 |
| ທ່ານລັດຖະມົນຕີການຕ່າງປະເທດ ບຸຍແທັງເຊີນ ແລະ ທ່ານລັດຖະມົນຕີການຕ່າງປະເທດ ວາງອີ (ພາບ: TTXVN) |
ທີ່ການພົບປະ, ທ່ານລັດຖະມົນຕີ ບຸຍແທັງເຊີນ ຢືນຢັນວ່າ ພັກ, ລັດ ຫວຽດນາມ ຍາມໃດກໍ່ ຖືການພົວພັນມິດຕະພາບ, ການຮ່ວມມືກັບ ຈີນ ຢ່າງສະເໝີຕົ້ນສະເໝີປາຍ, ປາດຖະໜາຢາກຊຸກຍູ້ການພົວພັນລະຫວ່າງ 2 ພັກ, 2 ລັດໃຫ້ພັດທະນາຢ່າງປອດໄສ, ໝັ້ນຄົງ, ຍາວນານ ດ້ວຍຄວາມໄວ້ເນື້ອເຊື່ອໃຈດ້ານການເມືອງທີ່ນັບມື້ນັບສູງ, ການຮ່ວມມືນັບມື້ນັບບັນລຸປະສິດທິຜົນ, ແທດຈິງ.
ທ່ານລັດຖະມົນຕີ ບຸຍແທັງເຊີນ ໄດ້ສະເໜີໃຫ້ 2 ຝ່າຍຕັ້ງໜ້າຊຸກຍູ້ບັນດາການຢ້ຽມຢາມ, ການພົບປະຂັ້ນສູງ ແລະ ທຸກຂັ້ນ; ປາດຖະໜາວ່າ ຈີນຈະສືບຕໍ່ສ້າງເງື່ອນໄຂສະດວກໃຫ້ແກ່ສິນຄ້າ, ພິເສດແມ່ນຜະລິດຕະພັນກະສິກຳ ແລະ ສິນໃນນ້ຳຂອງຫວຽດນາມ ເພື່ອສົ່ງອອກໄປຈີນ ແລະ ສິນຄ້າຫວຽດນາມ ສົ່ງອອກຜ່ານຈີນໄປປະເທດທີ 3; ສະເໜີໃຫ້ສອງຝ່າຍຮັກສາການສົມທົບກັນຢ່າງແໜ້ນແຟ້ນໃນການປ້ອງກັນ ແລະ ຄວບຄຸມໂລກລະບາດໂຄວິດ-19, ຊຸກຍູ້ການຟື້ນຟູຖ້ຽວບິນການຄ້າລະຫວ່າງສອງປະເທດໂດຍໄວ, ເລັ່ງການເຊື່ອມຈອດພື້ນຖານໂຄງລ່າງຄົມມະນາຄົມທາງບົກ ແລະ ທາງລົດໄຟຢູ່ເຂດຊາຍແດນເພື່ອອຳນວຍຄວາມສະດວກໃຫ້ແກ່ການໄປມາຫາສູ່ກັນຂອງປະຊາຊົນ.
ທ່ານລັດຖະມົນຕີການຕ່າງປະເທດຈີນ ວາງອີ ຢືນຢັນວ່າ ພັກ ແລະ ລັດຖະບານຈີນ ເອົາໃຈໃສ່ເປັນສຳຄັນການຮັດແໜ້ນ ແລະ ພັດທະນາການພົວພັນຄູ່ຮ່ວມມືຍຸດທະສາດຮອບດ້ານຈີນ-ຫວຽດນາມ; ປາດຖະໜາຢາກພ້ອມກັບຫວຽດນາມ ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ລົງເລິກການຮ່ວມມືເພື່ອຜົນປະໂຫຍດຂອງສອງປະເທດ, ແກ້ໄຂຄວາມຂັດແຍ່ງກັນຢ່າງເໝາະສົມ, ເຮັດໃຫ້ການພົວພັນລະຫວ່າງ 2 ພັກ ແລະ 2 ປະເທດພັດທະນາຢ່າງບໍ່ຢຸດຢັ້ງ, ໝັ້ນຄົງ ແລະ ມີຜົນປະໂຫຍດທີ່ແທດຈິງໃຫ້ແກ່ 2 ປະເທດ ແລະ ປະຊາຊົນຂອງສອງປະເທດ; ຢືນຢັນວ່າ, ຈີນຍິນດີສົມທົບກັນຊຸກຍູ້ການພົວພັນແລກປ່ຽນ ແລະ ການຮ່ວມມືລະຫວ່າງສອງປະເທດໃນໄລຍະຈະມາເຖິງໂດຍຜ່ານຫຼາຍຮູບຫຼາຍແບບ; ຈີນສະໜັບສະໜູນການເປີດກວ້າງຕະຫຼາດການນຳເຂົ້າສິນຄ້າຄຸນນະພາບສູງຂອງບັນດາປະເທດໃນພາກພື້ນ, ພິເສດແມ່ນປະເທດອາຊຽນ; ຖືເປັນສຳຄັນບົດບາດຂອງຫວຽດນາມໃນຕ່ອງໂສ້ການສະໜອງທົ່ວໂລກ, ປາດຖະໜາຢາກສົມທົບກັບ ຫວຽດນາມ ໃນການຮ່ວມມືດ້ານເສດຖະກິດ, ການຄ້າ ແລະ ການລົງທຶນ, ຮັບປະກັນສະຖຽນລະພາບຂອງຕ່ອງໂສ້ການສະໜອງທົ່ວໂລກ.
ກ່ຽວກັບບັນຫາທະເລຕາເວັນອອກ, ທ່ານລັດຖະມົນຕີ ບຸຍແທັງເຊີນ ສະເໜີໃຫ້ 2 ຝ່າຍສືບຕໍ່ປະຕິບັດບັນດາຂໍ້ຕົກລົງ ແລະ ຄວາມຮັບຮູ້ລວມຂັ້ນສູງ, ເຄົາລົບຜົນປະໂຫຍດຢ່າງຊອບທຳ, ຖືກຕ້ອງຕາມກົດໝາຍຂອງກັນ ສອດຄ່ອງກັບກົດໝາຍສາກົນ, ໃນນັ້ນມີກົດບັດສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982, ປະຕິບັດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ, ມີປະສິດທິຜົນ ແລະ ສູ້ຊົນບັນລຸກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC) ຢ່າງແທດຈິງ, ມີປະສິດທິພາບ, ສອດຄ່ອງກັບກົດໝາຍສາກົນ; ພ້ອມກັນຮັກສາສັນຕິພາບ, ສະຖຽນລະພາບຢູ່ທະເລຕາເວັນອອກ.
ໄຊພອນ
