳປາສັກ 18,9 ໂຕນ ສຸຂຸມາ 8,8 ໂຕນ ມຸນລະປະໂມກ 8,5 ໂຕນ ແລະ ເມືອງໂຂງ 21,4 ໂຕນ ນອກນີ້ ຍັງມີແນວພັນເຂົ້າຂອງບໍລິສັດ IDP ຈຳນວນ 245 ໂຕນ ທີ່ສະໜອງສະເພາະກຸ່ມຜະລິດຂອງບໍລິສັດ ແລະ ແນວພັນເຂົ້າຂອງສູນຜະລິດເມັດພັນເຂົ້າໂພນງາມ 57 ໂຕນ ສາມາດສະໜອງໃຫ້ຊາວກະສິກອນ ແລະ ກຸ່ມການຜະລິດຫາກມີຄວາມຕ້ອງການຄຽງຄູ່ກັບການອຳນວຍຄວາມສະດວກໃນການສະໜອງຝຸ່ນ ແລະ ເອົາໃຈໃສ່ສ້ອມແປງລະບົບຫົວຈັກຊົນລະປະທານ ພາຍໃນແຂວງມີຈັກສູບນ້ຳ 73 ແຫ່ງ ເນື້ອທີ່ 4.247 ເຮັກຕາ ຝາຍນ້ຳລົ້ນ 19 ແຫ່ງ ເນື້ອທີ່ 1.595 ເຮັກຕາ ອ່າງເກັບນ້ຳ 11 ແຫ່ງ ເນື້ອທີ່ 232 ເຮັກຕາ ແລະ ຊົນລະປະທານປວງຊົນ ເນື້ອທີ່ 2.506 ເຮັກຕາ.
（ແຫຼ່ງຂໍ້ມູນ： vientianemai.net）
