| ມະຫາວິທະຍາໄລສັບພະວິຊາຮ່າໂນ້ຍ ຢືນອັນດັບທີ 360 ໃນໂລກ ດ້ານເຕັກນິກ ແລະ ເຕັກໂນໂລຢີ | |
| ປະທານກໍາມາທິການເສດຖະກິດ ຫວຽດນາມ ຕ້ອນຮັບຄະນະປະຕິບັດງານກຳມາທິການເສດຖະກິດ, ເຕັກໂນໂລຢີ ແລະສິ່ງແວດລ້ອມລາວ |
 |
| ພາບປະກອບ ( ພາບ:vovworld.vn) |
ເພື່ອສືບຕໍ່ການປັບປຸງ ແລະ ຍົກສູງບົດບາດຂອງເຄືອຂ່າຍນັກປັນຍາຊົນໜຸ່ມ ຫວຽດນາມ ໃນທົ່ວໂລກ, ເພີ່ມທະວີການເຊື່ອມຕໍ່, ການຮ່ວມມື ແລະ ການພົບປະແລກປ່ຽນລະຫວ່າງຊາວໜຸ່ມ, ນັກປັນຍາຊົນໜຸ່ມ ຫວຽດນາມ ຢູ່ພາຍໃນປະເທດ ແລະ ຕ່າງປະເທດ, ຄະນະບໍລິຫານງານສູນກາງຄະນະຊາວໜຸ່ມກອມມູນິດ ໂຮ່ຈີມິນ ໄດ້ຈັດຕັ້ງເວທີປາໄສນັກປັນຍາຊົນໜຸ່ມທົ່ວໂລກ ຄັ້ງທີ V ໃນເດືອນ ພະຈິກ 2022.
ເວທີປາໄສປີນີ້ມີຫົວຂໍ້ວ່າ “ນັກປັນຍາຊົນໜຸ່ມຊຸກຍູ້ການນຳໃຊ້ວິທະຍາສາດ ແລະ ເຕັກໂນໂລຢີ, ປ່ຽນແປງໃໝ່ຫົວປະດິດສ້າງ, ປະກອບສ່ວນຟື້ນຟູການພັດທະນາເສດຖະກິດຂອງປະເທດພາຍຫຼັງໂລກລະບາດ” ເພື່ອປັບປຸງ ແລະ ຍົກສູງບົດບາດຂອງເຄືອຂ່າຍນັກປັນຍາຊົນໜຸ່ມຫວຽດນາມໃນທົ່ວໂລກ; ເພີ່ມທະວີການເຊື່ອມຕໍ່, ການຮ່ວມມື ແລະ ການພົບປະແລກປ່ຽນລະຫວ່າງຊາວໜຸ່ມ, ນັກປັນຍາຊົນໜຸ່ມ ຫວຽດນາມ ຢູ່ພາຍໃນປະເທດ ແລະ ຕ່າງປະເທດ.
ເວທີປາໄສມີການເຂົ້າຮ່ວມຂອງນັກປັນຍາຊົນໜຸ່ມທັງຢູ່ພາຍໃນປະເທດ ແລະ ຕ່າງປະເທດເປັນຈໍານວນ 200 ຄົນ. ບັນດາຜູ້ແທນຈະສຸມໃສ່ປຶກສາຫາລືກ່ຽວກັບ 4 ກຸ່ມຫົວຂໍ້ຄື ການສະເໜີຮູບແບບການເຕີບໂຕ, ຕິດພັນກັບການສ້າງໂຄງປະກອບເສດຖະກິດຄືນໃໝ່, ຊຸກຍູ້ການເຕີບໂຕຢ່າງວ່ອງໄວ ແລະ ຍືນຍົງ; ການວາງແຜນ ແລະ ວິທີແກ້ໄຂເພື່ອນຳໃຊ້ຢ່າງມີປະສິດທິຜົນ, ການວາງແຜນທ້ອງຖິ່ນ, ບໍລິເວນ ແລະ ປະເທດຊາດຕ້ອງປະຕິບັດຄົບຊຸດ; ເສີມຂະຫຍາຍບົດບາດຂອງນັກປັນຍາຊົນຫນຸ່ມ ຫວຽດນາມ ໃນການສ້າງພື້ນຖານວັດທະນະທໍາ ຫວຽດນາມ ທີ່ກ້າວໜ້າ, ເຊິ່ງມີສີສັນຂອງຊາດຢ່າງເຂັ້ມຂຸ້ນ, ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບໂລກ; ຍົກສູງຄວາມສາມາດໃນການປ້ອງກັນ ແລະ ຄວບຄຸມພະຍາດ, ຕິດພັນກັບການປ່ຽນແປງໃໝ່ລະບົບສາທາລະນະສຸກ.
ແຕ່ເດືອນກັນຍາ ຫາ ເດືອນຕຸລາ 2022, ຄະນະຈັດຕັ້ງຈະດໍາເນີນການສໍາມະນາຂະແໜງການທີ່ກ່ຽວຂ້ອງກັບບັນດາກຸ່ມຫົວຂໍ້ເຫຼົ່ານີ້ໃນຮູບແບບທາງໄກ.
ຫອມມາລາ
