| ກະກຽມພົບປະແລກປ່ຽນ “ຕໍາຫຼວດທະເລຫວຽດນາມ ແລະບັນດາເພື່ອນມິດ” ຄັ້ງທີໜຶ່ງ | |
| EVN ແລະ ບັນດາຄວາມກ້າວໜ້າໃນການຮ່ວມມືດ້ານພະລັງງານລະຫວ່າງ ຫວຽດນາມ - ລາວ |
ຊອກຮູ້ປະຫວັດສາດກການພົວພັນແບບພິເສດ ຫວຽດນາມ-ລາວ, ລາວ-ຫວຽດນາມ
ການປະກວດ “ຊອກຮູ້ປະຫວັດສາດການພົວພັນແບບພິເສດຫວຽດນາມ - ລາວ, ລາວ - ຫວຽດນາມ” ປີ 2022 ໂດຍຄະນະໂຄສະນາສຶກສາສູນກາງຈັດຕັ້ງ. ການປະກວດໄດ້ຈັດຂຶ້ນຕາມຮູບແບບປາລະໄນອອນໄລໃນທຸກໆອາທິດຢູ່ໃນໜັງສືພິມອອນໄລຂອງພັກກອມມູນິດຫວຽດນາມ, ເຄືອຂ່າຍສັງຄົມ VCNet ແລະ ບັນດາສຳນັກຂ່າວປະສານສົມທົບກັນ ໃນເວລາ 12 ອາທິດ ເລີ່ມແຕ່ວັນທີ 13 ມິຖຸນາ 2022 ຫາ ວັນທີ 5 ກັນຍາ 2022.
ການປະກວດໄດ້ເນັ້ນໃສ່ບັນດາເນື້ອໃນສະເພາະຄື ປະຫວັດສາດການພົວພັນພິເສດ ຫວຽດນາມ-ລາວ ໂດຍຜ່ານບັນດາໄລຍະປະຫວັດສາດ, ສຸມໃສ່ໄລຍະແຕ່ປີ 1962 ຮອດປະຈຸບັນ; ບັນດາບຸກຄົນທີ່ພົ້ນເດັ່ນເຊິ່ງໄດ້ປະກອບສ່ວນສຳຄັນເຂົ້າໃນການພັດທະນາສາຍພົວພັນຮ່ວມມືຫວຽດນາມ - ລາວ; ບັນດາຜົນງານແຫ່ງການຮ່ວມມືໃນທຸກຂົງເຂດທີ່ສອງປະເທດບັນລຸໄດ້ໃນການກໍ່ສ້າງສັງຄົມນິຍົມ, ພັດທະນາປະເທດຊາດ ແລະ ໃນໄລຍະປະຈຸບັນ; ບັນດາຂອບເຂດການຮ່ວມມືສອງຝ່າຍລະຫວ່າງສອງພັກ, ສອງລັດ, ສອງປະເທດ; ລະຫວ່າງບັນດາທ້ອງຖິ່ນຂອງ ຫວຽດນາມ ແລະ ລາວ; ແນະນຳຄວາມງາມຂອງທຳມະຊາດ, ປະເທດຊາດ ແລະ ປະຊາຊົນ; ມູນເຊື້ອວັດທະນະທໍາ, ປະຫວັດສາດ; ບັນດາຜົນງານການພັດທະນາເສດຖະກິດ-ສັງຄົມຂອງລາວ; ໂຄສະນາເຜີຍແຜ່ກ່ຽວກັບຄວາມໝາຍ ແລະ ຄວາມສຳຄັນຂອງວັນສ້າງຕັ້ງການພົວພັນທາງການທູດ ຫວຽດນາມ - ລາວ, ວັນເຊັນສົນທິສັນຍາມິດຕະພາບ ແລະ ການຮ່ວມມື ຫວຽດນາມ - ລາວ ແລະ ບັນດາການເຄື່ອນໄຫວໃນ “ປີສາມັກຄີມິດຕະພາບ ຫວຽດນາມ - ລາວ, ລາວ - ຫວຽດນາມ 2022”.
