 |
| ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດໄທ Don Pramudwinai. (ພາບ: diendandoanhnghiep.vn) |
ເນື່ອງໃນໂອກາດຢ້ຽມຢາມ ແລະ ເຂົ້າຮ່ວມກອງປະຊຸມສຸດຍອດແມ່ຍິງໂລກ 2022 ຢູ່ບາງກອກ (ໄທ), ວັນທີ 23 ມິຖຸນາ, ທ່ານນາງຮອງປະທານປະເທດ ຫວູທິແອງຊວນ ໄດ້ເຂົ້າຮ່ວມເວທີປາໄສວິສາຫະກິດ ຫວຽດນາມ - ໄທ ໂດຍກະຊວງແຜນການ ແລະ ການລົງທຶນ, ສະຫະພັນອຸດສາຫະກຳການຄ້າຫວຽດນາມ ສົມທົບກັບຄະນະກຳມະການການຄ້າໄທ ແລະ ສະພາວິສາຫະກິດ ໄທ - ຫວຽດນາມ ຈັດຕັ້ງ.
ກ່າວຄຳເຫັນທີ່ເວທີປາໄສ, ທ່ານນາງຮອງປະທານປະເທດ ຫວໍທິແອັງຊວັນ ເນັ້ນໜັກວ່າ: ໄທ ແມ່ນຄູ່ຮ່ວມມືການຄ້າໃຫຍ່ທີ່ສຸດຂອງ ຫວຽດນາມ ໃນ ອາຊຽນ; ເຖິງຢ່າງໃດກໍ່ຕາມ, ຄວາມດຸ່ນດ່ຽງດ້ານການລົງທຶນ ແລະ ການຄ້າລະຫວ່າງສອງປະເທດຍັງບໍ່ສົມກັບຄວາມສາມາດບົ່ມຊ້ອນຂອງແຕ່ລະຝ່າຍ.
ຫວຽດນາມ ຍາມໃດກໍ່ຖືເປັນສຳຄັນ ແລະ ປາດຖະໜາຢາກເພີ່ມທະວີການພົວພັນຄູ່ຮ່ວມມືຍຸດທະສາດກັບໄທ. ຫວຽດນາມ ຊົມເຊີຍ ແລະ ສ້າງເງື່ອນໄຂສະດວກໃຫ້ບັນດາວິສາຫະກິດ ໄທ ມາລົງທຶນ ແລະ ດຳເນີນທຸລະກິດຢູ່ ຫວຽດນາມ ໃນບັນດາຂົງເຂດທີ່ໄທ ມີທ່າແຮງ ແລະ ຫວຽດນາມ ມີຄວາມສາມາດບົ່ມຊ້ອນ
ທ່ານນາງຮອງປະທານປະເທດ ຫວໍທິແອັງຊວັນ ເຊື່ອໝັ້ນວ່າ ດ້ວຍການເຂົ້າຮ່ວມຂອງ ວິສາຫະກິດ 100 ແຫ່ງຂອງທັງສອງຝ່າຍທີ່ເວທີປາໄສ, ວິສາຫະກິດ ແລະ ນັກທຸລະກິດຂອງ 2 ປະເທດຈະໝູນໃຊ້ກາລະໂອກາດໃຫ້ດີທີ່ສຸດເພື່ອຫັນ “ຄວາມສາມາດບົ່ມຊ້ອນ” ກາຍເປັນ “ການປະຕິບັດ”, ປະກອບສ່ວນຊຸກຍູ້ການເສດຖະກິດການຄ້າ, ການລົງທຶນລະຫວ່າງ ຫວຽດນາມ ແລະ ໄທ.
ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດໄທ Don Pramudwinai ໄດ້ສະເໜີຍຸດທະສາດເຊື່ອມຈອດ 3 ພາກພື້ນ ເພື່ອແນໃສ່ຊຸກຍູ້ການເຊື່ອມຕໍ່ລະຫວ່າງ ໄທ ແລະ ຫວຽດນາມ, ຊ່ວຍສ້າງສະພາບແວດລ້ອມແຫ່ງການດຳເນີນທຸລະກິດ, ການລົງທຶນ ແລະ ພັດທະນາເສດຖະກິດທີ່ເຂັ້ມແຂງ ແລະ ຍືນຍົງ. ສາມຂົງເຂດດັ່ງກ່າວລວມມີການເຊື່ອມຕໍ່ຕ່ອງໂສ້ມູນຄ່າ, ການເຊື່ອມຕໍ່ພື້ນຖານເສດຖະກິດ ແລະ ການເຊື່ອມຕໍ່ຍຸດທະສາດການເຕີບໂຕແບບຍືນຍົງ. ຍຸດທະສາດການເຊື່ອມຈອດນີ້ຈະຊ່ວຍໃຫ້ວິສາຫະກິດຂອງທັງສອງປະເທດນຳໃຊ້ບັນດາກາລະໂອກາດ ແລະ ຄວາມສາມາດບົ່ມຊ້ອນຂອງສອງປະເທດ ແລະ ເພີ່ມທະວີການພົວພັນຮ່ວມມືຍຸດທະສາດລະຫວ່າງ ຫວຽດນາມ ແລະ ໄທ.
ເນື່ອງໃນໂອກາດນີ້, ທ່ານນາງຮອງປະທານປະເທດ ຫວໍທິແອັງຊວັນ ແລະ ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ໄທ Don Pramudwinai ໄດ້ເປັນສັກຂີພິຍານພິທີລົງນາມໃນບົດບັນທຶກຊ່ວຍຈຳ (MoU) ລະຫວ່າງວິສາຫະກິດ ຫວຽດນາມ ແລະ ໄທ.
ບຸນຄົງ
