 |
ກອງປະຊຸມແຜນການ-ການເງິນ ປະຈຳປີ 2019
ທ່ານ ສອນໄຊ ສີພັນດອນ ກ່າວວ່າ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈຳປີ 2019 ມີຄວາມຄືບໜ້າ ເປັນຕົ້ນ ລວມຍອດຜະລິດຕະພັນພາຍໃນ (GDP) ປີ 2019 ຄາດວ່າຈະເພີ່ມຂຶ້ນໃນລະດັບ 6,4% ສະເລ່ຍ 2.683 ໂດລາສະຫະລັດ ຫຼື ປະມານ 23 ລ້ານກີບຕໍ່ຄົນຕໍ່ປີ ອັດຕາແລກປ່ຽນເງິນກີບ ທຽບໃສ່ເງິນໂດລາສະຫະລັດ ສະເລ່ຍ 11 ເດືອນ ອ່ອນຄ່າ 1,47% ອັດຕາເງິນເຟີ້ສະເລ່ຍຢູ່ໃນລະດັບ 3% ປະລິມານເງິນ M2 ຮອດເດືອນ 11 ເພີ່ມຂຶ້ນ 16,2% ທຽບໃສ່ໄລຍະດຽວກັນຂອງປີຜ່ານມາ ຂົງເຂດວັດທະນະທຳ-ສັງຄົມ ໂດຍສະເພາະ ຂົງເຂດສຶກສາ ແລະ ກີລາ ສາທາລະນະສຸກ ສາມາດບັນລຸໄດ້ຫຼາຍຄາດໝາຍທີ່ກຳນົດໄວ້ໃນແຜນພັດທະນາ ລວມທັງຄາດໝາຍທີ່ຕິດພັນກັບເປົ້າໝາຍການພັດທະນາແບບຍືນຍົງ ນອກນີ້ ຂົງເຂດອື່ນໆ ແລະ ການຮັກສາສິ່ງແວດລ້ອມ ກໍມີຄວາມຄືບໜ້າເປັນກ້າວໆ.
ສ່ວນການຈັດຕັ້ງປະຕິບັດແຜນງົບປະມານແຫ່ງລັດ ຍັງມີຄວາມຫຍຸ້ງຍາກສົມຄວນ ໂດຍອີງຕາມການສະຫຼຸບ 11 ເດືອນຜ່ານມາ ປະຕິບັດລາຍຮັບໄດ້ 20.642 ຕື້ກີບ ເທົ່າກັບ 77,89% ຂອງແຜນການປີ ໃນນີ້ ລາຍຮັບພາຍໃນ 20.062 ຕື້ກີບ ເທົ່າກັບ 82,76% ທຽບໃສ່ໄລຍະດຽວກັນຂອງປີ 2018 ເພີ່ມຂຶ້ນ 3% ລາຍຮັບຈາກການຊ່ວຍເຫຼືອລ້າ 581 ຕື້ກີບ ເທົ່າກັບ 28,13% ສຳລັບລາຍຈ່າຍປະຕິບັດໄດ້ 23.278,47 ຕື້ກີບ ເທົ່າກັບ 69% ຂອງແຜນການປີ ຄາດຄະເນໝົດປີ 2019 ຈະປະຕິບັດລາຍຮັບງົບປະມານໄດ້ 97% ຂອງແຜນການປີ ປະຕິບັດລາຍຈ່າຍໄດ້ 98% ອີງຕາມຕົວເລກດັ່ງກ່າວ ງົບປະມານປີ 2019 ຈະຂາດດຸນບໍ່ເກີນ 7.416 ຕື້ກີບ ຫຼື ປະມານ 4,52% ຂອງ GDP ຜົນສຳເລັດອັນພົ້ນເດັ່ນອີກອັນໜຶ່ງແມ່ນທັງ 2 ຂະ ແໜງການ ໄດ້ສຸມໃສ່ສ້າງປັບປຸງນິຕິກຳ ແລະ ຜັນຂະຫຍາຍນິຕິກຳໃຕ້ກົດໝາຍຂອງຕົນ ເພື່ອເປັນບ່ອນອີງທີ່ໜັກແໜ້ນໃນການຈັດຕັ້ງປະຕິບັດວຽກງານ ແລະ ຫັນເຂົ້າສູ່ກົດໝາຍ.
ສຳລັບແຜນພັດທະນາເສດຖະກິດ-ສັງຄົມ ປີ 2020 ຈະສູ້ຊົນເຮັດໃຫ້ GDP ຂະຫຍາຍຕົວ 6,5% ຂຶ້ນໄປ ສະເລ່ຍຕໍ່ຫົວຄົນເພີ່ມຂຶ້ນເປັນ 2.733 ໂດລາສະຫະລັດ ລາຍໄດ້ແຫ່ງຊາດຕໍ່ຫົວຄົນເພີ່ມຂຶ້ນເປັນ 2.161 ໂດລາສະຫະລັດ ເອົາໃຈໃສ່ແກ້ໄຂບັນຫາສະຖຽນລະພາບເສດຖະກິດມະຫາພາກຢ່າງເປັນລະບົບຄົບຊຸດ ສືບຕໍ່ຟື້ນຟູ ແລະ ປັບປຸງພື້ນຖານໂຄງລ່າງທີ່ໄດ້ຮັບຜົນເສຍຫາຍຈາກໄພທຳມະຊາດ ໃຫ້ເຂົ້າສູ່ປົກກະຕິ ສຸມໃສ່ພັດທະນາຊົນນະບົດ ແລະ ລຶບລ້າງຄວາມທຸກຍາກ ພັດທະນາຂົງເຂດວັດທະນະທຳ-ສັງຄົມໃຫ້ມີຄວາມຄືບໜ້າດີຂຶ້ນ ສ່ວນແຜນງົບປະມານແຫ່ງລັດຈະສູ້ຊົນເກັບລາຍຮັບໃຫ້ໄດ້ 28.997 ຕື້ກີບ ເທົ່າກັບ 16,31% ຂອງ GDP ປະຕິບັດລາຍຈ່າຍ 35.693 ຕື້ກີບ ເທົ່າກັບ 20,08% ຂາດດຸນງົບປະມານ 3,77%.
（ແຫຼ່ງຂໍ້ມູນ： vientianemai.net）