ການປະກວດໄດ້ຮັບຄວາມສົນໃຈ ແລະ ຕອບຮັບຈາກປະຊາຊົນໃນທົ່ວປະເທດເປັນຈຳນວນຫຼວງຫຼາຍ, ໃນນັ້ນມີພົນລະເມືອງຫວຽດນາມ ແລະ ລາວ ຈຳນວນໜຶ່ງທີ່ພວມດຳລົງຊີວິດ, ເຮັດວຽກ, ສຶກສາຮ່ຳຮຽນຢູ່ຕ່າງປະເທດ ແລະ ເພື່ອນມິດສາກົນກໍເຂົ້າຮ່ວມການປະກວດ. ອາຈານ ກາວທິໝີລິງ (ຄູສອນໂຮງຮຽນມັດທະຍົມຕົ້ນ ກວ໋າງແທັງ (ເມືອງ ກວ໋າງແຈັກ, ແຂວງ ກວ໋າງບິ່ງ) ເຊິ່ງຍາດໄດ້ລາງວັນທີ 1 ໃນອາທິດທີ 3 ຂອງການປະກວດ ໃຫ້ຮູ້ວ່າ: “ເມື່ອຮຽນຢູ່ມະຫາວິທະຍາໄລ, ຂ້າພະເຈົ້າໄດ້ຮຽນນໍາກັບໝູ່ເປັນຄົນລາວຈຳນວນໜຶ່ງ - ເຂົາເຈົ້າເປັນຄົນໃຈດີ, ຊື່ສັດ ສະນັ້ນ ຂ້າພະເຈົ້າຍິ່ງຮັກແພງຖະໜອມນ້ຳໃຈສາມັກຄີ, ການພົວພັນແບບພິເສດລະຫວ່າງສອງປະເທດ. ໂດຍຜ່ານການປະກວດນີ້, ຂ້າພະເຈົ້າເໝືອນໄດ້ຫວນຄືນປະຫວັດສາດເພື່ອຊອກຮູ້ບັນດາຂີດໝາຍທີ່ໜ້າຈື່ຈໍາໃນສາຍພົວພັນລະຫວ່າງສອງປະເທດ”.
ນາງ ເພັດສະຫວັນ ພົມມະຈັກ ນັກສຶກສາຂອງສະຖາບັນການຕ່າງປະເທດ ໃຫ້ຮູ້ວ່າ: ການປະກວດແມ່ນໂອກາດເພື່ອໃຫ້ພວກນ້ອງໄດ້ເຂົ້າໃຈກ່ຽວກັບສາຍພົວພັນມິດຕະພາບ ແລະ ຄວາມສາມັກຄີແບບພິເສດລະຫວ່າງສອງປະເທດຢ່າງເລິກເຊິ່ງກວ່າອີກ, ສະແດງໃຫ້ເຫັນຄວາມຮັກແພງ, ຄວາມເຂົ້າໃຈ, ເອກອ້າງທະນົງໃຈຕໍ່ນ້ຳໃຈມິດຕະພາບທີ່ຊື່ສັດບໍລິສຸດ ຫວຽດນາມ - ລາວ.
 |
| ນັກສຶກສາສະຖາບັນການຕ່າງປະເທດເຂົ້າຮ່ວມການສອບເສັງທາງອອນລາຍໃນລະບົບທັນທີຫຼັງຈາກການປະກວດໄດ້ຈັດຂຶ້ນຢ່າງເປັນທາງການ (ພາບ: ມິງແອັງ) |
ທ່ານ ແສງເພັດ ຮຸ່ງບຸນຍວງ, ເອກອັກຄະລັດຖະທູດຜູ້ມີອຳນາດເຕັມ ແຫ່ງ ສປປ ລາວ ປະຈຳ ຫວຽດນາມ ໃຫ້ຮູ້ວ່າ: “ຄະນະໂຄສະນາສຶກສາສູນກາງ ພັກກອມມູນິດຫວຽດນາມ ຈັດຕັ້ງການປຸກລະດົມການປະກວດ ໄດ້ປະກອບສ່ວນສຳຄັນເຂົ້າໃນການເພີ່ມທະວີການສຶກສາໃຫ້ສະມາຊິກພັກ, ພະນັກງານ, ທະຫານ, ຕຳຫຼວດ ແລະ ປະຊາຊົນ, ພິເສດແມ່ນລຸ້ນໜຸ່ມ ໄດ້ມີຄວາມເຂົ້າໃຈກ່ຽວກັບນ້ຳໃຈມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງປະເທດ ລາວ - ຫວຽດນາມ ຢ່າງເລິກເຊິ່ງກວ່າອີກ”.
ທ່ານເອກອັກຄະລັດຖະທູດ ແສງເພັດ ຮຸ່ງບຸນຍວງ ສະແດງຄວາມເຊື່ອໝັ້ນວ່າ ການປະກວດຈະໄດ້ຮັບຄວາມສົນໃຈຢ່າງກວ້າງຂວາງຈາກປະຊາຊົນທຸກຊັ້ນວັນນະ, ນັບແຕ່ໄວໜຸ່ມຈົນເຖິງຜູ້ເຖົ້າ ແລະ ສາມາດຄົ້ນພົບຈຸດພິເສດຂອງສາຍພົວພັນພິເສດນີ້ໄດ້. ບັນດາຂໍ້ມູນທີ່ເກັບກໍາໄດ້ຈາກການປະກວດຈະເພີ່ມຕື່ມຄວາມອຸດົມສົມບູນ ແລະ ມີຄວາມໝາຍສໍາຄັນເຂົ້າໃນສາງປະຫວັດສາດຂອງການພົວພັນລະຫວ່າງສອງປະເທດ ຫວຽດນາມ - ລາວ, ພ້ອມກັນນັ້ນ ກໍແມ່ນເອກະສານເພື່ອໃຫ້ຄົນລຸ້ນຫຼັງໄດ້ຊອກຮູ້ ແລະ ສຶກສາຮໍ່າຮຽນ.
ທ່ານ ເລຫາຍບິ່ງ, ກຳມະການສໍາຮອງສູນກາງພັກ, ຮອງຫົວໜ້າຄະນະໂຄສະນາສຶກສາສູນກາງ, ຮອງຫົວໜ້າຄະນະຊີ້ນຳ, ຫົວໜ້າຄະນະຈັດຕັ້ງການປະກວດ ຢືນຢັນວ່າ: ຜ່ານການເຂົ້າຮ່ວມການປະກວດ ແລະ ຕອບບັນດາຄໍາຖາມ, ຜູ້ອ່ານຈະໄດ້ເປີດກວ້າງຄວາມເຂົ້າໃຈກ່ຽວກັບປະເທດ, ມະນຸດຂອງສອງປະເທດ ຫວຽດນາມ ແລະ ລາວຕື່ມອີກ; ຊອກຮູ້ກ່ຽວກັບບາດກ້າວພັດທະນາ ແລະ ການເຊື່ອມໂຍງຂອງ "ປະເທດດອກຈໍາປາ" ປັັດຈຸບັນ; ກ່ຽວກັບປະຫວັດສາດແຫ່ງການພົວພັນແບບພິເສດ, ຄວາມສະໜິດຕິດແໜ້ນ, ນໍ້າໃຈມິດຕະພາບຢ່າງແໜ້ນແຟ້ນ, ຊື່ສັດລະຫວ່າງສອງພັກ, ສອງລັດ ແລະ ປະຊາຊົນສອງປະເທດຫວຽດນາມ - ລາວ.
ຈາກນັ້ນ, ແຜ່ກະຈາຍບັນດາຄຸນຄ່າປະຫວັດສາດ, ສຶກສາມູນເຊື້ອປະຕິວັດ, ນໍ້າໃຈມິດຕະພາບ, ຄວາມສາມັກຄີແບບພິເສດທີ່ສອງພັກ, ລັດ ແລະ ປະຊາຊົນສອງປະເທດ ໄດ້ອອກເຫື່ອເທແຮງເພີ່ມພູນຄູນສ້າງ ນັບແຕ່ຊຸມປີແຫ່ງການຕໍ່ສູ້ປົດປ່ອຍຊາດມາຮອດປະຈຸບັນ; ພ້ອມກັນນັ້ນ ກໍປຸກລຸກສະຕິຂອງບັນດາພະນັກງານ, ສະມາຊິກພັກ ແລະ ປະຊາຊົນທຸກຊັ້ນວັນນະ, ພິເສດແມ່ນລຸ້ນໜຸ່ມກ່ຽວກັບການສືບຕໍ່ເພີ່ມພູນຄູນສ້າງສາຍພົວພັນມິດຕະພາບທີ່ເປັນແບບຢ່າງ, ຊື່ສັດບໍລິສຸດ, ໄດ້ກາຍເປັນສັນຍາລັກອັນດີງາມໃນປະຫວັດສາດການພົວພັນສາກົນ.
ບັນດາເລື່ອງລາວທີ່ຕື້ນຕັນໃຈກ່ຽວກັບນໍ້າໃຈໄມຕີຈິດ ຫວຽດ - ລາວ
ການຕົກລົງຮັບເຂົ້າເປັນສະມາຊິກພັກຄັ້ງທຳອິດຢູ່ລາວ ຂອງທະຫານຊ່າງແສງ ຫວຽດນາມ; ໃບຢັ້ງຢືນເພື່ອມອບໃຫ້ເພື່ອນມິດລາວແຕ່ຍັງບໍ່ທັນໄດ້ມອບໃຫ້, ຮູບຖ່າຍໝູ່ຄະນະນັກສຶກສາລາວທີ່ມີຜົນການຮຽນດີເດັ່ນ ໃນໂອກາດໄປຢ້ຽມຢາມບ້ານເກີດຂອງລຸງໂຮ່; “ອ໋າວຢາຍ” ທີ່ຜູ້ເປັນແມ່ຄົນຫວຽດນາມໄດ້ມອບໃຫ້ນາງ ຊານິຕາ ສະແຫວງໂຊກ - ຮອງນາງງາມ ການປະກວດ Miss World Laos 2019… ນັ້ນແມ່ນຂອງທີ່ລະນຶກຈໍານວນໜຶ່ງໃນຮ້ອຍຂອງທີ່ລະນຶກທີ່ສະແດງນໍ້າໃຈໄມຕີຈິດ ຫວຽດນາມ-ລາວ ອັນເລິກເຊິ່ງ ເຊິ່ງຜູ້ເຂົ້າຮ່ວມການປະກວດໄດ້ສົ່ງເຖິງການປະກວດ “ໃຫ້ຂອງທີ່ລະນຶກເລົ່າເລື່ອງ” ໂດຍວາລະສານ ຍຸກສະໄໝ ສົມທົບກັບສະຖານທູດລາວ ປະຈຳຫວຽດນາມ, ສະມາຄົມມິດຕະພາບຫວຽດນາມ - ລາວ, ລາວ - ຫວຽດນາມ ຈັດຕັ້ງ.
ໂດຍປຸກລະດົມ ແຕ່ວັນທີ 9 ພຶດສະພາ 2022, ການປະກວດໄດ້ຮັບຄວາມສົນໃຈຢ່າງຫຼວງຫຼາຍຈາກປະຊາຊົນສອງປະເທດ. ໃນກຸ່ມນັກຮົບເກົ່າ ກອງພົນ 968, ນັກຮົບເກົ່າ ບູຍເທື້ອງຕ໊ວານ ຝາກຄໍາເວົ້າໄວ້ວ່າ:
“ບັນດາສະຫາຍທີ່ຮັກແພງ!
ພວກເຮົາເຄີຍມີໄລຍະຕິດພັນກັບປະເທດລາວອ້າຍນ້ອງ, ມີວັດຖຸສິ່ງຂອງຫຼາຍຢ່າງຂອງວັນເວລານັ້ນທີ່ພວມໄດ້ຖະນຸຖະຫນອມ ແລະ ເກັບຮັກສາໄວ້. ພວກເຮົາຈົ່ງອອກສຽງ, ດ້ວຍການເຂົ້າຮ່ວມການປະກວດ “ໃຫ້ຂອງທີ່ລະນຶກເລົ່າເລື່ອງ”.
ພາຍຫຼັງເກືອບ 2 ເດືອນ ທີ່ປຸກລະດົມ, ການປະກວດໄດ້ຮັບບົດເຂົ້າຮ່ວມການປະກວດນັບຮ້ອຍບົດຈາກຜູ້ເຂົ້າຮ່ວມທີ່ເປັນຄົນຫວຽດນາມ ແລະ ລາວ ຢູ່ຫລາຍອົງການຈັດຕັ້ງ, ຫົວໜ່ວຍ, ກຳລັງ, ຫຼາຍໄວອາຍຸ... ແຕ່ລະຂອງທີ່ລະນຶກແມ່ນຕິດກັບເລື່ອງລາວເລື່ອງໜຶ່ງທີ່ໜ້າຕື້ນຕັນໃຈກ່ຽວກັບນ້ຳໃຈ ຫວຽດນາມ ແລະ ລາວ, ກ່ຽວກັບຄວາມຮັກແພງອັນຊື່ສັດບໍລິສຸດ, ອົບອຸ່ນ ແລະ ຄວາມຜູກພັນອັນແໜ້ນແຟ້ນລະຫວ່າງສອງປະເທດ.
ຕາມຄະນະຈັດຕັ້ງການປະກວດແລ້ວ, ນ້ຳໃຈມິດຕະພາບ ລາວ-ຫວຽດນາມ ໄດ້ຍືນຍົງ ແລະ ພັດທະນາຢ່າງບໍ່ຢຸດຢັ້ງຍ້ອນຄວາມມຸ່ງມາດປາຖະໜາຂອງປະຊາຊົນສອງປະເທດ. ນໍ້າໃຈມິດຕະພາບດັ່ງກ່າວໄດ້ຮັບການສ້າງ ແລະ ເພີ່ມພູນຄູນສ້າງຈາກແຫຼ່ງວັດທະນະທຳ ແລະ ຈິດໃຈຂອງສອງຊາດ, ໄດ້ຮັບການຫລໍ່ລ້ຽງແຕ່ອະດີດເຖິງປະຈຸບັນ ແລະ ມີຄວາມຫວັງມຸ່ງໄປເຖິງອະນາຄົດຢ່າງບໍ່ຢຸດຢັ້ງ.
ການປະກວດ “ໃຫ້ຂອງທີ່ລະນຶກເລົ່າເລື່ອງ” ມີເປົ້າໝາຍຄືເພື່ອ ຊອກຫາຄືນ ແລະ ຮີບໂຮມບັນດາຂອງທີ່ລະນຶກນັບແຕ່ອັນນ້ອຍໆເກົ່າໆ, ແຕ່ບັນຈຸ, ຮັກສາໄວ້ບັນດາຄຸນຄ່າອັນລໍ້າຄ່າໃນດ້ານຈິດໃຈ ແລະ ປະຫວັດສາດການພົວພັນລະຫວ່າງປະຊາຊົນສອງປະເທດ ລາວ-ຫວຽດນາມ, ພ້ອມກັນນັ້ນ ກໍສ້າງພື້ນທີ່ມິດຕະພາບລວມຂອງຫຼາຍລຸ້ນຄົນ...
ພ້ອມກັນກັບບັນດາການປະກວດທີ່ໄດ້ປຸກລະດົມໃນຂອບຂະໜາດທົ່ວປະເທດ, ຫຼາຍການປະກວດຊອກຮູ້ກ່ຽວກັບການພົວພັນ ຫວຽດນາມ - ລາວ ກໍໄດ້ຜັນຂະຫຍາຍຢູ່ບັນດາທ້ອງຖິ່ນ. ບັນດາການປະກວດກໍແມ່ນສານທີ່ມີຄວາມໝາຍເພື່ອແຜ່ກະຈາຍນ້ຳໃຈມິດຕະພາບແບບພິເສດ ຫວຽດນາມ - ລາວ.
ຫອມມາລາ
